(編註)
1. 原post link於此, 誠意鼓勵大家推推post
2. 為利於閱讀, 現只留有心回覆
3. 就史料爭拗卻未見詳盡觀點者亦刪去
4. 回應本blog初衷, 所有圖片均未有include
5. 引用內容以”/”標示
6. 內容太多, 呢邊會分開幾個post
7. 部分引用時事講笑(以”*”標示),編者會盡量加返註解係段尾
致敬 科學怪人巴打 & 所有推post巴打 @LiHKG
(/編註)
Index:
32. 啟德機場落成/#469
33. 講下早年香港既貨幣政策/#496
34. 中國打抗日戰爭時期既香港週邊環境/#530
35. 日本攻港18日戰爭/#563
36. 日佔期間發行軍票/#573
37. 日治期間既「歸鄉運動」/#579
#469科學怪人
32. 啟德機場落成
咁之前就有提過創辦雅麗氏醫院既華人精英何啟，佢同金蛉一樣都可以話係百足咁多爪。佢同區德合作，打算喺九龍灣一帶進行填海計劃，之後起屋解決到華人居住問題之餘又有錢賺
何啟喺1914年7月去世，區德就繼承佢既遺志，搵大家個名各取一字成立「啟德營業有限公司」，同香港政府傾掂工程條款之後終於可以喺1917年開始填海
1920年，啟德公司完成咗第一期填海工程，而新既填海區就被命名為啟德濱
後來因為省港大罷工，加上中國同日本空軍都急速發展，對香港既空中防衛構成威脅，1925年香港政府已經認為香港應該要有一個機場
1926年，咁啱啟德公司又出現財困，加上新填海地係興建機場既一個合適地點，港督金文泰就向英國建議興建機場，並且預計要100萬港元買咗啟德公司既170公頃填海土地，另外要73萬8千完成剩低既填海工程，仲有27萬5千作為工程開支
只不過香港喺經過省港大罷工之後，貿易活動並未完全恢復，亦都已經向英國借咗150萬。所以香港需要得到英國既同意(借款)先至可以落實計劃
對於起機場，英國軍方係同意既，空軍部備忘錄都提到香港機場喺戰時既功能:
1. 抵禦敵方從空中同海路既襲擊
2. 為艦上航空隊(航母上既飛機)提供岸上設施
3. 為皇家陸軍防衛提供空中支援
4. 為駐守既皇家空軍提供設備，以便針對中國既行動
但係英國時任財政大臣邱吉爾就質疑香港起機場既逼切性，英國殖民地部就唯有建議先由英國空軍部撥款負擔一半開支。只不過因為英國政府內部態度冷淡，撥款既問題一拖再拖，拖到去1929年，機場既籌備預算已經升到270萬，但最終香港政府只係爭取到99萬撥款，其餘款項由港府承擔
1930年，以啟德濱命名既啟德機場基本落成，但係當時就只有簡陋既空軍機棚，而機場都只有半沙半土既平地可以起飛，並未有水泥鋪設既跑道同滑行道，都好過無，粗粗地用住先
#490張繼聰相繼失聰
/2. 台灣反清，香港當災、因禍得福？/
遷界令咁大陣象都做得出，所涉及嘅範圍同人口咁廣泛，流離失所死幾多人，完全當人民係賤過地底泥
原來錦田書屋同遷界令好有淵源
因為遷界令使石屋荒廢多年，就形成今日我地睇到老榕樹將小石屋吞噬嘅奇景
1841前、後既事件都係成個香港歷史脈絡之一，不可分割，只係後期事件係更直接影響住香港史嘅發展
我覺得好似樓主咁先基本了解早期背景（間接關係），到介紹後期歷史（直接關係）時，理解會更完整
#496科學怪人
33. 講下早年香港既貨幣政策
依個話題首先要講少少基本知識:
銀本位制度係一種以銀金屬作為貨幣系統既標準。大致可以係:
1. 直接鑄造銀幣
2. 按照銀金屬儲備量發佈紙幣(鈔票)
講返轉頭，喺1842年香港開埠果陣並未有自己既貨幣，當時西班牙銀元、墨西哥鷹洋、盧比銀洋同中國銀錠、銅錢都被承認作為香港既標準貨幣。自由流通既一個壞處就係偽幣充斥，於是1845年5月香港政府決定將比較有信心既英國既金銀銅幣都加入成為流通貨幣
香港政府曾經嘗試推出英鎊作為法定貨幣，不過並無強制執行同禁止其他貨幣。民間同中國既交易依然都係用白銀、銅錢，甚至連政府收地租都容許採用白銀
一路等到1864年，香港政府決定鑄造「香港」字樣既硬幣，即係史上第一代既港元。可惜因爲中國同東南亞仍然廣泛用緊墨西哥鷹洋同中國銀錠，港元並唔受歡迎，所以香港造幣廠喺鑄造200萬個銀幣之後就執笠收皮
1895年，英國政府授權印度鑄造另一種銀元，叫做「香港銀元」，跟返墨西哥鷹洋既標準嚟做。另一方面，香港政府授權滙豐銀行作為發鈔銀行，不過發行既條件係要儲備相應數量既銀金屬作為保證，開始正式採取銀本位制度
其實因為中國仍然係採用白銀，而香港作為華南貿易既樞紐，所以當時用銀本位係理所當然
但係喺第一次世界大戰之後，歐洲戰敗國出售大量白銀繳付賠款，令到國際白銀價格不斷下跌。1925年白銀每盎司69美仙，去到1932年跌到得28美仙。銀行實在唔願意買入白銀嚟發行港元，因為銀價不停跌就即係代表佢既資產會貶值。
咁當年美國就有7個生產白銀既州份，總統同國會為咗選票唔能夠畀白銀跌落去。1934年6月，美國開始不斷買入白銀搶貴佢，令到中國白銀大量外流
1934年10月，中國政府調升白銀出口稅到10%，但都阻止唔到外流，更加促進咗白銀走私
物極必反，咁樣就調返轉出現通縮既問題，出現物價下跌、經濟不景。即使禁止白銀出口都解決唔到問題，中國決定宣佈放棄銀本位制度，而且規定一切公私流通都唔畀再用
中國係香港主要既貿易夥伴，所以香港都跟隨廢除銀本位
喺1935年，新條例規定滙豐、渣打、有利成為三家發鈔銀行。佢地要發鈔就要按一英鎊兌16港元既匯率，以等值既英鎊繳付畀香港政府成立既外匯基金作為保證
即係 英鎊本位
#497科學怪人
/遷界令咁大陣象都做得出，所涉及嘅範圍同人口咁廣泛，流離失所死幾多人，完全當人民係賤過地底泥/
果時邊有咁多人權
#499張繼聰相繼失聰2 日前
我都認同研究歷史一定要參考超過一個source ，始終求證事實係研究歷史嘅重要原則
但我諗如果執著到對每個細節去作絕對嘅真實求證、要求對每項歷史事件都必須鑽研過3、4本書先有資格攞出黎討論的話，咁呢度99%學術post都應該摺埋，改返做吹水5P台俾人9up下就好了，我地都少左個機會探索香港掌故
樓主都講明目的只係用生動有趣味既overview 去引起我地呢啲販夫走卒重拾認識香港歷史嘅興趣，咁已經好有益，如果邊個有興趣進一步探討，可自行參考多啲其他書籍達到增益作用
#506颱風快啲嚟
/以我所知
果陣未有香港既概念，都係一個個細地方，各自有名
清朝先至劃分為新安縣（包今日既深圳市）
宋「首都」果忽當時叫官富場/
官富場唔係觀塘咩？
#517科學怪人
/官富場唔係觀塘咩？/
應該咁講
官富場其實尖沙咀到茶果嶺都係
包埋觀塘
不過關於宋帝果part 係土瓜灣果頭
#519懵懂
留意
英國陸軍與英國皇家海軍和英國皇家空軍不同，沒有「皇家」頭銜，原因是英國內戰期間在英國君主與英國國會的一系列鬥爭中英國陸軍總是站在英國國會一邊[2]，並且根據英國國會在1689年通過的《權利法案》中的規定「和平時期未經議會同意國王不得維持常備軍」，英國陸軍在法律上並不屬於王室管轄。不過儘管英國陸軍沒有皇家頭銜，這並不妨礙在陸軍有若干團（Regiments）使用「皇家」此一頭銜。
#530科學怪人
34. 中國打抗日戰爭時期既香港週邊環境
自從1937年蘆溝橋事變之後，中日戰爭全面爆發。英國當時既處境其實非常老尷:
1. 如果放任唔理既話，日商就會取代英商得到中國既貿易利權，影響到英國既經濟利益
2. 如果明幫中國既話，會觸怒日本，日本就可能進攻英國喺中國既租界。當時英國喺遠東既兵力唔足以抗衡日本
英國就要諗一個既可以支援中國抗戰，又唔會激親日本既做法。就係喺道義上支持中國抗戰，並且提供有限度既物資支援。即係所謂既「慈善中立」
當時中國沿海既工廠幾乎盡失，要抗戰既話，就只可以依靠外國進口。香港實際上成為進口既唯一途徑
喺1937年香港既火車已經可以直接運輸軍用物資去武漢，以供應量計既排名係:
1. 德國: 主要供應槍同炮彈
2. 美國: 飛機設備
3. 英國: 同美國
日本駐港領事就出口術，話如果英國容許大量武器炮彈，尤其是防空炮經香港運去中國既話就會炸毀九廣鐵路華段
不過護督史美就無畀佢大到，向英國殖民地部建議拒絕日本仔對華實施武器禁運既請求。佢覺得咁做同幫日本仔無分別，亦都影響英國既中立
咁蘿蔔頭就喺10月真係坐言起行，開始炸九廣鐵路華段。不過當時轟炸機既效率並唔高，加上管理鐵路當局不斷搶修鐵路，火車運輸並無受到太大影響
11月，中國從英國購買既9架飛機運到香港，當時英國駐日大使就建議拖延飛機付運以免觸怒日本，但係英國外交部就ban咗，認為無禁運令就要如期送貨
對於依個舉動，日本仔喺12月就以派出更加多既空軍轟炸九廣鐵路華段，令到早上到中午既列車被迫停止，但不停搶修之下都只係中斷7日半
去到1938年10月，廣州終於淪陷，九廣鐵路唔可以再用嚟運貨。不過九廣鐵路為中國爭取足夠既時間起成滇緬公路，令到中國可以繼續有進口物資抗戰
咁喺1941年5月，宋慶齡發起一碗飯運動，邀請香港既酒樓東主參加
計劃詳情係酒樓、飯店會代為推銷飯券，每張兩蚊，用喺救援傷兵方面，購買者都可以去任何一間參加既酒樓度食一碗炒飯。至於炒飯既成本可以由酒樓捐出，或者向國母claim 返每碗兩毫子（實際上絕大多數酒樓都唔Care 成本，五行商會決定收返，結果會被民間批評發國難財）
難得既係，當時既港督羅富國都表態支持一碗飯運動，認為香港人應該援助同胞，某程度上體現香港華人對於英國同中國既雙重忠誠係得到官方認可
除此之外，香港亦都有唔少其他捐款、戲劇同音樂劇既義演
#539科學怪人
/巴打講完香港會唔會講下二戰 /
會，但依個post主要都係講香港史
所以討論會係圍繞香港抗日戰爭、日治同二戰後交接之類
/巴打會否介紹香港戰後發展，暴動，工業、經濟轉型歷史？/
會，不過未講到
#552毒撚研究所所長
/(reply to 盆菜話題) 不過當時d 平民唔驚元朝秋後算賬真係好堅/
驚乜 覆巢之下無完卵 元人都唔當南人係人
#555CanaryWharf
/34. 中國打抗日戰爭時期既香港週邊環境/
有個問題想問
德國同日本唔係軸心國同盟黎咩？點解德國會供應軍事用品俾民國？
#556科學怪人
/德國同日本唔係軸心國同盟黎咩？點解德國會供應軍事用品俾民國？ /
在商言商，肯畀錢唔單止軍事用品，當時德國仲有派軍事顧問去中國
國民政府亦有德械部隊
至於Axis要去到1940年9月至成立
之後喺日本抗議之下，德國先至撤走軍事顧問
#560SUV
德國同國民黨合作開的
蔣經國佢地都去過德國train﹐甚至果時考慮過唔同日本結盟，轉同國民黨結盟
果時德國都拖到冇得拖，先停止支援
#563科學怪人
35. 日本攻港18日戰爭
香港一直都係中國由外面輸入軍用物資抗戰既重要通道，自然成為日本既眼中釘。日軍定下咗「大東亞聖戰」計劃，其中C 行動（香港）、E 行動（馬來亞）同Z 行動（珍珠港）需要同步進行。
而早喺1935年，日本已經開始為進攻香港做準備，首先搵咗日本商船徵集香港海岸既資訊，作為未來日本軍艦從海路進攻既參考
1939年，日本特務山頭滿組織第五縱隊喺汕頭成立指揮所，並且喺香港設立支部。支部召集咗黑社會洪門、和勝和、致公堂等，以及廣東省既流氓過萬人，分別喺港島同九龍成立「天組」同「佑組」，等佢地可以喺日軍攻港果陣擾亂英軍後方
咁英國當然都知道日本仔既陰謀啦，但係當時英軍既主力都喺歐洲戰場，實在抽唔到嚟增援香港。至於美國總統羅斯福本來都想派兵協防香港，但係受到當時國會既限制所以唔能夠成事。
於是英國就喺1941年搵咗2000加拿大兵到香港協防。加拿大依個身份好重要亦都喺理論上好有阻嚇作用，佢係英聯邦成員自然會幫手，而且佢同美國簽咗盟約。即係話，如果日本敢郁香港，加拿大同美國都會同時有借口對日本宣戰。
不過阻嚇都真係理論上，上面都講過日本其實已經打算偷襲珍珠港，又點可能俾面加拿大呢？所以香港場仗就一定打硬
咁就大概講下雙方軍力先：
人數
日軍負責進攻香港既係第23軍司令酒井隆中將，軍隊加支援部隊約6萬人；英軍只有果2000加拿大兵、義勇軍、印度兵同英兵各兩營，加上支援部隊約13000人
海空裝備
日軍有「五十鈴」號巡洋艦、3艘驅逐艦、40架轟炸戰鬥機；英軍只有8艘魚雷艇同4艘炮艇(d艦都已經去哂新加坡護航)、5架舊式戰機
防守裝備
新界同九龍有155座槍堡、港島有80座，不過早喺1941年2月，全部既位置已經被日本偵察機探知
基本上雙方實力懸殊，未打都已經知道結果。不過喺開打之後，當時既英國首相邱吉爾發電報畀楊慕琦：「須準備逐屋而戰，寸土必爭。多守一天，聯軍即多得一天的助力，汝等亦必有永存之功名」
1941年12月5日，6萬日軍喺距離深圳河只有8里既地方集結，不過要等到12月8日(香港時間凌晨4點45分)先至向英、美宣戰
現代打仗第一件事就係要先爭奪制空權，上午8點日軍36架戰機空襲啟德機場，喺5分鐘之內機場內既5架英軍戰機同8架民航機都被炸毀。之後日本空軍再炸毀深水埗同昂船洲既炮台
除此之外，日軍飛機仲散發英、中、印文傳單，分別勸英兵投降、勸華人合作驅逐英國人同勸印度人倒戈爭取自立
而喺陸戰方面，早上9點日軍步兵第38師團分3翼越過中港邊境，不過喺過境果陣唔見有任何守軍。日軍都好小心咁慢慢前進，反而令到守軍工兵有時間炸毀九廣鐵路、羅湖橋同大埔公路，減慢大隊日軍南下既速度
咁喺12月8日當晚，潛伏喺香港既「第五縱隊」周圍製造混亂，縱火燃燒氣油站、糧米店、破壞香港當局徵召既運輸車輛同搶掠補給物資；佢地更加喺九龍最高既半島酒店掛起日本太陽旗。不過駐香港既國民黨將領陳策組織1既維持治安隊出現，第五縱隊既行動先至收儉
去到12月9日既下午，日軍到達城門水塘以北，威脅英軍喺九龍既主要防線 – 城門醉酒灣防線。喺日軍夜襲之下香港城門水塘陣地失守，加拿大營長Johnson更加被俘，英軍退守到南邊既金山地帶
12月10日，英國遠東海軍主力「威爾斯王子號」、巡洋艦「卻敵號」喺新加坡被日軍擊沉，所以無辦法增援到香港
11日金山失守，喺中午港督楊慕琦下令所有喺九龍既英軍撤去港島。當時國民黨將領陳策手下500名國軍稍為擊退喺城門防線既日軍，唔見英國增援先至唯有撤退
去到12月16日，日軍正式進入九龍市區，仲逼市民懸掛太陽旗歡迎佢地入城。之後日軍不斷從九龍對岸炮擊港島同進行空襲。
17日，日軍派人去港島招降，不過被楊慕琦拒絕，並且叫佢唔需要再提出投降一事
之後日本加強炮轟，西環海旁貨倉、灣仔海軍船塢、北角發電廠同油庫都中彈，發生大火。日軍喺大火濃煙既掩護下派出8000人登陸港島。
19日下午，日軍搶佔港島東面既渣甸山、畢拿山、柏架山一帶，並且喺20日攻佔香港最大既大潭水塘。依個時候香港既食水供應被截斷，基本上敗局已定。
去到24日英國駐港三軍司令向楊慕琦表示戰局已經無法挽回，再打就只會犧牲更多既性命，不過楊慕琦收到佢老細邱吉爾既order 當然想繼續堅持多一陣。另外陳策要求香港發放槍械比國軍1000人既敢死隊協助英軍，不過港督決定拒絕。
25日聖誕節，日軍脅迫被俘虜既立法局議員Shields 向港督勸降，再一次被拒絕。於是日軍即刻加強炮轟，三軍司令再一次向港督表示槍堡盡失兼無險可守，無辦法再打落去。
最後喺25日晚上6點，楊慕琦去咗日軍位於尖沙咀半島酒店既臨時司令部，喺酒井隆面前簽署投降文書，結束咗香港18日保衛戰。香港失陷之後陳策帶領英國軍官逃離香港去到中國。
#564目黑
陳策係邊個黎？
#565科學怪人
/陳策係邊個黎？ /
https://zh.m.wikipedia.org/wiki/陳策_(民國)
關於佢，Wiki 好詳盡
簡單講就係廣州失陷之後
國民黨將領陳策走難落香港
亦都成為國民政府喺香港既代理人
#567幽默感勉強唔黎
其實香港咁少兵都頂到咁耐算係咁
可惜港共政府完全無視呢班有份保衛香港既英烈
#568科學怪人
自古敗軍不言勇
中國歷史上從來都無當權者會認同雖敗猶榮依回事
#569羅拔皮利斯
個人覺得曉士兵團係香港保衛戰入面提得最少但又最受人尊敬
同埋其實班加拿大兵真係送嚟香港受死,無乜經驗就要咁遠過嚟打仗,依家黃泥涌峽道五方路嗰個位置種咗啲楓樹可能係為咗紀念佢地
#570科學怪人
曉士兵團個個都係外籍有錢佬
其實佢地大可以攞住舊錢離開香港
但佢地選擇堅守
#573科學怪人
36. 日佔期間發行軍票
日軍佔領香港之後，為咗完成大東亞戰爭，要諗計搜刮香港市民手上既港元資產
當時香港雖然係地方細小，但係英國管治下，憑住免稅、完善既法律同對私有財產既保護制度，擁有唔少金融資產。日本仔就諗到發行軍票嚟換取大量港元，並且繼續喺港幣依然通行既其他地方採購物資
咁軍票就唔需要有發行既準備金，而且印製既數目不限，所以係會引起嚴重既通貨膨脹
去到1942年7月24日，香港佔領地總督磯谷廉介發佈規程，規定香港只可以使用港幣同埋指定軍票:
1. 香港市民可用每4元港幣兌換1元軍票
2. 市民向日治政府繳付租稅同費用，必須用軍票結算
3. 只有不超過50元既其他收支仍然可以用港幣結算
由於當時謠傳軍票兌換匯率會進一步攀升，所以好多市民都拿拿聲兌換
另外日軍仲逼滙豐銀行簽發1.198億既港元紙幣，以便喺澳門搜購物資
去到1943年7月24，日治政府索性禁止港幣流通。日軍會負責搜查，如果發現有市民私下收埋港幣，會判佢地毒打、灌水等既酷刑，當時有唔少市民因為抵受唔住而死亡
日本喺香港發行近20億元既軍票，令到香港既物價飛漲，白米同食油價錢喺1941年9月到1943年5月之間分別升咗10同15倍
日本軍票喺戰後即時作廢，令到大量手持軍票既市民血本無歸。香港市民多年嚟向日本政府追討損失，但就被日方以1951年《舊金山和約》當中，英、日兩國同意唔會再索償為由而拒絕
#578懵懂
/1. 德國: 主要供應槍同炮彈/
德國都有幫中國？
估唔到喎！
#579科學怪人
37. 日治期間既「歸鄉運動」
香港雖然有錢，但都有一個問題，就係地小人多，喺1941年已經有160萬人。香港既耕地好少，無辦法生產到可以供應全港市民所需既糧食
當時日本對於香港既策略係掠水，當然唔係想搞掂咁多香港市民既糧食問題，於是佢地就諗到歸鄉運動
喺香港軍政廳成立初期，日本當局喺德輔道中成立「歸鄉指導事務所」，勸d 香港華人返鄉下，即係由得佢走咗自生自滅，無眼屎乾淨
1942年1月6日，軍政廳更加下令無工作同居所既華人離開香港，仲喺街上貼大海報，海報上寫住: 「田園將蕪，胡不歸？」為咗吸引市民返去廣東，日本當局仲懶貼心咁免費派船送佢離開，並且指定石塘咀既金陵、廣州同陶園三大酒家作為歸鄉市民既「宿泊所」，方便佢地喺陶園對面既碼頭搭船走
如果市民申請由海路走既話，要有一張近照同日治政府發畀每户既白米配給票嚟識別身分，並且申請歸鄉申告書。當局核實申請者既身分之後，就會喺申告書上面吸印，並且會收返申請人手持既米票。之後申請者可以領取歸鄉證明書，而每名歸鄉者最多只可以攞兩件行李、要打霍亂針同埋唔畀帶走港幣
之後市民會一直喺宿泊所度等待每1到2日先至有一班既歸鄉船離開，但過程中每人每日只係可以獲得以「六両四」既標準分到糧食，所以其實都好肚餓
至於經陸路歸鄉都得，簡單d。市民可以經青山道步行去元朗，再返深圳。然後廣州偽政府會派出招待員喺深圳「接待」佢地，之後就會安排佢地從唔同既途徑返廣州
除咗正式既歸鄉運動之外，仲有好多香港市民係自己逃走。因為日軍除咗搞到香港民不聊生，仲喺佔領期間仲有做出虐殺平民同強姦婦女既暴行。除此之外，d人都驚經由認可既方法離開沿路會受到日本憲兵既搜查同苛索
而逃走既人就主要有3條路線:
1. 坐漁船同舢舨到澳門，再坐輪船去廣州灣
2. 喺油麻地碼頭坐船返廣州
3. 坐小船經廣州灣去廣西桂林
因為歸鄉運動、各種既逃離同屠殺，香港由戰前既160萬人跌至戰後得返60萬人