(編註)
1. 原post link於此, 誠意鼓勵大家推推post
2. 為利於閱讀, 現只留有心回覆
3. 就史料爭拗卻未見詳盡觀點者亦刪去
4. 回應本blog初衷, 所有圖片均未有include
5. 引用內容以”/”標示
6. 內容太多, 呢邊會分開幾個post
7. 部分引用時事講笑(以”*”標示),編者會盡量加返註解係段尾
致敬 科學怪人巴打 & 所有推post巴打 @LiHKG
(/編註)
Index:
56. 中英政府就香港問題既談判/#851
57. 八九學運、六四事件下既香港/#860
58. 九龍城寨清拆/#893
59. 香港新機場、回歸前十大基建/#905
特別篇. CCTVB(應絲打要求講下特別電視廣播)/#924
60. 香港特別行政區成立/#934
61. 亞洲金融風暴/#968
62. 勿摸活家禽/#982
#851科學怪人
56. 中英政府就香港問題既談判
根據展拓香港界址專條，新界既租約去到1997就會屆滿，即係話有朝一日新界既土地契約問題就會橫跨97年，所以1979年港督麥理浩到訪北京諗住試下水溫
鄧小平首先詢問關於香港既基本情況，之後就強調香港主權屬於中國，一定要歸還，並且保證香港可以喺下世紀初繼續奉行資本主義，唔會因為收回主權問題影響投資者既利益。當時實際上即係提出咗以一國兩制既方法去解決香港問題
1981年，中國單方面訂立咗具體既方案，成為咗日後中英聯合聲明既框架:
1. 香港要喺1997年7月1日回歸
2. 回歸後成為特別行政區、高度自治
3. 保留自由港同金融中心地位
4. 行政長官由香港人擔任、中央任命
5. 現行社會、經濟制度、生活方式不變
6. 私人財產受到保障
7. 外國投資不受侵犯
8. 港幣地位同香港原有法律基本不變
1982年3月鄧小平再接見港大校長同香港工商各界人士，強調十六字方針:「收回主權，制度不變，港人治港，保持繁榮」
趙紫陽解釋得再生動少少: 「馬照跑，舞照跳，股照炒」
就喺果陣，英國首相戴卓爾夫人下令派兵去福克蘭群島攻擊侵入既阿根廷軍隊。英國前首相希思對於維護香港主權就認為唔可以類比，佢覺得英國對福克蘭係有主權，所以一定要竭力保衛；不過對香港就冇主權，得暫時既治權，只能夠盡力管治
9月22日戴卓爾夫人正式去北京同中共傾香港問題，佢指出中方需要考慮香港既主權同繁榮，香港繁榮取決於商人對英國管治既信心，突然之間攞返會搞到企業撤資，所以唔急得。不過趙紫陽就強硬咁重申中共唔承認三個不平等條約，如果真要喺主權同繁榮二選一，中國一定會揀主權；鄧小平就認為中國必須喺1997年收返港九新界全地區，更加話自己唔係李鴻章，即係主權方面無得傾，唯一可以傾既只有過渡安排
為咗逼使中共讓步，英方決定打經濟牌玩自殘，等中國知道英國係可以影響到香港經濟。1983年9月，英資財團喺倫敦大量拋售港元，令到港元匯價持續下跌同做成通脹，搞到當時恒指跌咗成一半同揪起香港市民搶購日用品。不過中國採取WFC既態度，喺港元持續疲弱太過影響在港英資財團既利益之下，香港唯有透過實行美元聯繫匯率制度搞返掂壇戲，所以經濟牌失敗告終
經過兩年一共22輪既談判，根據返之前中方聲明既框架下落實咗中英聯合聲明，正式確認香港會喺1997年7月1日回歸
#852浪子回頭
係主權移交，字都用錯
#853科學怪人
/係主權移交，字都用錯 /
的確香港問題 表達得唔夠具體小弟會注意
#854目黑
記得睇過啲資料話英國政府有打算名義上將香港歸還中國，但係就實際管治香港
#855科學怪人
/記得睇過啲資料話英國政府有打算名義上將香港歸還中國，但係就實際管治香港 /
所有實際影響中國主權同治權既方案，鄧小平都唔會認可
#856浪子回頭
/記得睇過啲資料話英國政府有打算名義上將香港歸還中國，但係就實際管治香港 /
主權換治權麻，中共都係唔肯
#857科學怪人
/主權換治權麻，中共都係唔肯/
英國無乜可能好似打阿根廷咁輕易喺軍事上打爆中共，基本上係佢話點就點
#860科學怪人
57. 八九學運、六四事件下既香港
1989年4月15日，被認為思想開放既前中共總書記胡耀邦逝世，引發北京市民同學生自發悼念活動，甚至乘機提出反貪污等要求既遊行示威活動，並且逐漸蔓延到中國各大城市。4月27日，約20萬北京大學生為主既市民衝破封鎖線，遊行到天安門廣場向當局表達訴求，仲成立咗聯會統籌學運
5月1日，聯會以「為民主而奮鬥既首都大學生」名義，撰寫《告香港同胞書》，解釋學運係為咗加快北京既政治同經濟改革步伐，希望喺香港回歸之前可以取得一定進展，呼籲香港有識之士可以聲援同支持。北京學運既消息通過香港記者報導傳到香港，引發香港各界支持
5月4日，香港學聯聲援北京學生運動，更加喺15日開始喺新華社香港分社外絕食，之後仲收集到8萬市民聯署支持
去到5月20日凌晨北京果邊宣佈戒嚴，解放軍陸續開入北京市區。即使當日颱風訪港，香港果邊打八號風球，遊行主辦人司徒華依然喺電台宣佈，集會遊行如常舉行。當日有4萬香港市民冒住風雨涉水前往維園集會地點，唱龍的傳人(而家雨革係香蕉奶唱今天我)、高呼「中國人不打中國人」、「解放軍向後轉」等口號
5月21日，香港出現史上最大規模既遊行示威活動，當時參加既市民多達100萬人，由司徒華擔任召集人、李卓人擔任糾察長。人太多，遊行人士所經過商店既蒸餾水都被搶購一空，甚至沿路有食店免費提供清水以示支持(而家d食店只會話你阻佢做生意)
打鐵趁熱，果日趁住人多成立支聯會，呼籲香港市民加入同捐款支持國內民運發展。連向來唔講政治既演藝界人士，包括岑建勳、張堅庭、張學友等都高舉標語同領唱 勇敢的中國人，亦都向沿途市民募捐；香港富商李嘉誠更加表示北京學生既動機係愛國並且給予大力支持；就連文匯報都登咗「痛心疾首」四個大字既社論，表達對中共當局鎮壓學運既不滿
5月27日雲集咗200多個港、台藝人，包括成龍、鄧麗君、汪明荃、梅豔芳、羅文等巨星，喺跑馬地馬場舉行「民主歌聲獻中華」音樂會，一共籌得1210萬港元並且全數捐畀支聯會，用作支援北京學運。當時會場內既市民獲發賽馬會資助既黃絲帶，並且不時揮動(香港黃絲既真正起源)
可惜既係喺6月4日凌晨，解放軍開始鎮壓北京學生同民眾，令到喺天安門廣場提供支援物資既18個香港大學生被迫撤退，至於李卓人更加喺6月5日準備上飛機返香港果陣被北京公安登機拉走。事件驚動港督衛奕信同首相戴卓爾夫人協助爭取放人，最後中共要求李卓人撰寫認錯既信件同沒收咗200萬既港人捐款之後先肯放人
之後支聯會就暫時無再搞大型遊行示威活動，改為喺香港同海外舉行支援愛國北京學生既宣傳工作，甚至係協助營救柴玲、吾一爾開希等300個民運人士，安排佢地尋求外國政治庇護
六四事件促進日後民主派政黨成立同發展，令到相關政治人物人氣大增；同時港人唔信任中共導致移民潮
#862科學怪人
搭單：麻煩各位支持香港史post 既都幫手追蹤依個IG: lingchengg_fanspage
支持鄭金鈴！支持大陸抄襲文化！
#871真名開帳戶
班00後唔知旺角以前叫芒角
#874科學怪人
唔記得樓主話會講到邊
會唔會講埋雨革？
雨革就唔好啦，始終連登咩政治立場都有，唔想受靶
#876SUV
/雨革就唔好啦，始終連登咩政治立場都有，唔想受靶 /
所以大部分寫歷史的都係等果代人死哂先，蓋棺論定
#879黃貫中
/巴打會唔會計劃講下二戰前嘅金融銀行史呀？
上文講到滙豐算唔算？/
當然算啦
仲想聽多d，尤其我以前睇過一本書
話香港其實就算係二戰前，銀行業務同貿易融資都係勁過上海
其實呢個area 喺香港史嚟講係幾underresearched，唔係太多書有祥細講，要知真係要自己搵primary source
#880黃貫中
/其實本來真係得錦田果邊會食
大埔約無呢D嘢/
上水都有喎，鳳溪學校啲學生而家好似仲會跟姓候嗰啲每年食山頭
#881黃貫中
/1. 以當時既交通，大量輸入英國勞工唔容易
2. 當時英國勞工人工，同職位係華人3倍以上，班公司都識計數/
仲有以前冇冷氣，又熱又濕，外國人嚟到好多風土病，香港腳就係最出名嘅例子
#882黃貫中
/睇到真係感受到好大嘅張力
67暴動可以話係一場發動者充滿政治計算嘅暴行，勞工階層被壓逼根本只係一個煽動者利用黎發起暴動嘅藉口，希望而家啲共狗可以認清當年歷史/
要了解六七暴動，強烈推介睇消失的檔案，佢嘅講法係港澳系統出現權力真空導致極左派上位，成件事周恩來直接知情
#883黃貫中
/澳葡係教育、基建、醫療等等方面真係連港英車尾燈都見唔到
賣點嘛 除咗賭就係南歐休閒風
其實澳門賭業興起，亦有香港華人倡禁賭先有後尾澳門賭業快速興旺/
伊莎貝拉黃秋生講得啱，葡國佬以前係做海盜點會信得過
#884黃貫中
/btw 其實就海底隧道一事，政府係有對兩間渡輪公司做補償
起果陣政府首先係屬意佢地入股起海底隧道，可惜佢地都拒絕咗/
Dump 春啦，海底隧道最後好似兩三年就回本
#885黃貫中
/56. 中英政府就香港問題既談判/
最近有解密檔案指出，麥理浩上任嗰陣大約1972年，英國內部已經意識到九七大限呢個問題，所以麥理浩10年發展計劃就係要將香港建設成模範城市，增加同中共談判嘅籌碼，但最後都輸咗
#886黃貫中
終於live，我睇都用咗好耐，更何況你要寫咁多字，真心佩服，10萬個多謝
#887煩糕
真係好難得有人咁用心打左咁多關於香港既歷史出黎
講真，就算中學修歷史呢科，關於香港既歷史都係講得比較少，真係好可惜
我是來留名的
#888科學怪人
/最近有解密檔案指出，麥理浩上任嗰陣大約1972年，英國內部已經意識到九七大限呢個問題，所以麥理浩10年發展計劃就係要將香港建設成模範城市，增加同中共談判嘅籌碼，但最後都輸咗 /
基本上中共唔show你做乜都無用
#889悲傷華法林
/上水都有喎，鳳溪學校啲學生而家好似仲會跟姓候嗰啲每年食山頭/
「本來」
#890科學怪人
/Dump 春啦，海底隧道最後好似兩三年就回本 /
天星都死死地
油麻地小輪收哂皮
#891浪子回頭
/天星都死死地
油麻地小輪收哂皮 /
點解拒絕入股海底隧道
#892科學怪人
/點解拒絕入股海底隧道 /
食老本囉，無遠見囉，唔識做生意囉
#893科學怪人
58. 九龍城寨清拆
1898年既展拓香港界址專條裏面包哂港九新界，唯獨唔包九龍寨城。不過喺1899年港督卜力派遣英軍強行驅逐九龍寨城內既清軍，喺清朝既抗議同交涉之下，結果雙方都唔再喺九龍寨城駐軍
不論係是清、民國、共和國時期，名義上九龍寨城都仲係中國既一部分；不過因為相關既國土同中國內陸分離，所以有個叫法係「飛地」
即係，九龍寨城
係香港既內飛地、係中國既外飛地
只不過實際上中國唔管、英國因爲條約所限無權管，於是寨城就變咗三不管地帶，咁有人就會有政治，於是城內居民就自組咗樂善堂去管理地方事務
住喺果度，可以話係一念天堂、一念地獄。天堂在於城寨係香港貧苦大眾既天堂，居民唔需要向港府繳交差餉、地租同物業稅，租樓同置業既價錢都比較相宜，窮人要安身同養老都係一流。當然佢地都要交水電費
另外二戰之後有唔少由大陸落嚟既牙醫同西醫，可惜佢地既資歷同執照得唔到港府承認，唯有喺城寨開設診所繼續搵食；對於城寨內既窮人嚟講，無牌醫生為佢地提供廉價但有一定質素既醫療服務，可以話係互惠互利
至於出面受到港府規管既脫衣舞表演同色情電影，喺城寨通通都可以任睇。城寨裏面租平，變咗可以畀居民開設小型工場同工廠，生產到價錢相宜既產品
地獄在於城寨既人口密度超高，生活環境同衛生、消防、治安都相對惡劣。喺1950年前九龍寨城係一個密集既木屋區，入面既黃賭毒都非常猖獗，當時香港警方只可以用便衣既形式對城寨進行有限度巡邏，即使有人犯嚴重罪行都只可以用「邀請」既形式移動佢出城寨外至可以拉
消防方面，1950年1月11日，城寨發生大火，燒毀哂裏面所有木屋
燒完之後城寨內既樓宇變咗現代化，不過係插針式有位就起，不規則咁向高發展，成為九龍區既一個集體回憶同世上人口密度最高既社區
港府喺歷史上好幾次都想拆咗寨城，不過因為主權問題，每當居民覺得出事都一定會搵北京政府求救，北京當局(不論國共)每次都會以外交途徑反對，所以都拆唔成。1980年初中英談判，主權移交塵埃落定之後，英國政府直接搵中國外交部交涉，要求拆遷九龍寨城
中共政府都明白城內居住環境真係差，經過研究之下同意，不過提出咗條件:
1. 為居民安排好過而家既居所
2. 容許城內無牌牙醫繼續行醫
港府應承咗，喺1987年1月14日宣佈拆得，並且會喺三個階段遷出城內居民。1992到1994拆野，拆完之後原址改建咗做公園
喺拆野過程當中發現昔日寫有九龍寨城既南門石匾，於是依個城方就正咗名，唔再叫城寨。至於當日清朝用既衙門都有保留，被列為法定古蹟並且成為咗公園既辦事處
#896浪子回頭
/食老本囉，無遠見囉，唔識做生意囉/
正常人都諗到起好咗之後啲車實用隧道，仲用你隻船過咩on99
#905科學怪人
59. 香港新機場、回歸前十大基建
早喺二次大戰結束，香港重光之後，由於啟德機場被盟軍空襲破壞，加上本身容量未能夠滿足戰後上升既民用同軍用航空需要，所以香港政府曾經提出喺屏山同后海灣起新機場，不過因為中國解放，機場太過接近中國領空實在有危險所以就無咁做，改為擴建啟德機場
1980年代初啟德機場既容量已經接近飽和，亦都已經無位再擴建。中方曾經向港府建議搵過塊地起新機場嚟滿足經濟發展需要，不過港督尤德等就認為財政情況唔許可，不如用依筆錢為50萬市民提供居所
不過去到1989年，港督衛弈信時代發生咗六四事件，觸發咗一輪移民潮同信心危機。為咗挽回香港人既信心，衛弈信推行包括機場在內既十大基建，希望可以令到香港煥然一新:
同sir 報1. 赤鱲角新機場
同sir 報2. 東涌新市鎮(逸東張家銘 – 中上男神)
同sir 報3. 青嶼幹線
同sir 報同sir 報. 北大嶼山高速公路
同sir 報5. 西九龍填海計劃
同sir 報6. 中區填海計劃
同sir 報同sir 報. 機場鐵路
同sir 報8. 三號幹線
同sir 報同sir 報. 西九龍高速公路
同sir 報10. 西區海底隧道
喺1989年12月，有到訪北京既香港人士向中共江澤民總書記提及新機場計劃，江就表示要「看菜吃飯」，不過唔好「你請客我付鈔」。即係話佢覺得港府付巨額去起新機場，由未來特區政府償還貸款係唔公平
1990年港澳辦主任魯平針對預計港英政府只會洗淨50億儲備，對香港傳媒講：「就個零頭，全都花光了，怎麼辦？怎麼辦？怎麼辦？」
1991年中英雙方就此進行3次談判，最後雙方同意到97儲備可以淨返250億，並且新機場既預算成本係986億港元，終於就簽咗備忘錄。不過半年之後英方將新機場既成本加到1122億，仲另外舉債460億，破壞咗備忘錄既規定。中國果邊當然就嘈佢，再經過13輪談判，最後縮返個機場預算去到1080億、負債減到230億
十大基建作為港英政府留畀香港人既最後一份禮物，起好之後香港可以話改頭換面
人口密集既九龍區飛機噪音問題完全解決，而鄰近東涌新市鎮發展咗10年已經住咗10萬人；西九龍同中區填海工程提供咗好多商住用地，為日後特區政府帶來可觀既收入同著名地標，國金二期就係其中之一；幹線同高速公路縮短咗新界西、大嶼山同市區既距離，其中西隧更加有效紓緩繁忙時間過海既擠塞情況，亦都令到港島可以快速去機場，不過就係貴咗少少咁解
#906煩糕
/我就無好似你咁正統喺學校學過，純粹靠睇書同靠對腳
你都可以分享下 /
其實都幾慚愧，雖然我讀過歷史，但係關於香港既歷史真係認識唔夠深入，我識既你都幾乎講晒 不過有樣小事可以分享下，點解以前英國人多數住半山，係因為好多英國人初初到埗香港時，都頂唔順香港既惡劣衛生環境，輕則病，重則因染病死亡，而點解當時香港衛生環境咁差，記得其中一個原因係當時落黎香港既華人都好窮，佢地為左搵食，好多都好興係床下底養豬，咁佢地大部分人都唔會話好注重衛生，多數都由得D豬就咁係度屙屎尿，久而久之就變到好污糟。因為半山以上空氣好，所以英國人都無咁唔適應。而係殖民時代初期，山頂亦都只限洋人居住
我都係憑記憶打返出黎，有錯請指正
#907游大輝
十大基建真係令到香港可以更現代化，可惜依家無乜基建係真係對香港有突破性嘅改進
#909目黑
我冇記錯港英政府到最後留左超過250億
#910科學怪人
/十大基建真係令到香港可以更現代化，可惜依家無乜基建係真係對香港有突破性嘅改進 /
特區基建其實本來我期待郵輪碼頭同活化官塘
可惜配套唔掂，虎頭蛇尾
#911科學怪人
/我冇記錯港英政府到最後留左超過250億 /
係呀，傾完又傾最後個數
#912科學怪人
/其實都幾慚愧，雖然我讀過歷史，但係關於香港既歷史真係認識唔夠深入，我識既你都幾乎講晒 不過有樣小事可以分享下，點解以前英國人多數住半山，係因為好多英國人初初到埗香港時，都頂唔順香港既惡劣衛生環境，輕則病，重則因染病死亡，而點解當時香港衛生環境咁差，記得其中一個原因係當時落黎香港既華人都好窮，佢地為左搵食，好多都好興係床下底養豬，咁佢地大部分人都唔會話好注重衛生，多數都由得D豬就咁係度屙屎尿，久而久之就變到好污糟。因為半山以上空氣好，所以英國人都無咁唔適應。而係殖民時代初期，山頂亦都只限洋人居住
我都係憑記憶打返出黎，有錯請指正 /
維多利亞城區內都可以養豬？依個唔清楚
#916NISMO400R
/特區基建其實本來我期待郵輪碼頭同活化官塘
可惜配套唔掂，虎頭蛇尾 /
英國人做得到的
中國人永遠都做不到
#917偽女人
樓主有冇時間講下當時既傳媒
報紙連載/電視
好似幾得意
#919東邪西毒南咸北濕
/58. 九龍城寨清拆/
可唔可以講下樂善堂既歷史
#920科學怪人
/英國人做得到的
中國人永遠都做不到 /
官員都係同一代AO出身，差喺邊？
#921科學怪人
/樓主有冇時間講下當時既傳媒
報紙連載/電視
好似幾得意 /
會，特別為你打一篇好唔好？
#922偽女人
/會，特別為你打一篇好唔好？/
樓主
#924科學怪人
特別篇. CCTVB(應樓上絲打要求講下特別電視廣播)
講電視史之前，首先要略略咁講下有綫同無綫廣播技術既分別。所謂有綫就即係從電視台開始到用户電視機，都係有真既線路連住，訊號經電流傳送；後期少少先有既無綫廣播技術就即係話唔需要線，訊號經微波喺空氣之中傳送，有個接收器就得
慣性收視、一台獨大依八個字由細聽到大，令到唔少人見到慣性都誤以為無綫電視係香港第一間既電視台
其實第一間喺香港開台既叫做麗的映聲，佢係一間英資公司，1957年成立初期只係得一個以黑白放映既英文台。麗的係採用有線技術傳播，因為需要鋪設地線，所以用户係要交安裝費25、每月租機費45同收看費25，以當年一毫子搭天星嚟講算係貴
因為得英文台睇，麗的最初果1500個用户都係外藉人士，係去到1963年之後增設中文台先至開始多華人睇，不過所謂中文台都只不過係以粵語配音外國電視劇，都係無本地既節目
1965年香港政府有意整返間以無線電技術做廣播既電視台並且招標，依個標有15年專營權，之後每5年續牌一次。相比起其他好似海底隧道依類必賺既投資，無線廣播可以話係豬頭骨，因為當時電視機依樣野根本未普及，畀錢拍完節目推唔推得起都係未知之數
出人意料既係，今次竟有6個財團入標競投，包括做開有線既麗的，甚至連日本三菱都有(有生產電視機，並且希望注資電視台去推廣)
不過最後個牌就批咗畀利孝和、邵逸夫既財團，主要有兩個原因:
1. 財團主要有電影公司「邵氏兄弟」，製作咗唔少深受華人大眾歡迎既電影，叫做有相關經驗
2. 財團唔係華資全資擁有，包括其他英美電視台同洋行都佔有股份，減少港英政府既顧慮
財團成立咗電視廣播有限公司，英文簡稱TVB，俗稱無綫。開台之前都要準備一系列既工作，包括設置發射站、買製作電視節目既設備同訓練相關既專才同藝人。喺技術方面，無綫好自然獲得都英美電視台投資者既協助。喺節目內容方面，無綫唔似得麗的咁淨係著眼於外國節目，而係著重本地既製作同中港文化，亦都設有新聞報導既團隊為本地市民服務
咁人都唔係話一開台就可以全部自己培訓，1966年7月無綫就請咗曾任英國每日郵報既副總編同澳洲電視台主管既Bednall 做總經理；場地方面就喺1966年8月用200萬投得九龍龍翔道既地段，佔地51000平方呎，並且起咗樓高六層既總部，二樓平台仲設有直升機升降場
萬事俱備，只欠節目。電視唔似得電影咁，要連續播放，所以無綫未開台就已經先要拍定d節目，去到1967年4月已經製作超過5000小時既節目
可惜無幾耐就六七暴動，社會精力都集中喺解決危機方面，無綫唯有延遲開播，去到9月暴亂開始無咁厲害先至做開台準備。成個人9月，無綫喺尖沙咀海運大廈舉行展覽，向市民展示百幾款黑白同彩色電視機，亦都搵藝人進行實地表演同用粵語介紹時裝，一改過往用英語介紹既傳統
無綫最終喺67年11月19日開播，為咗引人睇，走免費電視路線，唔會好似麗的咁向用戶收月費。不過當時電視機始終係奢侈品，唔係好多人負擔得起，無綫初期都只係得3萬用户，要捱到70年代初電視機先開始普及
無綫做既娛樂節目深入民心而且夠哂本地，歡樂今宵「日頭猛做，到依家輕鬆下」切合哂當年香港密集型工廠工人做唔停手既心聲，令到大部份香港觀眾都成為無綫忠實擁躉；劇集方面有唔少都係以本地家庭倫理作為主題，深受家庭主婦同少女愛戴
其他電視台見依個市場有得做，都想走入去分一杯羹。麗的喺1973年改用無綫技術廣播節目並且改為免費，成為香港第二間免費電視台（1982年改名做亞洲電視，王征入主之後成為香港良心同歲月留聲台，可惜都要喺2015年收皮）；1975年香港商業電台亦都開辦佳藝電視加入競爭，仲慘，1978年收皮。由此可見後來既競爭者都無力打破慣性收視
1975到1978年間，九龍塘廣播道就有五台山既稱號，因為當時佢係3間電視台同2間電台(港台、商台)總部所在地
#927偽女人
多謝樓主
樓主好快手
當時d節目真係貼地好多
高質好多
好多都係為香港人而寫
而家變cctvb 不了
#929科學怪人
/多謝樓主
樓主好快手
當時d節目真係貼地好多
高質好多
好多都係為香港人而寫
而家變cctvb 不了/
其實吸引觀眾就同追女仔一樣
追果陣時見面都要執正、成日畀到驚喜同新鮮感、次次都可以唔同話題
好啦終於追到喇，之後見面既形象就開始懶(e.g. 唔係日日剃鬚)，每晚whatsapp都例行公事
做熟咗有慣性收視，d高層仲點會同你搏命
#932毛新宇將軍
講下宋朝派兵屠殺大嶼山居民
#933曹魏人妻控
/其實吸引觀眾就同追女仔一樣
追果陣時見面都要執正、成日畀到驚喜同新鮮感、次次都可以唔同話題
好啦終於追到喇，之後見面既形象就開始懶(e.g. 唔係日日剃鬚)，每晚whatsapp都例行公事
做熟咗有慣性收視，d高層仲點會同你搏命/
樓主可唔可以講下回歸時中共收編香港啲江湖大老段故
#934科學怪人
60. 香港特別行政區成立
中英聯合聲明之後開始經過大概12年既過渡期，去到1997年7月1日新界租約期滿，成個香港歸還。依據聯合聲明，中國政府有責任依照一國兩制、港人治港、高度自治既原則容許香港發展。基本法因爲咁而制定，不過題外話，金庸本身係有份起草制定基本法，不過因為64事件令到佢不滿，所以退出咗
1990年全國人大通過咗第一屆行政長官同立法會既產生辦法，並且喺1996設立香港特區籌委會
行政長官產生辦法係：
1. 小圈子選舉，由400人既香港永久性居民組成推選委員會，當中300人來自4個功能界別，最後100人係原香港政界人士、港區人大代表同全國政協代表
2. 要成為候選人，必須得到50個選委提名，年滿40歲、香港連續住20年、無外國居留權、擁護基本法，選舉喺會議展覽中心舉行，最後董建華以320票當選特首
臨時立法會（做到1998年6月30）：
都係果400人提名同選出，民主派立法局議員覺得唔公義所以並無參加，因為港英政府視臨立會係非法組織，所以選舉喺深圳會堂舉行。末代港督彭定康覺得由百萬香港市民選出既立法局唔沿用，反而整d 咁既小圈子選舉係一場鬧劇
1997年2月19日，董建華有咗未來特區政府既主要官員名單，報請中央任命並且得到批准，點知就喺果一晚，提倡以一國兩制解決港、澳、台問題既鄧小平與世長辭，真係咁啱
6月30日下午4點10分，香港喺落住傾盤大雨之下，港督府方面舉行告別港督府儀式。之後彭定康一家乘咗專車離開，並且陪同英國查理斯王子、首相貝理雅同外相郭偉邦出席喺添馬艦東面會場舉行既英國告別香港儀式
晚上9點，喺深圳基地培訓、解放軍之中最精銳既人員組成先頭部隊進駐香港
7月1日零時，國旗分秒不差咁此起彼落，中英兩國如期完成交接，然後英國方面官員坐船走人，同一日凌晨1:30董建華宣誓就職
為咗隆重其事，中央政府、31個省、直轄市同自治區代表都向特區政府贈送慶祝回歸既大型工藝品，江澤民更加致送親筆寫既 香港明天更好 書法卷軸
#937目黑
臨時立法會係非法組織？可唔可以講多啲呢part啊
#938宋子傑
/臨時立法會係非法組織？可唔可以講多啲呢part啊 /
以我所知係班親中既議員成立出黎:
詳細睇下有冇其他巴打識
#941張繼聰相繼失聰
城寨啲樓一棟依住一棟咁起，好牙煙
以前細個跟呀媽係外面經過無入過去，唔知有無巴打入過去或者係裡面生活過可以分享下
#942張繼聰相繼失聰
/十大基建真係令到香港可以更現代化，可惜依家無乜基建係真係對香港有突破性嘅改進 /
高鐵1000億
#943張繼聰相繼失聰
/維多利亞城區內都可以養豬？依個唔清楚 /
睇文字都覺臭
#944科學怪人
/臨時立法會係非法組織？可唔可以講多啲呢part啊 /
sor，好多政治野我skip咗，驚講得多會失去趣味
簡單少少
本身港英既立法局民主成份唔太高，所以亦都有望坐直通車
即係話 最後一任立法局議員，成為第一任立法會議員
但係彭定康臨走之前大搞民主化同政改，喺中方唔同意之下大幅提高立法局既民主成分，即係由百幾萬香港人選出嚟
中共唔同意就當然唔畀班民選議員坐直通車
決定另起爐灶整個臨立會，自己選第一屆議員
港英政府唔同意就當佢非法
#945張繼聰相繼失聰
新機場即係玫瑰園計劃？
#946張繼聰相繼失聰
60，70年代電視機對一般香港人黎講係奢侈品，有啲涼茶鋪好有生意頭腦，裝部電視機招徠生意，要飲涼茶先有得睇。夜晚劇集時段定必座無虛席，涼茶飲過一碗又一碗，離開時滿肚水
#947張繼聰相繼失聰
/多謝樓主
樓主好快手
當時d節目真係貼地好多
高質好多
好多都係為香港人而寫
而家變cctvb 不了/
開創本地製作既先河，非常創新
而家無以為繼了
#949科學怪人
/開創本地製作既先河，非常創新
而家無以為繼了/
其實平心而論，CCTVB雖然無以前咁博命
不過一直都偶有佳作
我覺得變既係觀眾同潮流
好似學是學非咁
我相信觀眾留意既會係女主持索唔索多過當中介紹既科學常識
#950偽女人
/sor，好多政治野我skip咗，驚講得多會失去趣味
簡單少少
本身港英既立法局民主成份唔太高，所以亦都有望坐直通車
即係話 最後一任立法局議員，成為第一任立法會議員
但係彭定康臨走之前大搞民主化同政改，喺中方唔同意之下大幅提高立法局既民主成分，即係由百幾萬香港人選出嚟
中共唔同意就當然唔畀班民選議員坐直通車
決定另起爐灶整個臨立會，自己選第一屆議員
港英政府唔同意就當佢非法/
其實楊慕琪嗰時已經想加入d民主元素
但比人ban左
驚觸動到中共神經
到彭定康時候
始終唔敢搞普選特首
連搞投票都係由區議員開始試水溫
#951偽女人
/60，70年代電視機對一般香港人黎講係奢侈品，有啲涼茶鋪好有生意頭腦，裝部電視機招徠生意，要飲涼茶先有得睇。夜晚劇集時段定必座無虛席，涼茶飲過一碗又一碗，離開時滿肚水 /
其實以前既香港人好有人情味
佢地自己冇錢買電視
都可以去鄰居到睇
任睇唔嬲
唔只電視連報紙都係
d人係茶樓飲茶睇完既報紙會留比下一手睇
#952科學怪人
/其實楊慕琪嗰時已經想加入d民主元素
但比人ban左
驚觸動到中共神經
到彭定康時候
始終唔敢搞普選特首
連搞投票都係由區議員開始試水溫 /
楊慕琦果時係二戰前後
國共都仲內戰緊，果時英國係支持國民政府既
共產黨打贏咗之後無耐韓戰都係企美國邊
同驚觸動中共神經無關
個原因係相反，果時ban咗正正係因為中共主政，驚華人議員成為大多數既時候會畀中共控制同共產主義滲透
#954SammyJankis
支持
香港真係好少講返自己地方歷史
都係一本值得推薦嘅書
#955張繼聰相繼失聰
/其實以前既香港人好有人情味
佢地自己冇錢買電視
都可以去鄰居到睇
任睇唔嬲
唔只電視連報紙都係
d人係茶樓飲茶睇完既報紙會留比下一手睇 /
true
以前做生意無咁功利計較
而家好多鋪頭一係比租金欺壓一係堅持賺盡一分一毫
#958張繼聰相繼失聰
希望樓主可以既話討論下工業發展、新市鎮發展
#962張繼聰相繼失聰
原來紅A係香港最早期嘅產品唔係膠水桶，係牙刷，係1949年開始經營
好多野發蹟都係同原本業務係有分別
#964宋子傑
/原來紅A係香港最早期嘅產品唔係膠水桶，係牙刷，係1949年開始經營
好多野發蹟都係同原本業務係有分別/
咁又係
李嘉誠都係搞搞下搞埋地產,之後咩都搞埋
#965科學怪人
/咁又係
李嘉誠都係搞搞下搞埋地產,之後咩都搞埋/
OTO本身都唔係都係食住SARS條水，賣溫度計
#967余御汝如魚愉
/本身港英既立法局民主成份唔太高，所以亦都有望坐直通車
即係話 最後一任立法局議員，成為第一任立法會議員
但係彭定康臨走之前大搞民主化同政改，喺中方唔同意之下大幅提高立法局既民主成分，即係由百幾萬香港人選出嚟
中共唔同意就當然唔畀班民選議員坐直通車
決定另起爐灶整個臨立會，自己選第一屆議員
港英政府唔同意就當佢非法/
好似有一排係喺深圳開會 之後先搬返落香港
#968科學怪人
61. 亞洲金融風暴
喺香港就嚟回歸既時間，個股市係咁升，1997年4月1日恒指得12074點，升到8月7日既高位16673點，4個月之間足足升咗38%。當年第三季既失業率都出奇地低，得2.2%
就係依個咁美好既時光，一班國際大鱷睇中新興市場既股市同貨幣並且大肆狙擊，包括秦國、南泡同菲律賓。秦國政府喺秦銖喺大量既沽盤衝擊之下，唯有宣佈秦銖自由浮動，結果即跌兩成。骨牌效應之下，馬來西亞元、印尼盾都先後被狙擊同大跌。特區政府明白唇齒相依既道理，喺1997年8月11日決定由外匯基金撥出10億美元參與拯救泰國經濟，不過實在係杯水車薪
喺度先要簡單講下沽空既概念。用股票為例，假設我本身係冇任何中移動既股票喺手，不過我仍然可以選擇沽出。沽既辦法係搵一間有中移動現貨既證券行/銀行，借佢d貨先由市場放出，等於借咗一舊錢走
(小弟偽文青不諳經濟，想請教一下:
1. 放出d貨會去咗邊？
2. 無人肯買入/接貨又會點？)
咁借咗人股票就即係要遲早買返畀人，即係去到個價再跌先買返既話，因為一早借既錢係由原價賣出所得，就叫做賺咗；相反，如果隻股票係咁升，即係要用返再高既價去還貨，就叫做蝕
至於沽空貨幣個概念就簡單d，例如沽港元就即係借某間銀行既港元現貨，賣出換返做美金先落自己袋
要做到既話首先要有銀行肯提供咁大量既港元去沽出，跟住賣出既港元就要由金管局既外匯儲備基金接返貨。當然可以選擇唔接/某d國家既儲備承受唔到沽盤，不過就會令到市場對隻貨幣失去信心
1997年10月20日，國際炒家先大量沽空港股，令到恒指大跌630點
10月21日，炒家再沽出50億港元現貨，令到港元兌美元迫近1:7.75
10月22日，炒家再拋售78億港元，不過好多銀行都無足夠既港元做交收，要透過流動資金調節機制向金管局借港元
10月23日，因為咁樣，金管局就向多次透過機制借款既銀行徵收60到100厘既罰息，搞到d銀行要搵其他銀行拆借，同業拆息提高導致公眾借貸利率都變高
金管局罰息既決定一度引起市場信心危機，令到當日恒指大跌1211點，是為黑色星期四
10月24日，金管局將大量港元注入市場，令到港元兌美元守住喺7.74既水平，國際炒家知難而退，大量沽空港元既情況暫時停止，首戰暫時特區政府領先大鱷贏1:0
等到1998年8月5日，索羅斯為首既大鱷再度搶攻，一野推出300億港元既沽盤。好在香港底厚，當時除咗有外匯基金仲有2450億港元既財政儲備，金管局就動用港府財政儲備去承接沽盤，並且即刻將透過銀行沽出既港元補充返去銀行體系，防止好似上年咁突然變高息、影響市場穩定，大鱷又失一球，港府領先2:0
大鱷見郁唔到港元，就轉去郁香港股市。1998年8月13日大鱷沽空香港股票，將恒指壓到6554點，創5年半新低。另外樓市亦都因為股票市場資金蒸發大跌5成，大鱷連入兩球扳平2:2
61下:
咁講到香港既民生層面，而家成日都講通漲，漲價令到百物騰貴，d錢唔見洗。當時就無通漲問題，而係調返轉頭，變通縮，即係變咗百物騰賤
依個時候，人工唔變可以買多咗野即係變相加薪、加上企業賣平貨又賺少咗，導致當時唔少腦細都要炒人止血。如果被炒既人供緊樓，個情況係仲大鑊
假設一層樓本身樓價100萬，做咗按揭
之後炒魷無錢供，銀行收樓，但係喺通縮效應底下層樓淨係值50萬，即係就算業主無咗層樓之餘，仲要爭銀行50萬，依個情況就係所謂變成負資產
1998年8月13日晚，董特首、財政司司長曾蔭權等財金官員開緊急會議，最後決定喺第二朝開始動用外匯儲備入市干預。港府由金管局局長任志剛親自指揮入市行動，不問價格買入恒生指數33隻成份股同期指合約，承接哂以索羅斯為首既大鱷沽盤。曾司長發表聲明指出香港政府唔可以容忍有人喺貨幣市場造成混亂同人為高息、操控股票市場
由8月14日到8月28日，港府一共動用1180億港元入市，8月28日恒指收報7829點，比起入市前上升1169點，搞到國際炒家無辦法透過沽空香港股市獲利，港府贏波完場
美國聯儲局主席格林斯潘批評港府干預市場行為係削弱緊香港金融既公信力，不過任志剛就認為自由市場並唔等於可以被自由操縱，做決定要同時考慮市場公平性。而去到後來2008年美國金融海嘯期間自打嘴巴，政府對市場既干預比港府當時既措施嚴重得多，格林斯潘先至認同返任志剛等當年既入市行動
事後，連對手索羅斯對於港府既決定都讚賞有加。特區政府手上擁有大量上市公司既股票，不過為咗防止影響市場商業運作，從來都無行駛過作為股東既應有權利。1998年11月開始，港府陸續將喺8月大批買入既股票以有秩序既形式放返出市場，並且喺1999年11月成立盈富基金協助將股票回流到市場上
#970唔想諗野
/61. 亞洲金融風暴/
呢一球而家睇返都係世界波
#971目黑
俾波叔搞會搞成點？
#972科學怪人
/俾波叔搞會搞成點？ /
回顧返其實曾特首真係好野嚟
做財政、政務司、特首都叫做交到下功課
(當然唔係民選就一定係個個上場都畀人鬧，不過做野真係好過董、梁兩任)
可惜畀人捉到佢貪小恩小惠
#973科學怪人
/呢一球而家睇返都係世界波 /
仲要係冒險一腳，射失咗就係因為干預市場搞到投資者對香港信心盡失
#978科學怪人
睇到依個post 又喺度既巴絲，唔好以為我真係on9
[真心求教]想問下白鴿係食咩多？
https://lihkg.com/thread/614959/page/1
其實係諗到今晚會講既話題，想玩下膠引起巴絲對野鴿屎毛齊飛既關注
中頭獎唔好喊
#982科學怪人
62. 勿摸活家禽
之前香港社會係相信禽流感唔會惹到人。早喺1995到1996年期間，香港雞場已經發生3宗禽流感事件，造成約22400隻雞死亡；1997年4月喺流浮山既3個雞場都有4500隻雞係死於H5N1禽流感。只不過，當時雞農同政府都只係覺得雞場突然之間發雞瘟，反正雞瘟唔會惹人，社會對此亦都無太大關注
1997年5月11日，香港一個3歲男童染上感冒，先喺私家醫生診所求醫。男童喺屋企休養期間，好在屋企有養開雀鳥可以解悶，不過病況始終都係無起色，於是喺5月16日轉送到伊利沙白醫院。醫生嘗試用多種抗生素希望控制病情，可惜男童病情急轉直下，仲出現嚴重肺炎同多種併發症，最終喺5月21日不治。伊院主診醫生將男童氣管分泌物交去衛生署毒化驗所化驗，驗出男童染上一種未能分類既罕有甲型流感病毒
衛生署按照世衛組織規定，將病毒血清樣本轉交美國疾控中心、英國化驗機構同荷蘭實驗所化驗，以進一步確定病毒類型，最後證實係新發展既H5N1型禽流感病毒，依位男童亦都成為咗全球首宗發現人類感染H5N1既個案。為咗避免公眾恐慌，時任衛生署署長陳馮富珍公開表示男童家人都無染病，相信病毒擴散能力好弱
依單之後H5N1有5個月都無再發現新病例，不過去到1997年11月，一爆就爆3單。當時係已經搵到金剛胺依隻藥物，有抑制病毒自行複製既抗毒作用，不過必須要喺病人發病早期使用先至可以及時制止病毒喺身體蔓延。當時要檢驗證實患上H5N1要5到7日，而真正染上病毒既人一般喺依段期間已經去到危殆既階段，所以當時港大生物系袁國勇教授就建議醫生遇到嚴重傷風感冒同肺炎徵象既，有理無理都應該即時處方金剛胺
當時有輿論認為衛生署喺首宗禽流感爆發後3個月先至向公眾公佈事件，更加喺承認第二宗禽流感個案之後再次強調病毒無擴散跡象但無耐又再出現個案，臭屎密冚做法不能接受；不過董伯伯就批評傳媒渲染疫情打擊香港旅遊業
1997年12月10日，粉嶺一個街市雞檔發現有幾十隻雞染上禽流感死亡，追查之下發現雞隻係從廣東省既雞場入口，不過因為漁農署當時對內地入口禽畜既登記同監管不足，實在係確認唔到病雞來自邊個農場。雖然漁農署表示只要煮熟雞隻就可以殺死病毒，不過消息影響導致全港雞檔生意銳減5成，連帶旺角雀仔公園售賣觀賞用鳥類都拍烏蠅
12月15日，家禽業界為咗挽回市民信心，長沙灣家禽批發市場停業三日，並且由漁農處幫手進行大規模既清洗工作，以110度混有梘液既高壓蒸氣槍清洗雞籠
12月18日有新發展，港大微生物學系成功研發出一套快速、精密既H5N1測試方法，可以喺8個鐘內準確測試出病毒，亦都從兩個相關病例當中證實禽流感係可以人傳人。
之後病例越來越多，事態嚴重，11月23日喺漁農處既要求下，大陸宣佈暫停鮮雞來港7日；另一邊廂，特區政府決定屠殺全港130萬隻活雞，並且每隻只係補助返遠低於市價既30港元。因為唔夠人手喺短時間殺雞，政府都要請parttime，以一蚊殺一隻雞既薪金聘請家禽批發市場既職員殺雞。雞隻會放入黑色膠袋然後再灌入二氧化碳焗死，最後運去堆填區
好彩既係，喺殺雞之後禽流感疫情無再惡化，危機逐步消除。禽流感傳播既一個重要原因唔係雞煮得唔夠熟，而係市民喺雞檔揀雞都習慣伸手摸下，甚至係吹下雞屁股。喺政策方面加強入口大陸屠宰好既冰鮮雞，宣傳方面「勿摸活家禽」同「請勿餵飼野鴿」亦都成為後來既口號，減少市民接觸野生雀鳥同家禽
#986張繼聰相繼失聰
當年第一個感染h5n1男童無傳染比屋企人都算好彩
#989邊一個發明了返工
樓主請加油，香港史真係每個香港人都應該知但又無咩人知嘅歷史，依家嘅人應該熟劉關張多過砵甸乍
#990科學怪人
/當年第一個感染h5n1男童無傳染比屋企人都算好彩/
Sars就無咁好彩
#991目黑
一蚊一隻雞係咪咁黎
#992張繼聰相繼失聰
金融風暴嗰篇好似睇戲咁
#994游大輝
禽流感其實累死咗好多雞販，聽過有啲人一野破埋產，30蚊一隻真係太低
#999科學怪人
/禽流感其實累死咗好多雞販，聽過有啲人一野破埋產，30蚊一隻真係太低/
做生意唔係包賺
亦都一定有風險，只能夠怪自己唔好彩
我覺得，你既產品唔好彩出事，政府要銷毀
同政府要用你既產品，進行採購係兩回事
因為唔一定所有雞都有菌，亦都錯不在雞農
用公帑賠償算係酌咗情，賠太多又會畀人話用公帑補貼某d特定行業，對市民唔公平