(編註)
1. 原post link於此, 誠意鼓勵大家推推post
2. 為利於閱讀, 現只留有心回覆
3. 就史料爭拗卻未見詳盡觀點者亦刪去
4. 回應本blog初衷, 所有圖片均未有include
5. 引用內容以”/”標示
6. 內容太多, 呢邊會分開幾個post
7. 部分引用時事講笑(以”*”標示),編者會盡量加返註解係段尾
致敬 科學怪人巴打 & 所有推post巴打 @LiHKG
(/編註)
Index:
1. 香港曾經做過南宋既「首都」/#3
2. 台灣反清，香港當災、因禍得福？/#4
3. 張保仔、香港既海盜問題/#10
4. 英國入主香港島/#41
5. 賤地招商法、自由港/#62
6. 從兩單案件講下早期香港已經尊重司法獨立 第一單就係徐亞保案/#63
6. 第二單係毒麵包案/#68
7. 香港造船業可悲既起源 – 苦力/#79
8. 香港歷史上第一個大白象工程/#105
9. 英國入主九龍半島/#106
#1科學怪人
無論係咩年代既巴絲
應該都有讀過中史科同世界歷史科
但係不論係港英年代定係特區年代既教育，對於香港自己既歷史都係著墨得唔多，各方面都係走馬看花係咁意提下
個人認為香港史被刻意省略，係因為港英年代自從67暴動之後開始去政治化、特區年代又想增加學生對中共既認同感，咁我就偏偏反其道而行
連登巴絲成日都講「本土」依個詞語，但係實際上大家又有幾了解本土歷史？對於自己所住既地方又有幾了解？
小弟自問文筆差、不學無術
歡迎交流同狠批
同之前小弟開既法證post 、建築文物post一樣，好多野往往都係調返轉咁大家教返我轉頭
#2科學怪人
唔想做唐小鴨，首先我要address 返依個post 既內容並唔係我既原創研究
主要係睇咗依三本書之後歸納出嚟
1. 《香港史100件大事》上下兩冊
2. 《建人建智：香港歷史建築解說》
#3科學怪人
1. 香港曾經做過南宋既「首都」
係人都知南宋末年係畀蒙古人打到趴喺度
1276年，蒙古人已經攻陷南宋既首都臨安，可憐宋恭帝當時先得5歲就已經要出降
但係都仲有好多南宋既大臣係唔想認輸，蒙古人就唯有繼續打落去，一路打到福建、廣東，退下退下，最後就走到落香港
宋帝昰同佢細佬阿昺喺香港果陣就主要喺官富場(而家既土瓜灣)度居住
當地村民知道落難既皇上駕到，居然都好忠心，主動奉獻糧食同船隻
佢地仲幫手興建新既「皇宮」，朝廷就以香港作為基地，號令福建、廣東沿海分散既忠心百姓抗元
南宋一直都打輸，係去到香港先至「發威」，喺文天祥等大將既努力下守到半年，仲曾經光復廣州同惠州，叫做「互有勝負」啦
後尾九龍被打爆，又喺碙州(大嶼山東涌)守咗4個月，終於正式收皮
#4科學怪人
2. 台灣反清，香港當災、因禍得福？
去到明朝滅亡、清朝收復哂中國內陸既領土之後呢，仲效忠明朝既鄭成功、鄭經父子盤據台灣繼續抗清，而佢地喺中國沿海地區都有根據地
為咗防止鄭氏從海路得到補給物資同喺沿海省份收o靚，跟過鄭成功既降清將領黃梧就上疏提醒順治帝破敵既方法：
「沿海（向內陸）遷界五十里」
順治聽佢講，又真係搵人用繩竪立起界線，命令居民全部遷入界內，違者何君堯(*)！
簡單講，即係包括香港在內既居民，都要被迫搬返大陸
之但係咁樣一搞，令到好多人都流離失所
因為當時就冇電視冇收音機，好多居民對於新政府要遷界一事都無收到好完整既通知，有既都係半信半疑
最後d人真係等到士兵嚟驅趕先知死，時間實在太倉促，執唔切野，加上路途遙遠，餓死、病死既都不計其數
即使係成功入咗界既，好多都無田耕又搵唔到工做，真係人離鄉賤
曾經有廣東巡撫王來任喺康熙4年上疏講述居民既苦況，要求復界，結果當然係畀方丈炒魷，最後仲一病不起
王來任臨死都唔放棄，寫多份「展界復鄉遺疏」，康熙buy 佢其中兩點：
1. 清朝因爲遷界每年少咗30萬両收入
2. 內遷既居民因為生計斷絕，相聚為盜時有發生
於是維持咗足足8年既遷界令被廢除，去到康熙8年，1669年，終於正式復界
之前被內遷既香港人
「踴躍而歸，如獲再生」
為咗令香港既農業復元，清朝軍隊都幫手開墾農田，並且鼓勵其他居民加入幫手。依項德政吸引咗本身住喺內陸既客家人都落嚟定居同墾田，逐漸香港就形成咗客家社區
希望各位巴絲行過曾大屋、三棟屋既時候，除咗知道有客家特色之外，都可以諗返起有段咁既歷史
(*)何君堯, 香港律師兼任區議員及立法會議員, 為表對大陸政府忠誠, 2017年9月曾公開講過對「香獨分子」要「殺無赦」. 作者此處以何君堯代替「殺無赦」.
#5科學怪人
講到依度，我都要向林夕致敬
《畫意》
「難道人死商業才計得到他價格」
#6Noidentity
建議聽城寨既探險隊1842
https://www.youtube.com/playlist?list=PLzBUBjGTeiXTH6ZoLhuf4gL93homa12vi
#10科學怪人
3. 張保仔、香港既海盜問題
喺清初既康、雍、乾盛世之下，中國既人口由康熙初年既2千萬人，去到乾隆晚年已經急增到3億
之但係田地既增加遠遠滿足唔到人口增加所導致既糧食需求
於是沿海既居民為咗生計就成為海盜，靠掠奪商船為生
鄰近既越南喺海事方面其實比起中國走得更前
早喺1771年，越南南部既領主阮文惠為咗統一越南全國，破格咁就招募中國既海盜成為越南既「海軍」，仲正式授予官職、出埋錢協助班海盜返中國招聘新人加入，其中最出名果位海盜就叫鄭七
最終喺海盜既幫助之下，阮文惠統一全國，仲正式獲得乾隆皇帝既冊封
當時越南海軍仲識得錢搵錢，索性利用返海盜既特性，組成私掠船隊搶錢同國家拆賬(私掠船隊即係國家政權正式認可既海盜，我諗起巴士阿叔參選特首提出既黑社會登記制度)
可惜好景不常，原來既阮氏勢力反攻，並且喺陸戰擊敗「偽阮氏」，鄭七唯有走佬返中國繼續搶
鄭七死咗之後，佢既徒弟鄭一就繼續帶領餘部搵食，仲起朵叫「紅旗幫」
咁鄭一喺新會搵食果陣，就虜走咗一個跟住老豆捕漁、得15歲既小朋友
鄭一見到依個捉返嚟既小朋友，覺得佢幾聰明，而且有辯才，於是就升佢做頭目，收埋佢做義子
依個細路原名就叫張保，咁因為佢細個，d 人就叫佢「張保仔」
少年得志，當然就唔係人人都服，尤其是班做咗好多年海盜既old seafood
所以喺鄭一死咗之後、一嫂繼續統領部眾，部份舊部知道一嫂更加重用張保仔之後就自立門戶
其中郭婆帶離開團隊成立黑旗、梁寶就成立白旗
張保仔就唔係流既，佢就玩約法三章，建立海盜既軍紀:
1. 盜眾未經批准不得私自上岸
2. 搶到既貨物，8成歸公庫、2成歸搶者
3. 入村搶掠婦女，只准劫財，唔准強姦同私合，就算要捉上船成為勞動力都必須分艙居住
違反依d規例既下場仲慘過北韓政治犯
要先以竹枝插耳，遊示各船後再公開處決
另外盜亦有道，如果沿岸既鄉民主動接濟補給品，日後「必倍其利賞之」，亦唔准強搶相關鄉民，所以張保仔既船隊可以越做越大，日後喺廣東、香港駐紮都無引起大家反感
張保仔既坐大令到清朝擔心，清朝終於喺1808年決定要圍剿佢
可惜，張保仔接連擊敗虎門總兵林國良、許廷桂、參將林發、提督孫全謀，清朝水師完全打唔贏海盜
當時香港未被英國管治，清朝只能夠向喺澳門一帶既葡萄牙海軍求助
最後中葡海軍聯合喺香港赤鱲角同張保仔打咗激戰9日既海戰，先至打得贏，張保仔用爛船作護盾先走得甩
之前講到既黑旗幫郭婆帶都係一個世界仔，食住花生見到張保大敗就歸順朝廷，即刻就有官做
張保仔擔心郭婆帶會聯同朝廷剿滅自己，搵咗澳葡做中間人宣佈投降，之後一直都幫清朝打其他海盜，立咗唔少功勞
1821年，本來張保仔係有望升做總兵，可惜當時林則徐就提出:
「海盜投誠，宜示裁抑，以防驟變」
結果先至無得升
依個我覺得如果林則徐肯不論名節，往後既鴉片戰爭未必打輸，佢就唔駛因爲朝廷要向英國交差而受重罰
#11……………………
/1. 香港曾經做過南宋既「首都」/
其實講宋帝昺可以講埋盆菜呢
傳與南宋君臣逃難至香港及華南一帶相關。一說是文天祥被元兵追殺，橫渡伶仃洋，逃亡至現時深圳一帶，由於天色已晚，而眾將士又飢腸轆轆，當地村民同情他是忠臣，用僅存的豬肉、蘿蔔，加上現捕的魚、蝦造飯，但卻沒有足夠碗碟，只好拿木面盆盛菜，將士圍盆而食，這就是盆菜的起源。另一說則是，南宋末年，元朝軍隊南下，宋帝昺聯同陸秀夫、張世傑等人南逃避難。當他們路經東莞縣烏紗以及香港新界錦田一帶的圍村時，得到村民盛情款待。但在倉猝之間，村民找不到足夠的器皿盛載食物，只使用木盆菜餚放在一起，發展成盆菜。從此之後，每逢大時大節，村民都會享用盆菜。而現時新界原居民祭祖時的「食山頭」亦以盆菜為主。
#12科學怪人
太長就唔quote
乜原來盤菜係咁嚟，依個真係唔知，我又學到野
不過當時d 平民唔驚元朝秋後算賬真係好堅
#13科學怪人
前面講既，好似張保仔，主要事件既部分都唔喺香港發生，只係勉強咁同香港有關
後面講到英軍佔領香港之後會直接d
#15科學怪人
搭單講下
香港既文物修復同古蹟保存其實算係唔錯
位於世界前列
可惜既就係上面所講
教育制度上缺乏咗香港史既部分
巴絲去到張保仔洞，可能知道佢係一個海盜、佢喺度盤據過
去到宋皇臺，知道宋帝昺喺度跳海
去到三棟屋，咪又係一棟中國式建築
如果可以花時間了解一下每個地方背後既故事，相信欣賞香港既古蹟都會有多一份認同感，意義亦都大得多
#24……………………
/前面講既，好似張保仔，主要事件既部分都唔喺香港發生，只係勉強咁同香港有關/
後面講到英軍佔領香港之後會直接d
正確
1841之後發生嘅事先同今日嘅香港有直接聯繫
講宋朝清朝嗰啲同聽神話故事差唔多
講完無影響
#31彼岸之花
/太長就唔quote
乜原來盤菜係咁嚟，依個真係唔知，我又學到野 /
不過當時d 平民唔驚元朝秋後算賬真係好堅
其實亦有傳聞過香港客家人村喜慶場合食嘅「九砵」（即係俗語話嘅「九大簋」）都係相類似嘅原因出現
#40非洲彭定康
不過當時d 平民唔驚元朝秋後算賬真係好堅
果時都唔知咩事啦
咁鬼遠, 個個都仲係日日耕田
過得一日就一日
邊會理咁多
#41科學怪人
4. 英國入主香港島
喺工業革命之後，隨住英國紡織業既發展，英國需要從中國入口大量綿花，造成嚴重既貿易赤字
為咗賺返筆錢，英國就開始喺印度種植鴉片並且向中國傾銷
鴉片依樣新玩意喺中國就有福壽膏既美譽，唔少中國人都誤以為食完可以健康同長壽，上咗癮之後仲會越食越多
實則鴉片既有效成份係海洛英，無論喺依賴性同對身體既傷害，用現代既評定法去睇都係毒品之冠
清政府其實都知道會賴野，其實從來都唔容許鴉片銷售，英商一直都只係以走私形式入口
去到1839年，清朝終於忍無可忍，委派欽差大臣林則徐迫令喺中國既英商交出鴉片，喺虎門銷毀
之後發生既小衝突更加導致林則徐索性要求喺澳門既葡萄牙人停止對英商供應伙食
因為咁，奉行資本主義既英國，真正既話事人英女皇商人都紛紛要求開戰。1840年4月，英國國會以271票贊成、262票反對，些微差距下通過對清朝既軍事行動
遠在西歐既英國主要利用印度作為根據地出兵，個post既然話明要淺白，打仗既過程就唔詳講，相信大家都知道個結果
諷刺既係
本身明明係道光皇帝親自下令林則徐銷煙，打輸仗之後，為咗同英國佬交差，盡快平息戰爭，朝廷打算搵林則徐祭旗，將銷煙罪責推落佢度
新任欽差大臣琦善當然少不免踩多兩腳，最後林則徐被革職
琦善為咗急於求和，瞞住道光皇帝私下同英國既代表義律簽訂草約割讓香港島，可惜紙包唔住火，結果皇帝知道咗史無前例既割讓之後當然就好嬲，除咗要革職之外，仲要鎖起同抄家
(之後免罪已經係後話)
道光唔承認琦善簽既穿鼻草約，英國方面亦都覺得義律攞得太少著數，喺雙方都唔承認既情況下自然就要繼續打仗
英國打贏多一輪，道光皇帝終於跪低，簽咗正式既南京條約，除咗割讓香港島之外，仲要賠錢同開放港口通商
自此，1842年，香港正式成為英國殖民地
#47張繼聰相繼失聰
1. 香港曾經做過南宋既「首都」
當時香港正式叫咩名？
#48愉快動物
反而想知下歷屆港督同任內施政
#49張繼聰相繼失聰
/當時越南海軍仲識得錢搵錢，索性利用返海盜既特性，組成私掠船隊搶錢同國家拆賬(私掠船隊即係國家政權正式認可既海盜，我諗起巴士阿叔參選特首提出既黑社會登記制度)/
呢點唔係好明，姐係政府官方容許呢班海盜打劫番自己國家商船？？
#50科學怪人
/呢點唔係好明，姐係政府官方容許呢班海盜打劫番自己國家商船？？/
唔會
私掠船有兩種
1. 打劫敵國: 例: 16世紀末英國同西班牙既戰爭互派海盜搶對方貨物
2. 放任: 閒時越南容許同資助鄭七搶中國商船，戰爭時至幫自己
#52羅拔皮利斯
/2. 台灣反清，香港當災、因禍得福？
曾經有廣東巡撫王來任喺康熙4年上疏講述居民既苦況，要求復界，結果當然係畀方丈炒魷，最後仲一病不起
王來任臨死都唔放棄，寫多份「展界復鄉遺疏」，康熙buy 佢其中兩點：
1. 清朝因爲遷界每年少咗30萬両收入
2. 內遷既居民因為生計斷絕，相聚為盜時有發生
於是維持咗足足8年既遷界令被廢除，去到康熙8年，1669年，終於正式復界/
上水條巡撫街就係為咗記念佢而命名
#58科學怪人
/1. 香港曾經做過南宋既「首都」
當時香港正式叫咩名？/
以我所知
果陣未有香港既概念，都係一個個細地方，各自有名
清朝先至劃分為新安縣（包今日既深圳市）
宋「首都」果忽當時叫官富場
#62科學怪人
5. 賤地招商法、自由港
當年香港既價值其實好高
軍事上可以作為英國作戰既軍事補給地同中轉站
經濟上因為有一個深水而且唔會結冰既維多利亞港，可以作為一個理想既貿易同貨物轉運站
一開始英國駐華商務總監義律為咗令到香港成為「新廣州」，玩拍賣地皮，將中環街市到灣仔既臨海地皮分50塊去拍賣
怡和、寶順之類原本喺廣州既英資大公司都參與買地，之後甚至將總部搬去香港
另外仲有一種叫做「免役稅」，即係租地既人只要一炮過交兩年地租既話，就可以得到地皮既所有權
（同南泡100年後李承晚建國玩果種差唔多，都係賤地招商法)
1842年繼任既砵甸乍為咗進一步促進香港既海路貿易發展，宣佈香港作為「自由港」既地位，簡單d講即係對任何國家既船隻都係零關稅
講開又講，啱啱開埠果陣未有港督依樣野，管治香港既責任係由英國駐華商務總監兼顧，戰時總監甚至需要北上指揮同清朝打仗，真係好多野做
一路去到1843年，《香港憲章》頒佈，砵甸乍先至正式變成第一任港督
#63科學怪人
6. 從兩單案件講下早期香港已經尊重司法獨立
第一單就係徐亞保案
1849年2月25日，有2個英國軍官飲醉酒，佢地不知不覺咁行到去赤柱附近既黃蔴角村
兩位都飲多咗幾杯屎水，醉到要逐家逐戶搵女人，終於搵到個18歲卜卜脆，一於就衝入屋摸手摸腳抽返夠本！
屋入面仲有兩個老人家，佢地想反抗，結果被軍官打到頭破血流，唯有衝出去叫救命啦
咁啱住喺隔離既就有一個海盜叫徐徐亞保，盜亦有道，即刻就帶咗6個手下衝入去救人，並且用長矛刺死軍官
之後仲要用竹竿挑起條屍dum落海
喺當時既香港，死一個中國人好小事，不過如果死既係英國人就好大件事
當局派咗100人喺附近海陸兩路搜查，結果係水警撈返條屍上嚟，同時陸上警察亦都喺岸邊發現血跡
當時未有DNA測試，甚至係要去到1910年，全世界先至成立第一間專門既法證實驗室
警察查案都係靠拷問附近既居民，先至知道單野係徐亞保做，於是就懸賞100英鎊通緝佢
兩年之後終於拉到人，案件喺香港高等法院開審
難得既有兩點：
1. 港督般咸當時為咗維持公平審訊，破例咁喺庫房撥50港元請律師為徐亞保辯護，律師亦冇揸流攤，喺捉人程序、國藉、司法管轄權以致案情等等既關鍵問題都提出過重大既挑戰
2. 英國人社群輿論覺得一定要吊死徐亞保，並且應該以「故意殺人罪」(Wilful murder) 告佢
不過法官特別提醒陪審團要考慮死者充滿攻擊性同首先挑釁既因素
最後大家都可以做到不偏不倚，冇因爲民粹壓力而重判，只以「一般殺人」(Manslaughter)定罪，亦唔駛吊死，判終身充軍
#68科學怪人
第二單係毒麵包案
以前喺香港，華人係唔會食麵包，麵包都係歐洲籍既先至會食
而香港既麵包製作，基本上都係張亞霖開辦既裕盛辦館做獨市生意
本來都好地地，點知就喺1857年1月15日，如常供應既麵包竟然混有砒霜！當時大約有400個歐籍人士因為食咗依間野既麵包中毒
上至當時港督寶靈既夫人，下至提供急救既醫護人員都出事
不過好彩在於，砒霜既劑量超高，驗出嚟每公斤麵包3294含有毫克砒霜
依個濃度下，大部分人一食就即刻嘔，所以反而就無人毒死
對於張亞霖嚟講更加黑仔既係，當時正值「亞羅號事件」後中英再度開火，作為中國人既佢就更加有嫌疑，歐人公眾都未審先判覺得佢係為咗報復而落毒
之但係件事查落去，係會發現好多疑點：
1. 張既家人當日都有食果d 包，亦有中毒；
2. 張攞到獨市生意，喺社區既形象都好好，賺到錢，唔應該搞d 咁既野令信譽一鋪清袋；
3. 張知道麵包出事之後主動自首投案，話如果因爲麵包而有客出事，死500次都抵償唔到；
4. 廠房51個工人無人逃走，若無其事咁繼續做野等拉；
5. 要有成10磅砒霜先至做到依批麵包，依個份量喺民間係無可能買到；
6. 張之前仲承接咗10萬磅曲奇既訂單未起貨
民粹就覺得應該要告佢「企圖下毒」，甚至要求處死佢
當時不但法官、檢察官，連辯護律師都係毒麵包案既受害者，理論上張生係死硬
不過大家都基於事實，認為實在無證據指向係佢做
最後，張被判無罪釋放，但係喺歐人社群既壓力下，唯有以公眾安全為理由要求佢出境，張亦都簽名應承5年之內唔踏足香港
再一次睇現到香港既司法公正、獨立
#69吉田朱里アカリン
張亞霖離開香港去左邊
#70科學怪人
/張亞霖離開香港去左邊 /
返鄉下香山
其實當時中英已經開戰
未有毒包案之前香山果邊已經想佢返去，唔好為英國人「效力」
#79科學怪人
7. 香港造船業可悲既起源 – 苦力
喺1850年代，中國發生咗太平天國事變，內陸有唔少居民為咗逃避戰亂走難到香港
之但係香港只係佢地既踏腳石，佢地好多實際係會坐船去到南洋同美國果邊做苦力
有需求就自然有生意，香港因為咁就形成咗造船業同修船業
自願去既話其實已經算好，有d 係畀人呃/夾硬捉上船，再被賣豬仔去做廉價黑工
單係1851年，已經有7785人經香港去美國加州
1852年更加係4倍，破3萬人
自願去既，搭得人隻船當然要俾船費
可惜戰亂走難落嚟既大多都俾唔起
唔緊要！船飛同買iPhone X 一樣都可以玩分期付款，不過當然收返4到8厘利息
一般華工喺外地做兩年就可以還清筆數，之後就可以匯錢返鄉下
苦力運輸既生意係無限商機
1852年香港政府收入大概10萬；而中國人俾既船飛錢有150萬
船公司為咗收多d客兼賺到盡，一般都會搞到嚴重超載，令船上面環境擠迫、衛生差
港英政府唔想做臭香港個名，針對依個現象立《防止離棄商船水手條例》，規定每名搭客都要有足夠既船倉空間，等佢地可以進食同坐低
可惜條例喺執行層面既成效就同而家d中學校規規定唔准講粗口一樣咁好，苦力喺船上既不人道生活情況完全無改善
於是1855年再立一條《中國乘客條例》，內容更加具體
所有20人、航程7日以上既英國客運船，須要香港移民登記官簽發許可證先至准離開香港，條件如下:
1. 為每名12歲以上中國乘客提供12×72立方英尺空間；
2. 船上貨物量不得多到影響乘客健康；
3. 船上配備每人每日最少有白米1.5磅、牛/豬/魚共半磅、蔬菜半磅；
4. 船上配備藥物供急病所需、並駐有當值醫生
以為寫得咁詳細就可以改善？非也
奸商要玩野，一樣搵到法律漏洞
1. 只在香港修船同補給物資，去澳門接客
2. 懸掛英國以外既國旗避開監管
治亂世用重典，首席按察司（約等同而家既首席法官）斯梅爾喺法庭公開宣佈，邊個敢再從事苦力貿易必然會等同喺英國玩奴隸貿易判一樣咁重罪
佢亦都努力遊說立法局通過更嚴既法例，規定移民既船只可以前往英國有司法管轄權既地方，即係唔包括澳門，堵塞咗相關漏洞
另外港督堅尼地新上任當然要政績，佢授權東華醫院聘請暗差(臥底)扮苦力專查依類案件，之後東華每日都有兩到三單案彈畀法院
澳門都合作，喺1874年禁止苦力貿易，整個行業先至正式收皮
#83科學怪人
/(reply to 盆菜話題)
唔好講以前, 就算而家, 都仲係大把人覺得共產黨係好人, 有幫手打日本仔, 係真心為人民服務
非5毛，純講歷史
共產黨係有幫手打日本仔，不過只係有限度既游擊戰，邊打邊食花生積累實力
大將彭德懷違背毛澤東揸流灘既意願真打
文革咪比人鬥死
如果共產黨真係幫手打, 真係有國共合作
唔知而家會點
我覺得都難搞/
戰後國民黨既核心問題，貪污、惡性通貨膨脹之類搞唔掂，點都要收皮
就算最早期消滅共產黨，蘇聯都只會扶植下一個共產政權
#90非洲彭定康
/戰後國民黨既核心問題，貪污、惡性通貨膨脹之類搞唔掂，點都要收皮
就算最早期消滅共產黨，蘇聯都只會扶植下一個共產政權/
貪污 + 貪心 + 為物質可以出賣任何野 = 華人核心價值
認唔認同?
什麼”中華文化”, “傳統價值觀” 都係鳩up
學識唔服從呢d “思想價值觀” 先有得發圍
#93科學怪人
/貪污 + 貪心 + 為物質可以出賣任何野 = 華人核心價值
認唔認同?
什麼”中華文化”, “傳統價值觀” 都係鳩up
學識唔服從呢d “思想價值觀” 先有得發圍/
其實貪心、貪污、唯利是圖，依d 全世界都通
歐洲列強對殖民地都衰到貼地（英國已經係好d)
鬼佬同日本仔比你想像中差得多
#95F22CS2K
/貪污 + 貪心 + 為物質可以出賣任何野 = 華人核心價值
認唔認同?
什麼”中華文化”, “傳統價值觀” 都係鳩up
學識唔服從呢d “思想價值觀” 先有得發圍/
哲學小小黎講 其實咩價值觀都係鳩up
所有都只係一個信念 虛構出黎
只不過有一個共同信念 社會一大班唔識嘅人先會去做同一樣嘢
所謂一個觀基本上同一個宗教冇分別
#105科學怪人
8. 香港歷史上第一個大白象工程
講起大白象工程，大家都會諗起三跑、高鐵香港段之類耗費資源又唔見得有好大作用既基建
話說英國入主香港島之後，覺得大清喺九龍半島既炮台同軍隊都好有威脅，於是逼佢撤軍、拆哂d 炮
大清依d 垃圾國家當然只可以選擇服從，但又死要面子咁可以點做？
清兩廣總督耆英喺1846年上奏，想改為喺退守之地依山興建九龍寨城(現康文署九龍寨城公園附近)作為軍事基地
道光皇帝硃批「酌量妥為之」，香港史上第一個大白象工程就可以開波
「寨城佔地七十畝、城寬240丈、長130丈、牆高2丈、厚5尺至1丈，東南西北四面分別設大炮32門」
註: 1尺 為30cm，1丈 為10尺
城裏面除咗有火藥庫同軍營，仲有民房，招攬咗唔少農民入去住並且開墾城外既農田
有人住，即係農民既小朋友就有接受教育既需求，於是大清就起咗龍津義學(未食lunch，我好肚餓)
理想層面，高鐵起好可以提供多個便捷選擇
實際層面，高鐵同飛機票價相若
九龍寨城都係咁，理想層面，可用作防禦英軍入侵
實際層面，1854年被惠州天地會幾百人就攻破(烏合之眾，非正式軍隊)
之後清朝廢到要出錢喺香港搵僱傭兵協助收復
英國人都知道佢廢更加唔駛畀面，因應阿羅號事件之後清朝利用寨城作基地派人滲透香港島，喺1857年，港督寶靈決議開火，派200名駐港英軍攻城，仲活捉埋大鵬協副將張玉堂
寶靈矢言英軍只需要一小時之內就可以摧毀九龍寨城，要求張玉堂返去阻止鄉民攻擊香港
雖然歷史證實咗九龍寨城係一個大白象工程，但後來即使清朝再簽更多不平等條約，都堅持自己擁有九龍寨城既主權
依個令到往後寨城喺清朝滅亡之後變成三不管地帶
#106科學怪人
9. 英國入主九龍半島
香港島地方太小，對於致力推動殖民擴張既英國嚟講實在唔夠喉；另外雖然清朝喺九龍既軍隊實際上威脅唔到香港島，不過都係會令人不安
於是英國當然就放眼於維多利亞港既對岸 – 九龍半島
值得清朝慶幸既係，英國同法國喺1853到1856年間要同俄國打仗，無辦法同清朝打仗，所以去到1856之前九龍都無事
場仗打完之後，英國人終於可以理返九龍，但就要搵一個理由開火
10月，咁啱中國水師就喺廣州搜查懸掛住英國國旗既走私船「亞羅號」，並且拘捕船員
出戰既奶油終於搵到，英國借題發揮，訛稱亞羅號係香港註冊既英國船，中國方面無權登船拉人
（實際上，隻船係中國人喺香港註冊，船上既所有人都係中國人，愛爾蘭人堅尼地只係中國人為咗取得掛英國旗既資格而安排既掛名船長，其實從來無出現過）
不過為咗減少軍費消耗，英國就搵法國幫手一齊打
英法聯軍攻陷廣州同北京，並且火燒圓明園，搞到連咸豐帝都要避走
為咗平息戰爭，仲喺北京既恭親王代表清朝同英法俄三國簽訂北京條約，內容都係圍繞住割地賠款、傳教自由同開商埠
按照條約規定，英國可以永久得到昂船州同九龍半島