(編註)
1. 原post link於此, 誠意鼓勵大家推推post
2. 為利於閱讀, 現只留有心回覆
3. 就史料爭拗卻未見詳盡觀點者亦刪去
4. 回應本blog初衷, 所有圖片均未有include
5. 引用內容以”/”標示
6. 內容太多, 呢邊會分開幾個post
7. 部分引用時事講笑(以”*”標示),編者會盡量加返註解係段尾
致敬 科學怪人巴打 & 所有推post巴打 @LiHKG
(/編註)
Index:
38. 二戰結束前既香港前途問題/#586
39. 英國重佔香港/#590
35=39.5. 二戰後既香港政制改革/#596
40. 香港身份證/#624
41. 香港管制大陸人入境既歷史/#625
42. 由新亞書院到新亞桑拿/#635
43. 由新亞書院到中文大學 /#644
44. 韓戰期間既禁運政策同走私/#649, #653
#586科學怪人
38. 二戰結束前既香港前途問題
早喺1941年8月14美國總統羅斯福同英國首相邱吉爾已經發表大西洋憲章，確認會喺戰後恢復各民族曾經被武力剝奪既主權同自治權。聲名為國民政府日後收返香港提供法理上既根據
咁喺美國既角度就對於帝國主義同殖民地主義反感，所以如果中國第日想收返香港既話，美國係肯定會給予支持
之但係英國方面當然唔會同你咁睇。殖民地部大臣保爾勛爵指出，英國應該為將香港由荒蕪小島發展成為遠東重要港口而自豪。
佢認為香港被軍事佔領，錯不在英國，因為當時英國集中緊應付歐洲戰事；反而係美國太遲加強喺太平洋既戰略重心，先至係導致而家遠東局勢既主因
簡單d 講，即係美國唔能夠以英國無力保衛香港、馬來亞作為理由，而要英國喺戰後失去殖民地
喺英國官場內部，贊成同反對喺戰後歸還香港既聲音同時存在。贊成既就覺得可以利用香港換取中國政府妥協畀多d 貿易上既利權（例如減關稅）；反對既就覺得歸還會令到英國喺遠東打輸畀蘿蔔頭，之後仲要失去國土實在係霸氣側漏。另外一旦英國失去香港，一定會做成骨牌效應，連馬來亞、印度都會失去
咁英國既首相邱吉爾既意思就係用拖字訣，向中國駐英大使表示唔反對歸還香港，不過係目前時機唔成熟，要等到戰後先至再傾
英國喺雙十節發表聲明，表示願意廢除治外法權同放棄上海、廈門、天津同廣州既租界，不過對於香港同新界都係隻字不提。當時中華民國蔣中正都醒，分析估計英國唔肯放棄香港
咁蔣總統就直接提出要收返新界，英國得3個選擇:
1. 接受 2. 拒絕 3. 拖延
1唔得，因為新界喺經濟同戰略上都對香港同九龍地區好重要
2唔得，因為一定會引起美帝既非議
所以唯有都係拖住先，都係重申等戰後先至肯同中國傾新界問題
為咗維持中英既友好關係，蔣總統只可以選擇接受。而去到戰後共產黨就作反，根本就無睱再處理新界問題
#587科學怪人
/點解一罷工就返廣州
即係罷工果班本身係外勞？/
香港華人大多係由太平天國開始避戰亂走落嚟
所以上返去都唔係佢本身既屋企
只係國民政府支持下，畀地方佢地棲身、供錢供食，先至可以肆無忌憚咁罷
#588目黑
如果將香港俾返國民政府就真係不堪設想
4
0
#589科學怪人
/今年香港有成千億….按返比例姐係有1.5期億船飛錢 /
中國咁多人，奸商賺到人打2年工先還清
係咁上下啦
#590科學怪人
39. 英國重佔香港
去到1943年，美國為首既盟軍開始喺太平洋地區採取攻勢。當時英國負責東南亞指揮部: 負責盟軍喺印度、馬來亞、緬甸等地既作戰。
香港就跟中國戰區、唔歸英國，羅斯福向蔣介石建議用國民黨同共產黨聯手作為條件嚟喺戰後換取美國阻止英國攞返香港，令到情況對於英國係好不利
1943年5月，代表英商既中國協會向殖民地部表示，戰後中國喺政治、經濟同社會各方面都唔穩定，如果英國失去香港既話，就即係話喺遠東就再無一處穩定而有法治基礎既地方進行貿易
所以，英國要收返香港，就需要做一系列既準備，於是成立咗香港計劃小組。首先要令到美國唔好阻止就要利益，先應承咗日後香港可以成為未來聯合國喺太平洋地區實行集體安全既基地。之後佢地告知美國，只要盟軍一進攻香港，香港計劃小組都會跟隨部隊
1945年8月11日，其實都已經預見日本會投阺，當時英國提出派遣英聯邦部隊接受當地日軍既投降。夏愨少將率領24艘戰艦準備由菲律賓出發去香港；另一方面，英國駐華大使亦都設法聯絡被日軍囚禁喺赤柱集中營既前輔政司詹遜，要佢喺夏愨嚟到之前就成立定英治臨時政府
去到8月15日中午，日本裕仁天皇宣佈向盟軍無條件投降。隨後香港JPHA廣播電台先後用日語同粵語「玉音放送」，宣讀日皇投降詔書。喺真空期間，駐港日軍仍然會對香港進行有限度管治同維持治安。
至於應該係蔣總統定係夏愨接受日本投降，就影響到香港屬於邊個。美國新總統杜魯門當然一早同英國拆掂，將香港從中國戰區之中剔除，蔣介石都好無奈。咁跌落地都要那返渣沙既，佢都要個下台階，於是R到英國同意協助國民政府，容許國民黨軍隊途經香港收復南京、上海等地，避免畀共產黨游擊隊捷足先登
1945年9月16日，駐港日軍投降儀式喺香港總督府舉行。夏愨以代表英國政府同蔣介石既雙重身分見證日本方面喺投降書上簽字，而中國只係派咗4人代表列席。
自此香港既管治權重歸英國
#591科學怪人
/如果將香港俾返國民政府就真係不堪設想 /
可惜83年既中英聯合聲明唔係將香港俾返中華民國
#592唔想諗野
/容許國民黨軍隊途經香港收復南京、上海等地，避免畀共產黨游擊隊捷足先登
佢條路線點行
坐船 /
#593羅拔皮利斯
/如果將香港俾返國民政府就真係不堪設想 /
其實英國收得返香港都有少少要多謝羅斯福死得及時
繼任嘅杜魯門主張同英國維持親密盟友關係
#594科學怪人
/容許國民黨軍隊途經香港收復南京、上海等地，避免畀共產黨游擊隊捷足先登
佢條路線點行
坐船 /
係，海路運上去沿海城市
#595科學怪人
/其實英國收得返香港都有少少要多謝羅斯福死得及時
繼任嘅杜魯門主張同英國維持親密盟友關係/
真 撻Q選唔到
#596科學怪人
35=39.5. 二戰後既香港政制改革 (編註: 原文no.錯左….)
先講返少少喺日治年代既政治改革。1942年為咗拉攏喺香港既華人支持日本既統治，日治政府將香港、九龍同新界分成三個「地區事務所」，由日本人擔任所長，管理各區既經濟、教育同衛生事務。
地區事務所下設類似今日區議會既28個「區役所」，由日本佔領地總督委任當地華人出任各區既正副區長。依個制度雖然稱唔上民主，不過成為咗香港華人直接參與地方行政既先例同開始有「自治」既概念。
講返戰後，喺美國同全球去殖民地化既浪潮下，加上英皇認為香港居民對於本身既公共事務能夠擔負到更多責任，香港政府必須給予香港華人更多參政既權力。
於是復任港督既楊慕琦提出香港政制改革，佢提出咗成立一個有廣泛代表性既「市政委員會」：
1. 市委會會接收咗市政衛生局既職權，包括公共衛生、社會福利、教育、城市設計、公用事業、公園、娛樂場所等既大權；
2. 市委會名額30人，當中20人係由直接選舉產生，華人同非華人各佔一半。另外10人就由香港總商會、工會、香港大學同太平紳士提名；
3. 要做選民，任何國籍既人只要滿25歲就得。至於中國籍就要近十年内喺香港住滿6年兼每年交差餉滿200元；
4. 要競選委員，只需要滿30歲、有選民資格就得。
5. 委員任期三年，可以重選
但係當楊慕琦向英國殖民地部報告依個方案，大臣Jones 就唔太支持，並且反建議透過改革立法局既方法去增加居民代表性
1947年楊慕琦退休，之後就到葛量洪接任港督並且接手政治改革。可惜佢上任無耐，大陸既局勢開始出現變化。國民黨喺內戰當中接連打輸畀共產黨，英國當局擔心日後既市委會會畀共匪滲透同控制，亦都覺得「楊慕琦計劃」已經不合時宜
喺1949年6月22日，立法局非官守議員羅文錦提出新方案，擴大立法局既民主性質：
1. 官守議員由9人減到6人、非官守議員由7人加到11人，當中華人佔6人；
2. 選舉者同被選舉者限制喺73000合資格既英籍居民；
佢既理念係喺戰後，大量既大陸難民湧過嚟，純正土生土長既香港人唔多，要等佢地未來視香港為家先至可以放寬選民資格。
但依個正正就係小圈子選舉
葛量洪上報依個替代方案，英國殖民地部都有concern，擔心華人非官守議員日後被中共控制，不過都勉強接受先
不過因為之前戰爭既關係，唔少香港華籍居民都喪失出世紙，實際上得5000人合符資格登記做選民。
#597科學怪人
/突然由法證轉跳講香港歷史，巴打你都幾多範數下
科普講得太深入無人明，太淺白又無營養，好難攞到個平衡點
btw巴打真係法醫 ？/
梗係唔係啦
嗰個係故黎㗎
我遲d 都考慮緊寫返個做文物修復既故
#612張繼聰相繼失聰
/24. 香港華人罷搭電車/
港豬原型
#615張繼聰相繼失聰
終於追完
好似睇緊本書咁
巴打有冇睇過一本叫拾香紀嘅小說？
如果冇 可以睇一下
雖然係小說 但都帶左唔小香港歷史背景入去做故事入面
無睇過但有聽過
http://podcast.rthk.hk/podcast/item_epi.php?pid=671&lang=zh-CN&id=102744
#624科學怪人
40. 香港身份證
以前一般市民要過境並無所謂海關呢樣野，自出自入。以前好多中國難民嚟香港之後，等到中國局勢穩定之後都可以隨便返上去，非常自由。
要講身份證既歷史，其實早喺日治時期既香港已經有。1945年3月，香港佔領地總督田中久一發佈告示，規定10歲以上既香港居民必須申領住民證，並且隨身攜帶，作為控制社會既措施
而家香港出街無帶身份證，頂多都係畀差人陪返屋企攞返(利申: 試過)；不過果陣就無咁好彩，會受到軍法處罰，即係毒打、灌水之類
香港喺1945年重光之後，自然就取消咗住民證依樣野。只不過，因為隨之而來既國共內戰，1945年到1949年有130萬人嚟香港，當中只係得40萬係戰前香港原有既居民。國共內戰期間，國共兩黨勢力都大力滲透香港社會內部
香港政府喺1948年10月開始做野，將位於屯門既達德學院關閉，因為依間野有濃厚共產黨背景；1949年開始立法將煽動香港內亂既人都驅逐出境，除非佢可以證明到自己係香港人既身份。因為太多人擁落嚟令到情況失控，去到8月17日，香港開始做全港人囗既登記工作。
咁人口登記條例規定，除咗12歲以下兒童、駐香港英國軍人、警務人員之外，其他不論種族既人士一律要到指定機關進行人口登記，交出個人照片同打手指模，以便辦理個人身份證。去到1950年1月底，終於完成咗150萬香港居民既身份登記
打指模依個政策其實曾經引嚟香港華人團體既反彈，佢地覺得一般只有罪犯先至要打指模，所以當局既安排令到市民有犯罪既感覺
咁當時負責人口登記既官員解釋，人口登記工作唔係喺警署進行，而係由便服登記人員負責；另外市民淨係需要打大拇指，而罪犯係要打哂全十指，所以兩者係有好顯著既分別。堅持要指模係因為防止冒認簽名同轉樣
因為登記既人實在太多，為咗疏導人潮，特登請咗130人去搞依壇野。登記處會首先發登記表畀各大商行，再由僱主代僱員同家屬填申請表寄返去。之後，再由僱主約時間拉大隊去登記處總部集體影相。
1949年開始既身份證係硬紙咭片，資訊好複雜，有持有者既中英文姓名、地址、工作同工作地點、出生日期、性別、種族、國籍、照片、指模。但係因為硬紙咭片用得耐會殘破，指紋變得模糊不清，而市民既容貌會隨住年紀改變，所以去到1960年香港政府決定重新登記人口
1960年既人口登記條例規定，6至16歲既小童要申領兒童身份證、17歲以上就成人身份證。至於新來港者，需要喺抵港十日內向當局辦理人口登記同領取身份證。今次好咗，身份證會有兩片膠片夾住張紙作保存
1983年香港政府推出第一代電腦身份證，使用電腦噴墨同有防偽水印既保安紙製造，亦都開始以三粒星標示持有者擁有永久居留權既身份，取代以往黑印既標記方式
去到2003年，香港特區政府推出多用途既智能身份證。身份證裏面有智能晶片，上載有擁有者既個人資料、相同指模，方便市民通過自動化通道嚟快速通關，甚至可以當圖書證借書。不過有學者認為，智能身份證既附加功能會被濫用成為社會控制同侵犯私隱既工具
#625科學怪人
41. 香港管制大陸人入境既歷史
之前講到因為大陸太多，香港需要簽發身份證去識別人口。英國同中共喺意識形態上並不相容，所以開始封鎖邊境同停止九廣鐵路繼續通車。咁喺1951年，香港開始劃定邊境禁區，本身住喺禁區既居民要有港府簽發既許可證先至可以出入，而一般市民就入都唔入得既。香港政府開始喺中港邊境鋪設鐵絲網，防止再有人偷渡，不過成效不彰
1959到1961中國大陸發生大饑荒，由於中共無辦法解決國內饑荒既問題，實際上駐守中港邊境既解放軍都無點阻止難民湧落嚟，令到有大量大陸人經中港邊境偷渡落嚟。雖然香港警方有嘗試過努力堵截，但係肚餓就一定係不顧一切，捉都捉唔哂。另外就係喺新界既鄉民同警察，佢地都係傾向同情班饑民，自發供應糧水之餘亦都唔會向當局篤灰
一開始每日嚟幾百人，之後慢慢就變到每日幾千。單喺1962年，5月16日，就有近5千多既饑民越過邊界湧入香港
當時香港就實施「抵壘政策」，即係話中國難民只要抵達市區，就可以領取身份證同成為香港市民；不過如果喺新界被拉既就要返歸。新界鄉議局抨擊抵壘政策係對於新界地區既歧視，認為即使偷渡者進入新界都應該有權攞身份證。不過當時香港政府認為咁做就即係給予偷渡者錯誤既訊息，變相鼓勵更多偷渡者湧入香港，所以就無接納。
不過由於鄉議局既壓力，港府喺實際上減少咗喺邊境地區堵截非法入境者，等佢地可以易d 進入市區前往人事登記處申領身份證。而有趣既係，香港政府仲鼓勵新來港既人都向當局申請身份證，強調人事登記處既職責係登記同簽發身份證，唔會考慮個別人士係點樣入境，依個本住人道精神既行政決定得到當時輿論既支持
隨住1978年中國實行改革開放政策，經濟逐步發展、人民既生活水平開始改善，香港再唔需要因爲人道主義而喺行政上繼續接收大陸人。另外，香港逐漸由密集工業既經濟轉型升級到服務業，再唔需要大量既勞工，亦都無辦法再收容太多既偷渡者。於是，香港政府喺1980年10月23日廢止抵壘政策，並且改為實施即捕即解，即係話唔會再容許入境者喺人事登記處領取身份證
只不過，中港既生活水準始終係有分別，加上香港喺教育、就業機會、出入境自由各方面都存在優勢，所以喺8,90年代既偷渡潮、1999年內地子女居港權案，以至2012年既雙非嬰兒事件、仲有2015年既肖友懷肥蝗事件，都體現到時至今日，一張香港身份證所代表到既權利係幾咁重要
#635科學怪人
42. 由新亞書院到新亞桑拿
今日就會講下中文大學
咁喺2002年，中大就因為迎新營裏面既某d 有味對罵環節上哂報。其中「新亞桑拿」、「聯合組媽」應該時至今日都會有中大人記得
言歸正傳，1949年國共內戰基本勝負已分，當時中國大專界既好多教授、學者一係就跟蔣公去台灣，一係就喺香港教、一係就去東南亞發展
咁其中有一位曾經撰寫國史大綱，叫做錢穆既國史大師，佢以前就曾經喺北大同燕京大學教過。國難當前，佢有兩個friend就打算喺香港成立「亞洲文商學院」，仲已經同香港教育司立案。兩個朋友邀請錢穆做院長，佢局住應承並且會主講文史科
1949年雙十節，學院正式開學，當時只係租借九龍偉晴街華南中學既三間課室(我諗起指大同能大)就，喺夜間每晚上堂三粒鐘，所以當時有個別名叫做亞洲文商夜校
咁喺夜校既時代，無論係學生定係教授，大多都係日頭有其他既工作，夜晚先至返嚟上堂。當時甚至係連辦公室同圖書館都無
1950年3月1日，依間夜校得到上海商人王岳峯既支持，喺九龍桂林街租到屬於自己既校舍，可以由夜校改為日校玩全日制，希望課程可以貼近大學既水平
(當時香港只有香港大學唯一一間可以叫做大學同頒授學士學位)
另外間野起過個朵叫做新亞書院，新亞既意思係新亞洲。根據唐君毅既講法，喺過去2,3百年，中國積弱，亞洲成為歐洲列強最大既殖民地，佢覺得亞洲人同中國人為此都要負上責任。所以新亞書院講學一方面會照顧中國國情，另一方面會照顧世界學術文化既潮流，令到古老既亞洲可以重獲新生
至於一般都叫學院，但係偏偏佢就改叫做書院，係因為新亞認為近代大學分科太嚴，加上學分既過份限制會削弱咗教與學既自由，希望上溯返中國宋朝以來私人「書院」講學高度學術自由既精神。因為咁，《新亞學規》就指出要學生唔好淨係注意一門門既課程，應該先注意一個個既師長
書院條件改善咗少少，有辦公室同圖書室，不過始終都係地方狹窄，物資同設備方面同「大學」無得比。果度既學生大多係來自調景嶺難民營，經濟條件都唔好，根本就交唔起學費，無錢畀既學校都會減免，但會要求學生幫學校做雜務同清潔補數。另外佢地好多時都會喺學校寄宿。話就話係寄，不如話係借，佢地只係喺學校打地鋪訓覺
當時新亞只有30到40個學生，學費收入仲只係得應有既20%。教授雖然有出糧但絕對唔係而家d professor果種應該有既高尚地位同薪資水平，連錢穆都只係攞到僅僅夠生活既人工(正生書院校長)
錢穆堂堂一個北大教授搞成咁，都仲要堅持落去既原因，在於佢本人好憎中共。佢認為共產主義係一種剝奪個人自由、學術文化自由既極權主義。而當時共產黨統一全國，中國傳統文化搖搖欲墜，佢就企出嚟做返d 嘢，透過教育等年輕一代認識中國同傳承我地既文化，以至係畀佢地認識世界各地既文化
香港依個東西文化既交匯點，正正就係新亞既理想地方
#644科學怪人
43. 由新亞書院到中文大學
喺美國既冷戰思維當中，香港被視為東方既柏林，係對抗共產主義既一個重地。而隸屬於美國耶魯大學既中國雅禮協會(Yale in China Association)都明白到香港得一間HKU係唔夠，當香港既青年無書讀就唯有北上升學，即係有機會接觸到共產主義思想
雅禮既然無辦法繼續喺中國大陸既教育事業，唯有選擇將所有預算都放喺發展香港華人既高等教育。
耶魯歷史教授Rudin考察咗香港十幾間既專上學院，發現大多都係以牟利為主，得新亞依間「手空空，無一物，路遙遙，無止境」(院友應該聽過依首校歌）既書院真係有心去保衛中國文化
於是雅禮決定選擇新亞作為合作對象，1954年開始分5年共批出12萬5千資助新亞既營運同擴展
有大水喉射住之後，1955年新亞已經規模化，行4年制，有5個學系可以讀：文史、外國語文、哲學教育、經濟學、商學
1956年暑假，新亞喺九龍農圃道既新校舍落成，有教學樓、宿舍、科學研究室同30萬藏書既圖書館，唔再手空空
而喺新亞書院發展既同時，另外仲有崇基書院同聯合書院都努力為香港既華人青年提供高等教育。為咗爭取香港政府既支持同資助，三院喺1957年2月成立咗香港中文專上學校協會，勢大先至可以引起到人既注意
至於政府方面，因為香港人口激增，HKU 已經滿足唔到大家既升學需要，亦都認同需要多一間大學。終於喺1959年開始，政府宣佈資助三院成立一所以中文授課既大學，但有幾年時間畀佢地過渡，包括提升師資、課程同學生既水平，令到三院可以真係合符一間大學既水平
1963年香港中文大學正式成立，並且會作為以中文作為授課語言既聯邦制大學，錢穆做咗第一任校長，終於鹹魚翻生。可惜既係佢做咗唔夠半年就劈炮唔做，校董會挽留到佢，不過再過多半年佢都係再一次辭職
當然唔係因為跳草裙舞啦
原因都幾耐人尋味，佢喺辭職信度寫：「半載以來，形勢已變，事無昔比，穆意志灰頹，情趣全失」
當時輿論認為辭職牽涉人事鬥爭，但係錢穆自己交代就話係自己唔識處理行政事務，希望可以專注做返學術研究。不過最主要既原因，都係因為以前新亞著重師承關係，同後尾中大著重學分既制度格格不入
#649科學怪人
44. 韓戰期間既禁運政策同走私
喺二次大戰之後，世界上出現咗兩大超級強權：代表共產主義既蘇聯同代表資本主義既美國，佢地喺全球插旗同支持傾向自己既政權，逐漸形成咗冷戰既對峙局面
咁喺朝鮮半島就出現咗李承晚既南韓政權同金日成既北韓政權，而雙方都覺得自己先至係半島既唯一合法政權，亦都各自背後有大佬睇住，意識形態唔同自然就會打仗。北韓首先開火，之後美軍就用聯合國既名義出兵介入，將北韓打到接近中朝邊界
喺中國人民志願軍(其實係正規軍隊)參戰之前，美國就已經聯同英、法、日等國家對中國等既共產黨國家實施禁運。禁既範圍包括軍事裝備、尖端技術產品同稀有物資三大類。加入之後，直情凡係一個士兵可以利用既野都唔准運過去
可惜黑狗偷食，白狗當災。香港同澳門因為喺地理上屬於中國大陸既一部分，所以都連同中共一齊被美帝禁運；喺另一方面又因爲香港係英國既殖民地，要跟返英國對中國實施禁運，所以香港先至算係真正被封鎖得慘慘豬
1950年8月8日，港府對金屬機器、鋼鐵製品、化學品、化學設備、交通設備、石油、電子產品等進行規管。任何人如果想出口依d 野都需要先申請出口許可證；去到1951年聯合國大會表決通過對中國、北韓實施禁運之後，香港甚至再推出更加嚴格既出入口管制
不過香港咁做除咗因為要跟英國之外，實際上仲係為咗要得到美帝既信任，希望美帝認同輸入香港既工業原料係用喺本地正當既工業生產，從而爭取放寬對香港既禁運令
可惜美國都要花時間觀察香港，所以都拖到1952年初先至逐步取消對香港既禁運。喺1951依一年，香港既商界同工廠損失慘重，因為缺乏燃料而停產多時，而大量經香港轉口既商品亦都囤積喺香港運唔到出去，無辦法向外國付運。時任港督葛量洪都指1951年係香港「衰落同貿易凋零既一年」
因為禁運，香港出口到中國既貨由1951既16億跌到得返1953既5.4億，基本上都唔可以再好似以前咁依靠作為中外貿易轉口港嚟賺錢。不過有危就有機，香港有既係二戰後d 人湧落嚟所得既廉價勞動力，正正係因為咁樣有條件進行經濟轉型，大力發展工業生產，造就咗後來1960到70年代既經濟起飛
#653科學怪人
44續
咁好多被禁運既軍用物資同時都係民生會用到既野，而中國大陸對於日用品同工業用原料都有龐大既需求，有市當然就會有價。當時如果喺香港走私100萬貨返大陸既話，係可以賺到20萬，真係商機無限
喺禁運期間香港百業蕭條，好多商人為咗賺錢，都冒住貨物被充公、甚至生命上既危險走貨返大陸。香港因為要得到美國既信任，禁運會執行得比較嚴，但係隔離澳葡就唔同啦。葡萄牙無派兵參與聯合國既部隊、同中共保持住相對友好既關係，所以都無嚴格執行對中共既禁運
香港商人就好醒咁將石油等既物資運去澳門，然後等中共駐澳門既機構搶購。可惜好景不常，1952年6月之後美國加強對澳門既禁運同封鎖，香港商人唯有冒險直接運貨去深圳蛇口
霍英東係喺禁運期間最出名既走私港商。話說之前佢就做船運生意起家，所以佢就諗到神不知鬼不覺咁將船隊用剩既燃油直接運去澳門；另外佢都有搏一鋪，用快艇將中國急用既物資通通直接運過去，賺取高額利潤。不過佢就有樣野好，就係拒絕好似一般商人咁溝d 過期貨/假貨運返去，發國難財都發得有品過人
走私唔係講玩，d 貨咁貴盡量都唔可以被充公，所以水警見到既話都要加速逃走，不過香港水警追截既時候係會用機關槍掃射，所以其實真係好危險，係搵命搏既。
但係香港方面其實心底都知道禁運係會令到經濟有嚴重損失，喺討好美國之餘佢都諗計去陽奉陰違。首先就係司法上，捉到d 走私犯之後都只會告「沒有燈號」、「意圖偷運出口」之類較輕既罪名，判得唔會重，變相容許佢地繼續；另外就係美國一鬆就會偷簽所謂「特定物品」出口許可證，都算係咁