(編註)
1. 原post link於此, 誠意鼓勵大家推推post
2. 為利於閱讀, 現只留有心回覆
3. 就史料爭拗卻未見詳盡觀點者亦刪去
4. 回應本blog初衷, 所有圖片均未有include
5. 引用內容以”/”標示
6. 內容太多, 呢邊會分開幾個post
7. 部分引用時事講笑(以”*”標示),編者會盡量加返註解係段尾
致敬 科學怪人巴打 & 所有推post巴打 @LiHKG
(/編註)
20. 香港政府開始禁鴉片/#278
21. 香港大學成立#288
Offtopic 海上消防 – 葛量洪號滅火輪 變 展覽館/#300
22. 九廣鐵路通車/#307
23. 第一位官學生出身兼遇刺既港督/#340
24. 香港華人罷搭電車/#356
Offtopic 建築文物公開展示既難處/#366
#278科學怪人
20. 香港政府開始禁鴉片
1839年林則徐因為鴉片嚴重影響吸食者健康而奉詔銷煙，英國亦因為咁而挑起戰爭
南京條約簽咗之後，雖然鴉片都係非法，但實際上已經可以喺通商口岸自由入口，香港亦都成為走私鴉片到中國各地既轉口港
喺香港，1858年起就實施鴉片專賣，以價高者得既方式玩投標，中標者會成為「鴉片專賣商」，可以喺三年間於香港提煉同售賣鴉片煙
除此之外仲有一項權利，就係如果有其他人走私鴉片而被香港當局充公，沒收之後係會歸鴉片專賣商，即係佢玩哂
去到1876年簽既煙台條約，通商口岸既鴉片正式合法化，外商只要每箱鴉片繳交30両海關正稅同80両厘金就可以合法銷售，令到鴉片貿易更加猖狂
去到1905年，清朝終於忍無可忍，發佈詔令喺十年內消除鴉片既毒害，初期措施包括對吸食者進行註冊同剷除喺中國國內既鴉片種植場
1906年5月30日，英國既國會議員泰勒喺國會動議譴責鴉片貿易，覺得雖然英國每年以此賺400萬鎊，但係唔道德
估唔到佢既動議獲得一致通過，終於喺1907年，英國同中國協議鴉片進口量每年會減少十分之一，5100箱，到10年後就完全停止
不過政策去到香港就麻煩，當時鴉片貿易已經成為香港經濟既一部分，而香港政府當中有4分之一既收入係來自鴉片，而香港係自由港，無得由其他商品徵收關稅，咁令到港督盧押好頭痕
喺香港內部，社會上層大致既意見都係反對禁煙
香港總商會決議反對英國政府倉卒下令關閉所有香港煙館，認為會嚴重影響經濟繁榮
咁曾經身兼東華同保良總理既何啟都覺得華人社會唔歡迎關閉煙館
盧押知道一刀切會有嚴重反彈，即刻收煙館皮又要賠大筆錢，唯有用唔再續牌既形式去減少煙館數量，到1910年3月就會絕跡
咁但係條例通過之後，香港政府就會失去從鴉片所得既大量收入，為咗冚返條數，喺1909年9月17日立咗《酒精飲品條例》，開始向酒精抽稅，自此香港再唔係「無稅港」
因為驚死班友逃稅，仲設立咗緝私隊打擊走私
#288科學怪人
21. 香港大學成立
香港大學出過好多人才，例如毅然放棄考PCLL做街頭社運歌手既香蕉奶、喺舊登透過教人揀科都可以揀到上床既梁頌禮、擅於改編文學作品既唐小鴨等
(當然都出過小弟依類庸才)
其實早喺1872年，英國聖公會差會已經提議喺香港起大學；1880年皇仁仔甚至想令皇仁書院升格做大學，不過都ban哂
咁去到20世紀，無論係香港定係中國既教育發展都令到大家覺得香港有需要同有條件建立自己既大學:
1. 1905年起清國廢除科舉，改為以西學作為選官標準，令到好多中國人對西方大學教育有需求
2. 推動中國現代化所需既醫學、工程、法律人才都特別有需求
3. 去英美留學太貴，當時估計如果喺香港搞間大學，皮費只係需要5分之1，令更多基層華人負擔得起
4. 香港西醫學院既畢業生水平可以同英國大學醫科接到軋，並且資格得到英國承認
5. 列強喺經濟同文化方面都同部侵略緊，希望通過大學教育培養一批嚮往該國文化既中國青年。德國喺膠州有、俄國喺黑龍江都有、美國就更加協助喺北京成立清華大學，唯獨英國未有
咁德臣西報既社論就認為日本已經成為北方勁敵，如果英國要維持自己既影響力，就一定要喺香港有完善既高等教育系統
去到1907年，盧押從西非到達香港履新做港督，但係佢副手(輔政司)梅含理長期服務之餘又識中文，深受華人社會愛戴
為免功高蓋主，盧押必須做返d 政績，於是就支持成立香港大學。盧押喺聖士提反書院既頒獎禮發表演詞表明決心，認為香港必須成為遠東既牛津同劍橋。
盧押既呼籲引起富商摩地既積極回應，決定出資15萬港元，當中10萬用喺興建大學、5萬就用喺大學成立後既營運資金
另外本地商人伍理卿捐出5萬，畀香港西醫書院興建解剖實驗室
盧押就索性提議將兩樣野合併，不如將書院併入，而解剖實驗室就起埋喺HKU度
咁當時喺雅麗氏醫院既校董會就當然唔想，覺得併入可以，但唔該將大學起喺醫院隔離，但係實際上係唔可行，因為果度太平山區已經相當擠迫，亦都局限咗大學將來既擴建
最後喺多方既協調下西醫書院既校董會先至同意搬去未來既大學
地就搞掂咗，錢就差少少，淨係興建HKU既預算已經要28萬5千，但係兩筆捐款加埋先得20萬，摩地追加3萬都仲未夠
另外，仲需要125萬資金生息至可以保證到HKU既每年營運
咁何啟就建議搵上層華人慷慨解囊，為咗爭取佢地既支持，大學會成立文學院，畀中國學生可以選擇修習中國語言同文學
之後好多華人響應，連清朝兩廣總督都同意由廣東政府捐出20萬
另外西人方面，太古洋行既史葛都肯捐4萬英鎊
去到1909年底籌夠125萬，HKU終於喺1910年奠基
#291科學怪人
/政府一蚊都唔洗出？ /
唔駛
起大學咁大件事係要英國方面批准，而大學既定位係教育中國人
港督為咗爭取批准，第一件事就係諗計唔可以由港府畀錢
之後政府資助港大已經係後話
#298張繼聰相繼失聰
/第二單係毒麵包案/
呢個我都聽過
但係查唔查到真兇？
#299科學怪人
查唔到
#300科學怪人
300正皮專題:
海上消防 – 葛量洪號滅火輪 變 展覽館
「葛量洪號」曾經係香港海上消防隊既旗艦，命名於當年港督葛量洪爵士(佢都係一位官學生)。此輪算係Made in Hong Kong，由香港黃埔船塢利用英國進口物料製造，喺1951年動工，到1953年正式投入服務。
喺此輪服役前，香港海上消防船只有小型消防船隻；喺當年嚟講，此輪相對龐大且先進，有近40米長、排水量503噸、航速可達每小時12.5海里、配備8枚高壓水炮、更可於半粒鐘內製作15萬加侖既消防泡沫，所採用科技於當年屬於頂尖水平
2002年，此輪正式退役，由更先進的消防輪取代
咁隻船最出名救過既火，就要數到海上學府大火。話說董特首既老豆，已故輪船大王董浩雲就買咗一隻叫「伊利沙白皇后號」既超級郵輪（排水量83000噸，足足等於165隻葛量洪號）
董浩雲諗住將郵輪打造成世上最大既流動大學，叫做海上學府。點知就喺竣工前6日，發生咗一場大火，燒足4日幾先救得熄
作為特別專題，歷史就唔係我既重點，上面只係輕輕介紹一下
其實wiki搵返一定講得好過我
交行貨既話我相信巴絲就會離棄依個post
我之前都強調，認識香港史係需要用腳去認識，親身去睇下一磚一瓦既變化
今次我想先介紹既係2002年退役之後，滅火輪成為展覽館既經過
#301科學怪人
咁葛量洪號服役49年後，其實都已經五癆七傷，船身出現了嚴重的銹蝕與老化現象。
要令到佢可以見得人，就先要進行一系列既修復工程
咁講下修復既一個基本原則，就係「修舊如舊」，即係話整之餘都要盡可能保存古物既歷史痕跡，唯一無得留低既就係對文物有害既痕跡(e.g. 之前狄娜捐出既旗袍有好多黴點，留喺度係會令旗袍情況惡化甚至感染其他布料)
修復工程喺青衣船廠進行，歷時三載，主要包括：
1. 徹底清除滅火輪內外各處既殘存油漆與銹蝕物；
油漆會被鏟起、大範圍既鐵銹會以噴射強力沙槍去除；小範圍既則會以手提機器磨走
鐵銹其實係「有害銹」，如果坐視不理唔去整既話，金屬係會繼續被侵蝕下去:
原因
a. 鐵銹既體積係鐵金屬既8倍，因為裏面有水份、空氣相關既元素，會撐爆油漆表面令到金屬失去保護；
b. 鐵銹結構鬆散，無法保護銹下面既金屬
至於銅銹大多為「無害銹」，甚至可以對銹下銅金屬形成保護層
圖示銅制船葉既銅銹就係「孔雀石」CuCO3.Cu(OH)2，屬於無害銹，為咗達到「修舊如舊」的宗旨可以唔駛作出任何處理
至於圖示的另一船葉銅銹經過處理，皆因之前滅火輪辦開放日，希望能讓到訪學生有所比較(飽歷滄桑 vs 簇新)
2. 用化學試劑監測並且清除鋼板表面既鹽份，確保每平方米含量低於5微克；
3. 修復已經損壞、銹蝕嚴重既配件；
4. 為金屬表面塗上耐用既油漆，防止金屬繼續銹蝕及提供長遠保護
因應滅火輪會喺海邊展示，有鹽份兼濕氣重，防銹蝕功夫需要做足
所以為求穩陣，底油會噴上環氧樹脂同PU膠作保護
另外圖示船身既銀色金屬係鋁，於修復果陣亦都全部更換過
鋁比鐵活躍，因此焊接喺船身可以對滅火輪作犧牲性保護(即係鋁會優先被侵蝕，鐵就可以無事)
之後整完點樣由海上吊去陸地都大有學問
依個有趣
先由船廠拖到海傍，咁因為滅火輪好重，都無咁大力既吊臂船，要同廣州當局借隻有千噸力吊臂既躉船夾硬吊上岸
而工程最難既地方都係吊船固定要拋錨
果隻巨躉船4個足球場咁大，拋既錨多、粗得嚟又有百幾米長
所以事前仲要搵蛙人落去睇哂所有海底喉管位置，以免kick爆
做咗咁多野，終於可以喺2007年展出
#307科學怪人
22. 九廣鐵路通車
而家既鐵路迅速發展，又有東鐵、西鐵、馬鐵、機鐵之類，幾乎係無處不在
只不過以前如果想由香港島去新界，居民只能夠選擇:
1. 先搭輪船去廣州，之後再駁小艇去新界
2. 過河去九龍再步行返新界
(以連登d行路post既速度計，大概8個鐘內可以由尖沙咀行到去大埔，不過當時既路邊度有而家咁好行，仲可能要孭住大袋細袋返屋企，往往需要兩到三日先可以返到屋企)
咁其實喺1898年簽既展拓香港界址專條，當中就有條款:
「將來中國建造鐵路至英國管轄之界，臨時商辦」
對於英國同香港喺講，修鐵路有以下既價值：
1. 美國已經投資修建粵漢鐵路，英國唔理既話，美國實會延伸鐵路駁去另一個深水港口，影響香港作為華南航運中心既地位
2. 起鐵路加強新界同九龍之間既聯繫，等新界得到發展、同時令到擠迫既港島人口搬向北居住，從而提升殖民地收入
3. 鐵路可以令到廣東腹地既市民可以方便落嚟，為香港帶來勞動力
所謂九廣鐵路，即係由九龍駁去廣州
咁其實就分咗兩段既
九廣鐵路英段：九龍到羅湖，即係而家既東鐵綫
九廣鐵路華段：羅湖到廣州
咁香港史就集中返喺英段，英段就預計要花費130萬英鎊(42萬港元)，並且由香港政府果邊畀錢起，不過一時之間點拎得出咁大筆錢？
唔緊要，可以發行公債問大家借錢，好似而家d 債券咁，有息收你買唔買？搞掂！
諷刺既係，英段長22英里、華段長99英里
而英段喺1905年12月開始起已經開工，去到1911年9月先至完成，反而相比華段要起耐多2年2個月
原因在於英段所經過既地方好多都係山脈，要架設49座大橋同66座涵洞橋
最慘係，當時要開鑿穿過畢架山既隧道，每一步就需要29磅既炸藥，而每個禮拜只係整到60步，淨係隧道都整咗差唔多3年
另外起英段都仲要喺九龍填海39公頃，用嚟起位於尖沙咀既總站
搞咁大壇野，仲爭個總站
1910年，油麻地、沙田、大埔旗、大埔墟、粉嶺5站都已經啟用；不過要過咗成6年之後，1916年3月28，尖沙咀站先正式啟用
至於點解要等咁耐？
識得歷史既巴絲應該都會記得依幾年發生咗一件世界大事
依件大事就係 第一次世界大戰
尖沙咀總站喺施工期間正正係受到一戰既影響，英國作為協約國都要忙於應戰，令到部分由英國提供既建築物料未能夠及時運到香港，所以就等足三年又三年
另外搞笑既係，鐘樓上面既大鐘原來本身都只係啱啱喺中環畢打街個鐘樓度拆出嚟，廢物利用，一直就用咗6年
至於真正屬於火車站既大鐘，要去到1921年3月22日先至正式啟用
#309目黑
我冇記錯尖沙咀鐘樓個位之前就係車站？
#310科學怪人
/我冇記錯尖沙咀鐘樓個位之前就係車站？ /
係
鐘樓只係車站一部份
原車站其他部份相同位置而家變咗半個胸圍+一座公廁
#321游大輝
我想問下咁當時係畢打街鐘樓拆落黎個鐘依家仲係唔係尖沙咀個鐘樓度?成日都唔清楚到底尖沙咀鐘樓個4個鐘係咪同一set
#322科學怪人
1. 唔喺 換咗2次
2. padder果個無4面
1922年個鐘係同一set機械，可推動4個鐘面，不過時間顯示有偏差，要每日人手調教
1990年代新鐘做到4面一致
#340科學怪人
23. 第一位官學生出身兼遇刺既港督
咁滿清政府終於要被推翻，但係英國係同清政府有邦交(始終都攞咗咁多著數)，未承認中國南方既革命黨，之前港英政府都有取締過同革命黨有密切關係既三合會(後來喺香港從事黑幫活動組織既統稱)，令到部分同情革命既華人對港英政府有不滿
喺1912年，滿清啱啱收皮，英國認為需要一位了解中國同華人事務既港督去處理好「後事」，於是就搵咗梅含理做港督
咁梅含理份CV都幾勁下，佢1881年喺愛爾蘭既哈羅三一學院，古典及現代語言課程First hon 畢業，之後就去咗香港做官學生，用兩年時間學識廣東話，並且喺1885年考試合格
1886年做港督私人助理
1891年做助理輔政司
1892年做助理庫務司
1893到1902做警察司，期間處理過鼠疫同新界抗英
1902到1911坐正做輔政司
1911去斐濟做總督
咁佢就喺香港服務咗咁多年，識中文又熟悉華人事務，實在係合適既人選
1912年7月4日，梅含理到香港履新，喺碼頭檢閱儀杖隊之後，就全家坐肩枱轎，準備去大會堂出席就職典禮
10點20分，當梅含理一行去到位於畢打街既新郵政局果陣，突然有個西裝友喺街道衝出嚟，拎槍一野向住梅含理頭部..
“Bang!”
好彩印度警衛Kala Singh反應快，一野推開槍手既手臂，依槍射中咗梅含理夫人..
佢所坐既轎頂既木架
槍手仲想開第二槍，不過被沙展Garrod 捉住手臂推落地，再由警察制服，行刺失敗
即使係咁大件事，行程都只係受阻分零鐘
為免引起不必要既恐慌，梅含理當乜都無發生過，繼續前往大會堂
喺典禮當中，梅含理同夫人保持鎮靜同微笑，一切如常。第二日，梅含理仲只係帶住副官就進入華人居住地視察，擺姿態表示華人社會同行刺事件無關
其實華人領袖何啟亦都「代表」華人衷心歡迎佢，咁點解會有人想殺佢呢？
咁警方初步審訊槍手李漢雄，李漢雄就表示英國人虐待華人比滿州人更厲害，尤其係香港政府禁止中國錢幣喺香港流通，對中國商人造成不便
但係查落去之下，發現李漢雄爸爸李四曾經做過警察，被時任既警察司梅含理下獄
同某d 連登仔一樣，要追擊人與其話係為公義，不如話其實係因為私怨/睇人仆街
當然如果諗深一層，依單野好有可能係有政治因素。辛亥革命成功之後，好多下層華人都有「打鬼佬」、「殺洋人」既呼聲，李漢雄亦有可能係三合會成員
不過站喺梅含理既角度，依個時勢實在唔應該挑起英國同新政府既衝突，所以幾歹都只係認為行刺係出於私怨，同政治無關
本身法官判咗李漢雄坐一世同做苦役(都無處死)，兩年之後梅含理竟然特赦放咗佢，只係命令佢永遠唔可以嚟香港
話就話唔驚，不過自此之後，新任港督一上岸，都改為坐車去出席就職典禮，以防不測
#356科學怪人
24. 香港華人罷搭電車
Facebook 班網民話杯葛萬寧
杯既形式係集體喺人地Facebook Page玩接龍，然後萬寧繼續大排長龍；
連登仔話杯葛Caca
杯既形式係一人一信寄去Caca 曾經代言既廣告商度，然後Caca 繼續同失敗b去AIA
而喺1912年既香港，香港人杯葛電車，手法真係不可同日而語
咁又講下少少背景先，1911年辛亥革命之後，革命黨人喺廣州成立咗廣東軍政府
當時華人都表現強烈既民族主義，對於廣東既新政權都抱有期望
可惜萬事起頭難，當時廣東軍政府成立無耐，庫房就得萬零蚊，但係已經要養14萬人既軍隊(當中大部分都係外省前嚟增援起義既客軍)
透過裁軍縮皮係最直接，可惜唔得，因為清朝滅亡之後，好多前清兵都淪為盜賊，需要處理
咁香港在內既華人見佢唔掂，都好慷慨咁科水，夾埋都有兩百萬
可惜軍政府始終都係無辦法開源，因為實際上佢地只係可以控制廣州一帶，對於省內其他地區佢地都無辦法做到有效徵稅，所以兩球都係好快用完
軍政府當時用既辦法就係大量印銀紙同造錢幣去解決問題（我會覺得係成班接觸開封建社會既突然掌權，無論係稅收定金融方面，唔係無辦法，而係佢地根本就無概念兼唔識搞）
印銀紙既後果，當然就係貶值。當年廣東錢幣貶值3到4成
果陣依然係有大量廣東錢幣喺香港流通，為咗減低因此對香港金融造成既損失，香港終於通過《外國銅幣條例》，禁止外國銅幣進出口同流通香港。立咗法之後，港督梅含理勸電車公司、山頂纜車同天星小輪拒收廣東錢幣
可惜喺香港既下層華人，大多都係用廣東錢幣出糧。梅含理既舉動同電車公司既決定令到華人都好反感
1912年11月24終於爆煲，約1000華人喺筲箕灣總站(小精靈訓練員聖地)集會，阻止電車開行。警察即刻拉咗一個華人，班華人就向警察掟石，最後要開槍鳴警先至成功拘捕果個人
26日既早上8點半，示威行動蔓延到中環，又有近千人喺德輔道中聚集，佢地除咗向到場既警察掟石，更加威嚇想搭電車既乘客，結果又係要大隊警察逐步驅散。事件中歐藉警員Swan被石頭掟傷，需要送院
去到28日，開始有50名英軍加入擔任巡邏隊，仲會不時喺電車上駐守，先至再無出現扔石事件
但係電車行經既路線沿途都有中文告示，上面寫明會炸死任何搭電車既乘客
咁樣一搞，電車上除咗一名華人司機同服務員之外，都無人敢搭。至於本身搭開既華工，唯有步行返工
梅含理為此召集150位華人領袖，同佢地分析利害:
1. 廣東錢幣幣值低賤，唔收純粹係商業決定，並唔係為咗侮辱中國
2. 唔少華商有份喺電車公司投資
佢希望大家表態支持結束杯葛行動，自己以身作則去搭電車，並且鼓勵華人伙記都咁做
另一方面，喺立法局動議通過《防止杯葛條例》，任何從事杯葛行為既地區會被視為「杯葛地區」，地區內既居民會被徵收特別稅。同時堅持返法例，要求以後華工都要用港幣出糧
咁電車公司就喺12月21到23，一連三日提供免費乘搭既優惠，之後更加賣100000張半價車票畀華人僱主，再由僱主分發畀員工
杯葛行動喺政府既高壓手段同多方面既努力之下終於結束
#361科學怪人
估唔到有400正評，又要準備定特別既野分享
(當初我估計個post唔會過200正評 已經預5篇，而家咁睇好可能去到600以上 伹我又唔會交垃圾敷衍巴絲了事，唯有今個禮拜都出去學野)
#366科學怪人
400正評特別講題: 建築文物公開展示既難處
我地喺全球博物館睇到既展品，好多時都係喺玻璃櫃裏面，甚至係複製品
依樣就其實幾好搞，因為展櫃係玻璃，裏面大多防紫外光，即使被太陽照射，紫外光都唔會直射展品從而造成展品物料降解
另外展櫃係密封既，除咗係唔想d 大陸遊客亂咁摸/破壞d 展品之外，更加重要係因為要控制到展櫃內既溫度同濕度。因為太乾，展品上原有既顏料會龜裂、脫落；太濕，展品又驚發霉
不過對於1d時刻都要公開展示既展品，e.g. 鐵路博物館既歷史車卡、葛量洪號滅火輪船身，無得話封住去控制，要堅持畀大家睇到最好既一面，挑戰性就更加大
先講鐵路博物館既歷史車卡，車卡用鐵造就一定會生銹，暴露於空氣中就更加快出事
咁點樣先可以整到呢？最簡單既方法係先剷起鐵銹，仲要清除上面既油，再喺新淨既金屬表面重新油油顯示返舊有樣子
要油咁大個車卡，最快既辦法一定係噴漆法
一噴已經可以上色
可惜，鐵路博物館隔離就係真既火車路段，用噴漆法既話，少不免油漆分子會喺空氣中飄浮
一旦有機既油漆接觸到高壓電，就有機會著火。所以而家要翻修都只可以用油轆/掃
(圖右車卡未整，圖左整咗有個對比)
公開展示既話，第一件事就係遊客既安全
葛量洪號滅火輪最頂果個位封咗唔畀人上，就係驚人仆落街，留意圖示既膠板封咗樓梯
另外本身滅火輪就只係得貓梯畀消防員爬是上爬落
去到要公開展示就唯有新起樓梯由下層通往上層
另一件事就係展品既保養
講下葛量洪號滅火輪既甲板，上面有好多抄木條，任人踩上去兼受到風吹雨打，好自然就會斷裂同爆開，新既抄木條平均年零到兩年就會爆
爆開既話無得整，亦唔會整，要搵返承建商去換，但係換得一條兩條人地先唔會睬你，所以要草埋一次過
要即時解決問題，唯有就咁搵黑色膠紙痴返落去先，係就係肉酸少少，不過為咗公眾安全（驚插傷人）都無辦法
抄木易爛又好貴，成隻船換哂既話要過百萬，之前亦都有意見認為不如用玻璃纖維替代啦，又平又耐用
但係因為修舊如舊既觀感同社區人士反對，ban咗