(編註)
1. 原post link於此, 誠意鼓勵大家推推post
2. 為利於閱讀, 現只留有心回覆
3. 就史料爭拗卻未見詳盡觀點者亦刪去
4. 回應本blog初衷, 所有圖片均未有include
5. 引用內容以”/”標示
6. 內容太多, 呢邊會分開幾個post
7. 部分引用時事講笑(以”*”標示),編者會盡量加返註解係段尾
致敬 科學怪人巴打 & 所有推post巴打 @LiHKG
(/編註)
16. ［突發］香港宣佈成為疫埠/#193
Offtopic 我睇香港史既睇法/#215
17. 一直以來只針對華人既宵禁令終於取消/#222
Offtopic 柴油電動火車/#226
18. 雞，全部都係雞！/#240
19. 英國租借新界/#253
#193科學怪人
16. ［突發］香港宣佈成為疫埠
依個標題如果喺沙士期間於舊登出現，相信會出現唔少感不安、揚言報警既巴絲
事實上喺2003年既愚人節，有個當年14歲既中學雞(其實大過我)就係咁樣同大家開咗依個玩笑，仲好好心機咁仿冒明報新聞網既格式
結果被廣傳到水糧、日用品都被搶購，真係超市同百貨公司都要多謝佢
由此可見，成為疫埠係好大件事，而香港真係喺1894年5月10日起做過
咁要追溯返1855年雲南政局動盪，清政府需要調集外省軍隊跨省鎮壓。本身源頭喺雲南既鼠疫就喺軍事行動結束之後被帶到全國各地。廣州同香港有輪船往來，亦都令到後來疫症可以傳入香港
喺1894年5月1日，廣州已經有近萬人因鼠疫死亡
5月8日，香港出現首宗確診個案，短短三日後已經被香港政府宣佈成為疫埠
做疫埠之後就當然可以頒佈命令抗疫，緊急狀態之下公共衛生都會比人權重要:
1. 所有病人需要轉到醫療船Hygeia 或潔淨局指定地方
2. 所有死者需要喺潔淨局指定位置下葬
3. 染病者甚至只係懷疑自己有事，都需要即時去警局報案
4. 只有潔淨局指定人員先至可以搬運病人同死者
5. 潔淨局有權進入任何屋宇檢查，覺得唔衛生就有權進行消毒
6. 病者接觸過既衣服雜物會由潔淨局消毒後交還/銷毀
7. 潔淨局為病者/死者住過既房間消毒，全屋多於三名死者需全屋消毒
8. 所有廁所每日需要全面消毒2次，屋主需準備生石灰用於每次沖廁時加入以清潔
咁問題就出現
華人之前對於英國既公共衛生政策基本上係零認識
香港為咗防疫，會喺鼠疫死者屍體上灑上生石灰，並且草草收葬，依樣對於重視葬禮傳統既華人嚟講係難以接受
所以好多華人想返去廣州，唔係因為廣州醫生醫術高明，而係返去死可以有合符中國儀式既葬禮。但係出於防疫角度，英國當然唔會同意疫埠裏面既人週圍去。
於是就做成華人既請願同局部罷工，港督羅便臣既態度係認為華人當初願意落得香港，就需要接受英國法律同衛生措施，後尾上層華人極力請求先至成功爭取可以返歸
另外，本身東華醫院係用中醫果套去醫鼠疫，當時港府認為未如理想，應該用到西醫方式，於是強行派西醫駐院，並且不時將鼠疫病人轉去醫療船
作為華人領袖象徵既東華醫院權威被掃去，亦都促成咗日後東華中醫轉西醫既改革
1894年香港有2550人因鼠疫而死，華人死亡率高達93%
為咗長遠解決華人社區居住擠迫既問題，港府喺太平山區進行咗大型收地重建工作，並且預留一片土地作為公園(卜公花園)確保空氣流通，不過鼠疫一直都係解決唔到，要去到1923年先至消失
#195德國配方止咳露
今日宋皇臺(公園)唔係原址，日治時期將原本宋皇臺舊大石炸左做原料
#198HKVDC_2017
有興趣可以去電郵註冊古物古蹟辦事處e-通訊
成日都有免費公開講座
2018年2月份
10.2.2018 (星期六下午3時至5時 Saturday, 3 – 5pm)
廟宇與科儀法事：鴨脷洲洪聖古廟
講者：
葉長清先生
華人廟宇委員會文化及宣傳小組主席
地點：九龍尖沙咀海防道九龍公園香港文物探知館演講廳
講座由華人廟宇委員會主辦，古物古蹟辦事處協辦
110個座位；先到先得，額滿即止，無須預先報名。講座均以粵語進行。費用全免。
http://www.amo.gov.hk/textmode/b5/education_january_march_2018.php
#199HKVDC_2017
(推介史書)
Edge of Empires: Chinese Elites and British Colonials in Hong Kong
by John Mark Carroll
Published April 30th 2005 by Harvard University Press
https://www.goodreads.com/book/show/1224168.Edge_of_Empires
A Concise History of Hong Kong
by John Mark Carroll
Hong Kong University Press
(睇英文版, 漢文翻譯版被政治刪改, 嘈到上報紙)
https://www.hkupress.hku.hk/pro/5.php
Eastern Fortress A Military History of Hong Kong, 1840–1970
by Kwong Chi Man and Tsoi Yiu Lun
Hong Kong University Press
https://www.hkupress.hku.hk/pro/161.php
老兵不死：香港華籍英兵（1857-1997）
作者 鄺智文
出版日期 2014/05/19
ISBN 9789620435638
http://www.jointpublishing.com/publishing/catalogue/publisher/joint-publishing/9789620435638.aspx
Personal narrative of occurrence during Lord Elgin’s Second Embassy to China
https://archive.org/details/personalnarrativ00lochrich
#208科學怪人
/其實我係想睇樓主有趣地講香港歷史
唔係睇你copy出黎嘅資料
「有趣」都要基於「真實」
連最基本既「真」都做唔到
你不如睇CONTENT FARM/
巴打可以話我講既片面、表達得唔夠完滿
依個我承認，往後亦會再鑽研
一件事既成/原因、觀點依d ，有唔同角度
但基本資料性既野應該未去到唔「真」掛
#215科學怪人
btw 分享多少少我睇香港史既睇法
我會按認識香港史既程度分成4層金字塔
頂層: 鑽研原始史料、舊檔案
第二層: 博覽群書、比較偏頗之處
第三層:大致知道香港大事
第四層: 相信網上傳言/一知半解
我上面都講過，而家官方香港史既定位並唔係教育義務，而係淪為康樂活動同文化節目
而康文署d 古蹟相關教育活動有幾多人報名去聽，去過幾次都已經會知，有目共睹
所以我會預期入得依個post既巴絲喺第四層既比例偏高
有時下下要交代清楚每一個細節雖然正確，但就好難引起第四層既興趣
用一個雖偏頗、片面但有趣既方法吸引多d人先有個基本認識(交代太多英法聯軍經過、宋朝滅亡經過之類同香港無直接關係既，好多人會覺得無趣)，先拉多d人上第三層都未必係壞事
當然我會想再鑽研，巴打講得係有道理，睇多d 可辨真假
不過對於大多巴絲而言，其實第三層已經夠用亦都好實用
樓上果位絲打辭咗CA份工同屋企人想佢做返政府，我就用依個舉例
做牙醫助理，人地見工一定問你點解想做，如果可以借香港史講下少少以前牙科喺香港未得到重視既史事，從而令到人地覺得佢好有抱負、好有心、好了解，係等緊機會圓夢，吹多兩吹亦都可以解釋到佢點解做開marketing會想轉，依d去到第三層已經夠用
#222科學怪人
17. 一直以來只針對華人既宵禁令終於取消
以前就無平機會依樣野，白人同華人係有好明顯既差別對待。其中最嚴重既，要講起宵禁令
香港開埠果陣，因為出現大量為咗逃避戰禍落嚟既無業遊民，令到治安出現嚴重問題
但係當時香港警隊規模太細，無辦法有效咁維持治安，唯有喺1842年下令禁止所有華人不得在11點之後外出
(其實白人歧視有色人種一直都有歧視，到而家2018唔少美國白人都仲係覺得黑人 = 性罪犯/道友/小偷，把口唔講到明但上佢地d forum已經感受到
題外話，話說小弟因爲細個讀書畀人夾份屈非禮，所以對真正既性罪犯恨之入骨，睇得書多對性罪犯既動機同心態亦有少少見解)
1857年毒麵包案之後，香港政府對華人有更加大既戒心，同年7月15頒佈更嚴格既法例：
1. 任何華人喺晚上8點到日出前，如果無手持夜行紙，而被發現身處居所以外地方，就係犯法
2. 每次犯法可能會罰: 5到50元罰款/坐牢1到14日/12下以下公開笞刑/不多於兩小時戴上枷鎖遊街示眾，至於罰咩就由太平紳士決定
但係點罰都好，對於上層華人嚟講都具有好大既侮辱，公開處分更加係個個都睇到
隨住華人富豪同有地位既人越來越多，批評依種歧視性宵禁既呼聲都變大
最搞笑既係，華人員工可以因爲工作所需獲得警察司發夜行紙，但係請佢地既華人老闆反而就唔出得夜街
去到1881年12月，英國皇孫訪港，港督軒尼斯決定喺全港張燈結彩表示歡迎，並且暫停宵禁令，等華人都可以參與盛事
主張宵禁既人以為此舉會增加罪案，可惜果兩晚只有4宗偷竊案發生，實在無證據顯示華人宵禁與否同罪案率有關係
於是，針對華人既恒常宵禁令終於取消，只有喺港督刊憲之下先至需要華人申請夜行紙
#223科學怪人
/英法聯軍既原因只係因為嗰架船？
明歞借口嚟啦
仲有冇其他藉口，呢個藉口都幾唔合理下/
英: 喉住九龍、另有巴打指清國無遵守南京條約承諾
法: 馬賴神父傳教受阻兼被處死
藉口夠充分未？
#226科學怪人
之前話過每過100正評，都會講返1d 唔會上網同睇書搵得到既野
咁都講返柴油電動火車啦
而家做港鐵司機都唔需要太高條件，但以前唔係
從前火車係九廣鐵路局管，政府部門嚟，換言之，入得去做既都係公務員
所以唔少人都爭住入去做，亦都要有裙帶關係先入到去
當時係要由副司機做起，入門要考筆試，要識得鐵路知識(未電氣化之前既操作比而家難得多)
除此之外，做司機對視力即要求都超高，唔容許有任何近/遠視、眼疾、散光、色弱/盲，入到去都要年年檢查視力
喺工作方面，駕駛最難既地方在於停泊時機，每次停泊到車站果陣煞停火車，係需要透過司機人手操控風壓制動系統。
每次的制動能力仲會因應車卡、軋道表面、天氣等情況存在差異，所以要滿足到停泊位置準確無誤既要求係存在一定困難
咁一旦泊前/後咗又點算呢？諗住可以再調整？No
果陣既車唔似得而家咁密封，因為班次疏落，d 人都會好似餓狗搶屎咁爭住上車，停唔啱位，d 人都會係咁琴上去，無得再調整
另外講下點解火車行過軋道會勁勁公公咁既聲
因為其實喺鐵軋上面都會有空隙(預留空間防止因熱脹冷縮所導致既軋道變形、斷裂)
咁車頭都會有下圖既緊急制
以便有火警意外既時候切斷燃料供應+停車
只不過個制好多時變成行過既途人手痕既玩具
巴絲得閒去鐵路博物館撳下又幾好玩既，個制無封死
果陣時就無電子訊號決定喺咩位停車，但都有下圖依舊野，叫Fouling point，指示列車不能前於依個位
咁講多少少歷史，喺柴油電動火車年代，有小販會自行上車售賣藥油、牛肉乾等既小物品，甚至有無牌小販出售雞脾等既熟食。喺火車完成全線電氣化後，九鐵公司訂立附例明令禁止以上行為，列車上小販活動先至絕跡
而柴油電動火車車頭而家又喺邊呢？
No. 51 : 第一輛引入既火車頭，現為香港鐵路博物館館藏
No. 52-55: 轉售到澳大利亞，供當地牧場繼續使用
No. 56-62: 仍然喺港鐵運作緊，作工程運輸既用途，所以大家都無見到
#234科學怪人
(編註: 承上保育話題, 被問到香港街道有咩值得睇)
硬件喺香港嚟講其實已經超哂班
舊城個樣其實好難保留
地小人多，要發展真係無辦法，總無可能樣樣都留
(當然有d 例如係舊尖沙咀火車站變咗鋼胸加公廁係可惜兼過份)
另外舊城d 排水、衛生配套亦未必符合現代標準，整又係錢，不如起上去好過
香港保育古蹟係斬件式，即係舊上環街市留一座西港城、火車站就得個鐘樓，好d 既角度諗仲有d野代表住總好過無
其實以香港咁細既地方同開埠起計200年唔夠
可以睇而又保存得好、兼可以參觀既，話少又講唔上
好多野文物修復辦事處都有哂plan去整同維護，亦都會堅持返修舊如舊
(E.g. 九龍英童學校以前既紅磚、英國預製件欄杆之類，再細節既野要換、要還原都會盡量先從原本source著手)
至於軟件就真係無眼睇
都係果句，香港史一日唔成為教育義務，軟件永遠唔會推行起
睇而家好多開放既古蹟都長期無乜人去，已經算係熱門既舊大埔墟火車站數字上就吹到每年20幾萬人次(雖然我唔知佢點count)
入過去就知閒日根本有無20個市民同時出現都成問題
大部分都係廢老入去坐下、過日晨
喺街基本上有張凳都會有人坐啦
假期就多d既，東南亞女傭囉
大陸遊客都會有三幾個
如果唔係有音樂show之類真係好少喺入面見到本地年輕人
#240科學怪人
18. 雞，全部都係雞！
之前都講過香港開埠以來男女比例失衡，令到雞既需求大咗
隨咗畀人捉落嚟，逼良為娼果班之外，香港地其實仲有唔少人自甘墮落去做雞
搵食姐，犯法咩？
1844年，喺香港已經有123隻雞，當時集中喺中環既嘉咸街同荷李活道一帶。當時唔少英國水手同士兵都染上性病，令到時任港督戴維斯認定妓女就係傳播性病既源頭，下令將全港既妓女都驅逐出境
當時措施執行上並唔嚴厲，好快唔少妓女就偷偷地返嚟繼續搵食，香港政府都無辦法，唔再趕走，唯有寓禁於徵
1845年5月香港成立咗一間性病醫院，專醫性病。醫院既開支就由黃色事業果度徵收
當時規定，妓寨每月需要交5蚊、妓女每月就交1.5，咁就可以領取營業牌照同公開接客
去到1847年，因為英國本土並無抽妓捐既先例，加上社會覺得收得太貴，於是政府就停止徵收，換言之即係無皇管
於是色情行業就越做越大、妓院同妓女都越來越多，仲係各適其式、任君選擇：
大陸妹: 上環水坑口
鬼妹/專接鬼佬客: 中環嘉咸街、荷李活道、擺花街等地
架妹: 灣仔舢舨街
1857年，舊問題又再度被重視，因為有性病既英軍同水手越來越多，起咗醫院都幫助不大。為此香港訂立咗《防止性病蔓延條例》：
1. 妓院要向華民政務司註冊，每月交稅
2. 妓院限制喺下環、西營盤同太平山街營業
3. 妓女需要不時接受性病檢查，有病就唔准接客
自此之後註冊咗既妓院都好自律，管束旗下既妓女，以免佢地有病而影響收入
咁講下唔同類型既妓女啦！
公娼即係註冊咗既妓院旗下既雞
「琵琶仔」：14/5歲左右既處女雛妓，索價400到500
「尖先生」：都係幼幼，但已經接過客，索價50到100
「老舉」：公開接客既妓女，索價30到50
至於唔希望受監管，自己偷偷地接客既都叫私娼
去到1839年，因為英國本土有好大既呼聲，班大愛賢者覺得定期檢查依樣野傷害到婦女既私隱，所以英國國務大臣下令香港停止體檢制度
自此之後妓院可以好似以前咁喺週圍任開(都要攞牌同註冊)，加上1897年取消咗針對華人既宵禁令，令到上環一帶既妓院夜夜笙歌
咁香港政府就喺1899年起喺中環皇后大道中海邊開始進行大型填海工程，一路填到去西邊既石塘咀。新既土地同社區都要諗諗計點開發好
同時喺鼠疫之後，香港為咗改善社區衛生，又要進行重建同處理水坑口過度擠迫既問題
咁就比政府諗到下令所有喺水坑口既公娼妓院都要喺1906年前搬去石塘咀，作為續牌/新領牌照既條件。同妓院唇齒相依既酒樓自然都跟住搬埋過去
果時既交通唔太方便，為咗方便原本喺水坑口既客人，妓院喺每晚下午5點到凌晨1點都會安排黃包車接駁服務
btw，因為HKU鄰近風月區，所以1923年立法局議員周壽臣認為大學係潛修之地，所以應該喺九龍建校，不過ban咗
佢仲在生既話應該會畀而家住hall果班激死
#253科學怪人
19. 英國租借新界
清朝打輸畀英、法列強，可以理解；
喺甲午戰爭輸畀歐洲都仲未睇得起既新晉日本仔就真係醜死人，列強已經睇唔起清朝兼加速瓜分中國
1894年11月9日，港督羅便臣寫信去英國殖民地部，明言當時香港既東、西進出口既鯉魚門海峽同青洲水道都屬於中國，如果其他列強日後同英國打仗，借道攻擊九龍、炮轟香港島都好容易，因此建議香港邊界需要推展
1898年法國喺俄國支持下，向清國提出租借廣西既廣州灣，咁令到英國方面好震驚
於是英國就以此影響香港安全為由，向清提出拓展香港界址既問題
李鴻章表示只要拓展範圍唔係太大，都想息事寧人，原先諗住只係租借一角畀英國起炮台
點知英國果面原來係提出要哂后海灣到大鵬灣以南、水域同其他鄰近島嶼在內既所有領土，李鴻章自然屌咗出聲，堅決反對
英國方面自然就攞其他國家去比，指出德國租借膠州灣同俄國租借大連、旅順都比起依個方案既土地大得多
李鴻章反駁英國之前已經租咗威海衛，無理由再要
咁英國就大9佢: 「你可以令到俄國退出旅順同大連既，我咪撤出威海衛囉！」
要俄國退出當然係無可能，李鴻章唯有屈服，但唯一堅持既清朝都係要留返設有衙門既九龍城
於是《展拓香港界址專條》達成全面協議，並於1898年既7月1日生效，租借99年
(所以97回歸都係7月1日)
但係當時出面打緊美西戰爭，美國既軍艦喺大鵬灣作為基地進攻位於菲律賓既西班牙部隊
英國為咗討好美國同喺戰爭中保持中立，唯有暫緩接管新界，等美國艦隊可以繼續停泊
咁要去到1898年8月初，熟識中文同華人事務既輔政司駱克先至到達新界進行實地考察，但睇嚟佢就唔多受到新界居民既歡迎，當時近一千名鄧氏錦田村村民向駱克既調查團掟臭雞蛋
駱克返到去寫咗31頁報告書畀英國，建議未來香港政府盡量保留新界原有村落組織以便管治
(算係種下咗丁權既禍根)
拖到1899年3月28日，警察司梅含理先至帶人喺大埔墟附近搭建警棚；同一日錦田、屏山、廈村、下八鄉等既鄉紳集會，商討抗英大事，並且進行荷槍實彈演習
4月3日，鄉民焚毀大埔警棚
於是4月4日，駐港英軍司令加士居就率領100英軍攻入大埔
4月7日，港督卜力宣佈會喺4月17日正式接管新界，咁樣更加引起鄉民既義憤，於是搵埋深圳鄉民幫手，一共2000人到大埔同英軍對峙
4月16日，卜力派半營英軍入大埔，強行擊退鄉民，並且直接喺大埔舉行升旗禮，比原定提早咗一日
之後加士居既英軍齊集錦田，炸毀吉慶圍同泰康圍既高牆，甚至拆咗吉慶圍兩扇鐵門作為當地人抗英既懲罰，歷時6日既抗英行動終於收皮
事後兩扇門喺卜力無做港督之後，運返去自己喺愛爾蘭既別墅做裝飾，喺鄧氏鄉紳再三請求之下先至物歸原主同重新安裝
#254齋睇唔買
/之後加士居既英軍齊集錦田，炸毀吉慶圍同泰康圍既高牆，甚至拆咗吉慶圍兩扇鐵門作為當地人抗英既懲罰，歷時6日既抗英行動終於收皮
事後兩扇門喺卜力無做港督之後，運返去自己喺愛爾蘭既別墅做裝飾，喺鄧氏鄉紳再三請求之下先至物歸原主同重新安裝/
歸還左果兩道鐵門其實唔係本身果對門
細心d睇其實還番黎之後果道門左右唔對稱既
聽聞係英國國邊好似整唔見其中一邊所以係唔知邊到搵定做過一道門還番去
#273SUV
/19. 英國租借新界/
拎新界呢part，唔多唔少同非洲有關
果個年代列強全球分餅仔，英國要拎九龍同新界，某程度上都因為佢係非洲失利，要同上面交代
之前係毛巴果個講比利時立國的post入面佢提過少少