原Post > http://lihkg.com/thread/334020/page/1
Editor只backup左Post主講理論追到#116, 入面仲有人問下問題Post主又答下都好好睇,
有興趣不妨追下Post&推下
– By 菩提本無樹 7/2017
嗨！ 大家好 我是菩提本無樹
見到我名就知又有好嘢益你地，請善用起底功能。
上兩個post都有人問可唔可以講下唔同皮嘅特性、真假皮點分、技法等等。今堂一於滿足大家
睇哂個post一定對皮革有一定程度嘅了解
所以今次唔教你地整成品喇
主要由文字同圖片去講解。
不過我個人好低調，至憎人沽名釣譽架喇
不過你地放心，童叟無欺，實事求是係我教皮嘅宗旨。
事先聲明，我收徒弟最緊要係睇佢有冇潛質，所以就算你地肯學呀，我都未必教。
拿皮嚟講呢，我地不要分得咁細
市面上主要有兩種
一）植鞣革
二）鉻鞣革
其實仲有半植鞣嘅，不過今次唔討論喇
皮革係點樣生產都唔講喇
到你開咗間皮廠你自然就個有答案
睇得呢個post相信大部分人都係比較新，所以我會集中講基礎方面嘅嘢。
植鞣
最簡單易明嘅講法
係天然製成，有皮香
，成本較高，通常實啲重啲同非常適合用嚟handmade
而梳化，你架車個seat位，你個手袋，多數都係鉻鞣。都係嗰句啦，化學嘢。
咁點解適合handmade呢？因為佢比較挺身，可以做到封邊效果，細節處理上容易好多。
咁部位方面睇下上圖
新手多數都係買腩條，因為價錢平啲，又大碌
不過心水清嘅巴絲可能會問，平嘢有冇好架？
用嚟練習/悉心選擇位置都可以蒙頭落刀嘅
以我所知日本一間好高質嘅皮廠所生產嘅皮，係冇腩條賣嘅。
最主要都係纖維散，利用率唔夠高。
不過我有必要講一次
唔係用靚料=大師
輕輕講一講
Double shoulder 風格好唔同，頸紋會多同厚，如果鐘意raw d wild d, 可以考慮一下，上品也
Butt就即係背，成塊皮嘅極品，除咗價錢我諗唔到有咩唔好，你諗到講我聽
一上到雙肩/double butt價錢係兩倍起跳
丫係，係香港皮革主要用呎做單位
有分英呎，港呎同ds
好喇講咗咁耐，點分植鞣定鉻鞣先？
植鞣呢就好易分，摸上去有皮嘅質感，聞落去有皮味，將佢捲成一碌，禁落去有「at at」聲嘅，9成都係植鞣
鉻鞣就大部分都軟林林，比較薄嘅，但新手唔建議買因為好難處理。
都係嗰句經驗搭救啦。
咁市面上你見到一張張嘅皮，多數係牛
牛皮佔咗市場上嘅90%
大家可能已經一邊出緊深水埗或者上緊淘寶
一邊屌我講啲唔講啲
植鞣革
上圖最左邊嗰塊就係原色
一張牛皮經過正常處理，不經染色後嘅狀態就係呢個色。
有好多因素去影響顏色變化，遲下再講
我地叫一般/普通牛皮啦如果去買，因為真係最基本嘅皮
香港最常見係意大利嘅植鞣
價錢好，變色唔錯，易手入又易入口，新老手必備。
美國/日本唔好買，無它，好貴，但好靚。
講完。
當然有啲地方有其他地方嘅皮
南美洲嘅皮我都玩過，如果閣下有興趣都可以一戰。
上圖近年興起嘅擦蠟皮
皮革界嘅MK妹
出廠時已經噴上一層層嘅蠟，隨使用方法蠟會慢慢甩/融入塊皮。所以會睇落有非常waxy嘅luster
色多，非常易封邊，叫做唔錯。
Badalassi pueblo
價錢唔太高，但密度好
有磨砂面可以選擇
香港可選顏色較少
Minerva box
捽紋
上品，油脂高，挺得嚟又軟，紋路特別
質感非常好
接住落嚟係講高級皮革。
皮革界嘅王者
只有馬臂皮
而係眾多馬臂皮皮廠入面，只有美國Horween出品嘅馬臂皮，先係最頂尖嘅馬臂皮。
雖然冇親手玩弄過，但我愛撫過，嗰種滑溜同實在感，除咗影視紅星三上悠亞我諗唔到邊個可以比到你。
極難入手，係美國一般人都係買到啲碎，價錢高。最靚嘅批次已經比大部分鞋廠拎哂，詳細希望有皮鞋巴打出嚟講兩句。
價錢最平嘅係日本馬臂皮，但反而係最光滑。
細張，甚至可以去到十幾ds，一ds係10×10 cm
一般街價900-1500一張
處理容易，皮革夠實，有啲錢又有啲基礎，買張可以玩下。
最近仲有英國Clayton 同意大利馬臂
詳細待補完。
呢塊係日本馬臂
一位巴打係日本買返嚟搵我整嘅
我當然影低少量閃咭
大家可以睇得比較清楚嗰個滑溜嘅美尻
豈能讓人不心動？
馬臂皮我唔太建議粗用
最好放內袋
要比牛皮更常保養
始終太多做用痕跡會有啲違和感
如果巴打們買咗塊馬臂用，係打磨嘅時候記住唔好用太粗糙嘅布，因為有可能整花
而且可以用返馬臂皮專用嘅保養KY去上返
講完馬臂
講返牛先
眾多牛皮之中有一隻皮價錢特別高
我地祖國嘅出品
英國皇家馬鞍皮
佢都係牛皮，不過舊時多數用嚟整馬鞍，所以有呢個名。
J & E Sedgwick 嘅出品
好早期已經係製皮時將皮浸入蠟水入面，同而家噴上面嘅做法唔同
皮好厚去到4mm都有
非常重，油脂好足夠，相對地耐用
本人非常鐘意嘅一重皮革
用傳統手造嘅風格加埋J & E出品嘅皮整皮帶，得罪講句，今晚個場啲女，得你有資格媾
如果巴打絲打有興趣係外國網買可以search bridle leather
香港冇返$120呎都買唔到
講漏咗植鞣革嘅特性
非常易有痕跡，基本上整花咗或因自然使用而得嚟嘅痕跡，係整唔走嘅
吸水，非常易吸水
大家唔好帶塊皮去河邊吸水，植鞣革濕咗又冇適當處理乾咗之後基本上會硬哂，唔要得
唔用嘅時候應該包好，最好就底面反轉嚟捲，咁就會減低對皮面嘅傷害
唔好比陽光直接照射，因為植鞣革一見光就會變色
濕度高嘅地方唔好擺，因為佢會發「毛」
無論你要清潔定點，一定要用乾布
咁植鞣革就簡單講完
鉻鞣都要講下
好多時新手買完塊皮返去整極都唔靚，又封唔到邊，咁就多數都係買錯咗鉻鞣喇
鉻鞣嚟講呢，同整鞣分別好大
皮廠用化學方法生產，即係新聞見到皮廠廢水直接排入河就係鉻鞣廠喇
生產鉻鞣革所需時間好短，成本較低
顏色選擇會多好多
咁質地方面，好多時都係軟身，耐水性高、
而且唔易留低使用痕跡。
有樣嘢好重要就係封唔到邊，所以要用比較進階嘅方法去修飾條邊。
想睇下鉻鞣可以軟成點可以睇下
拿有心睇嘅巴絲要留意喇
接住落嚟講下點分真假皮同點樣揀皮
其實植鞣唔難分
因爲去正式皮號買我都未見過假
但如果你想知道你個背囊個長方型tag，係咪真，你公司啲八婆女同事個袋係咪真，或者身邊啲濕尻偽文青拎住個clutch係咪真，想恥笑下，都有方法嘅。
不過講明先，鉻鞣係比較難分，我請教過一啲前輩甚至皮號老闆，佢地嘅分辦方法同我一樣，所以如果有人知道更多，分享下。
植鞣革除咗睇光澤，仲可以睇毛孔平唔平均，係咪自然。顏色有冇因使用時間變深。想進階啲可以睇埋橫切面嘅纖維。
鉻鞣就比較難，用文字冇咁好，所以用例子答你
如果你禁落去有呢個效果就係真
如果係假佢唔會有向中心變型個效果嘅
大家不妨補充
一陣到點揀喇