依本書其實係2005年出版，經過書局好多次都比佢個名吸引左，加上係不同既媒體都見到依本書既推介，不過唔係好知本書講咩，最終都無機會買到。直至去到上年既一次舊書活動見到有依本，就即刻買左佢，之前先知道原來係講關於二次大戰既故事，令到我依個歷史撚更加有興趣開始睇。
作者既寫作手法有D特別，第一，佢寫作既角度可以話係用第一身，話第三身又得，但依個手法可以清楚咁交代晒成個故仔。第二，依本書多次用到先講結局，再講過過程既手法。無錯你會問咁既手法會令到無左一份驚喜既感覺，但係作者既功力就係可以令到你明知結局係點，但到左睇個刻都會覺得緊張，甚至感動。
本身主要都係講德國人，猶太人，佢地係二戰時既德國既生活情況。透過幾條唔同既線，用親情，友情，愛情去交代返成個故仔，每一條線都好感人。
最後關於偷書賊依個書名，作者其實都係想帶出文字既魔力。主角就係透過文字去認識，鐘意依個世界；同時亦因為文字而討厭，厭惡依個世界。
總結黎講，依本書我覺得係絕對值得推介各位巴打。
