想講吓余華既《第七天》，呢本小說係講主角死後七日内既所見所聞，從而反映咗中國社會既不公同腐敗，低下階層所面對既無奈同絕望，以及當代社會扭曲既價值觀。
書入面個主角係死後既世界，見返佢既爸爸同契媽、前妻、朋友等等，本書既每一日都會倒敍生前佢哋點識、有咩關係、點死等等，所有人物間既感情線都補排得好精妙，仔細諗返其實所有主角同佢周遭既人物都係死於非命，可以話係畸形社會下既犧牲者，但反而死後大家放低執著同分歧，互相尊重同幫助，死無葬身之地竟然會係一個烏托邦。
呢本雖然比起《活著》嗰啲會無咁重既文學味道，但係作者喺人物感情方面描述得好好，主角對佢爸爸、契媽既親情，主角同佢太太、MK情侶之間既愛情，仲有警察同犯罪者之間既友情，作者用一啲好簡單既對話，已經令到讀者好投入到當中既感動起伏，亦同時會感慨係喺一個混濁不堪既社會講公義同品德係幾咁荒謬。
總體講，本書好似講緊一個光怪陸離既死後世界，但賣腎、棄嬰等等又偏偏係現實社會既投影，而且小說入面人物之間既既感情都係好感動既。如果巴打都喜歡睇描述人物同社會既小說，呢本係好值得一睇既。
“與現實的荒誕相比，小說的荒誕真是小巫見大巫。” — 余華
分享吓書入面一啲句子：
1. 沙發那邊的貴賓們沒有了聲音，豪華貴賓室鎮住了沙發貴賓室，金錢在權力面前自慚形穢。
2. 後來他在我的生活裏悄然離去之後，我常常會心酸地想起這個夏天站台上的情景。我在他二十一歲的時候突然闖進他的生活，而且完全擠滿他的生活，他本來應有的幸福一點也擠不進來了。當他含辛茹苦地我養育成人，我卻不知不覺把他拋棄在站台上。
3. 離去時，李姓男子幾次回頭張望，張剛看出他渴望前去安息之地的眼神，用自己骨骼的手拍拍他骨骼的肩，對他說：”不要等我了，你先去吧。” 李姓男子搖搖頭說：”我們的棋還沒下完呢。”
– by Zzz
呢本都睇左一排細節唔記得，我覺得睇到余華d文字西洋化左好多，
同時好多句子似係左度右度先寫到出黎，成為左金句
個手法幾新鮮，用已死之人自行行動呢個咁怪誕ge背景，去同大陸社會果種BOSS級怪誕同枱而席，
沖淡左一般人對大陸各式不合邏輯事件ge麻木感
同埋覺得余華幾有良心，上晒神台仲會寫出咁平易近人小說，無論教化定療傷都係正面影響
– by 五月街
2/2017