抗爭者的思路

14 Aug 2019 by 亞里士多德你唔少 source

香港既抗爭係全球關注，獨一無異、無地方可以比較既。香港人沒有槍械，沒有軍隊，沒有武器，只有一顆赤子之心同熱愛香港既心（特別係一班學生）。真誠既行為打動左唔少覺得香港無希望既或者行屍走肉既人，重燃點起每個人都能夠做少少野既初心。兩個月以來，係黑暗中探索出路，懷住百感交集既心情，不知來去何從，只求搵到一絲曙光！抗爭者要做既就係到處嘗試，到處碰壁，逆流而上！

講咁多廢話，同路人都知既，只係想鼓舞一下大家，以下就係我想分析同釐清抗爭人士既思路，無論係幕前出去落街幫手或者係幕後既種種文宣工作，都應該要有既態度同觸覺。希望帶到個畫面比有d迷茫，無乜方向，或者覺得絕既人，有另一種思考方式。實唔實用就見仁見智啦！

行動守則（自訂）
我為自己訂立既行動守則，每次發夢前都要諗下，咁我會逐樣解析。
咁我用咩準則去定下行動守則？我會考慮以下幾個因素：

1. 時間
特別係入夜時份，越接近凌晨就越少人，呢個係必然既。尾班車前要返屋企，少一批；住得遠怕走唔到，少一批；驚警黑入夜亂黎，少一批。越夜越危險，唔係街坊既話（咁佢行兩步就返到屋企），唔會同你留夜。有一個講法係12點定律，地鐵停駛前散水，又係一個限制黎。

2. 地區性/地勢
交通越唔方便越少人！就之前火炭被捕人士運去馬鞍山警處一事為例，屌你老味山卡啦地方+凌晨1點幾，雖然都號召到幾百近千人，但係根本唔會同防暴狗對峙。可以走既路唔多，一邊就山，一邊就一條大馬路走，有車無車都人人自危，封路包圍就仆街了。每個地區都有其特性，唔係個個前線都識路識玩，少左呢方面既知識就好難決定之後做乜。（留？轉場？）

3. 行動手段同目的
簡單黎講就係每次行動到底你想做d咩？想達到咩效果？就比較早期既抗爭為例，612係就住政府唔撤回修例甚至硬推而行出黎示威，可以話主要目的係100萬民意被漠視既民憤表達。結果黎睇，政府強硬處理手段造成200萬+1既遊行同行動升級。728元朗遊行就係針對警黑勾結既民憤表達同要逼使政府回應五大訴求。結果就係逼到d狗以雙重標準逮捕少量元朗恐襲人士，五大訴求依然漠視。71衝擊立法會就係破壞議會入面象徵制度不公既所有野，以表達對港共政權既不信任同對政府施加壓力，實行政府不回應就行動升級，同時加入五大訴求最後既一條「我要真普選」。

逐樣講，612就一切行動升級既開始未有話散唔散水就唔講啦。728元朗就可以講，手段：以武制暴；目的：顯示出抗爭者既決心，唔會怕你黑社會既！目的達成左其實可以收皮走佬，用呢兩個準則做其中一個散定唔散既理據。71立法會用既手段：首次強闖立法會，破壞象徵性物品；目的：實行行動升級承諾，進強逼政府回應民意。入左立法會個下其實好轟動，係比同路人去睇到有人肯走出暴力潔癖既陰霾，又比所有香港人上左堂政治課，真係希望既開始黎（我覺得）。少少離題，事後孔明去睇，示威者並唔係想佔領立法會，死守立法會，只係短時間既佔領回應記者同塗污抗爭對象。然後上映一齊黎一齊走既美好一幕，帶有共識既抗爭價值觀就係咁出左黎（近期既be water都係抗爭價值觀）。
上面呢段係我前面無乜人睇過講「散水」既post度講過就直接copy&paste出黎，會有少少outdate，咁我就再加以補充。
最近期發生左811血腥鎮壓出現左更多警權無限大既行為，放鬼混入示威者入面高調拉人、放火、用榴彈砲射警察再屈示威者、直接係葵芳地鐵站放Tear gas、人神共憤既近距離用布袋彈射眼！……等等，就衍生出癱瘓機場行動同埋幾個問題：1. 捉鬼問題、2. 街頭抗爭風險問題、3. 民意問題（？）。咁我會係最後再分析。

4. 風險與回報 （最重要既因素）
承上，你有左明確既行動手段同目的，咁之後你就要諗達到目的既手段有幾大風險同回報，然後將兩者放上天秤下去衡量自己做到咩程度。就用最近既事做例子，810大埔遊行當日基本上係九龍新界兩區到處快閃，行動迅速，遍地開花。由大埔＞大圍／沙田／黃大仙＞紅隧＞尖沙咀＞藍田／荃灣。度度都留有堵路足跡，走都走得好快，記者有d都跟唔上既。你問我成效有幾高？我可以答你唔高，但點都要同大眾／覺得唔關自己事既人講，抗爭就係每個人都要付出代價！快閃既被捕風險（以未有鬼高調親自拉人呢個資訊去睇）係無同防暴對峙咁高既，而回報都唔係高，係針對市民既行動，引起更大既社會回響。（先不評論對錯）咁既然回報其實唔高，同防暴對峙其實係不太理想。有見過人話要狗一次比一次難清場，其實並無道理，你可以加重警察既負擔其實效果幾好（30000警力減文職減pc仔），但好可惜7月起已經唔會無警力不足既問題，有外援黎幫手，數量一定唔會少既，所以依家唔會再用呢一套講法，亦唔會做！
812癱瘓機場事件，可以話係咁多日以黎最成功既抗爭方式。首先，目的就係要癱瘓機場同向旅客做文宣工作，風險就當然係班狗封鎖交通，無人可以走到，而機場既地理位置係一個島黎，無交通就只能行路走東涌，如果有心拉人係死撚晒既。另外，因為811既種種事發生，我會以最壞既打算做分析，理由好簡單，你唔能夠用正常人既思維去分析班狗（或者係共黨）會有乜野行動，佢地係完全超出常理範圍。舉例子：佢地既內鬼可以惹起火種然後武力鎮壓，打到仆街再逮捕，咁機場無路走就當然死晒啦！機場既現場情況其實相當混亂，當時太多人，係收唔到準確既資訊，以我上面既風險分析為基礎，係一定要走。理由係4點30左右機管局宣報6點打後既機cancel，目的達成；另一方面睇，假如班狗要武力清場，佢地一定會停晒航班先，然後封鎖交通，之後宣佈非法集會，係劇本黎既。當時收到既資訊係按住呢個劇本行，即使係假情報都一定要走（目的達成左）。係回報方面當然唔錯，經濟損失、本地社會有回響同全球既關注，同埋無人被捕。（題外話：有d唔明點解知道航班cancel晒都要叫人入機場，唔太明白）

順便講下捉鬼同民意既問題，民意方面，就請各位搞清楚同路人係唔會割席！割席定義就係佢自動退出運動做港豬或者將你排除出運動當你係鬼。根本就唔會有同路人做到割席，佢可能會係當時講難聽說話，會有人身攻擊，會阻止你既行動，但絕對唔會係割席！當有呢種情況發生，就先停落黎三口六面講清楚，屌人唔係唔得，唔該比理由講道理！講到尾都係執著係「手段」上面既爭執（以我所見），何必兩邊標籤分化？根本就係一時之意，上晒頭先會發生既。去到全香港民意方面，查實係今時今日我地係唔再睇重民意，民意鞏固同宣傳要繼續做，但係唔好比民意束縛住自己（當然唔係話你感情用事，嬲就去殺人，跟著行動守則去做），基本上811發生既事係人神共憤，有良知既人已經會理解。衰d講句，我諗唔到有咩係一做錯就全部民意逆轉，如果有人諗到，政府早就做左啦，又有內鬼。
（題外話：其實７月以黎D鬼做咁多放火呀榴彈砲呀，又有警員燒傷個d，就係想民意逆轉，結果咪又係一面倒或者係兩邊打50大板）
去到捉鬼呢方面，有咁多爭議我就先觀望狀態，因為鬼係源源不絕既，捉到一隻身邊都可能有幾隻，其實相當難對付，但係捉鬼未嘗唔可以做，因為有成功例子，只要捉到佢，少一個就係少一個，同埋其實d鬼比人捉到都驚啦，都唔知捉住佢既人會唔會對佢做d乜架嘛。另外，如果搞錯左係同路人，都會理解體諒既，唔會話疑神疑鬼，自己人打自己人既問題。（可能我諗得太理想，講真捉鬼呢部分我唔太肯定，只供參考，自己諗下啦！）

有左行動守則呢個基礎之後，最後就要講
心態
驚！每個人都會驚，驚係人既求生本能反應，唔可以輕易無左驚既情感。先接受自己可以承受既風險去到邊，再決定出黎行動既定位，唔係亂咁行亂咁跟大隊既。如果無諗過既話，當面對緊急情況既應對反應係一定會慢，咁慢半拍都死左啦講真個句，無時無刻都要保持冷靜，係腦入面預演一次可能會發生既事，再係現場盡量收集情報，做最好既決定。尤其是係街上面既行動，如果你一個人慢左落黎，會連累到全部比你拖慢既人。一定要果斷做決定既！
呢場群眾自主運動由一個又一個人累積上去，最後做到依家咁大既規模，請同路人有自覺每一個決定，每一個行動都可以影響到事態發展！盡量令每個同路人既素質提高，係我既責任！

最後簡單咁講一句，勇武既人可以繼續做前線亦可以返屋企做文宣，相當靈活既；但係你唔可以叫一個和理非突然上前線企咁前，係有種種限制既，勇武唔該親身少少，你地唔係一時半刻有人頂替到。當去到有d位你認為一定要企出黎以死相搏既，當然唔會阻止你。