14 Aug 2019 by 倫敦人妻先生手記 source
(編：係回應13Aug2019堵塞機場運動中，部分遊客被阻止登機鼓燥，引起多人討論。有示威者於第二日去機場道歉)
我想回應兩句經常聽到嘅說話：「咁樣做會失民心」、「咁樣做會俾藍絲同政府有黑材料」。
首先，係「民心論」。
不嬲衝衝子上前線都係咁不顧形象同儀態架啦，佢地做嘅嘢唔會elegant架！你示範下點樣優雅地抗爭，用蘭花手彈黑警耳珠，再錫佢春袋好冇？至於話尋晚前線對那個疑似中國公安好暴力嘅人，我想問有幾暴力？你記唔記得小柏林督察捉到示威者係點架？係活生生拗斷對方隻手架，係拗斷架！好暴力咩？咩叫以眼還眼？依家眼睫毛都未還一條，你就話好暴力啦？當前線俾卧底黑警拉嘅時候，我地除左叫「好嬲」之外，係咩都做唔到架！如果唔認真反擊，只會鼓勵更多各方勢力混入來，再拘捕前線，前線見到便衣就火滾是很可以理解吧？
當然，係咪做得唔夠好？係架唔好架！大佬，你估佢地真係建制派所講「收錢做野、受過精良訓練」架？無償義工黎架，邊個中學修過「時代革命」基礎入門課？大家都係半路出家，錯真係好正常，你真係當佢地美國海軍陸戰隊派過黎嘅外國勢力呀？你暑假工派傳單教下補習，佢地暑期工係同政府搏殺呀！人地幫完手，你第一句要講嘅係「多謝」，而唔係嫌三嫌四，呢個係基本禮貌。你真係好唔滿意就開個眾籌請僱傭兵黎做前線，到時你要守咩公約、你要打咩文明戰都無所謂，人地真係專業兼讀過呢啲嘛！
咁邊個理民心？咪就係不停講要「得民心」嘅和理非同後勤囉！（同埋你問自己到底係失民心，定係純粹唔岩你心水？唔好下下都拎民心出黎好喎）我地都有自己的角色架，我地出黎幫手「縫補補」，幫忙修補裂痕、甚至幫忙清理街道、在地鐵站外派口罩，大家合作左兩個月一向都係咁架啦。無左和理非修補裂痕，社會就容易轉風向打壓抗爭者；如果無左衝衝子，和理非會做啲咩？就係會好乖好優雅咁坐低俾警察預約拘捕。
所以，前線很可能會不小心做失民心嘅事，不堪入目、很「黃」很暴力的事是正常的。但今次佢地唔擋住班黑警嘅話，今次機場集會，大家就會再次坐低「公民抗命」被捕，然後一鑊熟，你唔係覺得班黑警會俾你感化到呀嘛？你鬧佢之前，麻煩你先肯定左佢地今晚嘅貢獻同犧牲，你先好開口講下一句，我講多一次，呢個係基本禮貌。
唔信？你望下上星期何式凝個和理非集會？好優雅架，又無衝衝子，結果呢？一鋪獻左七十個頭，係最高戰損的一場抗爭呀！
大家要明白，勇武派跟和理非係緊密合作的關係，而非從屬的關係。勇武派無絕對嘅必要聽和理非的命令，亦唔需要和理非去批准去做任何野。同樣地，和理非亦唔需要向勇武派請示行動。大家兄弟爬山，各自努力。
所以，麻煩雙方都對彼此禮讓一點，批評可以，但情緒發洩就麻煩你自己吞返落肚，無人有責任當你的情緒垃圾桶。
至於「俾藍絲黑材料」呢種說法，對唔住，我真係笑左。黑警做左咁多野、勾結黑社會又打盲人隻眼，夠唔夠多黑材料？然後你覺得佢有介意過你地講乜野咩？前日隻黑心狗乸大言不慚話自己拎OT拎到手軟添呀！人地都唔介意你點講，咁你又做咩咁介意藍絲點講？反正藍要變黃嘅話，上個月已經變左，餘下呢一班係唔會為你改變架喎。又得罪講句，抹黑運動的建制機器根本無停過，我們個女仔俾人打盲眼，人民日報講咩呀？佢話係佢係中示威者鋼珠架！根據「黑材料邏輯」，難道我要譴責受害人提供黑材料？不可能啊！
欲加之罪何患無辭，14年夠和平啦，咪又係俾人抹黑到癡線？你就算全體坐喺度，佢地一樣會抹黑你，會信呢啲假消息嘅人，無論點都會信，你到底有幾唔了解邪惡？！
最後，請容許我講多句：輿論戰並唔係前線應該擔心的戰場，那是文宣組和我們一眾鍵盤戰士的工作，正如黑警打人嘅時候係唔會理警民關係科諗咩，佢地自然會幫忙善後。我有我的崗位，你直嘅我幫你拗孿佢，你孿嘅唔駛旨意變返直，就係咁簡單。
#我無條件支持前線
#我唔理你要俾咩批評
#但第一句麻煩係好多謝你的付出
#然後再心平氣和講道理
#你有壓力我有壓力
#抗爭係好骯髒的
#革命不是請客吃飯
#扔核彈都唔割蓆並唔係講笑的
#做唔到呢點麻煩你唔好應承
#若你曾講的都不可算真
#請不要愛上我這麼一個人
#而其實我太認真心中很記恨
#都是你的錯