7 Aug 2019 by ～小妖精～ source
序言
好多示威者成日諗住將目光放到去選舉就可以光復香港, 允其係立法會選舉。但係我相信大家都知, 香港直選35席有個叫做「比例代表制」既選舉方法, 呢個方法既存在令到親共陣營響民意差距唔夠大既情況下, 佢地會得到足夠多既議席。響直選既議席加上幾乎都係保皇既功能組別下港共係可以輕而易舉贏到35席。咁有個好明顯既問題就係, 響咩條件下泛民主派可以贏到35席以上?
我做左少少modelling, 要過35席既條件係咁樣
1. 泛民:土共 既票數比例要大於7:3, 低於呢個比例直選最多只可以攞到25席
2. 泛民每個區出既隊伍要有嚴格限制, 投票既選民亦要嚴格配票 (出生月份1,2月投A, 3,4 月投B之類)
3. 功能組別要大於12席, 其中超區3席, 30席功能組別最少要9席, 即係代表泛民要爭取多3席返嚟。
簡介
泛民主派過去輸既原因係咁
[1] 意識形態相似既參選人數遠比目標議席既多, 結果大量既票都係射左落海。
經典既例子就係
– 九龍東連續兩屆(2012,2016)激進民主派內鬥, 結果九龍東尾席都係比土共袋左。
– 新界西2016年亦出現同一個情況, 結果亦係比土共袋左尾席
[2] 門閥之見太過嚴重, 過去唔同派既人幾乎不能過票。
例如毓民系既票大約佔左全香港15%既票, 但係呢班人以當時既情況可以話係永遠都唔會投民主黨。
[3] 泛民主派當年黨同伐異, 並唔能夠完全代表民主派既聲音
呢個我相信係well known既。
咁點解去到今日呢啲問題會冇左呢?
[1] 毓民系既人基本上退曬
我自己算係毓民既忠實支持者。由佢2008年參選, 2010年五區公投, 2012一票不投民主黨, 組人力, 2016年熱普城選舉, 2018年退熱, 我都係一路走來支持毓民。可惜既係, 佢地組織既做事手法的確會令人好反感。今次係自2008年嚟第一次冇毓系既人參選既立法會, 呢個有助激進派同溫和派同流合作。
[2] 泛民主派集體右移
當連民主黨都出去第一線食tear gas, 毛姨姨都屌TVB果陣, 就知整個泛民既ideology有左範式轉移。民主黨, 公民黨再唔係以前溫和派, 而都係勇武派既一部份, 咁樣亦係有助大家配票。最好既例子就係大家對鄘仔既觀感大幅好轉
[3] 新一代主導既社運提倡不割席不分化兄弟爬山
呢點係最重要既基礎。6月以來既抗爭有好多次具爭議性既勇武行動, 最後都被大眾包容左, 咁既情況下證明泛民主派有能量重新整合
模型
響直選入面既選舉, 係有個方法可以估算響有N%既票既情況下最多可以攞到幾多席。我地舉個例子
我地假設泛民:土共票比=6:4, 目標區域係九龍東 (5席)
咁既情況下, 泛民同土共都會有兩套策略, 分別叫進取同保守。進取既話就係議席比例+1而保守就係議席比例. 響咁既情況下泛民既策略就係
進取 : 4席, 每席15%票
保守: 3席, 每席20%票
而土共就係
進取: 3席, 每席13.3%票
保守: 2席, 每席20%票
咁既情況下我地可以畫個表
香港五個選區, 只有5,6,9三個議席數。我地可以做埋另外兩區既議席策略圖, 呢兩個玩法就多少少:
響呢堆表度你就會見到
1. 只要土共唔玩野, 保守/中庸作風, 咁既情況下佢地基本上會guarantee有 2+3+3+4+4 = 16席, 即係泛民極限只係得19席 (19/35 ~ 54%)。
2. 呢個model係assume緊配票可以極大化, 響泛民內鬥下, 土共係可以偷到雞
3. 事實上6:4既票比算係一個好aggressive既assumption. 因為過去既票已經跌穿6:4黃金比例。今屆雖然有35萬新增選民, 好有可能會回升番去6:4既黃金比例。
要令到土共響直選議席上更落下風, 要做到既就係迫佢地響五區都用超保守或者超激進策略, 咁既情況下佢地會有2+2+2+3+3=12席甚至更少, 咁既情況泛民就會有23席或以上。咩情況下佢地會用超保守既策略?
1. 佢地自己互相介票。簡單講我地需要一個土共版既毓民 (對唔住我真係好尊重毓民, 但係佢既影響真心係negative)
2. 佢地既票數比例跌穿40%. 咁究竟要跌幾多佢地先會驚? 我上一次開post講民意就見到林奠既民意比03年既仲要差:
等我地做少少簡單既推論, assume 泛民有60%, 65%, 70%, 75%, 80% 票下最多攞到幾多票, 呢個只係tedious computation, 我直接比結論就得啦:
1. 9席既新西/新東只有土共跌到得番3成票(7:3)先會有質既轉變. 咁既情況下泛民幾乎係保證有7席,
2. 同理, 5席既九龍東只有去到2成票(8:2)先會有改變
3. 而6席既九龍西同港島原本響6:4既情況下采取中庸策略(求4席) 就可以保平安。只有土共票數跌過2成(5:1)泛民先有可能再得一席
所以: 響呢個情況下土共就會跌到2+2+2+2+2=10席, 加上現有功能組別泛民就會剛剛到半。但係呢個situation既難度係相當高。
結論
要泛民響議會主導, 需要有幾個必不可或少既條件:
1. 大家要團結, 唔可以分化
2. 配票, 講左好多年
3. 功能組別再攞兩席, 去到12席
4. 爭取支持泛民既票去到7:3比, 咁樣直選先有攞25席既機會。就算得6:4, 23席既直選+12席既功能組別亦足夠泛民擋住所有立法會既議案
當然呢個只係very ideal既model, 但係我地咁多年嚟連model都冇研究過, 我覺得我地好慚愧。