(編註：本篇作者將部份5 Aug 2016梁天琦嘅演講打字文字稿方便大家廣傳。而本站係收錄#11及#14夏二十嘅完整分段版。有條件者可直接睇片。)
24 Jul 2019 by 徐秋分、夏二十 credit to 梁天琦 source
過往我地成日強調話我地要勇武抗爭，我地唾棄形式主意、唾棄失敗主意。
咁係咪代表我地一定唔可以嗌口號、唔可以搞遊行、唔可以搞集會、唔可以聽歌？
其實一直都唔係。
我地過往喺金鐘呢個地方、喺旺角，當我地喺雨傘革命走上前線嘅時候，點解我地唾棄舊有嘅模式？點解我地唾棄舊有嘅政客？
因為佢地教條主義：和平、理性、非暴力、有啲人仲覺得要非粗口。
佢地覺得呢啲野係天條，一定唔可以違背。
結果，當日喺金鐘，
有義士衝出龍和道嘅時候，
結果就比一班教條主義嘅示威者拋棄。
我地反對嘅係呢一樣野。
我地反對嘅係教條主義，而唔係和平集會，又或者公民抗命本身嘅能力。
依一樣野我喺新東補選嘅時候已經講過一次。
我地呢個社會如果要攞返我地應該有嘅權力，我地唔可以再教條主義。
條條大路通羅馬，邊一個方式可以推返呢一個政府，呢一個方式就應該要去做。
相信和平抗爭嘅人、相信公民抗命嘅人，繼續公民抗命。
相信佔馬路、相信絕食、相信罷交稅等等和平手段嘅人，繼續去做 —— 我鼓勵你地去做、我希望你地去做。
我唔希望你地因為有人批評你地嘅手段，結果就完全放棄你地相信嘅野。
同時間，相信勇武抗爭嘅人，一樣都要繼續做。
近呢幾個月我地曾經發起過示威 —— 係71一個示威 —— 喺中聯辦外面，我地失敗左。
我地連累到有好幾位義士，出到黎諗住支持我地，但係結果被捕，乜野都做唔到。
Plan A做唔成、Plan B做唔成、Plan C都做唔成，證明左啲乜野野丫？
我地反抗政府，攞返我地應有嘅權力嘅時候，我地要因時制宜。
當晚有近千個警察守喺西環，如果我地盲目相信，勇武抗爭係一定會成功，只有勇武抗爭先係一定要行嘅路嘅話，我地當晚就會一齊去送死。
我唔想見到有人犧牲，亦都唔想見到有人係被推上前線。
但喺一個必須嘅情況底下，一個兩難嘅局面底下：一係就留低，一係就企喺到抵抗嘅時候。
我地先至要孤注一擲，勇武抗爭，我希望大家會明白呢一點。
唔好再繼續教條主義，唔好再盲目相信自己嘅嗰一條道路，係一定會成功。
「必須要行呢條路，而其他所有道路，都係唔應該行」呢個諗法係錯嘅。
我地絕對要因時制宜。
［部份略］
到今日，其實我思緒仲好混亂嘅呢段時間，因為發生得太多事啦，呢兩個禮拜。
其實我乜野選舉根本都未開始準備、仲返緊學，呢一啲政治嘅旋渦、政治嘅風波就係咁湧埋黎，要不斷去面對。
所以到依家嘅依一刻呢，我個頭腦非常之混亂。
到底要講啲乜嘅野，先最能夠鼓動大家獨立嘅意志？
到底要講啲乜嘅野，先至最能夠令到更加多人醒覺，走出黎反抗？
我仲未諗好。但係有幾個主題我係想講嘅，咁就寫左喺手板。
第一樣野，係政治。
乜野係政治呢？有人話係眾人之事。
而我睇，政治嘅本質其實就係權力嘅分配。
當我地講一個政治問題出現嘅時候，其實就係講緊呢個社會上嘅權力、資源到底係比中央繼續集權？或者係比呢個社會上嘅權貴，繼續保持佢地嘅權力？抑或呢一啲嘅權力會轉移到另一個持份者，例如人民、例如香港人？
咁呢兩個禮拜發生嘅事係乜野？就係政府將佢地本身法例上無嘅權力延伸 —— 無限延伸，白紙黑字寫明嘅法律，政治唔跟。
政府延伸佢嘅權力，剝奪人民本身應該有嘅選舉權、被選舉權、以及言論自由，所以呢一個係一個權力分配嘅問題。
當我地呢一班香港人走出黎反抗，追求一個政體嘅改革，或者好似今日今日咁樣，追求呢四隻大字(編：「香港獨立」)。
我地講緊嘅就係我地要奪權，我地要攞返呢個社會上我地應有嘅權利。
呢一個社會，呢一個香港嘅主權，
唔係屬於習近平、唔係屬於中央、唔係屬於共產黨、唔係屬於中國政府、亦都唔係屬於特區政府 —— 呢一個社會嘅主權係屬於於香港人。
主權永遠都應該在民，唔應該在於北京。
但係香港嘅情況係點樣？
香港有百多萬嘅香港人，有血有肉嘅香港人，一百幾十萬，香港人無權選出一個代表佢地嘅代議士、香港人無權被選舉、無言論自由，香港人嘅權利完全比政府剝削。
依一個係乜野社會呀？依一個係一個獨裁嘅社會。
有獨立意志嘅人、追求意志嘅人面對一個獨裁政府應該點樣？
革命。
但係問題就黎啦。
革命？會連血架喎。
革命？會失敗架喎。
革命？會有犧牲架喎。
呢d情況當然會出現啦。
如果呢個政府唔令你嘅革命失敗、唔打壓你嘅革命、唔令到你有犧牲、唔剝削你嘅權力、唔扼殺你地喺萌芽之中，代表啲乜野？
代表你地嘅革命無效丫，代表你對政府無威脅丫。
所以今時今日呢一個局面好似好差，但同時間亦都反證一樣野：
就我地對香港政府、以及北京政府、中國，我地對佢地構成威脅，所以大家係應該為呢件事出現而鼓舞。
我地丟掉左對香港政府、對特區政府，以及對基本法、對一國兩制嘅幻想，我地今時今日呢一刻開始，我地準備鬥爭、我地準備奪權，呢一個就係今日呢一個集會嘅意義。
第二樣野，係政府。
乜野係政府？政府點解會出現？
政府係因人民希望有一個權力分配嘅機構，去維持社會嘅秩序，先至會出現，政府唔係一個管治人民嘅機構，政府應該係人民嘅僕人。
人民唔應該害怕政府，政府應該害怕人民。
所以相信大家有睇戲嘅應該知道呢兩句說話，喺香港一樣適用。
雖然係今時今刻，仍然有好多香港人係害怕呢個政府。
點解？
政府有武力、政府有權力、政府掌握哂呢個社會上嘅話語權、政府有法律，佢可以隨意解釋法律 —— 袁國強講嘅法律就係法律，呢個就係香港。
政府嘅本質就係一個暴力嘅機構，當我地做嘅事，唔符合政府所諗，唔符合政府當權者嘅方向，佢地就會用暴力黎打壓我地。
所以點解我地要強調勇武抗爭？
就係因為，政府本身已經係一個暴力嘅機構。
對住一個暴力嘅機構，我地唔可以仁慈、唔可以懦弱，亦都唔可以再同佢地講乜野仁義道德。
呢一個政府根本就係一個無賴嘅政府、無賴嘅政權，中國就係一個無賴嘅國家，你同佢講仁義道德做乜鬼野呢？
係需要做無賴嘅。
當然有好多人唔想做無賴啦，包括我自己。
但係如果呢個係一個必要嘅方法，去推翻呢個政府嘅話，我願意做呢個無賴。
第三樣野，係革命。
乜野係革命？
大家一定會聯想到流血革命、辛亥革命、死人、冚樓、犧牲、打壓、冤獄。大家一定會聯想到呢類。
但革命本身係一樣乜野事？
革命本身係講緊，一個社會結構、權力分配嘅根本性嘅改變。
一個由下以上嘅改變。
一個由上以下嘅改變係「改革」，由下以上就係「革命」。
大家諗下，到左今時今日，仲會唔會奢望中國同香港特區政府由上以下改革，仲會唔會相信佢地會俾我地擁有民主，擁有自由。
冇可能嘅。
所以我地必須要革命。
而革命幾時開始？
革命其實已經開始。
兩年前點解我地呢班本土派，將雨傘運動叫做雨傘革命？
因為我地知道果一刻就係開始。
果一刻更多香港人知道，我地唔可以靠其他人、唔可以再靠呢個政府「網開一面」。
因為，如果我地要靠政府「網開一面」俾民主我地，呢個只係一種人治。
點解我地要，求當權者網開一面？
求北京政府有一絲善念，知道香港人唔係諗住顛覆國家，只係想要權力同民主，而開啓民主改革？
我地就係唔相信呢樣野。所以926, 928, 1130我地先會走出黎，由下以上向政府施壓。
我地唔希望香港係一個人治嘅社會。我地希望香港係個法治嘅社會。
憲法寫明我地應該有嘅權利，我地就應該要有。
兩年前，革命已經開始左。
只係大家唔知道。大家仍然覺得，好和平好理性好非暴力，非常美好嘅一個烏托邦，好似金鐘嘅夏慤道咁。
但革命已經悄悄開始左，
因為我地唔再相信政府嘅改革，我地係由下以上去扭轉呢個社會嘅權力結構。
革命已經開始，咁到底幾時會成功？
1894年，孫中山仲係度做緊乜野？
佢係度向李鴻章上諫一本書，叫《萬言書》，仲講緊滿清政府應該點樣改革。
相信大家都知道，佢係1895年，冇人理佢之後，成立左「興中會」，開始正式嘅革命。
幾時先成功？
1911年。
由佢開始踏上革命呢條路，用左16年，先推翻到滿清政府。
我唔想掃大家興，唔想撥大家冷水，但係，
革命係一條長路，
冇可能一時三刻就成功；但係，又有可能，一時三刻就成功。
革命係一件好吊詭，好好笑嘅一件事。
但係我地要保持革命嘅精神，我地要影響更加多人，因為當成功果一刻，回望返過去我地就知道一切都係值得。
如果革命成功之後我地攞唔到人民嘅心，民心，我地冇辦法得天下。
得民心者得天下，所以我地首先要做嘅野係影響更加多嘅人。
今時今日，有17%，百多萬嘅香港人相信呢四個大字(編：「香港獨立」)。
我地要繼續推呢個數字上升。
我唔知幾時我地先可以成為社會上嘅大多數，但我知終有一日，我地會係社會上嘅主流。
呢一日係必然會發生嘅事。
因為，即使今時今日，我冇得參選，我冇得再從政，
我相信呢個門常開，一日係呢度，我都冇機會走入隔離呢棟大樓(編：立法會)。
但唔緊要，因為，仍然有另一個人取代我。
後繼絕對係會有人，你地唔應該，將所有希望，擺晒係一個人身上。
一個人當然係代表佢自己，同時間，佢代表嘅仲係一個理念。
你地追隨嘅，應該係一個理念，而唔係一個人。
即使我冇辦法再參選，冇辦法再…，我唔知仲可以做d乜野，係今時今刻。
但我知道我仍然可以影響更加多人，仍然可以繼續宣揚我嘅理念。
我地要繼續影響民心，總有一日我地會成為主流，我地一定會成功。
最後一樣野，夢想。
乜野係夢想？夢想就係… 夢想就係夢想(笑)
夢想係好虛幻嘅一件事；夢想係實現之前，永遠都係好似癡人說夢話咁樣。
我係17歲嘅時候，2008年，咁我唔講具體政團、議員名，
但當時2008年大家都知有邊個政團、議員走左入立法會，
大家都應該知當時邊個係呢個政體嘅領頭人物、代表。
佢地係議會入面做嘅所有野，影響到我。
我中學嘅時候同一個同學講，「我將來想成為一個代議仕，你點睇」
佢話「幾好呀，你都幾啱做呀，你一定會成功嘅，我將來會投票俾你」(笑)
呢樣野今時今日睇好似失敗左，但曾經，我距離呢個夢想只有一步之遙。
而係我追求呢個夢想嘅呢一年，發生左d咩事呢？
其實一年前我只不過係一個廢青，一個畢唔到業嘅大學生，好想畢業，畢業唔到。
一年前我只係一個，係社會上冇人知我係咩人，一個唔知自己應該係社會入面擔當咩角色嘅人，一個廢青。
有邊個會諗到，一年後呢個廢青會成為一個，被政府剝削政治權利嘅，香港人。
有邊個會諗到，一年後呢個廢青，會同佢嘅夢想只係相隔一步之遙。
冇人會諗到，我自己都唔係好相信。
但係，即使我對我自己嘅夢想能唔能夠實現，只係半信半疑。
但係我知道如果我繼續半信半疑而唔去做嘅話，我一定會失敗。
如果我秉持呢個夢想，即使知道好難會成功，即使知道好可能會失敗，即使知道我走出黎會俾人恥笑、唾棄、謾罵、打壓，但我都依然繼續去做。
人冇夢想同鹹魚有咩分別？
所以我繼續去做，所以，一年之後嘅今時今日你見到我梁天琦企左係度。
但其實一年之後我只係一個廢青，搵唔到工，乜野都做唔到，乜野都唔識。
所以大家要有呢個夢想，呢個理想，大家要繼續保持一個夢想，終有一日我地一定會成功。
今時今刻，好多人會恥笑我地，覺得我地係痴線。
但係，一年前邊個會諗到，呢但4個大字會影響到咁多香港人，會令佢地走黎呢個地方集會？
一年之前你講呢4個字會俾人話「你痴線嘅」「打機可能就得」「唔好發夢啦」
但一年之後有呢個集會出現。
咁再一年之後會有d乜野事出現？
我唔知。
但如果我地呢一班人，以及社會上有好多未黎嘅人，繼續保持呢一個夢想嘅話，
我地一定會實現呢個夢想，一定會成功。
呢一刻，非常之黑暗。
但係，我相信大家，好多人睇過蝙蝠俠啦，入面有一句對白
「黎明之前嘅黑暗，係至撚黑暗嘅」(台下人笑)
真係好黑暗，
但係，
黎明即將會來臨。
多謝大家。