25 Jun 2019 by 葉山ゆずき source and discussions
是咁的，我係一個讀緊傳理系嘅學生。六月以嚟，相信大家都比以前清楚邊間媒體係人、邊間媒體係鬼，但仍然有好多平時少睇新聞嘅人對香港媒體嘅立場一無所知，令到自己不知不覺地比佢地洗腦、誤導。有見及此，我整理左少少資料，希望令大家更加了解而家媒體係咩背景。
相信大家都對傳統嘅電視媒體認識比較多，所以我地就由電視媒體開始講起。
TVB、Now、ViuTv、有線電視、香港開電視、港台電視31
TVB、ViuTv、香港開電視都係免費既頻道，而ViuTv同香港開電視係分別隸屬於Now同有線電視。換言之，若然大家唔想睇住CCTVB六點半新聞食飯，可以選擇係六點睇Viu、或者係七點睇Viu／香港開電視既新聞報導黎送飯。
係網媒方面（呢到會集中講只係網上發展、較少人認識既媒體），佢最恐怖既地方，係一眾大家耳熟能詳既紅媒，會用另一種包裝手法去吸引年輕族群睇，所以希望大家以後唔好再係FB Share佢地既Post。
除左大家熟悉既《港人講地》、《HKG報》等，其實活躍係FB既《點新聞》係隸屬於《文匯報》、《橙新聞》大老闆係中聯辦，《輕新聞》老細亦都係紅底。
至於係FB老是常出現既《巴士的報》，雖然立場尚未算偏頗、亦都聲稱同《星島》係無關係，但其實佢地既Office，就正正係星島大樓入面。
另一方面，想點名講下《東方》呢幾個Page。
《港呢啲》
https://www.facebook.com/onccgongnedi/
《港實測》
https://www.facebook.com/oncctesthk/
《港。故》
https://www.facebook.com/oncckonggu/
雖然以上講既呢幾個Page既內容同政治無關，但我實在睇唔過眼《東方》一路寫臭香港年輕人，一路係FB食住後生仔條水，所以各位以後仲睇唔睇就自行衡量。
而《政策．正察》呢個FB Page，內容看似中立有深度，但其實都係由董建華創立既「香港團結基金」所創立，所以你會見到佢會係好多重大議題上出Post，暗啞底幫政府手清洗太平地。
https://www.facebook.com/ppi.ourhkfoundation/
咁到底有咩網媒可以睇？除左《立場》、《本土》之外，想大家都多D支持下知名度唔高既《眾新聞》。
《眾新聞》嘅創辦人係一眾資深既傳媒人、包括曾經比人斬既《明報》前總編劉進圖、李月華等，係一個相對「信得過」既媒體。
至於《端傳媒》，曾經有指佢都係紅底，但其實報導內容算係比較有深度既一間媒體，政治立場亦未見有偏頗，大家可以自行斟酌。
至於老細係于品海、有出紙本周報、曾經撤回過64報導嘅《香港01》，呢間野非常擅長玩Facebook，建立左好多個Page攻陷唔同族群，仲有佢旗下嘅外賣服務《e肚仔》嘅插畫廣告Page《搵食姐》。呢間野嘅內容時藍時黃，大家睇嘅時候一定要小心。
pic
紙媒方面，相信經歷過反送中頭版廣告後，好多人而家都只信得過《蘋果》，亦都對《明報》感到失望。事實上，《明報》係賣比而家既老細張曉卿前，曾經都賣過比于品海。係大事大非面前，《明報》文人辦報嘅精神己經不復存在，實在令人惋惜，個人覺得只有調查報導仍然值得一睇。
老細係擦鞋狗地產佬何柱國嘅《星島》、賣百份嘅《東方》，呢D真係睇都唔洗睇。《信報》、《經濟日報》、《商報》雖然聚焦財經，但《信報》賣左比李澤楷之後，由發生練乙錚事件到最近同王迪詩嘅爭拗，相信已經逐漸被染紅。
香港係一個媒體百花齊放嘅地方，所以其實仲有好多媒體無講到，各位巴絲可以留言補充。
其實香港作為一個彈丸之地，可以容納咁多間媒體其實係一件好特別嘅事，奈何中共已經識用媒體向香港人落手，希望大家係仲未死淨官媒之前，可以珍惜每一間報導真相、堅持不偏不倚嘅媒體，提醒身邊嘅人要小心選擇接收資訊嘅渠道，捍衛香港僅餘嘅言論同新聞自由。
++++++++++++
#23, #44
仲有傳真社都係高質媒體!
調查報導唔易做!
大家唔買報紙，都記得捐錢俾佢地!
#59
之前見到端新聞整既圖
