#575科學怪人
咁夜晚就應巴打既要求約略咁講下血濺分析啦
(11. 血濺分析)
血液雖然算係一種「水溶液」，但係相對於水嚟講算係比較傑，因為佢真係溶咗好多野喺入面
所以血液既表面張力係非常之高，亦都因為咁，血滴係可以比水滴大滴得多，而且係呈球形；佢既流體力學方面都同水有好大分別一滴水從高處跌落地，果滴水係會散開並且分裂成幾個更細既水滴
不過如果係血液的話，喺正常重力既情況下就唔會發生依件事，而係都只會係一滴過
血液從越高既地方滴落嚟，血斑既範圍就擴散得越開（10尺高滴落嚟會達到maxmium size）
依個性質所帶嚟既重點就係，血液傾向依附喺一個表面而唔會容易散開，一旦見到散開就即係代表係有足夠既外力作用(例如子彈、刀、槌等打擊)當見到現場血跡斑斑就更加揭示到造成傷害既痕跡
一個血點如果係90度垂直滴向表面(例如重力作用下著地)，會係偏向圓形；
不過睇返上圖，表面係咪平滑對個形狀係有影響
而當見到血點係長型既，就即係果滴血係喺某個角度被外力整上所依附既表面上(例如牆壁）
計到個角度既話，就可以從中估計果下血濺喺邊個位形成(IP都唔駛check)
sin -1 A = W/L
A 就係血濺impact 既角度，W: 血跡闊度，L: 長度
咁都講下常見既血濺特別形態
Swipe: 帶血既物件喺表面上移動，會形成抹痕
Cast-off: 當帶血既重物（例如武器）揮動，一Fing 就會根據揮動方向造成密密麻麻既血斑，痴喺牆/天花
Spurt: 當動脈被整斷之後，由於傷口既血壓升降，會做成噴射現象
#576伽羅
/以前試過離心機fing支血，分返血清出黎
嘩屌，見到有支血入面有薄薄的一層油係道
原來肥佬血入面真係有咁多油，多到分到成層油出黎/
成層油 真•血脂
#577XCIX
動脈果幅好過癮
#578絲打不絲
樓主 有興趣想買本書睇
有無介紹？最好一本簡單d 一木深入d
#580科學怪人
/樓主 有興趣想買本書睇
有無介紹？最好一本簡單d 一木深入d/
入門既睇依本
Forensic Science: The basics /Jay A.
另一本要有一定science基礎，講得稍微深入d
Forensic Science: modern methods of solving crime / Max Mouck
#581科學怪人
今日就講下濫藥啦
正確d 講其實就應該叫做物質濫用（substance abuse）
(12. 濫藥)
咁主要就會分3種：
1. 服用合法既物質，但唔係用於果樣野設計既用途，例如無咳既人大量飲咳水
2. 服用非法既物質，海洛英、可卡因之類
3. 服用合法既物質，而且係用於設計既用途，不過用喺唔合適既時候；例如酒後駕駛、運動員食類固醇之類既禁藥
講得法證，我當然就只會著眼於非法既物質(illicit drugs)
喺香港，未經許可販運、製造、管有喺「危險藥物條例」所包括既藥物都係犯法既
咁從藥品既影響去講下
2007年醫學期刊The Lancet 就有篇文，講有人建立咗一個比例圖，按照「依賴性」同「對身體既害處」去比較返一堆有害物質
#585XCIX
照你幅圖睇其實都只係一半半
實際都係睇條友點用
#586SUV
/照你幅圖睇其實都只係一半半
實際都係睇條友點用/
只要過左量，所有野都可以有毒
(詳情可以Google LD50)
藥理學一個重要concept就係有幾多%會入到血，做到野 (bioavailability)
由血/其他體液入面的藥物/其代謝的廢料濃度，可以推算返佢幾時食，同埋食左幾多
當然，不同的攝取方式(打針定口服，藥丸定藥粉) 都可以有影響
最好當然係加埋法醫的報告
冇的話好難有提向性的報告
#587SUV
我用大家都熟悉的必理痛做例
普通版同特強必理痛的分別，其實好大程度上係粒藥溶解速度的分別
(當然讀書做lab玩過，特強好似15min溶哂啦)
份量都係相同，500mg (0.5g)
另外佢有隻傷風感冒熱飲，好多人都話掂，但其實份量上佢得333mg (0.333g)﹐比好多人平時一次過食兩粒藥丸(1g) 相差3倍份量
但點解佢咁快見效，就係因為佢係粉，溶得快吸得快
(你頂到果陣味的，普通版磨粉都一樣得)
再講落去就會變藥劑野
相同的諗法係毒藥上一樣有，因為屍體的血係固定位置，化驗唔同身體位置(最好有埋胃內部的樣本啦，做少好多野)
真係可以推測到攝取方式同埋份量(例如揾唔揾到整藥片果d成分)
不過前提係有屍體係手，冇的頂多可以話佢有攝取過，好難講係唔係過量
#588科學怪人
/照你幅圖睇其實都只係一半半
實際都係睇條友點用/
巴打講得啱
毒理學一個重要概念：dosage makes the poison
水飲得太多都會中毒
要比較physical harm 一定係相同劑量先可以客觀
#589科學怪人
案發現場搵到懷疑係毒品既物質，首先要睇下係咩性質先決定帶走既形式
1. 如果係成棵植物/植物既一部份咁搵到
例如大麻乾葉
可以係用透氣既膠袋入好（不透氣會變壞/腐爛）
2. 如果係粉末狀既，搵張紙包住，按圖示既方法對摺，就唔會漏粉
(摺法個名叫druggist fold)
最後都係用膠袋入住
3. 如果係液體狀既
就要用一個密封容器入住
防止裏面既有效成份揮發走
所有懷疑毒品入lab 之後都要用準確既電子磅秤重
重量好緊要，因為一般牽涉既毒品越多，最後就會判得越重
如果係搜獲大量既毒品（例如以公斤計算），因為做實驗分析只係用得著以克計既樣辦，所以全部毒品都用嚟做實驗並唔現實
對住一大批毒品，可以因應佢既狀態，喺唔同既方位都各自抽取少少，結合成為一個可以代表整體既樣辦
毒品檢測最難既地方，在於毒品既種類千變萬化
要快既話最好就可以得到警方既資訊（相關線報）同知道當時發現high 野既人既病徵（迷迷糊糊、自言自語之類）
無既話都仲有辦法既，依然可以用顯微鏡去搵到毒品既類型
好多毒品雖然都係一堆白色粉，但當佢地混入氯化汞既水溶液，喺顯微鏡下都會呈現唔同既結晶
#591XCIX
/只要過左量，所有野都可以有毒
(詳情可以Google LD50)
藥理學一個重要concept就係有幾多%會入到血，做到野 (bioavailability)
由血/其他體液入面的藥物/其代謝的廢料濃度，可以推算返佢幾時食，同埋食左幾多
當然，不同的攝取方式(打針定口服，藥丸定藥粉) 都可以有影響
最好當然係加埋法醫的報告
冇的話好難有提向性的報告/
咁有冇方法fake到法醫 佢唔係死於drug abuse?
#594SUV
/咁有冇方法fake到法醫 佢唔係死於drug abuse?/
有屍係手，難度極高
攝取得藥物就一定會成條路線都check到有野，因為死左血會停係同一個位
有心要check一定知，最可行就係令佢唔會向drug abuse方向考慮
不如話用drug abuse整死佢，之後係高速公路掉出去，撞到散哂就真係難check
#595我好鐘意梓貓
/ 買黎做咩
我諗解剖學果邊班人真係有機會有
果時上病理，佢地好隨意拎左唔少cancer死的各種人類內臟做講解，可能有陰莖/睪丸癌的樣本掛/
死左都要比人切丁丁
真係慘
咁嘅話真係買咩都唔難
#597科學怪人
/ 有屍係手，難度極高
攝取得藥物就一定會成條路線都check到有野，因為死左血會停係同一個位
有心要check一定知，最可行就係令佢唔會向drug abuse方向考慮
不如話用drug abuse整死佢，之後係高速公路掉出去，撞到散哂就真係難check/
思路合理
不過香港人口密度太高
技術上好難
要考慮帶出公路、拋屍過程留下更多痕跡甚至有閉路影到
有時做太多反而會弄巧反拙
#598SUV
/思路合理
不過香港人口密度太高
技術上好難
要考慮帶出公路、拋屍過程留下更多痕跡甚至有閉路影到
有時做太多反而會弄巧反拙/
所以我諗真係想殺人，首先要令佢死得似自然死亡，自然死亡唔會點詳情去查死因
例如係佢生活入面加入致癌物，搏佢cancer死
唔令警方開files就唔會有咁多化驗野，咁容易出事
#602XCIX
/所以我諗真係想殺人，首先要令佢死得似自然死亡，自然死亡唔會點詳情去查死因
例如係佢生活入面加入致癌物，搏佢cancer死
唔令警方開files就唔會有咁多化驗野，咁容易出事/
直頭勁 完全冇人諗到
#605科學怪人
而家發現既毒品其實都唔係純正既毒品，而係會加入咗其他物質
一係為咗降低純度，等班道友滿足之餘，自己又可以賺取更多利潤；
二係為咗增加刺激感，例如混入玻璃粉之後，玻璃粉喺吸入既過程會刺穿鼻既微絲血管，令到毒物可以直接進入血液，從而提升吸收效率
依個時候就必須要選擇合適既溶劑將毒品成份從填充物當中分離，先至可以做後面既測試
另外亦可以先嘗試先放喺紅外線光譜儀度照下，每一隻毒品因為化學結構有分別，所照出嚟既圖譜都有分別
但佢既缺點就係當雜質未能完全移除，就會出現好多「雜peak」，不能作準
咁講到真係做化學測試，每種毒品其實都會有相對應既快速測試
好簡單，都係加本身係某隻顏色既試劑落樣辦度，樣辦係相對應既毒品先至會變色
舉個例，用嚟測試巴比妥鎮靜劑既試劑本身係透明，如果樣辦係巴比妥就會變成紫色。
變色試劑測試一個好處就係即使樣本係多種毒品既混合，只要含有對應果隻，該變色既都係會變色；不過睇到既顏色可能稍微有所影響
缺點在於會出現所謂假陽性，即係未必係毒品都會出現變色
#606科學怪人
酸蝕過程當中其實都係會發出惡臭
外國地方大就或者可以
要喺香港做到無隔離左右聞到報警又係有難度
#608唔~
/醫療/研究相關係合法的，香港出單ok﹐under醫療機構 / 大學名義，好多野都訂到
例如哥羅芳街外好難買到，我係lab多到沖涼都得
仲未計大量毒藥 / 病毒樣本之類/
其中一個血嘅供應商咪紅十字會囉
#609科學怪人
/所以我諗真係想殺人，首先要令佢死得似自然死亡，自然死亡唔會點詳情去查死因
例如係佢生活入面加入致癌物，搏佢cancer死
唔令警方開files就唔會有咁多化驗野，咁容易出事/
要講下鉻
Cr3+ 化合物係人體維生既微量元素
不過Cr 6+ 係高度致癌物質，食好少已經可以令基因突變
日積月累就會生癌，而要喺屍體上一個極低濃度情況下分離出Cr3 同 Cr6 係好很貴，國家級/大學實驗室先會有資源做到
無可疑之處都未必做
更重要既係正常毒理化驗唔會為意到，係人身體都有鉻
利申: 學術討論、個人睇法、唔鼓勵犯法
#610科學怪人
/直頭勁 完全冇人諗到/
我只能夠話香港既法證係好勁
好多時d 盜竊、非禮之類既懸案拉唔到人
唔係因為查唔到
而係懶得查
#611科學怪人
Btw 許金山案其實聰明反被聰明誤
健身球係膠面
會形成表面被有機毒物吸附
而且對外得一個細吹氣口
毒物散之不盡
而家國家級既GC-MS 已經可以檢測出低至皮克(pg，即一萬億分之一克) 既物質
有心查既話，發現係遲早既事
#614XCIX
而家先知溝玻璃粉原來為左破壞微絲血管好吸收d
#616SUV
/要講下鉻……/
你講到咁實在，我仲諗住講得含糊d﹐戴定頭盔
#617最佳樓主角
/ 你講到咁實在，我仲諗住講得含糊d﹐戴定頭盔/
三價鉻同六價鉻本身既property應該都會唔同？
#618科學怪人
/三價鉻同六價鉻本身既property應該都會唔同？ /
當然
#621XCIX
咁講法香港應該發生緊好多慢性殺人
#622科學怪人
/咁講法香港應該發生緊好多慢性殺人 /
無聲的命案，我卻不知不覺
不信世界那麼醜惡
#623SUV
/咁講法香港應該發生緊好多慢性殺人 /
我講一單日本的新聞，有個老婆每日都係佢老公的食物道慢性落老鼠藥(一種溶血藥)﹐落左三年
點知佢老公因為有食開維他命K﹐呢個本身就係果隻溶血藥的解毒劑，所以冇事
佢老婆比人拉左
藥物之間有好多呢d奇特的組合，如果某人知道，之後係食物道落藥，而煮多一味目標人唔會食的送，入面加解藥
都可以做到相似的效果，慢慢毒殺人
#624科學怪人
咁我就約略講下少少利用chromatography 喺一杯溶液當中分離唔同既概念
想像一下一班男人同一時間行入去一間房，房裏面唔同位置都有好多靚女相然後一齊向住出口行
A: 得道高僧，不好女色，直接行去出口
B: 靚仔、事業有成，淨係會對明星級既稍稍駐足觀賞，第二個行出門口
C: 普通人，見靚女都會𥄫，行下停下，第三個行出門口
D: 毒男，唔理好醜求奇就手，流連忘返，最後一個出去
咁其實喺chromatography都係同一個概念，唔同既物質喺同一時間被推入一個叫column既空間，並且有其他物質(mobile phase)喺後面keep住一路畀度力將佢地推向出口
而佢地因應分子結構、極性、大小等一籃子因素，喺前進過程同本身喺column 上面既物質有唔同程度既牽引，牽引會導致整體既前進速度變慢
同一種物質，都理應有相若既速度
亦會喺同一時間出嚟
只要喺出口度連接感測器，就可以度到喺開波後某個特定時間段(retention time)到達出口既物質，從而做到將唔同既物質分離並且逐一做檢測
而家一般都係駁質譜儀(Mass Spectrometer)，因為佢所提供既質譜圖都可以對照返library睇係咩物質，而且仲可以提供濃度分析
#626科學怪人
咁毒品除咗可以用實物做檢測之外
如果要睇一個人有無吸毒，仲可以喺人體度做檢測
雖然話喺香港吸毒係唔直接犯法
（只不過吸得毒就即係藏有）
但喺某d情況之下都要被判進行戒毒
咁現行針對活人既檢測就有
血液驗毒、尿液驗毒同頭髮驗毒
血係毒品進入人體內既第一站，無論毒品係經吸入、進食定注射，首先都係會入血
所以三種方法之中，驗血係攝入毒品之後最快可以檢測到毒品既方法，通常進食後2個鐘後(時間需視乎毒品種類同吸收位置）就可以睇到
透過分析血液既毒品濃度、並且考慮抽血距離攝入既時間、攝入既形式，可能大約估算實際攝入既劑量
一個重點，就係分析之前，要先用離心機將血清分出嚟，先至可以針對血清做分析
咁講下尿液
尿液裏面既毒品就需要等到血液流經腎臟先至有機會被排出，所以所需要既時間會耐d（8小時打後)
與此同時喺尿度又可以睇到佢喺幾日內有無吸毒，相對持久
不過由於經尿液排出毒素既比率因人而異，同人亦唔係固定速率
驗尿只可以得出一個人喺若干時間內有無吸過某隻毒品依個結論
但唔會知道佢實際攝取咗幾多
講到頭髮
血液既毒素會喺毛囊細胞既空間之內積聚，亦都因為咁會經毛囊隨著頭髮生長過程當中進入頭髮內
要喺頭髮內檢測到毒品一般都要一星期之後（但個持久性更長，可睇到一個人3個月內既吸毒史）
人既頭髮係會生長，毒素會隨住頭髮既生長被帶到頭髮更出既位置
如果喺近頭皮位置既頭髮發現毒品，即係話頭髮擁有人最近攝入過毒品；遠離頭皮位置都有，即係佢長時間都有食；只在遠離頭皮位置發現，即係佢最近已經無食
#630SUV
/咁我就約略講下少少利用chromatography 喺一杯溶液當中分離唔同既概念……/
幫手補充少少，多謝而家的電腦cloud service愈來愈勁
好多時收左data之後，買機的公司都開始有埋online library幫人比對你的樣本係咩物質
就算係混合物，如果比較常見的都有機會知係咩
lab人愈來愈做得少野，咩都電腦做哂
#634SUV
有冇牌都係做果d野，個牌係用黎簽report同揹鑊
之前港豬澳石屎有問題，咪有個化驗師比人推出去祭旗
係香港就算做鑑證，都唔敢話一定公正
佢係under警務處，唔係獨立機構，而黑警做野有幾公正，大家都明
做假data唔會的應該，不過會唔會講哂事實的全部就另一回事
#635科學怪人
/ 有冇牌都係做果d野，個牌係用黎簽report同揹鑊
之前港豬澳石屎有問題，咪有個化驗師比人推出去祭旗
係香港就算做鑑證，都唔敢話一定公正
佢係under警務處，唔係獨立機構，而黑警做野有幾公正，大家都明
做假data唔會的應該，不過會唔會講哂事實的全部就另一回事/
唔好以為唔係簽名果個就唔駛問責
數據出錯果d 就係公司追究返簽名果個
但一涉及刑事就會查埋實際邊個落手、approve、邊個明知都照去
石屎單野係上至經理、下至tech 仔
牽連廿幾條友
#636SUV
/唔好以為唔係簽名果個就唔駛問責
數據出錯果d 就係公司追究返簽名果個
但一涉及刑事就會查埋實際邊個落手、approve、邊個明知都照去
石屎單野係上至經理、下至tech 仔
牽連廿幾條友/
比人祭旗點會唔拉哂全部人陪葬
簽名果part包括埋佢check過data冇錯, 程序冇錯之類
所以tech仔可以賴三賴四, 話自己做錯野
上面阿ger可以話太過信任下面的人, 但簽字果個冇位可以推
之前鉛水果野, 咪又係推哂去水喉匠果道
香港有好多所謂的專業人士, 個牌就係用黎揹鑊用的
#637科學怪人
/之前鉛水果野, 咪又係推哂去水喉匠果道
香港有好多所謂的專業人士, 個牌就係用黎揹鑊用的/
補充：港珠澳單野係廉記拉人
去到刑事真係已經唔單止關邊個簽名事
21個都被控涉貪，收咗錢就要一鑊熟
#638科學怪人
btw, 果單tech 仔有落手就無得賴做錯
因為查到係人為刻意調教日子
#639科學怪人
法證果度應該都講得差唔多，大路野都講完
#640科學怪人
論指甲既重要性
唔願意既抓傷佢既咪唔會有懷疑囉
仲要係一個人上人屋企，好難唔畀連登仔覺得係屈人
被男友問是否處女始自稱曾被姦 女教師庭上嚎哭否認誣告
https://lihkg.com/thread/456043/page/1
#641科學怪人
無留指甲既絲打
用牙咬雖然男方既生物痕跡會被oral fluid 所沖淡
但一樣可以做牙印比對
#642科學怪人
果單野其實好矛盾
「姦」完2年之後報案
法證既角度就唔信，因為難以搵指向性證據
社會學角度傾向相信，理解性侵受害人羞於啟齒，未必願意即時同人講
#643XCIX
/法證既角度就唔信，因為難以搵指向性證據
社會學角度傾向相信，理解性侵受害人羞於啟齒，未必願意即時同人講/
我都覺得單案條女越講越多疑點
#644科學怪人
/我都覺得單案條女越講越多疑點/
講少少個現實
唔同既研究都表示
即使係開放如美國
都因為驚受到指責、羞於啟齒、驚影響人際關係
（大部份既性罪犯都係揀認識既人作案，喺街搵陌生人既佔極少數）
性罪行既受害人好多都選擇啞忍
導致high under-reported rate
所以司法上為咗鼓勵受害人報告
會傾向相信受害人嚟 balance 返
即使受害人當時無報警，都會理解佢地當時太驚/心情未平伏
亦會鼓勵佢地喺任何時候鼓起勇氣報警，以免日後有更多受害人
尤其是小朋友講被侵犯幾乎信硬
基本上有少少表證成立既話都會拉咗人先
#645科學怪人
夜晚又傾下計
大家點睇推行全港校園強制頭髮驗毒？
#646科學怪人
/係香港就算做鑑證，都唔敢話一定公正
佢係under警務處，唔係獨立機構，而黑警做野有幾公正，大家都明
做假data唔會的應該，不過會唔會講哂事實的全部就另一回事/
警務處鑑證科只係負責好少部份既範疇
(現場影相、指紋鑑證、軍械、IT)
其餘大部分會牽涉到法證工作既都係食衛局，獨立於警隊，目的就係為咗確保工作不受影響
政府化驗所（一切DNA、毒理、材質、火災事故）
衛生署法醫科
#647科學怪人
/而家先知溝玻璃粉原來為左破壞微絲血管好吸收d /
正正因為咁，好易overdose
#648SUV
/警務處鑑證科只係負責好少部份既範疇
(現場影相、指紋鑑證、軍械、IT)
其餘大部分會牽涉到法證工作既都係食衛局，獨立於警隊，目的就係為咗確保工作不受影響
政府化驗所（一切DNA、毒理、材質、火災事故）
衛生署法醫科/
當年有舊朋友的朋友，做左幾年鑑證都唔做
佢果時只係話唔會再做呢類工，都唔敢問原因，之後轉哂行去銀行
#651科學怪人
問題文件有無人有興趣？
#652SUV
/問題文件有無人有興趣？/
我
#653我好鐘意梓貓
講咩都有興趣
只係想學下野
#654科學怪人
(13. 問題文件)
香港法例第200章 《刑事罪行條例》 第71條 偽造的罪行
「任何人製造虛假文書，意圖由其本人或他人藉使用該文書而誘使另一人接受該文書為真文書，並因接受該文書為真文書而作出或不作某些作為，以致對該另一人或其他人不利，則該名首述的人即犯偽造的罪行，一經循公訴程序定罪，可處監禁14年。」
所以制造虛假文書係好大罪
亦有1d 科學方法可以去睇下
擦痕
首先一份文件上面，金額被塗改係好嚴重
擦下個8字既左方係可以變成3字
甚至乎擦少個0
咁就有兩種擦法：
1. 物理
咁可以用沙膠擦甩原子筆同機印墨水
之但係再小心都好，沙膠擦完係會影響到紙張纖維既微細結構
依個時候可以用實體顯微鏡睇（著重比對光既反射），顯示相關位置曾經被塗改
2. 化學
亦可以用漂白劑之類令到墨水肉眼睇唔到
依個時候可以分別用紅外線同紫外線照落張紙度就可以睇到果個位用過漂白劑
紙張壓痕
如果喺一疊紙上面寫得夠大力，筆既壓痕係可以壓到落去下一張紙上面
即使第一張紙唔見左/被塗改過
亦可以從下一張度睇到壓痕
方法係開盞燈，斜斜地咁照落張紙喥
#657科學怪人
文物仿製/復修工藝技術又係好有趣
之後有心情都會另外開post 講
#658科學怪人
紙張分析
一份文件有時會被蓄意加入額外頁數，例如合約、遺囑加一頁魔鬼條款
如果係機印既話，現代既機已經唔會點有瑕疵，墨水/碳粉亦未必可以睇得到
一般嚟講附加落去既頁數都唔會係搵同一批次既紙張所生產
白紙睇落張張一樣，但係都會有細微既唔同
先講厚度，每個品牌既紙張都
用專門既paper micrometer 係可以分別到紙張之間
紙張長、闊亦都有些微分別，可以搵卡尺量度
因為應用所需，紙上面都會加入唔同添加劑
填充物：令紙張顏色更光鮮
塗層：令紙張易於打印
Sizing Agent: 令墨水可滲入紙內
而每間造紙公司所用既添加劑成份、落既比例都有好大分別
透過做化學分析係可以分得到
#659SUV
同樣的問題都出現係簽名的墨水道
同一牌子墨水，就算唔同批次都會有不同成份比例
只要比較前幾後日不同文件簽名用的墨水就知係唔係出自同一支筆
同埋比較墨水被氧氣氧化的程度，都可以估到係唔係同一日簽落去
多數生意人都會固定有一支簽字筆/鋼筆，唔會經常轉墨水
(我都有用開鋼筆，墨水大約一個月先fill一次，仲要多數係同一支)
#660科學怪人
/ 同樣的問題都出現係簽名的墨水道……/
陣間我都會講下
#661科學怪人
墨水分析
如果係手寫既，仲可以睇下墨水成份
首先唔同筆既墨水都係由唔同既顏料撈埋
可以用thin-layer chromatography (TLC)去分離唔同既成份
(有少少似大家細個上初中科學堂玩既Paper Chromatography 實驗，一滴M&M 朱古力既外層顏料都可以分成幾隻野）
咁比較返文件被書寫既唔同位置上既墨水，如果係由唔同既筆所寫，就可以判斷特定位置係唔係後來先加上去
(甚至乎只係喺銀碼上加筆令1 變 7 都睇得到）
另外比對法證實驗室儲存既各款墨水喺TLC 既表現，甚至係可以知道寫果個人用咩筆；依個時候要比較下枝筆既歷史，例如一份1999年生效既聲明如果係用2001年先至推出市場既筆嚟寫既話，成份聲明都一定係虛假文書
咁再進階少少，當墨水已經寫咗喺紙上面之後就會曝露於空氣同光線中，成份會隨住時間而慢慢變質，部份既墨水分子會變成比較細既分子
我用最普遍既藍原子筆為例
都會含有染料Rhodamine B
咁喺變質過程當中，分子既 -CH2CH3 會被氫(-H)所取代
即係喺同一粉分子裏面，一個group被取代既話，分子質量會降低28；兩個既話就係56，如此類推
因應以上既現象，即使係用同一款筆去寫，只要一經質譜儀去量度，就可以有效咁分到一個筆劃係本身已經有定係新寫上去
#662杏仁路姆西
如果咁講 偽造一份遺囑係好難ge事
咁點解當年小甜甜單case搞左咁耐ge?
#664科學怪人
香港有效既筆跡專家證人咪政府化驗所
爭產官司要考慮整體好多野
唔係淨係一張遺囑可以話事
除咗小甜甜立2006遺囑當時唔清醒之外
更重要既，係社會無可能接受一個風水師繼承遺產
所有人都會覺得
攞嚟做慈善基金咪幾好
#665科學怪人
再者，依d 都好睇d 人證點講
華懋高層既角度
幫班細佬妹既話，佢地仲可以繼續做經理
幫陳振聰既話，未必用返佢地
點都一定話無聽過龔如心提及過對陳振聰有利既野
#667SUV
/爭產官司要考慮整體好多野……/
佢個慈善基金有好大部分係資助大陸
你明點解佢一定要陳振聰輸啦
#668湖水藍調
/所有人都會覺得
攞嚟做慈善基金咪幾好/
#669科學怪人
/ 佢個慈善基金有好大部分係資助大陸
你明點解佢一定要陳振聰輸啦/
我只評論法證方面既野
#670科學怪人
咁講多少少，驗問題文件既一個難點係盡可能唔可以破壞文件既整存性
所以即使要做破壞性既化學測試，亦只可以用一種特製既工具，好似釘窿機咁開個洞，攞少少樣辦出嚟
(個洞仲細過原子筆筆尖)
要用咁少既樣辦做檢測，唔會好似一般檢測咁用GC
現代有直接少少既paper spray mass spectrometer (PS-MS)
可以用極少既溶劑滴落紙樣辦度溶咗d 墨水，之後上面畀個電壓佢
溶劑連墨水就會因為電勢差直接進入質譜儀
簡單、方便、快捷
透過PS-MS 除咗睇到墨水變質程度，更加可以分到唔同牌子既墨水
#673XCIX
而家d手法咁高明
我諗香港現存應該有唔少虛假文件
而d人又冇呢方面知識所以冇拎去檢驗爆d大單野出黎
#674科學怪人
/而家d手法咁高明
我諗香港現存應該有唔少虛假文件
而d人又冇呢方面知識所以冇拎去檢驗爆d大單野出黎 /
啱，而假銀紙應該算係最多既虛假文件
檢測方法同理
香港唔會好似美國咁開私人法證lab
坊間銀行、保險公司係都有部門專門核對依d 文件野
但發現唔妥都係只有報警一途
#675SUV
/而家d手法咁高明
我諗香港現存應該有唔少虛假文件
而d人又冇呢方面知識所以冇拎去檢驗爆d大單野出黎 /
咁講啦，道高一尺，魔高一丈
只要有夠大的利益，就一定有人會開發偽造技術
例如係運動的禁藥
我舉一個例，之前環法單車賽的禁藥事件咪係咁 (sorry我唔100%記得細節)
佢地事前準備好一堆各車手食完禁藥之後身體的血液 (抽血拎的)﹐係比賽前輸血入去，從而增加贏的機會
因為佢打的量少左勁多，到比賽後抽血果時的量已經唔超標
同埋仲有事前儲血，比賽果時輸血入去，因為係車手的血液，唔會check到，但車手夠可以因此有更高的帶氧能力
#676科學怪人
btw 即時諗起有個超齡保安
為咗唔退休用假身分證繼續做過3間公司
呃咗幾年先至被揭發
#677科學怪人
/我舉一個例，之前環法單車賽的禁藥事件咪係咁 (sorry我唔100%記得細節)
佢地事前準備好一堆各車手食完禁藥之後身體的血液 (抽血拎的)﹐係比賽前輸血入去，從而增加贏的機會
因為佢打的量少左勁多，到比賽後抽血果時的量已經唔超標
同埋仲有事前儲血，比賽果時輸血入去，因為係車手的血液，唔會check到，但車手夠可以因此有更高的帶氧能力/
比較想知事前儲血點prove
#678一般新會員
/我舉一個例，之前環法單車賽的禁藥事件咪係咁 (sorry我唔100%記得細節)
佢地事前準備好一堆各車手食完禁藥之後身體的血液 (抽血拎的)﹐係比賽前輸血入去，從而增加贏的機會
因為佢打的量少左勁多，到比賽後抽血果時的量已經唔超標
同埋仲有事前儲血，比賽果時輸血入去，因為係車手的血液，唔會check到，但車手夠可以因此有更高的帶氧能力/
blood doping 點會測唔到
#679SUV
/blood doping 點會測唔到 /
有錢國家有個玩法就係比賽前成team人去高原地方集訓
用天然方法推高紅血球量，合法的
我今晚先有時間揾返果單野的tech detail出黎，唔係有人爆料都冇人知呀
#680科學怪人
(14. 筆跡鑑證入門)
咁除咗睇紙、睇墨水
鑒於每個人既字跡都會有分別
所以亦會睇下問題文件既筆跡係唔係真跡
蒐證方法就有兩種
1. 請個真跡既人/疑犯返去寫字
a. 除非一早知道某人撰寫有關問題文件時候既環境，否則無論係室內環境、溫度、燈光、座位等等都應該處於一個舒服既狀態
b. 個形式唔會係畀寫野個人睇住一篇野，而係以有人讀然後照跟住寫既形式
根據自己字跡寫字係唔需要意識，但刻意改變自己既字跡就係需要額外留神；聽寫本身已經需要留神，令疑犯/想違約屈人既真跡人少d機會同時留神改變字跡
c. 要求寫一大段，唔會淨係寫幾句
頭頭既時間可能都仲可以改變字跡，但寫到後段會兼顧唔到一邊聽、一邊改變字跡，會變返原本字跡
2. 搜集有關人士其他寫開既文書
可以強制攞佢平時寫既野，例如日記、書信之類
好處就一定係保證係真跡
不過都有佢既限制，就係:
a. 唔同時間(以年計)既字跡會有分別
最好可以搵到佢近期既文書
b. 依類唔似得之前咁可以指定人寫乜，未必有問題文件concern既重點筆法
所以最好兩種搜證都做
#681BellaElla
/酸蝕過程當中其實都係會發出惡臭
外國地方大就或者可以
要喺香港做到無隔離左右聞到報警又係有難度/
諗起做lab果陣驗食物重金屬含量，落硝酸係sample到做digestion , digest過程唔覺意聞左一下，d味臭到一世難忘
#682科學怪人
/諗起做lab果陣驗食物重金屬含量，落硝酸係sample到做digestion , digest過程唔覺意聞左一下，d味臭到一世難忘 /
lab safety
#685SUV
/諗起做lab果陣驗食物重金屬含量，落硝酸係sample到做digestion , digest過程唔覺意聞左一下，d味臭到一世難忘 /
我知果陣味
同埋做DNA野要用2-mercaptoethanol
又係 聞一聞醒腦醒神，索一索舒筋活絡
早餐都唔駛食
#689XCIX
我發覺自己嘅字跡真係亂黎
睇番近幾個禮拜都覺得好大分別
而且自己嘅簽名都好奇怪 做唔到次次差唔多咁
有冇計改善
#690科學怪人
/我發覺自己嘅字跡真係亂黎
睇番近幾個禮拜都覺得好大分別
而且自己嘅簽名都好奇怪 做唔到次次差唔多咁
有冇計改善/
正常既，但總會有共通既起筆落筆相連位
#699科學怪人
由此證明我幾未夠班
淨係識得d 過時檢測方法
#707猶差縮縮
/其實最先有記載法證既概念，唔係英美等既先進國家，而係要數到中國既秦朝《封診式》，但所記載既主要都係刑偵、調查既規則同零碎既案例
要去到從唔同死因入手，同時著重驗屍、法證方面就要數到南宋宋慈《洗寃集錄》/
當時已經識得利用昆蟲等既特性去破案真係好勁
原來咁早已經有forensic entomology嘅概念
#711科學怪人
/原來咁早已經有forensic entomology嘅概念 /
中國entomology係比較早
反而西方天主教宗係連基本剖驗都禁止
直到黑死病殺死太多人先至因爲要搵出原因而發展法證既概念
果陣都已經接近文藝復興
#712科學怪人
補充，明朝既法證都仲發展緊
東西廠亦都有現代法證類似職能
去到清朝科技發展停滯不前，加上歐美工業革命衍生出更多專科科學家，18世紀先追過中國
– 編註:收錄至此, 之後嘅內容請去原post睇 –