#1科學怪人
留意到巴絲平時討論唔少新聞既時候
都會對於點樣搵到兇手/件事係咪真
麗港城香港18 炒麵撈便便
果舊「黃金」係咪真係「黃金」？
中大醫學院許副教授涉嫌收埋麻醉劑喺一個健身球內，點可以搵到？
南韓從大陸輸入既藥丸當中被檢出有嬰兒頭髮，搵到條頭髮又點知到佢係？
小弟見好多人都對法證方面好好奇
但又好似未見有人認真討論依樣野
唯有無料扮四條講下，希望拋磚引玉
個post 我會多講原則、少講化學/生化理論
嘗試用一個盡量唔需要太多基礎知識，甚至係文科巴絲都可以睇得明既方法去講
#7科學怪人
(1. 乜野係法證)
開波講下基本野先啦
Forensic Science 中文究竟應該譯做乜呢？唔同位會睇到唔同譯法
但我覺得意思上用返香港Government Lab叫 法證科學 會比較合適
#10科學怪人
當中Forensic 其實係來自拉丁文”forum” 一字，解作Public。咁古羅馬元老院(當係而家香港立法會咁)，佢地鐘意喺 Forum，即係公眾地方果度傾政治同政策議題既，罪犯亦都要喺公開場所受審
去到而家 法證科學
用最簡單直接既講法，即係 法律層面面既應用科學
(The application of science to law)
廣義嚟講其實唔單止係廣為人知既兇案調查、毒品鑑識
其實1d 好濕碎既野例如陳振聰爭產、鉛水事故、食品安全(手x之店雪糕大腸桿菌含量超標)
只要同法例相關，都係法證科學可以涵蓋既範圍
#18科學怪人
書局有本書有講法證
好多書都有講，初學 for 興趣到專業技術手冊都有
#21科學怪人
估唔到咁多人有興趣
btw 原諒我要遷就大家
1d 基礎野會講得比較深入
#22科學怪人
但係
香港既 政府化驗所 法證事務部 就淨係做刑事相關
食物安全既法例就有食環署食安中心做
#24科學怪人
咁係咁意都講下歷史啦，雖則我明白真係好悶
(2. 歷史)
其實最先有記載法證既概念，唔係英美等既先進國家，而係要數到中國既秦朝《封診式》，但所記載既主要都係刑偵、調查既規則同零碎既案例
要去到從唔同死因入手，同時著重驗屍、法證方面就要數到南宋宋慈《洗寃集錄》
依本野列出咗人因應唔同既死因，例如從樹上跌死、被蛇鼠咬死所見到條屍唔同既詳細表徵，從而去判斷死因
當中亦有案例講解，有一單係只知道有個人被斬死，身上十幾處鐮刀所致既傷痕，但兇手身分無人知道
於是官府就命令附近居民都要交出自己所用既鐮刀，當中只有一把附近係有烏蠅嬲住。因為烏蠅鐘意腐肉，所以就捉到兇手
當時已經識得利用昆蟲等既特性去破案真係好勁
#25科學怪人
以上唔係鳩吹，有原文，有興趣就睇 :
檢驗被殺屍在路傍，始疑盜者殺之。及點檢，沿身衣物俱在，遍身鎌刀斫傷十餘處。檢官曰：「盜只欲人死取財，今物在傷多，非寃讎而何？」遂屏左右，呼其妻問曰：「汝夫自來與甚人有寃讎最深？」應曰：「夫自來與人無寃讎，只近日有某甲來做債不得，曾有剋期之言，然非寃讎深者。」檢官默識其居，遂多差人分頭告示側近居民：「各家所有鎌刀盡底將來，只今呈驗，如有隱藏，必是殺人賊，當行根勘！」俄而，居民賫到鎌刀七八十張，令布列地上。時方盛暑，內鎌刀一張，蠅子飛集。檢官指此鎌刀問為誰者？忽有一人承當，乃是做債剋期之人。就擒訊問，猶不伏。檢官指刀令自看：「衆人鎌刀無蠅子，今汝殺人血腥氣猶在，蠅子集聚，豈可隱耶？」左右環視者失聲嘆服，而殺人者叩首服罪
#29科學怪人
咁就大篇少少入正題
開始講關於法證檢測既基本原則
(3. 基本原則)
雖然好多國家既法證實驗室係隸屬於保安部門
(香港既政府實驗室 法證事務部就唔同，屬食物及衛生局豁下，只係會為紀律部隊同醫管局提供服務)
但係佢地既工作就唔係查案、破案
查案破案係由返警務人員負責
咁佢地係做咩既呢？
大路嚟講，法證做既所有野都係圍繞住依兩件事
1. Identification
從現場既物品當中搵出可能成為證物既任何物品
2. Comparison
現場搵到既物品(例如現場搵到既精斑)送返Lab 果度進行唔同既測試，去同known substance比較(例如從嫌疑人口腔套取所得既DNA)
3. Report
佢地只會因應證物調查所得，交代客觀既科學結果
例如: 現場既DNA同疑兇搵到有8處相同，DNA 不屬於疑兇機會率只有百萬分之一
之類
#32poundofmyschool
phd先有機會做？
#33科學怪人
/phd先有機會做？/
chemist 一般都係
technician degree 都有機會 但而家多咗master爭
#37科學怪人
打埋依段訓，聽日先再打
咁做法證既人會有兩個信念
1.「任何接觸都會留下痕跡」(by Locard’s Exchange Principle)
一個人進入案發現場，會發生物質交換:
a. 疑兇身上既物質(例如: 衣物纖維、精液)會遺留喺現場
b. 案發現場既物質(例如: 受害人血液)會被疑兇帶走
c. 一單案既多名共犯，可以透過喺同一現場帶走既物質加以辨識
2. 無兩個獨立既物件係完全一樣
a. 好多野肉眼睇落無分別(兩張白紙)，透過微觀既分析其實係可以搵到唔同(兩張紙纖維結構、化學成份)
b. 透過比對之後，如果發現疑犯所有既某樣野同案發現場某樣野係一模一樣(or 搵唔到不同之處)，可以斷定依兩樣野係出自同一來源(common source)
#49青瓜
/……可以斷定依兩樣野係出自同一來源(common source)/
是日最有價值
#57新英倫愛國者
入正題未？
巴打係自己上網睇定係大學讀開
利申係大學讀過一個介紹法證嘅course
Assignment係揾偵探片入面嘅破案手法有咩錯
留名學野
#64臭氧溴氧臭樣
留名
曾幾何時夢想職業係做發證 好似歐陽震華或者黎耀祥咁pro 成本會行會講野既百科全書就好
可惜好難
#66科學怪人
/入正題未？
巴打係自己上網睇定係大學讀開
利申係大學讀過一個介紹法證嘅course
Assignment係揾偵探片入面嘅破案手法有咩錯
留名學野/
我自己目前就為興趣睇咗兩大本書
書睇唔明既野就再上網針對咁搵下
另外小弟未聽說過大學開相關學科
大學開既一個半個法證course 都係依附喺science faculty 搵d chem lecturer 教返
走馬看花之餘太過側重於化學方面既理論
詳細既探討講嚟講去都係得毒理法證、濫藥、DNA之類
真係要學多d 「偏門」既就自己睇先實際
#78OK網路公審
hku 有科common core係教呢d
有興趣 但我嫌workload大無揀
#83科學怪人
又打一篇先
咁就因為尋晚都講過
任何唔關事既人
進入案發現場都會有機會
1. 帶走現場既物質（破壞證據）
2. 自身既物質遺留現場（製造干擾）
所以喺確定現場環境安全（查火災成因之前都要救熄咗d 火先啦）
兼送咗現場既傷者去醫院之後
一定要封鎖現場
至於入去搜證既方式要視乎返環境而定
唔可以一概而論，但一定要係仔細
而且搜證既人越少就越好
常見既 喺密閉既小房間可以係一個Officer 搜證就夠
1. 向内螺旋：由房間既外圍開始，以弧形轉向中心
2. 向外螺旋，即係掉返轉
但係如果現場環境空間係比較大既，無辦法，需要用到多d 人去搜證
3. 平行線
每人負責一個位置，大家平行咁向住同一個方向前進
對於1d 開放空間，例如喺座山上面發生兇案
搜證既範圍同所需要既人力都可以好龐大
#87小小肥豬
/我自己目前就為興趣睇咗兩大本書
書睇唔明既野就再上網針對咁搵下
另外小弟未聽說過大學開相關學科
大學開既一個半個法證course 都係依附喺science faculty 搵d chem lecturer 教返
走馬看花之餘太過側重於化學方面既理論
詳細既探討講嚟講去都係得毒理法證、濫藥、DNA之類
真係要學多d 「偏門」既就自己睇先實際/
香港冇得讀
反而外國真係有major forensic science
好想讀
#88科學怪人
/法外看，是對～～是錯，公理將透視結果/
其實所謂公理
即係普通法嚟講「毫無合理疑點」
只係建基於當時既技術、常識去睇
之後講到頭髮鑑證，我亦都會講下因爲當時技術限制造成既寃案
正如而家個個都認為 性交法事 係荒謬、抵坐
話唔定30年之後，真係有科學證明到做完係可以轉運既話，到時就變成寃案
#101科學怪人
算啦臨走都係整多一篇
咁喺現場搵到既證物既特徵可以分兩大類:
1. Class Characteristic
一種可以同時由多個物件，但唔係所有物件擁有既特徵
黃色水果: 香蕉、楊桃、鳳梨
O型血: 世上若干百分比既人
貓毛: 所有貓種
2. Individual Characteristic
DNA、指紋，只會指向獨立個體
咁喺法證層面，要做到合理既指向性
a. 搵到一堆class characteristics 指向同一人
例如: 鞋印(知道疑犯著43號鞋)、疑犯衣物上有狗隻毛屑(套取唔到毛囊細胞判斷唔到係咪來自現場隻狗)
or
b. 搵到一個或以上individual characteristic
牆上有血指紋，血液來自受害人、指紋來自疑犯
#124行撚開啦死老鬼
network forensic 撚留名
#132Fjj65n
梳呀巴打 原來我del晒啲notes
不過我記得係有教過blood stain, fingerprint, fibre analysis,筆跡同研究起火原因
#135SUV
留名，以前係醫院做過醫療化驗的前lab人
#145科學怪人
依個post 好多行家
又有做network 又有做MLT
#166科學怪人
好，開波講講
(4. 檢驗方式)
咁又講下法證既檢測方式啦，有兩大類：
1. 非破壞性測試(Non-destructive Tests)：
即使做完個測試，樣辦都唔會受到破壞，可以留嚟做下一個測試
例如：顯微鏡睇下一塊乾葉係咪大麻(顯微鏡會睇到特定紋路)、齋照紅外線/紫外燈做物質分析
2. 破壞性測試(Destructive Tests)
即係喺測試過程當中，樣辦會被破壞
唔能夠再用嚟做其他Test
例如: 做胃部食物劇毒重金屬測試，需要先用硝酸將個樣辦消解(Acid Digestion)
咁我點解要講依兩類呢？因為案發現場搵到既證物可能都好有限
但係為咗要揭示更多既事實，要進行既測試一定係越多越好
所以就要好小心咁去決定做每一個實驗既先後次序
個次序盡可能去確保唔影響下一個實驗
一般都係優先進行非破壞性測試，做無可做先至再做破壞性測試
例如現場搵到既一把染血槍械，以下係一個合理次序:
1. 血液/體液分析: 先小心提取槍上血液，唔好揩到無血既部分
血果度就先用非破壞性測試（luminol) 確定係血液（放心詳細方法果d 講到血液會再討論）
再做抗原測試確定係人類血液
再提取DNA(破壞性測試)
2. 指紋辨識: 套取槍上可能有既指紋(碳粉/金屬粉/螢光粉令指紋顯示)
3. 槍械/子彈/火藥鑑證
#167jinx我老婆
都係讀個個common core 同樓主講嘅嘢好相似 仲有得試拎指模同腳印
#168科學怪人
/都係讀個個common core 同樓主講嘅嘢好相似 仲有得試拎指模同腳印 /
所以我之前先留email 想要d notes 睇睇
btw 我相信d lecturer 本身都係做開chem 既研究而唔係做法證
教法證都係照書dup
可能我地都係睇住同一本書嚟講
不過我依個post 作為「興趣班」會有唔同
講既會係比較著重資訊同邏輯
太過艱深既chem/biochem 會跳過/只講皮毛，數學亦會簡化去講
#176當朱者遇上墨者
咁係法證既角度黎講, 完全犯罪係咪唔可能?
其實我係想留名咋
#177科學怪人
/咁係法證既角度黎講, 完全犯罪係咪唔可能?
其實我係想留名咋 /
可以答你法證角度無完全犯罪既概念只有科學根據同一個機會率一個人犯罪與否警察無權判，法證更加無權判
有權判既得陪審團/法官
#178科學怪人
見無人理
又想講多一個叫chain of custody既概念
每一件證物由入lab開始就已經要登記一個獨立既編號，咁果件證物去到邊、由邊位化驗師/工程師喺幾時管有、做過咩實驗，都要做文件上既登記
件證物經過邊個手都一目了然，確保中間無d 不知名既人攞過佢進行篡改
依樣野如果稍微有甩漏，基本上證據已經唔會被接受
依個就係Chain of custody 既概念
返到現實，當一個性罪犯強姦同整傷一個女性，個女人要送院既時候往往都要先行救治，陰道受傷要醫亦可能影響到證據既完整性(因為醫生接觸過，甚至可能已經對陰道進行清潔)
咁所以喺美國，就有專門訓練處理懷疑性侵案件既護士去處理依類救治，佢地會先提取陰道分泌物並且以法庭可以接受既形式妥善咁保存同紀錄，從而完成chain of custody
#186HKDI葉繼歡
/2. 無兩個獨立既物件係完全一樣
a. 好多野肉眼睇落無分別(兩張白紙)，透過微觀既分析其實係可以搵到唔同(兩張紙纖維結構、化學成份)
b. 透過比對之後，如果發現疑犯所有既某樣野同案發現場某樣野係一模一樣(or 搵唔到不同之處)，可以斷定依兩樣野係出自同一來源(common source)/
呢兩句好似有d矛盾？可能係我理解錯
#188科學怪人
/呢兩句好似有d矛盾？可能係我理解錯/
無矛盾，一模一樣 即係疑犯所有既就係案發現場既野來自同一來源，唔係獨立物件
一張紙撕開一半，一人拎一半，都係來自同一張紙
疑犯被拉時身上有受害人血液，同現場既受害人血液就係同一個來源
其實簡單一句:
發現一樣即係唔係獨立物件
#194小淫蟲2017
雖然宜家做緊個post都係叫forensic，不過唔係樓主咁科學果面
反而係商業/電子交易果面多d
#195科學怪人
/雖然宜家做緊個post都係叫forensic，不過唔係樓主咁科學果面
反而係商業/電子交易果面多d /
forensic 其實有好多方面
science 只係一個細分支
#217薯片佬
係咪用次氯酸鈉洗血跡可避過luminol 檢測？
#223科學怪人
/係咪用次氯酸鈉洗血跡可避過luminol 檢測？/
施用過次氯酸鈉既位都會好似陽性反應咁呈現螢光
令人無從判斷血跡實際位置
但就會知道你係特登用hypochlorite洗過咁解
#225科學怪人
/大學讀chem定讀咩先做得/
法證科學算係一門跨層面科學，牽涉既專業好廣
毒理法證要chem
DNA要biochem、biotech
交通意外要physics、engineering
纖維、塗層染料要material science
#227俄羅斯練膽大法
讀過forensic psychology來留名
#228科學怪人
/讀過forensic psychology來留名 /
測謊機有幾準？
#233俄羅斯練膽大法
/測謊機有幾準？/
唔準 professor係測謊啲堂上係教睇表情同講野、用字方面 表情係超微細嗰種 放慢條片咁睇 學緊嘅時候幾有趣 不過lie detection只佔幾堂
#235科學怪人
/唔準 professor係測謊啲堂上係教睇表情同講野、用字方面 表情係超微細嗰種 放慢條片咁睇 學緊嘅時候幾有趣 不過lie detection只佔幾堂
諗起要分辨指紋，都係要放大去睇超微細既特徵
#237細龜
/1. Class Characteristic
一種可以同時由多個物件，但唔係所有物件擁有既特徵
黃色水果: 香蕉、楊桃、鳳梨
O型血: 世上若干百分比既人
貓毛: 所有貓種/
依到唔係好明
求指教，我知我蠢