(編註)
1. 原post link於此, 誠意鼓勵大家推推post
2. 為利於閱讀, 現只留有心回覆
3. 就史料爭拗卻未見詳盡觀點者亦刪去
4. 回應本blog初衷, 所有圖片均未有include
5. 引用內容以”/”標示
6. 內容太多, 呢邊會分開幾個post
7. 部分引用時事講笑(以”*”標示),編者會盡量加返註解係段尾
致敬 科學怪人巴打 & 所有推post巴打 @LiHKG
(/編註)
Index:
67. 自由行爭議/#86
68. 基本法23條立法爭議/#96
Offtopic家庭手工業/#137
特別專題: 香港對性罪行既防治(上)/#147
特別專題: 香港對性罪行既防治(中)/#156
特別專題: 香港對性罪行既防治(下)/#158
69. 領匯上市/#164
70. 雷曼迷債事件/#171
#86科學怪人
67. 自由行爭議
經歷過沙士期間既經濟低迷之後，中央為咗挽救香港經濟推出咗CEPA同開放自由行。由2004年1月1日起，全廣東省同中國其他大部分省會、重要城市居住既大陸人都可以申請個人遊簽注，落嚟香港旅行；去到2009年4月1日，深圳居民更加可以「一簽多行」，即係申請一次簽注，喺一年之內可以不限次數咁往返香港，只不過每次逗留既期限唔可以多過一個禮拜
香港以前1960年代主要係做美國同日本遊客，日漸發展出成熟、專業、有國際水平既服務態度。隨住強國勃起，內地經濟迅速發展，對於香港所提供既就近兼高質既旅遊服務有龐大需求；加上內地假貨充斥，有假金、假奶粉、假藥，去香港採購對佢地嚟講等於「信心保證」
自由行同一簽多行令到內地訪港旅客有增長，自此之後香港失業率一直都低，亦都幫助香港旅遊、零售、酒店、飲食等既行業發展；至於佢地落嚟鐘意做咩？首先因為大陸對外國進口貨品都會有關稅，佢地都樂於去到香港依個免稅天堂採購外國化妝品同奢侈品，幾乎一到假日尖沙咀廣東道堆名店都會大排長龍
唔好以為大陸人淨係嚟食、買同痾，而家好多受過高等教育既都對香港文化同歷史有興趣，有時喺康文署各大博物館見佢地未必少得過見本地人；佢地甚至會同本地人一樣行山、去離島遊玩
(話說以前讀書我都成日帶內地同學果班圈子週圍玩，所以而家講到流利普通話）
大量內地自由行旅客湧落喺，當然都唔係得好既一面，造成唔少香港社會問題。首先係佢地湧落嚟掃名牌手袋、首飾、珠寶、鐘錶等既高檔商品，扭曲咗本地營商環境。賣果d産品既店鋪可以用貴租去搶佔人流最多既鋪位，引起整體商鋪既租金都大幅攀升，令到本身存在既中小型、微利行業既商店都做唔住。原來繁忙既街道同商場開始走向單一化，唔少都變咗淨係得金行同藥房
另外香港始終物資有限，當大量大陸人落嚟搶日用品同享用服務就好容易做成短缺，2012-2013就出現過奶粉供應不足、長期以來大陸孕婦借自由行落嚟生B亦都搞到本地孕婦床位短缺；個別商戶見做大陸客搵錢反而仲歧視返香港人轉頭，例如萬寧曾經推出只限大陸遊客既奶粉優惠、廣東道D&G分店保安禁止本地顧客喺店外拍照等等
咁個別既大陸訪港旅客教育水平同公民質素都有待改善，會做出香港社會輿論接受唔到既行為，例如週街痾，甚至係出現過幾單大陸人誤以為公共飲水器係兒童廁所，抱B上去痾既新聞
以上既行為引起中港矛盾同罵戰，香港人以蝗蟲
稱呼內地來港旅遊同生B既人士、大陸人亦都以港燦、香港狗等稱呼香港人。香港政府為咗解決自由行衍生既問題，喺2013年初先後暫停雙非孕婦來港產子既配額同限制旅客每次買嬰兒奶粉既數目，亦都開始研究透過將邊境禁區發成專門服務自由行既購物中心嚟減少對其他地區既衝擊
#93科學怪人
/軍事上，打杖死好多人。
而且受限國制條約，台灣發展唔到核武，大陸可以發展核武。
所以中華民國唔可能靠軍事反攻大陸。
最好用文攻，令大陸好似蘇聯咁collapse。所以大陸出最賤最cheap最拿渣招數，就係整中共國家防火牆城，google都踢走。
目前香港人好反對蝗蟲，可能都係大陸招數。令香港人反蝗，大陸有藉口唔俾咁多大陸人黎香港，避免佢地接觸反共信息。/
free-thinker 今次又有d sense wor
#96科學怪人
68. 基本法23條立法爭議
先講下基本法23條既內容:
「香港特別行政區應自行立法禁止任何叛國、分裂國家、煽動叛亂、顛覆中央人民政府及竊取國家機密的行為，禁止外國的政治性組織或團體在香港特別行政區進行政治活動，禁止香港特別行政區的政治性組織或團體與外國的政治性組織或團體建立聯繫」
世界各地從古到今，對於叛國罪都有清晰既法例去規定，唯獨是香港一直未有。世上最早就此立法既國家係英國，1351年禁止從事同企圖殺死英王家人、王儲、大法官、向英國發動戰爭等行為，否則會被判處叛國罪，可以用火刑處死；現代東南亞既泰國，甚至規定泰王同家人係連鬧下都要坐25年。
香港回歸之後發生咗兩件大事，令到特區政府喺2002到2003年間推動設立23條既本地法例:
1. 2000年台灣民進黨勝出總統選舉，香港有線電視訪問副總統呂秀蓮期間，呂表達咗台灣獨立同唔會與大陸統一既立場。中央駐特區聯絡辦公室副主任王鳳超之後表示香港記者應該為維護國家主權統一同反對「兩國論」負上責任，並暗示23條應該盡快立法
2. 1999年法輪功被中國政府認定係非法組織之後，繼續喺香港公開活動甚至宣傳天滅中共等既訊息。除左特首董建華出口術話佢係邪教組織之外，香港政府實際上唔能夠對法輪功成員有任何取締行動
喺2002年2月，保安局局長葉劉淑儀表示全球每個地方都有維護國家安全既法例，得香港無，認為政府落實立法係責無旁貸，而且畀兩三個月既諮詢期都已經足夠
回歸前，政府要向市民進行法例諮詢，一般會先用白紙印諮詢文件，即係白紙草案。等政府收集完意見、經過討論同修訂之後就會用藍色紙印，即係藍紙草案
不過葉太今次立廿三條就一反傳統，直接就印藍紙。面對立法會民主派議員既質詢，葉太就認為草案既技術性同複雜情況會令到無人肯真係閱讀，即係白唔白紙先根本無所謂，最緊要快，喺2003年7月完成立法。佢仲話帶睇人唔起：「唔通的士司機、侍應、麥當勞員工又會識得同我傾廿三條既白紙草案？」
23條立法引嚟各界關注
1. 天主教陳日君樞機(時任港區主教)擔心萬一中國大陸既天主教因國家安全理由被取締果陣，會牽連香港天主教教會
2. 記者協會麥主席擔心23條會令記者報導敏感問題果陣承受壓力，亦都促使傳媒為咗避免犯法而自我審查
3. 大律師公會梁家傑主席認為諮詢文件中建議既警方調查權力過大，亦都無好似英、澳咁有相應既制衡同問責制度
4. 八間大學圖書館喺歷史上首次發表聯合聲明，對於諮詢文件提及管有煽動性書籍可以入罪既建議表示憂慮，擔心會損害學術自由
5. 民主黨涂謹申認為特區政府喺經濟最低迷果陣提23條立法係其心可誅
面對各界既憂慮，葉太有公開回應。佢出席Shitty 舉辦既23條立法論壇果陣，回應非民主政權可唔可以制衡到23條執法既提問果陣講到：「希特拉都係民主選舉上台既，但佢殺咗700萬猶太人，一人一票係咪真係可以保障人權？」
過幾日佢再喺中大既論壇派定心丸：「我相信過幾年之後，你地出咗社會做野再睇返，你會相信葉局長係冇呃你地，放長雙眼睇啦各位！」，實質暗串中大學生未出社會工作唔識野、考慮不周
解釋就解釋咗，2003年2月，23條立法草案刊憲公佈；3月中起更加趁住沙士期間市民既焦點都喺抗炎方面，加快立法既審議程序，終於成功喺6月15日過關，首讀通過！
不過似乎葉太既回應同行動就唔係好得到市民既支持喇！7月1日，民間人權陣線籌辦「反對23，還政於民」既遊行，隊伍喺維園出發，史稱七一大遊行
大部分遊行市民都響應呼籲著黑衫，自製唔同既標語同道具諷刺董特首同葉太，表達反對23條立法之餘，亦都宣示對董特首6年嚟施政失誤既不滿。事後主辦單位話有50萬人參與，不過當時特區政府通過直升機鳥瞰錄影、向中國總理溫家寶匯報既人數就有67.5萬
董伯伯喺7月2日都只係以 「早晨」 回應記者任何關於23條既提問，而且仲堅持如期喺7月9日就23條進行二讀
點知7月6日，香港建制當中既商界重要人物田北俊竟然變節反對23條，宣佈即時辭去行政會議成員職務，搞到董伯伯第二日就宣佈押後二讀，之後更加喺9月5日撤回草案
7月16日掃把頭葉太辭職並且得到批准，50萬人大遊行亦都令到董建華積勞成疾，開始出現「腳痛」既問題，終於喺2005年3月12日提早辭任行政長官
#98科學怪人
講起沙士，有無人對於重要既事情要講三次有印象？
#99吉田朱里.
/講起沙士，有無人對於重要既事情要講三次有印象？/
洗手
#100科學怪人•6 個月前
/洗手 /
咁你都記得，睇嚟巴打唔細
#101目黑
回歸之後嘅香港政府真係好撚垃圾
#103張繼聰相繼失聰
/回歸之後嘅香港政府真係好撚垃圾/
毫無擔當嘅風度，無一例外
#104摟屌裙最迷人
講開沙士我都諗起d好感觸既野，當年我岩岩讀中一，對於咩沙士根本冇咩特別感覺，只知日日都戴口罩，仲有就係放咁多日假真係好爽。
到左出黎做野，我老婆（當時女朋友同居緊）係醫院做護士。有日佢番晏晝收夜晚10點，食緊晚飯時新聞先講緊佢做野間醫院有人確診豬流感。隔左無耐就收到佢電話打黎話佢接觸過個確診者，要即時隔離，叫我幫佢執d日用品過去比佢。
個陣去到醫院都冇得見佢，我將d日用品交比佢d同事轉交比佢。之後我企左係醫院出面一個佢望到我我望到佢既位置傾電話。好彩過兩日報告出黎冇受感染終於可以放番出黎。
離遠隔窗對望既心情一d都唔好受，當時大家都講到喊，就算我而家打番出黎諗番起都眼濕濕。回想番當年沙士既醫護人員足足有成幾個月都冇得番屋企，同屋企人只可以離遠隔窗對望，真心佩服佢地既付出。
#105張繼聰相繼失聰
聽日講少少家庭手工業
#108張繼聰相繼失聰•6 個月前
/講開沙士我都諗起d好感觸既野…… /
我明白
沙士果陣佢地唔單只同屋企人隔離成個月咁簡單，最大問題係sars真係死得人，佢地屋企人可能要作定最壞打算等等下變成陰陽永隔，度日如年
#109科學怪人
/講開沙士我都諗起d好感觸既野……/
向有心既醫護人員致敬
多謝分享
不過而家醫療最大問題都係人手短缺、病房經常爆滿，再有心都好難維持到好服務
#110李棟旭
其實政制史一啲都唔悶架，係1980－2000呢廿年個變動次數頻密到係世界罕見
區議會可以見到由早期毫無民主成分去到民主派有佔多數機會，之後又見到政府可以使橫手到加啲委任議員落去、重劃選區等你唔過半
又好似廢除市政局最大目的係破壞民主派政黨嘅系統，令到政治人才一步步晉升嘅機會消失等等都幾多嘢睇
#111科學怪人
香港果廿年包含 傾回歸前、傾回歸、銜接、回歸
每一步都牽涉政治計算
#115科學怪人
/Mers 有係香港爆過咩？ /
有過案例，即刻關事接觸過既人都trace 哂
無爆
#117游大輝
/講起沙士，有無人對於重要既事情要講三次有印象？/
千奇 千奇 千奇 洗手 洗手 洗手
着到成個太空人咁
#120科學怪人
/講起沙士，有無人對於重要既事情要講三次有印象？
千奇 千奇 千奇 洗手 洗手 洗衣
着到成個太空人咁 /
其實董太已經係好野嚟
你睇下龍蝦
#121游大輝
睇返蔡子強本書先發覺原來葉劉真係一個傳奇。佢係23條之前人氣好高，而可能係咁所以當時 23 條一提出果陣都多人支持嘅，唔知02年7月定11月果陣話有7成市民支持，但就係因為葉劉亂講野同埋得罪記者（信報某個姓黃定唔知姓何嘅記者比佢當眾串左一獲）所以啲市民先知23 條有伏，最後仲搞到71五十萬人上街要自己辭職，佢都算好野架喇
#122游大輝•6 個月前
/其實董太已經係好野嚟
你睇下龍蝦/
未見識過龍蝦之前覺得董太好潑辣，但見到龍蝦之後 都係曾太最正常
#123科學怪人•6 個月前
講到香港史，考下大家以下說話喺香港既起源
1. 倒抽一口涼氣
2. 犯咗法，又點喎
3. 人無夢想，同條鹹魚有咩分別
4. 臭罌出臭草
5. 官到無求膽自大
6. 一刹那既光輝唔代表永恆
7. 阿燦
8. 識煮糖水又會煲粥
9. 威囉 疊馬囉 英雄主義囉
10. 若要人不知，四十三kB
#124游大輝
講第四句嗰個人真係埋咗個罌入立法會個時間廊度
第十句有聽過但唔記得係邊個講嘅
#125日向葵海（主唱）
1. 齊昕嘅母親
2. 肖友懷事件
3. 少林足球
4. 白頭佬
5. 林鄭
6. 蔡楓華
7. 燦神
8. 何東精神
9. 陳浩南
10. Oscar Ma
#126真名開帳戶
所以話嗰次拉倒廿三條個關鍵少數係田大少豉油黨
而唔係飯民
#127科學怪人
/所以話嗰次拉倒廿三條個關鍵少數係田大少豉油黨
而唔係飯民 /
依個真
#128科學怪人
/1. 齊昕嘅母親
2. 肖友懷事件
3. 少林足球
4. 白頭佬
5. 林鄭
6. 蔡楓華
7. 燦神
8. 何東精神
9. 陳浩南
10. Oscar Ma/
好勁，10都知
#129掟上今日子
/所以話嗰次拉倒廿三條個關鍵少數係田大少豉油黨
而唔係飯民 /
/依個真 /
究竟飯民有過咩重要功積？
#130科學怪人
/究竟飯民有過咩重要功積？/
近d 既咪林卓廷反圍標，真係搞冧哂班管理公司同contractor
#132夏威夷夏蕙姨
仲追緊上個post 有排睇 正
巴打加油 認識多啲自己嘅城市真係好重要，但係同時見到佢開始墮落呢一下真係好心痛
都算係見證咗由盛轉衰嘅歷史必經階段
#137張繼聰相繼失聰
Offtopic家庭手工業
大家應該聽過上一輩或阿嫲年代流行「穿膠花」：家庭主婦係廠攞一大堆手作仔返屋企動員全家人夜晚齊齊穿，以幫補生計。嗰個年代家庭入息低，家庭式手作不失為一種增加收入嘅好方法
一般大家知道這種模式約莫係60年代開始盛行，不過原來係香港工業未起飛之前，家庭式手工業已經出現。
最早嘅家庭式工業要追溯到20世紀30年代嘅「造紙袋」。當某店鋪要造紙袋，就係街頭張貼招紙廣告，主婦們就聞風而至。店鋪只會提供紙張，而造紙袋所需嘅其他用品例如漿糊、鉸剪等都係由家庭主婦自備。熟手嘅家庭每月可賺一蚊。
40/50年代仲有一種家庭手工叫「鎚椰衣」，椰衣即係椰子殼外面一條條嘅纖維。鎚黎做乜？原來係整掃把。女人們攞一批椰殼返屋企，用鐵鎚，敲下敲下將纖維鬆開，就可以造掃把頭。
椰衣掃把嘅好處係塵埃一經掃抹會藏哂係纖維之間唔會四處飛揚，係垃圾桶dun一dun，塵埃就全數跌落。
之後50年代嘅家庭手工更多元化：有「鎚蓮子」（蓮子開邊）、「摘芽菜」（摘根）、「剝蝦殼」（幫麵鋪整雲吞）等等
到60年代，香港工業真正蓬勃，就出現我哋熟悉嘅「穿膠花」、「釘珠片」、「串珠仔」、「造爆竹」等等，工業製品係國際打響名堂，家家戶戶既辛勞都功不可沒架（細路真係慘，朝早返學，放學溫習做功課，夜晚無得玩要幫手做工人 ）
（參考 吳昊 《老香港 人海微瀾》）
而家年代我地諗落覺得幾有趣。但以現代工業標準去睇，呢種生產方式簡直難以想像：具挑戰之處係，點樣係將生產工序外判比千萬家庭嘅同時（仲要唔係固定人員），嚴格管理好產品質素？做產品QC恐怕都幾大工作壓力
#141科學怪人
btw 除咗QC，做training 應該都幾煩
始終d野雖然唔係專業工種，都係要教
#142張繼聰相繼失聰
/68. 基本法23條立法爭議/
孽太，好嘔心
#143游大輝
/btw 除咗QC，做training 應該都幾煩
始終d野雖然唔係專業工種，都係要教/
但係應該唔會太難上手卦?
#144Z.Bauman
係法國做緊有關於雨傘後網絡自由既研究，有無人有興趣
好希望至少係我能力範圍可以寫一d 關於香港既事
#145Z.Bauman
有興趣可以add 我tg 吹下水做個interview
tg: Zbaumanresearch
#147科學怪人
特別專題: 香港對性罪行既防治(上)
之前見到喺連登有個戀腳Post，當中唔少絲打應樓主既要求貼出自己既修長美腿，所獲得既討論反應遠比小弟依個低質Post 熱烈
葡萄心態作祟下，其實係當時心血來潮諗起一單有趣既戀腳案例，想由此講下性罪行喺香港既防治歷史
個人覺得用案例講好似有趣少少
(以下案例用化名，當事人已經受到法律制裁，所以雖然係真事但唔開真名。我亦都將件事稍微故事化咗)
2008年7月，旺角鬧市有一班保險經紀大熱天時都仲要企喺街度推銷保險
「呀！非禮呀！」當中一位22歲既女同事突然間尖叫，嚇到花容失色
女同事回個神來，只係見到遠處有一個細小既身影正漸漸消失喺眼前
身邊班保險狗見到當然起勢咁追，可惜就連馬屁都聞唔到，身影亦都消失於人群之中
女同事話小腿無端端畀人由上至下摸咗兩秒，不過條友唔知做乜就咁摸完就走咗去。佢無得去報警，因為根本就連條友個樣都睇唔清
總唔能夠話因為發生依d怪事就唔再去推銷，好在之後2個月都無事發生，去到9月27號，竟然發生同之前一模一樣既事，就好似打機NPC既觸發劇情咁！
女同事大叫救命，成班保險狗一踴而上！可惜，狗公始終都係長期返工、缺少運動，同上次一樣都係捉唔到果個人。不過今次有d唔同，就係女同事記住咗摸腳條友個樣
女同事去到警署報警，講出當時既案情。警察攞咗一堆相畀女同事辨認，點知條女一眼就認出！
就！係！你！
以為會做出依種事既係面目猙獰既性罪犯或者係油頭肥毒撚？大錯特錯。相反，相中人偏瘦削、黝黑，散發住一股陽光氣息
咁相中人就叫李普晴，佢當年17歲，係一個品學兼優而且動靜皆宜既學生
學業:
會考23分
（中文5*，數學、附加數、物理 B，生物、化學C）
學校朋輩輔導員 主席
課外活動:
1. 學界男子丙組400米紀錄保持者
2. 代表大埔區參加全港運動會，主打400米同800米，屢次贏得冠、亞軍
3. 公益少年團校際中國象棋團體賽亞軍
叻人背後少不免都有陰暗既一面，佢同戀腳Post 既一眾巴打一樣，對於靚腳都係情有獨鍾
不過佢衰在唔係得把口，早年已經有摸途人小腿既習慣兼且畀差人拉過，當時仲細所以只係警司警戒，不過就留咗相搞到畀人認到咁解
女保險從業員認到係李普晴之後，警察就直接上門塔佢返去。之後發展都好簡單，李普晴直接同警察認咗自己有做，亦都搵咗政府律師代表上庭求情
中文5星既普晴自己寫求情信，透露被捕之後已經知死，自己主動搵心理醫生睇病，先至知道自己有戀腳癖，而家只係覺得羞恥
最好佢都算好彩，可能因為成績好啦，唔駛好似沙咀故個樓主咁入去Thank you sir 1, Thank you sir 2
只係判咗18個月既感化令，不過就留咗案底
#148目黑
中文5星既普晴自己寫求情信
#149科學怪人
/中文5星既普晴自己寫求情信 /
都係一種表達誠意既公關手段
不過最神奇既都係佢著校服上庭應訊，驚死人地唔知佢邊間學校
#151張繼聰相繼失聰
/但係應該唔會太難上手卦? /
我估派得比家庭做手工應該都係構造簡單嘅部件嘅，之但係簡單極都有標準掛。真係想知點樣train，點樣QC
#152張繼聰相繼失聰
/不過最神奇既都係佢著校服上庭應訊，驚死人地唔知佢邊間學校 /
痴線，條友癲癲地
題外話
有唔少名人好似許仕仁咁證據確鑿俾人告，但依然有好多名人紳士朋友為佢寫求情信。我就有疑問，明知果個人罪有應得，寫求情信既人唔擔心被社會誤會自己同情/維護被告而破壞自己嘅社會形象咩？？
還是係純粹出於同被告嘅交情去撰寫求情信，免得俾人指責無情無義？
#153科學怪人
/我估派得比家庭做手工應該都係構造簡單嘅部件嘅，之但係簡單極都有標準掛。真係想知點樣train，點樣QC /
好似一個紙袋，張紙要摺幾分、剪幾多，係可發影響到紙袋尺寸
樣樣都要有規範
#156科學怪人
(中)
案例就講完，開始講下個防治政策
以前社會同資訊唔係好開放，性罪行一直都係傳統禁忌。係人都知性罪案，錯一定係在於加害者；不過唔知咩原因，唔少受害人尤其係兒童，會覺得被性侵係自己既錯。即使唔係都會羞於啟齒，覺得講出嚟好醜怪、覺得多一事不如少一事、甚至係擔心講咗出嚟加害人會受到懲罰/影響親友圈子內其他人(依個多數係講緊熟人作案既案例)，理由千奇百怪
其實依個唔止係東方傳統既觀念，甚至係性思想出名開放既美國都有依個問題。美國唔少州份既DOJ網站關於防治性罪行既介紹都有提及過: 性罪行既under-report rate 相比其他罪行都係比較高，大致亦都係舉出上段既原因
有見及此，關於性罪行既檢舉，喺司法理念上會傾向相信受害人嚟平衡返:
1. 認為女性唔會用自己「名節」去屈人，第一件事會首先傾向聆聽同相信受害人
(所以李普晴一被點到相就一定係拉咗返去先)
2. 理解受害人喺當時未必敢講同需要時間平復，歡迎佢喺案發後任何覺得舒服既時間舉報
(in #metoo we trust)
所以香港，屈人非禮、強姦既成本比較低，一來傾向相信，二來就算告唔入都比較難證明女事主係有心屈人，三來就算告得入都只會係老妨，同強姦既後果差得遠
講起性罪行，大家都會諗到街頭d 變態佬，即係李普晴之類。不過出乎意料之外，大多數既性罪行唔係依d，而係熟人所為。美國既數據講緊係9成，所以諗到1d 針對性罪犯既額外既限制
咁講到熟人作案之中最轟動，就要傾下梅根鄰居姦殺案
「佢叫梅根(Megan Kanka)，1994當年7歲，本身就有一個叫做完滿既家庭，住喺市郊相對寧靜既地方。
咁有日屋企附近就嚟咗個鄰居，佢睇落衣冠楚楚、青靚白淨，而且人又好相與，平時同大家都會有傾有講。咁佢就邀請梅根去佢屋企度睇puppy，大家咁熟，作為父母當然好放心啦！
點知，梅根去到睇到既唔係狗仔，而係大狗！大狗x 完佢之後再用皮帶將佢勒死。
單野上咗報，發現原來個鄰居之前已經有幾次性罪行既案底。事件引起全美關注，梅根父母認為如果一早知道佢係d 咁既人，就唔可能畀個女單獨同佢玩。於是佢地週圍演講，最後亦導致有性醜聞果位總統同意簽署法令，要求各州都推行對性罪犯既社區通知，亦即係所謂《梅根法》」
#158科學怪人
(下)
點解要扯到去美國呢？因為自從梅根法之後，美國對於性罪行既防治同各項研究都係喺世界當中領先，亦係全球第一個額外限制性罪犯既國家，以致後來喺香港既討論同立例都有從中參考
梅根法係喺嚴重罪案、令人憤慨既呼聲中成立，限制亦都千奇百怪:
美國人有一人一票真普選，亦都享受高度既自由。佢地隨便由一個州搬家去另一個州，就好似上水搬去沙田住咁方便
不過呢，有一類人就除外既，就係《性罪犯登記冊》既registrants 啦。因應唔同州份、所犯罪行同受害人既性質，佢地都會受到唔同程度既限制。咁我就係咁意講d 基本既
社區通知
1. 某d 性罪犯既資料係可以喺網上查核，有齊名、地址、所犯罪行等資料，就同高登畀人起底一樣
當然亦都會透過傳單、街招、報章等既方法去通知社區內既人有性罪犯搬入
2. 美國有樣野叫假釋，即係未坐滿刑期就放，但原定刑期既剩餘時間都要接受監察同假釋官提出既條件(有d 甚至真釋後都要繼續限)。主要都係針對孌童犯，依d 條件可以係千變萬化，舉d 常見既:
唔可以喺公園附近蹓躂(loitering)
唔可以住喺學校、教堂某特定方圓範圍內
唔可以從事會接觸小朋友既行業
最搞笑既
紐約州既性罪犯唔畀玩Pkm Go
唔同州既性罪犯喺萬聖節要熄燈，同貼依張紙喺大門
“No candy or treats at this residence.”
仲有唔畀化妝、特定時段要留喺屋企之類
香港喺千禧年之後都發生咗一連串性侵兒童既案件，尤其係老師侵犯完學生之後仲可以出去做補習阿sir，開始有呼聲去定立類似美國梅根法既限制法例同社區通知嚟防止色狼繼續侵犯兒童。香港就此委託顧問去做過研究
如果完全搬美帝果套，有好大可能係違反基本法，因為基本法將《公民權利和政治權利國際公約》捆綁，對釋囚作出任何限制都會有憲制上既危機。當推行一地兩檢都面對咁多人為反而反，推性罪犯社區通知既後果可想而知
另外基本法33條賦予香港人選擇職業既自由，唔可以講到明話唔準性罪犯做兒童相關既工作。不過行政上都有辦法，唯有可以inform 老細，交個波佢地決定請唔請，2011年《性罪行定罪紀錄查核機制》終於推出
大致係:
1. 有意聘請需要接觸兒童工種既僱主可以要求準僱員向警務處申請查核
2. 要親身上門去灣仔搞，搞完即刻得到一封密碼信
3. 無性罪行既話，僱主喺7日後就可以透過信上既密碼，打入自動電話系統收聽結果
咁講返李普晴，佢係咪就會喺查核當中被披露呢？唔係，佢係可以參加罪犯自新計劃，因為:
1. 佢既定罪係三個月監禁以下
2. 佢係初次被定罪(即使唔係初犯)
只要佢喺三年之內唔犯法，相關既非禮罪就會「失去時效」，唔會喺電話系統當中被披露
#159目黑
香港係私隱保護方面做得幾好
#160科學怪人•6 個月前
/香港係私隱保護方面做得幾好 /
唔覺，何出此言？
#161美艷美腰黃美英
沙士個陣我就係記得同我呀哥日日係到睇數碼暴龍02
#164科學怪人
69. 領匯上市
回歸之後起咗大量居屋，不過後尾因為樓市問題又要停售，開支大咗收入少咗。房委會喺2003年7月24日宣佈將旗下既泊車位同零售商場分拆出售，賣既形式會係成立領匯房地產信託基金
講下個名先，The Link Management，link 既意思係同商户締結顆伴合作關係。至於領就同Link 諧音、匯就解作收取外匯既意思，即係指投資者可以有錢收。行政總裁蘇慶和預告喺公司成立初期，因為減少咗官僚程序，商户租金可以有下調空間
不過佢都表示領匯按照商業原則運作，長遠嚟講係會做野增加商場人流同改善服務，亦都會收返市值租金
11月24，領匯公開招股書正式派發，預期派發既年息係6.85厘，吸引唔少人借孖展認購，希望可以獲發更多手股份
不過上市唔係一帆風順，鄭經翰喺電台節目批評房委會賤賣資產，覺得集資先套現得300幾億係嚴重低估咗價值；另外佢都擔心第日領匯會加租逼走商户。鄭經翰提出動議反對領匯上市，不過房屋局常秘梁展文就批評鄭「將假既說話重複說成真」，更加有唔少市民批評佢阻人發達。阻人發達死全家，結果就連白鴿黨都反對鄭經翰既動議
立法會搞唔掂就輪到法律層面。就喺12月8日，領匯截止認購既前夕，竟然係一個67歲既公屋綜援婆婆盧少蘭走出嚟，入稟高等法院申請司法覆核。佢既法律理據係房屋條例第4條規定:房委會除咗要為居民提供住宿，仲須確保提供商業用及營業用建築物，當房委會失去商場管理權就等於提供唔到
婆婆當然無錢打官司，搵法援又唔批，可以點？唔怕，有鄭經翰、長毛、陳偉業、陶君行等人喺背後支持同墊支費用。法庭最後判婆婆敗訴，都係基於條文上既考慮:
1. 條文寫確保提供(to secure the provision)，無話限定必須由房委會提供(to provide)。所以字眼上容許由領匯依個第三者提供
2. 條例17A條容許房委會喺符合租契同行政長官同意下出售屋邨不動產，包括商場、停車場等設施
雖然係輸，不過亦都因為官司，再加上上訴再上訴既漫長過程，領匯既第一次上市被擱置。2005年1月，證券業人士同曾經認購既散户發起1萬人參加既反政客亂港大遊行，「聲討政棍鄭奸漢、長毛、塵偉業，損害港人利益」
領匯要拖到2005年11月先至可以再次招股。結果第一日收市，股價已經比起招股價升咗15%，睇落好似皆大歡喜。不過之後問題開始浮現，領匯成為地産霸權既表徵，租金隨住一連串既翻新同改善工程之後上揚，令到好多小型商鋪都難以承受。商場店鋪趨向集團式同單一化，市民失去以往既人情味、集體回憶同低廉商品
#171科學怪人
70. 雷曼迷債事件
經歷完沙士既低谷之後，香港股市可以話係欣欣向榮，除咗領匯被超額130倍認購之外。喺2005年開始，建行、招商銀行、中銀、工銀等內銀股陸續喺香港上市，引起香港散戶同投資者既熱烈認購，令到香港股市氣氛不斷升溫，去到2006年底更加升破20000點！
2007年8月，中國突然宣佈玩港股直通車，即係以天津作為試點，容許大陸居民喺中銀既天津分行開設户口，不限金額咁直接投資香港股票市場。香港市場知道依個消息都好高漲，係咁升，去到10月30日已經升到31958點既歷史高位，仲高過李兆基既預期
只不過，依個消息都係出口術，一直都未得到正式落實。11月3日溫家寶總理接受記者訪問果陣提到要三思而後行，既要考慮香港股市係咪承受到，又要考慮點定立相關既法規
當香港知道中央可能走數既消息後，11月5日股市即刻大跌1526點，不過市場當時仲係好樂觀，李兆基預測去到2008年春天恒指都可望33000點
另一方面講到美國，當時息口低借錢又易批，加上樓價又不停上升既環境，好多家庭都借錢置業，甚至係按咗本身層樓再融資供多一層樓。上述證明唔到還款能力既貸款，叫做次級按揭。美國既金融機構為咗賺更多，會將依d次級按揭同優質債券撈埋再進行債券化(結構產品)，等整體獲得優良評級再賣畀投資者
可惜2006年開始美國樓價見頂回落，令到d借大咗既美國人還唔起錢、次級按揭既斷供率不段上升，即係搞到結構產品個價都會下挫
講返香港市場，美國第四大銀行雷曼兄弟同香港新鴻基金融合作，設計36款以利息高於定期存款作為招徠既迷你債券，估計集資140億。迷債分銷到本地各大銀行，而銀行職員喺講解既時候被指為求跑數誤導包括退休人士在內既市民，事後唔少買咗既市民都聲稱誤以為迷債係銀行存款而唔係投資
結果當然大家都知道，次按爆煲導致雷曼破產。政府即時要求銀行以市價回購所有迷債，不過因為倒閉事件令迷債既市價大幅下跌，班投資者當然唔肯過佢。新成立既雷曼苦主大聯盟要求銀行全數退還本金，更加不斷發起遊行示威同喺銀行門口聚集抗議，更加有大姐Ming、荷蘭叻等偽人力撐苦主。
有言論同情佢地誤信不良銷售導致血本無歸，但同樣都有言論覺得佢地只係投資失利，唔應該輸打贏要。事件以銀行跪低並且賠償85%本金告終
#172目黑
原來雷曼兄弟係銀行黎架
#173科學怪人
/原來雷曼兄弟係銀行黎架 /
投資銀行，可以買其他公眾金融機構既次按
#175游大輝
/投資銀行，可以買其他公眾金融機構既次按/
早一兩日做風險管理份 assignment 睇左啲資料，原來佢爆煲嘅原因係佢靠借出面銀行啲錢黎放數，明明自己得200億美金嘅本，但係借左出面成6000億美金 ，高峰時每個月借500億美金出去，結果個樓市跌少少就足以推冧成間公司了
#177天然矮
科學怪人巴打可唔可人講多啲香港嘅交通史?
#178十二指腸
/回想起sars 期間電視新聞報導每日感染人數逐日增加，由最初得個知字，到高峰期越睇越心寒，香港成為疫埠，最得人驚係唔知道幾時會完，覺得香港應該玩撚完 /
個時帶個口罩去 virtual zone打機
#179科學怪人
/早一兩日做風險管理份 assignment 睇左啲資料，原來佢爆煲嘅原因係佢靠借出面銀行啲錢黎放數，明明自己得200億美金嘅本，但係借左出面成6000億美金 ，高峰時每個月借500億美金出去，結果個樓市跌少少就足以推冧成間公司了 /
最主要d 人無得還
#181科學怪人
其實點解無人會問
美國既性罪犯可唔可以透過整容嚟逃避社區通知？
#182目黑
/其實點解無人會問
美國既性罪犯可唔可以透過整容嚟逃避社區通知？/
美國好似有咩社會保障號碼.etc
#183科學怪人
/美國好似有咩社會保障號碼.etc /
依個no. 其實無乜關係，因為好似身份證咁並唔會喺性罪犯登記冊列出
現實情況係例如我想扮正直識女仔
但登記冊有我張相同名
咁我介紹自己果陣求其作個假名呃人+ 整容，對方咪唔知我係registrant 囉
#184科學怪人
其實係，唔係話第一次登記咗就算
一般每3個月都需要去返local sheriff (類似警察局) 登記一次，入面會重新影相。除非每三個月整一次啦
依個過程叫做register as a sex offender
如果唔肯咁做既話就會觸犯 failure to register as a sex offender ，都係一條重刑罪，會被通緝
failure過既人喺登記冊既分類度會被視為更加危險
因為大家會覺得佢唔登記即係唔肯改
更加備受白眼
#186科學怪人
btw，性罪犯登記冊都有去分類邊d 性罪犯危險d
去等公眾認清楚
一般都係有3個Tier
點分？
主要係
1. conviction-based: 由定罪決定危險程度
一般強姦犯會比4th degree sexual assault危險
2. Recidivism: 重犯會比初犯危險
留意failure to register as a sex offender 都係一條性罪行，犯咗都係會被視為重犯性罪行令到自己更危險
3. Duration: 登記咗10年無再犯既比啱啱出獄既安全
Tier 1: 多數都係衰possession of child porn、輕微性侵(adult victims)
Tier 2:性侵(child victims)、嚴重性侵、完成治療又多年無犯既rapist
Tier 3: rapist、重犯者、Failure to register
另外最高仲有一類 Sexually violent predator，布希政府果陣新加，針對果d犯完又犯、精神不能自控既人，唔會放出嚟，坐完之後要去精神病院接受治療，直到唔再violent 同predatory為止
#188M3730R
此po已完
#189科學怪人
/此po已完
應該都已經係學術台比較長壽既post/
始終會有講完技窮既一日
仲有無人想討論
– 編註:收錄至此, 之後嘅內容請去原post睇 –