(編註)
1. 原post link於此, 誠意鼓勵大家推推post
2. 為利於閱讀, 現只留有心回覆
3. 就史料爭拗卻未見詳盡觀點者亦刪去
4. 回應本blog初衷, 所有圖片均未有include
5. 引用內容以”/”標示
6. 內容太多, 呢邊會分開幾個post
7. 部分引用時事講笑(以”*”標示),編者會盡量加返註解係段尾
致敬 科學怪人巴打 & 所有推post巴打 @LiHKG
(/編註)
Index:
45. 石硤尾大火/#654
46. 公屋: 令雞脾漲價既元兇/#663
47. 雙十暴動/#674
48. 香港撲水時期/#681
49. 天星小輪加價事件/#706
50. 講下香港既銀行業發展 (應巴打要求)/#711
51. 六七暴動/#764
52. 紅磡海底隧道通車/#785
53. 香港首位喺荷里活發展既巨星/#809
54. 香港，勝在有ICAC/#825
55. 越南船民/#834
#654科學怪人
45. 石硤尾大火
喺二次大戰結束之後，大量湧港既大陸人對於住屋需求變得殷切。當時既工作機會都集中喺香港同九龍市區，於是落到嚟既人都要喺市區附近住。市民就喺石峽尾之類比較偏僻既地區起木屋，佢地只要見到有地方就會起，逐漸咁形成一個又一個高密度既木屋區
早喺1948年香港政府見到木屋區既發展都推出咗相應既公共衛生規例，主要係針對潔淨方面，授權咗醫務處長、工務司同警務處長可以對於唔符合公共衛生既木屋進行清拆。咁但係當時就無考慮消防方面既問題，其實木頭非常易燃亦都容易令到火勢蔓延。
喺1950年代初，香港木屋區已經發生咗幾單火警，其中最嚴重就要數到1953年聖誕節發生既石硤尾大火
1953年12月25日夜晚9點幾，喺石峽尾村同上村交界既藤廠首先著火，無幾耐吹起北風，火勢就蔓延到白田上村。當時喺果個位接駁滅火水喉係非常困難，拖慢咗開始灌救既時間，所以過咗40分鐘成個白田村都已經成為火海。晚上10點，香港消防總局通過電台呼籲全港後備消防員都去現場幫手，甚至係港島區既消防車都趕去現場增援(當年未有海底隧道，車輛由香港去九龍只能夠經水路)
因為火球會向上伸張，去到火勢最猛果陣係連喺港島都可以清楚睇到。去到扑性day凌晨零時之後，諸葛亮借東風，把火即刻燒過去石硤尾村大街口，仲波及埋窩仔下村，一路燒到凌晨2點半，火勢先至受控
火災發生之後，木屋區既災民倉皇逃生，佢地喺大埔道同青山道一帶等待救援。比較麻煩既係災民當中有唔少係同家人失散咗既小朋友，所以出於安全問題警察都要先接走同暫時安頓好佢地。
火災除咗會直接燒死人之外，最大既問題就係令到班災民無家可歸同無飯開。不過人間有情，深水埗街坊福利會附設小學就開放成為火災當晚畀婦孺暫住既收容所。喺26日中午社會局派飯畀災民果下先至知道原來有咁多災民，一共派出咗4萬幾份飯。紅十字會、民安隊、救世軍等都有幫手喺寒冬派發應急既禦寒衣物
據統計，當時既火災波及六條村並燒毀咗木屋2580間，燒死咗3個人、重傷6個、輕傷45個、登記咗既無家可歸既災民有57151人
#655Improver
巴打會唔會計劃講下二戰前嘅金融銀行史呀？
#657科學怪人
/巴打會唔會計劃講下二戰前嘅金融銀行史呀？/
上文講到滙豐算唔算？
#658長期病患者
樓主打算總共會打幾多篇
#659科學怪人
/樓主打算總共會打幾多篇 /
希望可以去到sars
#660Improver
/上文講到滙豐算唔算？/
當然算啦
仲想聽多d，尤其我以前睇過一本書
話香港其實就算係二戰前，銀行業務同貿易融資都係勁過上海
#661科學怪人
/當然算啦
仲想聽多d，尤其我以前睇過一本書
話香港其實就算係二戰前，銀行業務同貿易融資都係勁過上海/
巴打睇過既都不妨分享多d
#662SUV
我阿麻就係石峽尾大火，冇左自己間舖
之後一路都要開始打工，揾唔到咩錢
#663科學怪人
46. 公屋: 令雞脾漲價既元兇
記得以前喺YouTube睇過一條片講上女朋友屋企，自己住私樓就有雞脾食、住公屋搞到無雞脾食之餘仲要送客
咁話說石硤尾大火之後，政府同社福機構所做既野只係可以臨時滿足到災民短期既糧水需要。長遠嚟講，災民無家可歸都要繼續泵錢落去
首先當時中華廠商會主辦緊第11屆既工展會，大會即時決定捐1皮野賑濟災民，並且喺全場既展位進行義賣；至於一堆慈善機構亦都組成咗委員會專責處理籌款，通過工商、華僑同星島日報代收各界捐款，其中普慶戲院同八和會館仲進行義演向觀眾募捐。
短短兩日，已經籌得6萬既善款，去到1954年5月1日已經累積到230萬。委員會除咗將收到既捐款用喺救災物資上面，仲前後向每名已登記既災民派發共35元既救濟金
但係最終嚟講都要諗辦法去安置佢地。最理想既辦法其實都係原區安置，咁依個簡單，拆哂d木屋跟住由得佢地起返既話係得，不過又驚燒多次咁解，於是就有建立徒置屋邨既諗法。首先政府收返災區既私人土地，拆哂d違法建築物；為咗可以安置更多災民，之後再將石峽尾附近既山丘填平。政府會喺原地起一堆5到7層高、符合安全規格既水泥房，並且喺區內添置馬路嚟防止未來火災蔓延。
徙置屋邨主要就有3種既，租大d 就貴d 租金，好公平。一般單位120平方呎，可以容納5人家庭，月租14；86呎既租10蚊；得半間房既租5蚊。當時單位就真係家徒四壁，疴尿同沖涼要去每層中央既公眾廁所同浴室、煮飯就要去外面走廊用自己既火水爐。仲有一個問題，廁所係連門口都無，所以當時女性居民係要結伴去廁所嚟防止有人偷窺，形成唔錯既鄰里關係
當時就無公屋扣分制依回事，不過對於徒置大廈既居民都係有規則要守：
1. 唔准在屋內劈柴
2. 要保持村內清潔
3. 唔准隨地吐痰
4. 唔准隨街dum 垃圾，垃圾要放喺垃圾桶內
5. 唔准隨街便溺，要用公廁
自此之後亦都陸續有其他既徙置屋邨落成，1955年就建成咗大坑東邨同李鄭屋邨，其中起李鄭屋邨果陣喺地盤意外發現咗一座東漢古墓，政府隨即保存同改建成博物館。咁同而家康文署既博物館唔同，李鄭屋果個就有好多小朋友去既，不過當然唔係因為對歷史有興趣，純粹係為咗入去嘆冷氣(當時嚟講算係奢侈既享受)
#665科學怪人
/我阿麻就係石峽尾大火，冇左自己間舖
之後一路都要開始打工，揾唔到咩錢/
佢無畀返地鋪做補償？
#667SUV
/佢無畀返地鋪做補償？/
你估係2017年咩，果時邊有政府賠償呀
好似連優先上公屋都冇呀果個年代
#668科學怪人
/你估係2017年咩，果時邊有政府賠償呀
好似連優先上公屋都冇呀果個年代/
拆木屋優先上公屋係有
應該話徙置屋邨本身既意義就係要搞掂d 木屋人
#670SUV
/拆木屋優先上公屋係有
應該話徙置屋邨本身既意義就係要搞掂d 木屋人/
徙置區同公屋唔同，公屋唔係共同廁所，廚房，高一級的
優先上徙置區就有
#671科學怪人
/ 徙置區同公屋唔同，公屋唔係共同廁所，廚房，高一級的
優先上徙置區就有/
徙置區算係第一代公屋
#674科學怪人
47. 雙十暴動
喺中國解放之後唔少人都走難落嚟香港，當中有唔少係前國軍同佢地既家人，佢地都會繼續效忠中華民國政府，仲好尊敬蔣中正。咁喺石硤尾、大坑東同李鄭屋徙置區，每逢到咗中華民國既雙十節國慶都會插滿哂中華民國既青天白日滿地紅旗，甚至喺大廈既外牆都掛有孫中山同蔣介石既大型畫像，以示對國民黨效忠同懷緬
但係依d 野如果係以張貼既形式係好難清除。去到1956年10月3日，香港市政衛生局決定禁止徙置區居民喺樓宇牆壁上張貼標語紙旗同其他裝飾物，但就容許佢地用柱或者用繩掛起既形式
喺石硤尾區一早已經有街坊會作為政府同居民溝通既橋樑，所以個決定會傳達得好少少，喺街坊會要求之下班居民都肯自己清除；大坑東都有雙十節慶祝委員會發揮同樣功能，所以都無事。但係李鄭屋邨因為大廈啱啱起好，仲未有居民團體，搞到政府直接派人清除果陣出現糾紛
當時李鄭屋邨一名低級職員見到紙旗，喺請示上司之後撕旗。佢做依件事純粹出於執行職務既忠誠，可惜就無乜政治觸覺，件事引起果區既民國支持者強烈反彈。去到上午11點左右，有3到4百左右既居民去到徙置區辦公室前面聚集要求賠償。一小隊既警員嚟到勸唔掂，2個區職員唯有標貼6面國民黨旗幟平息公憤。居民當然就唔太收貨，散一散之後又再聚集，去到下午一點已經有2千人。佢地要求職員就撕旗事件燃放爆竹道歉之餘，仲要喺中文報章登報道歉，但依樣當然就唔係職員有權答應
去到下午2點15分，有人闖入徙置辦公室毆打一名職員，打完佢再打第二個果陣，有警察入嚟用催淚彈驅散群眾並且將職員救出。警察依個行為令到不法分子乘機將居民既敵對情緒由區職員轉移到警察身上並且演變成為大規模既騷亂。
首先騷亂者對辦事處縱火，去到10月11日仲去到深水埗週圍搶掠店舖同焚燒汽車、強逼市民俾錢佢地買國民黨旗並且以流動既方式襲擊警員。因為情況已經失控，香港政府決定實施二戰後首次戒嚴令，仲派遣英軍幫手平亂並且協助拘捕騷亂者，甚至要出動皇家空軍喺空中偵察。去到10月13日，已經拉咗3600個參與暴動既疑犯，零星暴動要喺10月16日先至平息。
雙十暴動話就話係有國民黨色彩，不過國民政府發言人就話暴動實際上係由中共既人員發動，目的係阻止香港僑胞喺下年慶祝雙十國慶。台方更加表示依件事係共匪借故喺殖民地散佈不安
至於中共果邊周恩來總理就有相反既睇法，佢仲約見咗英國駐華代表，對於香港政府未能有效咁阻止國民黨特務所策劃既暴動提出嚴重抗議
咁香港政府同葛量洪港督就咁睇：
1. 否認事件同國民黨特務有關
2. 唔回應國民政府指事件係共產黨發動既指控
3. 將暴動非政治化，賴哂落三合會度
自此以後既十一同雙十國慶，港府都高度戒備，直到1970年代後冷戰逐漸平息為止
#675目黑
港英政府都幾慘下
下下都做磨心
#676科學怪人
/港英政府都幾慘下
下下都做磨心/
其實都係，因為香港既特殊地理位置
國共兩邊都有大量既支持者同特務喺香港
行錯半步都會變成政治衝突
#680史基。泰爾
見巴打有講
香港保衛戰&香港重光
我又分享一個港台電視嘅節目喇
http://www.rthk.hk/tv/dtt31/programme/historyhk2017/episode/446256?lang=en
歷史說香港 之 香港保衛戰 07/08/2017
大日本帝國在1941年12月8日強攻香港，可是這個兵力薄弱的小地方卻讓勢如破竹的日軍苦戰了十八日，才能令當年的港總督楊慕琦爵士簽字投降。千帆過盡，這場香港保衞戰又出了多少英雄？
港台電視其實都有唔少香港歷史節目睇
值得各巴絲遠離CCTVB俾個機會自己去睇
#681科學怪人
48. 香港撲水時期
GPhone Wong 可以絕食，但絕對唔可以絕水。水無處不在，但係乾淨既淡水喺香港1963年水荒期間就真係一滴難求
咁係咁意先講下香港既用水歷史先咁早喺鴉片戰爭時期，香港既薄扶林瀑布係外國商船同英國海軍喺遠東既重要水源。不過去到1861年，香港已經發展成為12萬人口既商業城市，過往依靠瀑布、山澗同上游儲水池既方法已經滿足唔到用水需要，於是果陣開始香港就陸續起咗薄扶林水塘、九龍水塘等嚟應付。
果陣香港唔憂無水，全港都係無限制咁全日供水；但去到1895年開始維多利亞城每幢樓都安裝水喉，住宅區日常用水唔會受到限制，不過商店就要按水錶收錢；至於城外既樓，如果係華人既話就只可以向街喉攞水，不過係外國人既話就可以裝水錶，然後供水入屋。收費就分兩種：無裝錶既一律按每年差餉加徵2%作為水費、有錶就每用水1000加侖收費2毫半
但係隨住香港既人口越來越多，水塘既供應漸漸滿足唔到需求。去到1928年10月香港發生嚴重水荒，開始要按照供水情況實施七級制水（7為最嚴重）：
1. 屋內每日供水2小時
2. 停止供水入屋，用水需用街喉
3. 海旁建水櫃，減少可供水既街喉數量
4. 街喉夜晚無水供應
5. 街喉每日供水7小時
6. 街喉每日供水5.5小時
7. 街喉每日供水2小時
水荒最嚴重，去到第七級果陣，香港市民自己會去搶街喉水之餘，都會搶山水、井水，就連油麻地火車橋底既黃泥水都有人敢唔放過
喺1945年二戰結束之後香港人口急劇增加，當時政府已經起昨大欖涌同石壁兩個大型水塘。只不過水塘再多，都解決唔到雨量突然減少既問題。喺1963年終於又出事，果年全年降水量得1600毫米搞到水塘都唔夠水，先係宣佈每日供水3小時，再改為每兩日只供水4小時，等同之前既第7級制水
為咗解決水既問題，各方面都諗過唔同既方案:
1963年5月，3000名佛教徒聚集喺跑馬地球場，舉行「向十方諸佛菩薩祈降甘霖法會」，希望可以求得豪雨以解決香港市民既燃眉之急，可惜依班唔係好似呆呆獸咁發動乞雨技能就有雨落，未能夠天從人願
另一方面香港政府都研究過派船隻去日本購買食水，依個方法需要船艦30艘，但就只係可以做到每日供水1100萬加侖，即係每日耗水量既4份之一，實在係杯水車薪
至於當時港九各區既街坊會都組織響應節約用水，自發管理街喉輪水既秩序，仲買咗膠管代替消防喉供水嚟減少浪費，不過個天係唔落雨都無辦法，隨住供水時間越來越少，秩序都開始搞唔掂
去到5月28，香港既水塘得返20億加侖既水，淨係可以足夠供水50日，實在係無辦法之下喺6月起改做每4日供水一次，每次3到4小時。
不過詳細咁講，依度每4日供水一次淨係指入屋喉，街喉都仲可以維持隔日供水一次；另外徙置區因爲人多，所以都可以隔日有水。人可以用少d水，不過工業生產就唔得，所以觀塘既工廠都有豁免，可以維持每日上午9點到11點供水。
喺水荒之下，大量用水既行業例如理髮、紡織之類都做少咗生意，建築業部分奸商亦都因為無水而改用鹹水撈水泥起樓，而鹹水樓係會加速鋼材料既銹蝕，影響到樓宇結構。咁喺茶樓等既飲食業方面，要做生意就唯有向外購買淡水，以前向私人食水商買水係每千加侖賣100，制水之後要加到150，成本上漲之下都係要轉嫁畀食客，亦都需要停咗唔做早市嚟慳水；當時九龍有一間冰室仲有員工因為制水而拒絕沖茶，搞到顧客無茶飲就攞餐刀桶佢4刀
咁制水一事應運而生既文化同集體回憶，就要講到邵氏既電影七十二家房客，「樓下閂水喉」成為電影既經典情景，亦都好寫實。因為當年大家都要喺依短短幾個鐘之內攞夠水，唔係就四日後請早，而水喉既出水水壓係有限，上層必須要等下層關水喉先至可以攞到水。當然大家都可以輪街喉既，一般都係男人返工、女人輪水，因為爭水而互相毆鬥都時有發生。當時工商日報專欄都諷刺:
「朝早離家晚上回，街邊輪水被人推。
血流頭破渾閒事，爭問有無帶水來。」
要解決問題就一定要有穩定既水源，最近既淡水就係東江。喺1963年，周恩來總理指示廣東當局將供水問題同政治談判分開，香港方面亦都成功爭取中國落實興建水務工程，由東江抽水再經深圳水庫由陸路水管供港。雙方同意由1965年3月起，粵方每年向香港政府出售不少於150億加侖既食水，先至解決到水荒問題
香港政府喺1970年代中曾經喺青山起過海水化淡廠，不過因為燃料成本過高喺1982年關閉。時至今日，海水化淡既技術開始成熟，成本亦都越來越低，所以香港社會都開始有重建海水化淡廠既呼聲
#686目黑
邊個天才諗到去日本買水？
#687科學怪人
/邊個天才諗到去日本買水？ /
去日本捉到呆呆獸咪得囉，要幾多有幾多
認真，傾下計啦，點睇海水化淡？
#690目黑
/認真，傾下計啦，點睇海水化淡？/
真心覺得話去日本買水個條友一定有問題
香港之前都好似有間海水化淡廠
但係依家啲東冮水多到要射返落個海到
#691科學怪人
/香港之前都好似有間海水化淡廠
但係依家啲東冮水多到要射返落個海到 /
上文都有講過，喺70年代係有一間
但當時技術未完善，成本太高所以收咗皮
btw諗去日本攞水應急其實好合理
其實有樣野無講，1963年果陣時唔單止香港，連華南都出現罕災，大陸都供唔到水；搵台灣既話隨時畀上面閂水喉，所以自然諗到日本
#692花月流星
會唔會講下九龍寨城既歷史？
#693科學怪人
會唔會講下九龍寨城既歷史？
你指發展到清拆果度？
講到果陣仲有巴絲睇個post 既實講既
#699十二指腸
/德國都有幫中國？
估唔到喎！/
上世紀中史書講近代史，有張相係東北日軍俘虜左國民黨一批軍事物資，個批係國民黨嘅德甲師。。。
同埋可以睇下德國西門子喺晚青已經有好多生意喺中國，好似鐵路，工業同原材料貿易
中德關係一直唔錯
#700悲傷華法林
/傳與南宋君臣逃難至香港及華南一帶相關。一說是文天祥被元兵追殺，橫渡伶仃洋，逃亡至現時深圳一帶，由於天色已晚，而眾將士又飢腸轆轆，當地村民同情他是忠臣，用僅存的豬肉、蘿蔔，加上現捕的魚、蝦造飯，但卻沒有足夠碗碟，只好拿木面盆盛菜，將士圍盆而食，這就是盆菜的起源。另一說則是，南宋末年，元朝軍隊南下，宋帝昺聯同陸秀夫、張世傑等人南逃避難。當他們路經東莞縣烏紗以及香港新界錦田一帶的圍村時，得到村民盛情款待。但在倉猝之間，村民找不到足夠的器皿盛載食物，只使用木盆菜餚放在一起，發展成盆菜。從此之後，每逢大時大節，村民都會享用盆菜。而現時新界原居民祭祖時的「食山頭」亦以盆菜為主。/
其實本來真係得錦田果邊會食
大埔約無呢D嘢
#702科學怪人
/其實本來真係得錦田果邊會食
大埔約無呢D嘢/
巴打可唔可以share多少少
btw今年去完大尾督果個，幾正
#704科學怪人
/上世紀中史書講近代史，有張相係東北日軍俘虜左國民黨一批軍事物資，個批係國民黨嘅德甲師。。。
同埋可以睇下德國西門子喺晚青已經有好多生意喺中國，好似鐵路，工業同原材料貿易
中德關係一直唔錯 /
其實以前德國喺清朝d生意純粹係想分一杯羹既心態，並唔係真心想發展關係，從八國聯軍一役威廉二世既方針態度可見
德國喺對外擴張方面發蹟比較遲，亦都係列強之中比較少海外殖民地既一個國家，有商機當然不容有失
中德關係真係開始好，應該要數到德國打輸一次大戰失去膠州一帶，再無殖民利益衝突之後先開始
#706科學怪人
49.天星小輪加價事件
無人鐘意加價，而家既香港人無論面對港鐵定係巴士加幾多，第一時間都係喺FB同IG聲討下，點都會有人畀like表示認同；再唔係就住加價新聞上連登開個靚post 都應該可以得到比起依個香港史post 有更加多既正評。不過喺1966年既香港仲未有FB、IG、連登，市民面對天星小輪加價又會有唔同既做法
咁喺60年代已經有大量來自中國內陸既貧民落嚟香港，全港當時有接近一半既人口住喺板間房，同而家d 青少年上唔到車一樣，造成嚴重既社會矛盾同對政府既不信任
當年未有紅隨同地鐵，返工如果要過海既話，搭天星係唯一既方法。天星小輪係窮人恩物，自從1946年4月之後接近廿年都從來未加過價，不過隨住燃油成本同營運開支不斷上漲，終於都要喺1965年10月向政府申請加價:
成人頭等艙由兩毫加到三毫
成人二等艙由一毫加到兩毫
華文媒體見到天星想加價當然猛烈抨擊，認為係對大眾利益既挑戰，甚至乎引申到可能引致既連鎖加價潮；市政局既民選議員葉錫恩亦都好同情低下階層面對通漲既擔憂，發起簽名運動向港督請願反對天星小輪加價，成功收到23000個市民簽名
咁加價申請就喺1966年3月表決，議案喺只有葉錫恩一個人反對之下以14:1大比數通過，但批准既就無天星之前所提出既咬得咁大啖:
成人頭等艙由兩毫加到兩毫五仙
成人二等艙一毫收費不變
不過華人社會都係覺得斗零都唔應該加，事件昇華到已經唔再係加價導致加重負擔既問題，而係政府漠視民意既態度令人反感。抗議行動就由青年人蘇守忠仿效印度聖雄甘地所發起既絕食示威揭起序幕
當年27歲既蘇守忠著住寫有「支持葉錫恩，參加絕食，反對加價」同「民主」字樣既黑色外衣喺中環天星碼頭廣場開始絕食，聲言要絕到撤回加價或者佢餓死為止。佢呼籲年青人加入之後一呼百應，好快就已經聚集咗400人，漸漸事件由一個人既絕食變成港九都有既示威行動。
示威期間，油麻地警司霍傑士見到有500人當中有人手持橫額示威，走去問佢有無許可證，佢即時大叫警察逼害佢地，亦都令到示威者開始針對政府人員，之後亦都有做出向警察掟石、破壞巴士等既行為。
因為今次既暴動事件並唔涉及國共既政治組織，純粹係即興性質。所以事件好快就可以以宵禁、拉人同警方開槍鎮壓平息告終
雖然今次既暴動未能夠令到天星唔加價，但係都對於港英既管治響起警號。之後就住事件既報告書有提及，今次既暴動係出於青年人對社會現時制度不滿同不服從管理既表現，成為咗後來香港改變統治政策同加強回應社會訴求既根據
#708目黑
咩年代都有死廢青
利申：廢青
#709科學怪人
廢青先至無野可以輸，爛命一條
#710游大輝
咁20年先加一次價又唔係好過份啫，人地打開門做生意唔通要蝕比你咩 搞到咁大真係過左火位囉
#711科學怪人
50. 講下香港既銀行業發展 (應巴打要求)
之前都講過香港喺1850年代開始曾經係苦力同海外勞工既中轉港，所以國際貨幣既兌匯業務一早就已經非常發達，而喺滙豐等既本地銀行開業之後，銀行業一直都有染指兌匯業務
只不過去到1949年中共建國之後中國實行外匯管制，外國政府亦都禁止當地既華僑再匯款去中國入面，令到香港既銀行業無咗兌匯業既生意同收入，需要再諗計開源。有危就一定有機，當時喺上海有唔少商人都走難落嚟，佢地帶住大量既資金喺香港準備開設工廠，於是銀行就為工廠發展提供貸款；另外戰後大量人口移入香港，佢地對於房屋都有好大既需求，於是銀行就為起樓既發展商提供融資之餘，都為買樓既人提供房貸。
既然有咗商機，喺50年代開始就有唔少華人銀號或者錢莊都想分一杯羹，紛紛向政府申請銀行牌照同增加資本，希望可以承接更多既業務。咁銀行為咗可以有更加多既錢嚟發展，仲透過高息吸引市民存款
容許我岔開少少講下地產，咁香港喺1962年就修訂咗1955年既建築條例，新例既地積比例減少接近20%
用例子去比較兩個接近同期落成既樓盤會實際d
舊例: 八文樓
新例: 美孚新村
講返正題，新例令到地產發展商賺少咗，搞到佢地爭相向政府申請入則，並且趕喺新例實施之前動工興建，令到新起既樓喺3年之內多咗接近2倍。咁多樓起就即係多錢可以借，銀行業收到大量既貸款申請都好興奮，甚至乎嫌借貸賺唔夠，索性自己注資做埋發展商玩埋一份
不過咁玩唔駛幾耐就開始出事，私樓供應多咗之餘，政府亦都喺60年代大量興建徙置大廈同廉租屋。啱啱落嚟既華人無錢，就點都買唔起；有錢買果班又有大把選擇，終於令到樓市爆煲。
好衰唔衰，喺1964年仲發生咗舊樓拆卸導致附近d 樓變成危樓既事件，令到政府急急修例要求以後要經過檢查保證安全先至准拆樓。咁就慘啦，因為有好多樓盤都係以拆舊樓再起新既形式嚟發展，變咗搞到有350個地盤因爲新例而停止動工。停工即係新樓唔能夠如期落成，地產商賣唔到樓就無錢還，連累到有份借錢既銀行業都受到牽連
首先爆既係成立近二十年既明德銀號，佢之前就以年息10%既高息去吸引存款。話說有大客攞返銀號發出既7百萬港元支票去到明德諗住兌現，點知連總行都話無足夠既現金找數。事件搞到喺第二日清晨，總行同彌敦道既分行都出現排隊提款既市民，依個現象有個名叫擠提。雖然明德喺資產上係夠兌現所有存款，不過大部分都係酒店同樓宇等既不動產，流動資金實在應付唔嚟。最終一野就擠到破產，要由香港政府擔任明德既財產受託人去處理變賣資產還債一事
明德爆咗之後市民對銀行開始失去信心，第二間做靶既輪到廣東信託商業銀行。1965年2月6日，廣東信託香港仔分行首先發生擠提，高峰期有近1000市民喺分行門外等候。不過好在今次佢地已經有充足準備，分行經理仲安慰存户話總行有大把銀紙，叫大家可以放心提款。依間分行為咗令人放心仲宣佈會延長營業時間到午夜12點，不過人群擠提到8點就散哂。第二朝喺廣東信託元朗分行都有300人去擠提，不過即刻就有運鈔車由警車開路送大量現鈔過去，所以到下午3點已經收哂皮
不過何善衡等創辦既恒生銀行就無咁好彩，恒生本身係華資銀行，喺1962年既總資產就已經有3.55億，喺香港既規模就僅次於滙豐。因為受到謠言既影響，恒生喺幾日之內被擠走2億港元，情況可以話係岌岌可危。董事長何善衡喺無奈之下，唯有將恒生51%既股權以5100萬賤賣畀滙豐，而滙豐亦會出現金幫恒生捱過擠提既浪潮，自此恆生成為滙豐銀行集團既成員
為咗結束擠提既風潮，港督戴麟趾下令，作為應急措施，每日每個銀行存户只係准提取最多100港元，另外宣佈英鎊都係法定貨幣，並且向英國果邊R到可以空運大量英鎊嚟穩定銀根。錢果方面唔再係問題之後，擠提風潮亦都平息。
銀行方面都受到教訓，為咗防止日後再有同樣事件，開始推出相對高息既定期存款去穩定流動資金。定期即係喺特定時間內唔准提走，或者要提就會無哂利息
#712科學怪人
/咁20年先加一次價又唔係好過份啫，人地打開門做生意唔通要蝕比你咩 搞到咁大真係過左火位囉 /
其實上文都有略略提過但唔明顯
淨係加頭等根本唔會影響到最基層既市民
好明顯加價只係一個題同爆煲位啦
實際上當年市民不滿既係住屋問題、貧窮問題、警察濫權同貪污問題，同埋對民主既訴求
#722張繼聰相繼失聰
痴線，唔帶身分證會俾人毒打
咩原因49年既人口登記唔包括 警務人員？
佢地都係香港居民
#727張繼聰相繼失聰
/當時輿論認為辭職牽涉人事鬥爭，但係錢穆自己交代就話係自己唔識處理行政事務，希望可以專注做返學術研究。不過最主要既原因，都係因為以前新亞著重師承關係，同後尾中大著重學分既制度格格不入/
可惜
不過如果唔行學分制又難以符合現代大學制度
#728張繼聰相繼失聰
西方國家禁運->促成香港工業發展
石硤尾大火->香港公屋發展
都係有危先至有機
#730科學怪人
/痴線，唔帶身分證會俾人毒打 /
相對於日本仔對其他佔領區嚟講已經算好
#732張繼聰相繼失聰
香港水荒->紅A賣膠桶發達->促進香港塑膠業發展
又係有危後有機
#734科學怪人
/香港水荒->紅A賣膠桶發達->促進香港塑膠業發展
又係有危後有機 /
依個真，我無講到
膠桶喺水荒期間真係大賣
輪街喉、入屋喉4粒鐘入最多水，都有用
#745游大輝
/淨係加頭等根本唔會影響到最基層既市民
好明顯加價只係一個題同爆煲位啦
實際上當年市民不滿既係住屋問題、貧窮問題、警察濫權同貪污問題，同埋對民主既訴求/
咁咪即係乘機借題發揮
#752吉姆
香港人往往過於著墨南宋
忘記咗自己歷史
#753科學怪人
/咁咪即係乘機借題發揮 /
的確，無論係古今中外所有既政治事件都係借題發揮
而嫉妒、貧窮同無上流既機會，自然會令年青人乜都睇唔順眼
民間既起義例如張角、陳勝吳廣、法國大革命等等都有住以上既共通點
到而家好似汶萊咁都係皇上萬歲萬歲萬萬歲
不過個個唔駛交稅又好食好住，又有邊個得閒同你搞革命講民主
反之就再好既制度都會有野反
#754科學怪人
/香港人往往過於著墨南宋
忘記咗自己歷史/
真，所以一定要有多d人去博物館睇下野
#755吉姆
如果當年罷工
英屬香港政府無視班粵裔工人
反而輸入英國工人階級嘅移民嚟頂替
香港會點？
陳策係咪真係咁大影響力？
#756吉田朱里アカリン
/真，所以一定要有多d人去博物館睇下野/
歷史博物館個香港故事唔夠本土味
#757吉姆
/歷史博物館個香港故事唔夠本土味 /
錢穆先生個史觀好似唔係好啱香港 以致整個南粵
當初中大叫香港亞洲大學唔係更適合佢地個理念咩？
根據唐君毅既講法，喺過去2,3百年，中國積弱，亞洲成為歐洲列強最大既殖民地，佢覺得亞洲人同中國人為此都要負上責任。所以新亞書院講學一方面會照顧中國國情，另一方面會照顧世界學術文化既潮流，令到古老既亞洲可以重獲新生。
#760NISMO400R
/如果當年罷工
英屬香港政府無視班粵裔工人
反而輸入英國工人階級嘅移民嚟頂替
香港會點？
陳策係咪真係咁大影響力？/
如果香港人口結構變左白人佔90%以上唔知支那會唔會收
#761吉姆
/如果香港人口結構變左白人佔90%以上唔知支那會唔會收 /
我估最多三成純白人
但係會好多Eurasian
#762科學怪人
/如果香港人口結構變左白人佔90%以上唔知支那會唔會收 /
1. 以當時既交通，大量輸入英國勞工唔容易
2. 當時英國勞工人工，同職位係華人3倍以上，班公司都識計數
#763科學怪人
/當初中大叫香港亞洲大學唔係更適合佢地個理念咩？/
中大唔係淨係得新亞，成立果陣出錢資助既主要都係港英政府
#764科學怪人
51. 六七暴動
要講依單野之前，首先要講下蟈蜻。1949年新中國成立之後韓戰爆發，觸發美國等國家對中國實施禁運，而香港同澳門都係當時中國賺取外匯同偷運物資入口既重地，所以中共當時唔急於回收返港澳，採取「長期打算，充分利用」既方針，並且依據「既不主動惹事，也不示弱，有理有利有節」既原則行事
1966年8月起，毛澤東領導既文化大革命爆發，而港澳都係資本主義社會，處理港澳事務既左派人士自然會擔心被打成走資派，驚自己一係被召返大陸接受清算，甚至乎係大陸派人落嚟接管佢地既權利。為咗保住頸上既人頭，依班人必須要諗辦法自救，諗到可以喺港澳發動類似文革形式既暴動
其實暴動首先就喺澳門開始，喺1966年11月15日，澳門行政局就喺氹仔坊眾學校見到有非法搭起既棚架，搵警察去查詢，引起咗警察同工人之間既衝突並且拉咗6個人。藉住依件小事，澳門左派乘機挑起「反帝、反迫害」既罷工同罷市。事件醞釀到12月3日，發生咗「澳門123事件」。喺澳門總督府、市政廳等既機構都有武鬥，並且引起警民衝突，防暴警察唯有開槍射擊示威者並且最終殺咗2人，當日澳門宣佈戒嚴
123事件爆發之後，廣東省外事處聲明支持澳門學生，並且惡人先告狀咁向澳葡提出「懲兇」（指射擊市民）既要求，包括護督、陸軍司令、警察副廳長等。葡萄牙作為歐洲既弱國，講野都細聲過人，結果澳督嘉樂庇屈辱地接受以上既所有要求，後來仲答應驅逐所有國民黨駐澳門既人員。
原則上，澳門已經成為半個解放區，澳門左派人士武鬥成功亦都令到香港果邊既左派覺得可以照辦煮碗，並且發動咗六七暴動。
首先都係要搵個借口挑起事端，1967年5月 喺新蒲崗一間膠花工廠本身就以多勞多得既形式出糧，即係穿既膠花越多就賺得越多，而做夠120蚊就會有加一(即132)。廠方見有d工人偷懶諗縮數，淨係做夠最低可以加一既工資就算，於是就推出咗兩招:
1. 改為要做夠160先至可以加一(即176)
2. 做唔夠160既，炒！
當時如果按照正常既工作效率做野，理應係可以每個月做到400以上，所以對於一般員工嚟講其實無乜影響。即使有少數既員工走去同資方交涉，亦都難以得到大多員工既支持。喺1967年4月29日，資方首先就炒咗92個左派工會份子同平時怠工既工人，第二日更加係炒夠500個，亦都有跟足勞工法例作出補償。只不過被炒果班就覺得唔gur，留喺廠外示威兼貼大字報，並且朗讀毛語錄同唱紅歌。
去到5月5日，廠方諗住如常咁付運貨品畀買家，點知班示威既工人出手阻止，搞到百幾個防暴警察要出動包圍工廠並且封鎖附近既道路。當廠方再一次準備出貨果陣，工人當然再一次阻止啦，爭執之間管工孔彪腳踢示威者蕭劍輝，引起工人鼓躁並且攞起七大武器之首攻擊廠方人員，最後要防暴警察用警棍驅散並且拉咗21個示威者先收科
依單野之後，大公報喺5月8日既社論乘機抽水:
「港英當局在新蒲崗對愛國工人和同胞進行血腥鎮壓的暴行，已激起廣泛的憤慨。樹膠工會昨晚舉行了控訴大會，堅決表示他們不會屈服於武力之下，為了中國人的尊嚴，為了全業工人職業生活的保障，決支持人造花廠工人鬥爭到底，並即席通過向港英當局提出立即釋放被捕工人；懲兇、賠償；保障工人人身安全；警方今後不得干預勞資糾紛等四項要求。」
一呼百應之下，5月11日有大批學生同左派工人到場聲援示威者，港英政府為免變成第二個澳門，採取咗相應強硬既態度去鎮壓同拉人，總共拉咗127個。中國口交部見到咁好既位當然要入，即刻出聲明強烈抗議港英政府對工人同居民既「法西斯暴行」。
香港既左派見到聲明當然就好似接到聖旨一樣，認為中共支持香港既鬥爭行動，甚至謠傳即將派兵解放香港，當然加多兩錢肉緊逼港英政府屈服。於是工聯會牽頭成立咗「港九各界同胞反對港英迫害鬥爭委員會」，一共有101個委員。委員會發表抗議書，指出造反行為有有毛澤東同七億中國人民作為後盾，並且開始號召左派工人同學生去港督府貼大字報抗議
5月都係示下威，6月已經去到全港既罷工、罷市同罷課，不過港英政府都係唔屈服，鎮壓規模隨住委員會既行動一齊升級。於是喺7月開始，委員會決定周街度放置「真假菠蘿」（炸彈），為免誤傷華人堆菠蘿仲有溫馨提示，寫住「同胞勿近」。不過實際上當同胞見到依句果陣都走唔切，造成咗唔少無辜市民死傷。
咁商台就有個節目主持人叫林彬，佢喺節目裏面諷刺左派同中共，終於喺8月24日佢所坐既汽車被左派強行截停並且投擲燃燒彈，林彬被監生燒死。自此商台為咗紀念林彬敢言既精神，喺1968年開始製作「十八樓C座」既時事諷刺節目為民發聲，播到而家
林彬事件之後工商日報大力批評，矛頭直指港共同委員會。事件都令到香港市民同團體對暴徒反感，佢地大力支持港英政府用強硬手段鎮壓暴動。7月28日，港英政府授權警察無須拘捕令就可以直接將懷疑破壞治安既人拘捕，去到8月拉咗3間小型左派報章既社長，不過唔包大公、文匯，咁做有兩個考慮：
1. 向社會表達壓制鼓吹暴動既言論
2. 避免過分觸動中共
解鈴還須繫鈴人，果個時候大陸既紅衛兵情況已經失控，開始向軍隊奪權，毛澤東都要調整文革既路線同設法停止武鬥。於是北京方面都發出指示要香港左派停手，六七暴動亦都逐漸平息
#765科學怪人
/歷史博物館個香港故事唔夠本土味 /
好過無咁解，不過要本土味真係去油麻地行一轉
#766吉田朱里アカリン
/好過無咁解，不過要本土味真係去油麻地行一轉/
戲院
#767張繼聰相繼失聰
大躍進慘劇對香港有無重大影響？
除咗大量人口偷渡來港
#768黃貫中
/19. 英國租借新界/
呢篇好睇
係自己社區發生好有親切感
住左三十年, 原來1百年前發生過D咁既事
好想知當時係邊個位搭建警棚,係邊到升旗
到時經過又會多一番感受
推介巴打睇一本書: 被遺忘的六日戰爭-1899年新界鄉民與英軍之戰
應該有曬你想知嘅事
#769張繼聰相繼失聰
/51. 六七暴動/
睇到真係感受到好大嘅張力
67暴動可以話係一場發動者充滿政治計算嘅暴行，勞工階層被壓逼根本只係一個煽動者利用黎發起暴動嘅藉口，希望而家啲共狗可以認清當年歷史
#771科學怪人
/睇到真係感受到好大嘅張力
67暴動可以話係一場發動者充滿政治計算嘅暴行，勞工階層被壓逼根本只係一個煽動者利用黎發起暴動嘅藉口，希望而家啲共狗可以認清當年歷史/
其實不論係當年還是而家既蟻民，要煽動一樣容易
#772科學怪人
/大躍進慘劇對香港有無重大影響？
除咗大量人口偷渡來港/
走私商家發國難財
#774悲傷華法林
/其實本來真係得錦田果邊會食
大埔約無呢D嘢/
/巴打可唔可以share多少少
btw今年去完大尾督果個，幾正 /
其實以前都係得錦田果邊會食，新界東多數係分開一砵砵，唔會撈埋
係近年先至話盆菜，以前邊會俾埋D蘿白豬皮果D嘢扮大盆，
一砵一樣嘢，好均真，又唔會撈埋晒D味
#775科學怪人
/其實以前都係得錦田果邊會食，新界東多數係分開一砵砵，唔會撈埋
係近年先至話盆菜，以前邊會俾埋D蘿白豬皮果D嘢扮大盆，
一砵一樣嘢，好均真，又唔會撈埋晒D味/
都係打邊爐形式？
可唔可以講多少少
#777悲傷華法林
/都係打邊爐形式？
可唔可以講多少少/
唔係，係用公雞碗㗎
不過而家個個都貪方便改晒做盆菜喇
以前係條條村村口都有個公家灶頭
每家每戶都煮D白飯出嚟
再喺出面請師傅返嚟煮
雞還雞 肉還肉，唔會撈埋，用雞公碗裝
但十零年前唔知邊個講話客家盆菜，
講到一盆咁㷫住食先係正宗咁
就變晒做盆菜
以前盆菜係得錦田果邊（鄉議局元朗約）興，
大埔約同南約都無話有呢D嘢
又唔衛生又浪費好多食物
搞到D炆豬肉濕立立，門鱔一pad pad
諗起就嬲
新界東係食九大簋，唔撚食盆菜㗎
https://hk.lifestyle.appledaily.com/lifestyle/food/daily/article/20150215/19041041
#782科學怪人
/港英好波 /
的確比澳葡強硬得多，反映宗主國既能力
#784Improver
/的確比澳葡強硬得多，反映宗主國既能力/
澳葡係教育、基建、醫療等等方面真係連港英車尾燈都見唔到
賣點嘛 除咗賭就係南歐休閒風
其實澳門賭業興起，亦有香港華人倡禁賭先有後尾澳門賭業快速興旺
#785科學怪人
52. 紅磡海底隧道通車
從前九龍同香港島，雖然只係一河之隔，但係無論係人定係車，要來往就淨係可以搭渡輪。其實早喺1902年，香港船政處周年報告已經建議興建連接維多利亞城同尖沙咀既跨海橋樑嚟解決港島區擠逼既問題。另外亦都有建議認為可以喺鯉魚門度起跨海高架橋，令到本身喺港島東筲箕灣既電車可以擴展駛去九龍半島。不過依d建議到最後都係不了了之，一直都未有付諸實施
去到二次大戰之後人越來越多，香港同九龍既往來交通日漸頻繁，而小輪就算開得再密，班次上始終都係會有限制，實在難以滿足使用上既需要。去到1950年，陸路渡港終於可以重新被提及，當時主要係有兩個方案：
1. 跨海大橋；2. 海底隧道
跨海大橋成本會稍為比海底隧道低少少，不過個問題就係香港始終都係有風險會被颱風吹襲。即使顧問公司同承建商聲稱佢地既工程師係可以確保橋樑可以頂得住颱風唔會出事，港英政府都係會有所顧慮
另一個問題係船隻通行問題，雖然顧問公司既方案係橋底高度足以令一般輪船同運兵船可以通過，不過始終大型戰艦同郵輪都係唔得。所以即使起橋係成本較低既方案，跨海大橋既方案最終政府都係不予採納。
再傾咗十年之後，最終政府決定要起一條海底隧道連接銅鑼灣同紅磡，工程會喺1969年9月開始。港府落實咗海底隧道法案，由海底隧道有限公司投資興建並且可以得到30年既專營權作為回報，預計營運16年就可以回本。隧道會採用四線雙程行車既方案，並且只容許車輛專用(行人、單車唔得)，會以24小時開放方式營運。
成條隧道係以15個沉箱組成，每個沉箱長350呎、直徑34呎，一共使用鋼鐵25000噸。本來預計要6年起好既隧道最終亦都喺三年搞掂，並且喺1972年通車
海底隧道通車之後有兩個主要既影響，首當其衝既就係渡海小輪業務不斷萎縮。喺價錢嚟講，車輛行隧道會比起經車用小輪渡海稍貴，不過喺時間方面，行隧道既收費連過海所需要既時間只係十分鐘以內，但係搭小輪係要40分鐘以上仲要係班次有限
另外巴士公司喺海底隧道通車無耐就開辦咗三條過海路線，101, 102, 103，囊括咗港九多個上落客點(港大巴絲應該好熟依幾條線)。集體運輸一定平過私家車，依三條線快速過海都只係收一蚊，貴過搭小輪但都係一般市民可以負擔既水平，不過真係方便好多。
結果係絕大部分既渡海航線都已經收哂皮，甚至係本身依靠車輛渡港搵食既油麻地小輪最終都要易手賣畀新世界集團
第二個影響就係九廣鐵路英段(今東鐵)既總站搬咗去紅磡。其實早喺1960年代，尖沙咀站既發展已經去到樽頸，亦都唔夠地再擴建車站，滿足唔到日益繁忙既火車服務。果陣時港英政府其實已經屬意發展紅磡作為交通樞紐，所以先至決定將海底隧道起喺紅磡，並且可以連接鐵路通向新界。順理成章紅磡起咗新型既火車站，尖沙咀站亦都被停用同拆缷。拆缷一事喺社區組織既弱力反對同發起聯署之下，終於由港府向英女皇成功爭取保留尖沙咀鐘樓。至於車站原來既所在地，最後變咗做一座巨型公廁同半個銀色胸圍
(最後果句，明我講咩既第一位有心人，作為小小心意小弟可以寄送一張有紀念價值既明信片)
#789目黑
太空館唔係後黎先起架咩
#790科學怪人
/太空館唔係後黎先起架咩 /
舊尖沙咀火車站拆完就即起，落成仲早過文化中心
#791科學怪人
btw 其實就海底隧道一事，政府係有對兩間渡輪公司做補償
起果陣政府首先係屬意佢地入股起海底隧道，可惜佢地都拒絕咗
#793游大輝
點解以前啲工程通常會提早完成，但係依家啲工程通常會延誤呢？
#794科學怪人
/點解以前啲工程通常會提早完成，但係依家啲工程通常會延誤呢？ /
單講海底隧道係因為專營權果30年係要計咗起隧道果段時間，即係越拖就越少時間可以收返錢
在商言商當然越快越好
#796成龍快逝
想知多啲六七暴動嘅事，可以睇一套叫做消失的檔案嘅紀錄片，拍得相當詳盡同埋都幾持平
#797游大輝
/單講海底隧道係因為專營權果30年係要計咗起隧道果段時間，即係越拖就越少時間可以收返錢
在商言商當然越快越好/
原來係咁，咁其實實際嘅專營權根本無30年，有啲搵笨喎
#802Minato
留名，欣賞巴打你咁有心機打咁多篇文章同大家分享。
輔仁有一系列文章講香港保衛戰，都幾值得睇，可惜既係呢段歷史今日被刻意遺忘左
http://www.vjmedia.com.hk/articles/2017/12/07/173490/%E3%80%90%E9%A6%99%E6%B8%AF%E4%BF%9D%E8%A1%9B%E6%88%B0%E7%95%B6%E5%B9%B4%E4%BB%8A%E6%97%A5%E3%83%BB%E4%B8%80%E3%80%91%E6%97%A5%E8%BB%8D%E5%81%B7%E8%A5%B2%E7%8F%8D%E7%8F%A0%E6%B8%AF%EF%BC%8C%E5%90%8C
#803朱古力波肥仔波
留名 自己本身做博物館，好鍾意睇 有時親眼見啲文物都會好開心
#804凱特
/6. 從兩單案件講下早期香港已經尊重司法獨立/
屌你老母雖然新追post諗住追曬先講嘢
但睇到呢度真係忍唔撚住
一個啱啱落地嘅殖民地政府
冇借呢件事擴大港人同英國人嘅地位差距之餘
仲出錢幫佢打官司 是其是非其非
再睇下依家 偉大嘅祖國
以言入罪
2018年連1849年都不如
屌你共產黨有咩資格管香港
開埠百幾年要俾個垃圾70年政黨國家收歸
#806科學怪人
/留名，欣賞巴打你咁有心機打咁多篇文章同大家分享。
輔仁有一系列文章講香港保衛戰，都幾值得睇，可惜既係呢段歷史今日被刻意遺忘左/
政治不正確呀
#809科學怪人
53. 香港首位喺荷里活發展既巨星
從前荷里活都係外國人先有得玩既舞台，一直都未有華人既先例，直至到一個唔係東亞病夫既人出現之後改變咗個玩法
佢叫李振藩，1940年11月27日喺美國三藩市出世，接生果一刻已經被填寫咗Bruce依個名，後尾一家返返香港定居。因為佢老豆本身都係有名既藝人李海泉，喺有父幹之下可以有機會入行做童星。李振藩喺10歲果陣拍細路祥果陣起咗個藝名叫李小龍，依個名亦都比較為人熟知
雖然李小龍一路讀書一路拍戲，不過佢都叫做考到當時既名校喇沙書院升F.1，可惜上到中學實在兼顧唔到，加上下下有咩事、同學之間有磨擦都鐘意用拳頭解決，讀咗一年就「被勸退學」，要去聖芳濟升F.2
(話說曾經有一位性荒濟既舊登名人Jasper So 露J求SP 唔知仲有無人記得)
不過後尾李海泉都係要1961年送李小龍去美國讀大學，主修哲學。不過當時既李小龍都已經跟葉問學過師，所以喺大學時期已經夠料喺美國開設武館授徒。1967年佢更加自創截拳道，根據詠春既方法再加入唔同既格鬥技巧，以迅速見稱，亦都作為佢日後成為武打巨星既基礎
1971年李小龍喺嘉禾電影公司創辦人鄒文懷既邀請之下返香港拍戲，一拍就拍5套。可惜人生苦短亦都好諷刺，1973年喺《死亡遊戲》拍到3分1果陣，人如戲名英年早逝
佢既真正死因可以話係撲朔迷離，但其實早喺1973年5月李小龍喺做緊龍爭虎鬥既國語配音果陣已經喺休息室既地板度無故暈低。當時佢被工作人員叫醒果陣面色蒼白，但都堅持要返去錄音室工作。可惜果日都係再次跌低、全身抽筋、呼吸困難。
嘉禾老細知道之後即刻派人送李小龍去浸會醫院，當時主診醫生發現佢腦部有水腫，並且因此忠告佢唔好再食大麻。之後李小龍去美國做多次全面身體檢查，果邊就認為佢只係過度工作同疲勞過度，並且認為隊草唔會構成腦水腫既後遺症，於是李小龍就無聽浸會醫生講繼續隊。
咁喺1973年其實李小龍畀好大壓力自己 ，當時龍爭虎鬥作為第一部李小龍打入荷里活既電影，佢為咗做到最好都努力練功同事事過問，每日工作最少12小時，甚至乎係喺office 開會都要一路健身，搞到自己缺乏休息並且喺過身前輕咗20磅；另外根據李小龍學詠春既師兄所講，李小龍特登由美國購買練武機器，綁喺腰間之後就可以利用電擊通過大腦控制肌肉收縮擴張，據說練2到3分鐘就已經可以達到平時40分鐘既劇烈運動
李小龍過身果日去咗另一個女星丁珮既寓所（唔知做乜），並且死喺佢屋企，不過事後無證據顯示李小龍既死同佢有關
法醫解剖檢驗到李小龍係因為過敏性腦水腫，引致微絲血管爆烈造成腦溢血死亡，最終死因庭裁定佢死於不幸
要講到李小龍對後世既影響，開咗華人打入荷里活既先例就當然。甚至係去到最近，香港咪發生過D&G 尖沙咀廣東道分店門口狗阻止香港市民喺店外影相既事件，有示威者就借用咗李小龍套精武門出現過既告示，改為「港人與狗不得拍攝」
#812科學怪人
/屌你老母雖然新追post諗住追曬先講嘢
但睇到呢度真係忍唔撚住
一個啱啱落地嘅殖民地政府
冇借呢件事擴大港人同英國人嘅地位差距之餘
仲出錢幫佢打官司 是其是非其非
再睇下依家 偉大嘅祖國
以言入罪
2018年連1849年都不如
屌你共產黨有咩資格管香港
開埠百幾年要俾個垃圾70年政黨國家收歸 /
當時英國希望喺遠東建立一個商業中心，並且延攬廣州既外企過嚟香港
守住法治係企業放心營商既一個要素
#823科學怪人
順帶一提，文化博物館3樓有李小龍常設展覽
有興趣可以去睇多d
#825科學怪人
54 香港，勝在有ICAC
喺執法機構當中，廉署一向都保持住獨有既神秘感。警隊、入境、海關果d全年無休咁請人，不過廉署一年都唔知有無請一次
貪污依樣野其實唔係新鮮事，亦係唔少由貧窮國家變富裕國家既必經階段。香港早喺1898年已經通過輕罪懲罰條例，首次將受賄同貪污列作違法
咁喺1945年之後，由於戰後物資短缺，貪污情況更加嚴重。為此香港制定咗更嚴格既防止賄賂條例，仲喺1952年成立咗隸屬於警方既「檢舉貪污組」。可惜始終都係自己人查自己人，「檢舉貪污組」實際成效真係非常有限。當時警察貪污腐敗既情況非常普遍，亦都有選擇性執法既重大權力，所以一般市民如果想做生意就必須透過向警員行賄嚟尋求保護
60年代既多次暴動反映咗市民對於政府改善施政係有要求，社會再無辦法容忍貪污問題。去到70年代當時既九龍警區副指揮葛柏嚴重貪污既問題爆煲，引起咗香港社會公憤
葛柏貪咗一共438萬港元，以當年香港2萬就可以買千呎一手單位嚟講可以話係天文數字，最慘既就係當時佢仲可以利用機場管制既漏洞鼠返英國逍遙法外。1973年8月香港專上學生聯會(學聯)喺HKU舉行公開論壇討論葛柏事件，有150人參與。之後學聯仲發起全港市民簽名運動要求港府引渡葛柏返香港接受調查，兼且聯合其他工人組織先後喺Pokemon Go聖地維園同摩士公園舉行公開集會，有約500市民參與。
港督麥里浩順應民意，做完一連串既諮詢同研究之後決定喺1974年2月成立一個獨立於警隊並且直接隸屬港督既機構，就係廉政公署。為此麥里浩仲專誠親自飛去馬耳他說服已經退休既前警察政治部首長彭定國擔任廉署首任行動署署長。廉署可以調查除咗港督以外既任何人士，仲有權追查銀行户口、稅項帳目。
廉署喺成立第一年，1974年底就已經接獲3189宗關於貪污既投訴，近半係同警察有關。另外最終喺廉署既努力之下，葛柏終於喺1975年頭被引渡返香港受審並且被判入獄4年兼充公2.5萬港元贜款
不過廉署隨後幾年越拉越多警察，引起警隊內部既強烈反彈。1977年10月有2000個基層警員為此成立香港警察員佐級協會去爭取返自己既權益，協會當中有人衝去廉署總部搗亂兼打傷5個職員。為咗避免更多警員反抗，麥理浩決定宣佈特赦喺1977年1月1日前犯有貪污而未被檢控既警員。自此之後，香港公務員廉潔奉公既風氣慢慢形成
#834科學怪人
55. 越南船民
越南位於海邊又有大量耕地，本身漁業同農業都好發達。可惜喺二次大戰之後經歷對法國、美國戰爭之後，即使北越最終統一全國，國家都已經失去大片森林同耕地，甚至係做唔到農業同工業既自給自足。飢餓、貧困、共產政權迫害，令到越南人大量出逃
1978年12月，一隻名為「匯豐」號既船載有2732個越南難民，本來打算前往台灣高雄，不過去到香港附近海域果陣，船長竟然打算要求進入香港並且容許難民登陸。咁本身隻船就唔係打算去香港既，港府當然就根據聯合國難民法例拒絕啦
不過匯豐號一於冇理，竟然繼續駛向香港，喺下午一點仲喺香港以南140海里，夜晚11點半已經去至得返50海里。港府重申船上難民唔可以喺香港上岸，並且基於人道立場向船隻提供所需要既糧水同燃料，等佢可以繼續前往高雄
去到第二日上午（12月23），匯豐號已經抵達香港水域仲諗住強行登陸放低難民，港府唯有出動水警輪同皇家海軍掃雷艇喺附近戒備。匯豐號唔知做乜停咗喺度賴死唔肯走，港府都無辦法，唯有一直為難民提供糧水、毛毡同藥物，更加喺聖誕佳節特別提供香煙、白蘭地同餅乾作慶祝
12月26日，難民代表開始同港府代表進行談判，要求暫時喺香港登岸再等其他國家收容。佢地表示台灣已經唔係聯合國成員，無義務幫手接收難民，所以想留喺香港。不過港府果邊就堅拒佢地既要求，除非有其他國家明確答應收容佢地，先至會考慮
其實香港當時已經有大量人口，要再接收依批難民實在係比較吃力；更加重要既係開壞先例會令到往後有更加多越南人用依個方法登陸香港。咁聯合國同英國當然就捽香港要收依班垃圾，英國社會事務大臣Ennals 認為由得難民喺船上辛苦渡日係好唔人道同唔合理；跟住美國、西德、法國都保證會收容難民之後，港府先至肯畀停留咗27日既匯豐號難民上岸
難民上咗岸之後，船長同船員當然會被秋後算帳。當局喺調查過程當中發現船上面收埋咗價值650萬既黃金，相信係因為犯罪集團榨取難民所得，不過竟然同港府謊稱係因為人道立場而救起果批難民；另外船上實際上有3383名難民，衰多條超載乘客罪，結果船長被重判坐7年兼且船上所有黃金充公
開壞先例既結果就係香港成為「第一收容港」，即係要無條件為所有到港難民提供「暫時」既收容，單喺1979年已經嚟咗66000人。不過歐美列強都係口爽荷包lup，實際上每月都只係接收600人離開香港
喺1982年7月2日之前到港既越南難民都可以入住港府安排既開放式難民營，即係每日上午5點到晚上11點都可以離開營地，並且可以喺外面搵工。不過實際上唔係有好多難民都有好高學歷同工作能力，有唔少越南女性都要從事賣淫行業
不過為咗阻嚇難民湧港，7月2日之後到香港既難民只可以暫住喺禁閉式既集中營，難民不得離開營地同搵工。正正係因為禁閉，營內既罪案率偏高，去到1988年7月同8月更加分別發生咗騷亂事件，逼使港府喺9月開放禁閉營。不過依個做法令到罪案蔓延去社區，更加有越南人被聘請為殺手參與犯罪活動
除住時間過去，越南既經濟同政局有所改善，90年代開始港府喺越南政府答應唔會加害難民既情況下，陸續將滯留既難民送返越南，亦都為少數越南拒絕接收既難民發出香港身份證。去到2000年6月1日，最後一個難民營關閉，困擾咗香港近25年既問題終於結束
香港為收容船民一共洗咗87億港元，理應可以搵聯合國難民公署claim 返，可惜當中既11億款項到而家都仲拖欠緊，不了了之
#836目黑
最後一批難民係97之後先遣返？
0
#837科學怪人
/最後一批難民係97之後先遣返？ /
http://www.info.gov.hk/isd/news/cjan98/0108viec.htm
係，98年都仲有
2000年淨返既簽晒身份證
#841NISMO400R
好多船民去左美國澳洲
當年走難黎香港既人而家生活好過香港人
可能十幾年後到香港人走難
#842科學怪人
/好多船民去左美國澳洲
當年走難黎香港既人而家生活好過香港人
可能十幾年後到香港人走難/
寄人籬下始終唔會好受
btw 當時既宗主國英國見香港頂唔順
除咗承擔國際配額之外
仲特登為香港收多10000個越南船民
#844SUV
細個聽唔少 北漏洞拉
#845科學怪人
/細個聽唔少 北漏洞拉 /
不漏洞拉，風味絕佳
#846科學怪人
其實好多香港人對東南亞人既稱呼都係來自於當時既香港史同流行文化，本身係無任何歧視同貶損既意思。只不過而家既人叫慣咗又唔知點嚟先至心裏有鬼咁覺得歧視緊人
菲律賓：Maria，源於戲劇文化
印/巴: 阿差，源於港英時代警察
越南: 北漏洞拉(解從今開始)，源於電台廣播