(編註)
1. 原post link於此, 誠意鼓勵大家推推post
2. 為利於閱讀, 現只留有心回覆
3. 就史料爭拗卻未見詳盡觀點者亦刪去
4. 回應本blog初衷, 所有圖片均未有include
5. 引用內容以”/”標示
6. 內容太多, 呢邊會分開幾個post
7. 部分引用時事講笑(以”*”標示),編者會盡量加返註解係段尾
致敬 科學怪人巴打 & 所有推post巴打 @LiHKG
(/編註)
25. 香港間接參與第一次世界大戰/#378
26. 搶米風潮/#388
27. 香港機器工人罷工/#390
28. 香港蓄婢傳統既沒落/#407
29. 海員大罷工/#428
30. 孫中山教訓港督、訪港外交/#448
Offtopic 都市傳說: 共享單車免費借用大法/#460
31. 省港大罷工/#465
#378科學怪人
25. 香港間接參與第一次世界大戰
1914年8月，一次大戰爆發，英國加入協約國與同盟國開火。咁香港當時始終都係英國既一部分，所以都進入戰爭狀態。
第一件事，香港政府拘捕同驅逐境內200個德國僑民
另外因爲德國喺中國既山東省有據點，英國容許日本軍艦停泊喺香港鯉魚門，攻擊沿海既德國艦隻
但係最重要既貢獻，都係錢
一開始係喺1914年尾開始既戰事慈善捐款，咁就透過英皇海員救濟金、海陸軍盲人救濟會等既組織進行人道方面既經濟支援，到1918年已經一共籌到141萬港元
另外香港政府通過𣾀豐銀行發行戰事公債，年息六厘，用嚟支援英國既戰爭。可惜公債既認購並唔活躍，只有103人認購200幾萬港元債券
錢就永遠都唔夠，港督梅含理決定喺全港徵收7%既特別戰務差餉。對於有錢人嚟講係小事，但係對於窮人嚟講就好肉痛
當時一般華人文員月薪先得160，其中60要用嚟交房租，再收差餉會令佢地生活更加困難。立法局非官守議員覺得應該只係向有錢人收，但係梅含理就覺得應該要公平、人人有份，所以否決昨
咁有一個中英混血兒地主就真係發財立品，佢就係好出名既富商何東爵士(當然佢既才能就唔係喺煮糖水同煲粥兩方面)，夠義氣，幫哂租住佢旗下物業既所有人交依筆差餉
1919年7月，特別戰務差餉停收。
埋單計數，香港喺戰事當中透過各種形式為英國貢獻咗1025萬港元
#388科學怪人
26. 搶米風潮
先講下國際上既背景。第一次世界大戰之後，歐洲各國都需要補充糧食。越南、緬甸等地既食米唔准賣出口，因為要先供應畀自己既宗主國
另外日本喺1918年因為天災導致食米失收，唯有去東南亞收購食米
真係全世界都乞緊米
講返香港，自己本身耕地已經唔多
但係喺一戰結束之後，香港既人口已經超過50萬，出產既米糧根本就滿足唔到內需，要依賴進口。但係架仔同歐洲都搶緊米，令到米價飛漲
香港既有錢人都還好，有一定既存米，叫做有飯食
但係華人貧民就真係負擔唔起，唔緊要都仲有3個選擇:
1. 替代法: 番薯番薯番薯～Yummy
2. 勒緊肚皮法: 每日只食一餐
3. 自欺欺人法: 食粥，一樣係大大碗
邊個選擇都好，對於從事體力勞動既人嚟講真係頂唔順
咁香港政府見到咁既情況，任命赫治臣做穀米專員去調查食米既問題，結果查出班米商既倉庫其實夠香港人食個半月，只係囤積居奇想賺到盡
結果香港人等唔切政府做野，喺1918年7月26日正值颱風訪港，大批碼頭苦力停工並且喺灣仔街市對出空地聚集。成班人圍埋呻無飯開，於是有人提議不如去米鋪度搶，竟然係一呼百應
300名苦力大軍先喺廣興店搶300斤，之後殺到水渠街、皇后大道東搶掠14間米舖。有d 店員手持掃把同大軍搏鬥，但係始終抵擋唔到肚餓而產生既戰鬥力，都係被洗劫一空
其他灣仔既米舖見到咁，即刻關門寧願唔做生意，希望避過一劫
之後搶米風潮蔓延到中環、銅鑼灣、西環等地，經常有3-40到150人不等既苦力同黑幫大軍去各米舖搵食，但係警方到場每次都只係驅散搶米大軍，從來都無大規模既拘捕行動，令到搶米情況更加嚴重。當時好多米舖都已經唔敢開門，只係敢開一扇小窗賣米；連帶當鋪同金鋪都一律喺入夜之前關門
直到九龍都開始搶米，香港警察終於要拉人
只不過拉到返去，法官都理解市民係因為無飯開先至會犯法，一律只係輕判罰款5到7元/14日監禁了事
要解決搶米潮，最根本既辦法都只有解決糧食供應問題
咁赫治臣其實早喺搶米風潮之前已經做緊野，只係入貨都要時間，市民搶咗一輪先撲到三萬幾擔官米。有米之後，即刻用每1蚊10斤既平價賣畀市民
咁針對商人囤積居奇，赫治臣發佈限價令:
1號白米，每擔22
2號白米，每擔15
3號白米，每擔12.5
仲命令米商如果積存白米多過100擔要同佢報告
另一方面，華民政務司發出告示，承諾政府會每月津貼20萬嚟平抑米價，勸諭華人停止搶米行為
當時連中國都禁止食米出口，咁英國人又點樣搵米？
好簡單，用返佢地最擅長既走私法，並且賄賂關卡
咁商界都有幫手收拾殘局，先有何東托上托之下得到北京國務院批准，特別准佢喺安徽同江蘇兩省買50萬石白米，運去香港救濟市民
另外洋商英美煙草公司向本港米商高價買1500擔米，再用低價專賣畀華人貧民
咁東華都有做野，喺西營盤、大笪地、油麻地等9個地方贈粥
(當時喺東華拍板贈粥依個決定既正正係何東總理，何東夫人紀念堂班宿生煲粥既傳統，係咪咁嚟既呢？ )
民間亦都開始推廣食麵代替食飯。唔係因為西化，而係現實問題。一個人每餐食4両麵已經夠飽(本書就咁講，絲打就可能夠飽既，我應該要6両)
當時每斤麵只賣8仙，即係每人每日2餐都只係需要食4仙落肚
喺各方既努力之下，食米供應終於回復正常，市民亦都再無需要搶米
#389科學怪人
4両麵 = 150克，大約只有1.5包公仔麵
#390科學怪人
27. 香港機器工人罷工
喺一次世界大戰之後，香港出現物資短缺既問題，物價飛漲亦導致港幣貶值40-50%
當時一個機器工人既月薪只有30港元，但係一家三口既基本開支已經要39港元，做成入不敷支
另外，同工不同酬既情況都好嚴重，當時歐藉機器工人可以加薪2到3成追返部分通脹，但係華工就已經凍薪10年
咁1920年3月，香港華人機器總工會就向外資船塢同電力公司等既資方談判，提出加薪40%既要求。資方就當然覺得做乜事依班中國人可以咬得咁大啖呢，只肯答應向華工發放1.5元既伙食津貼
總工會當然唔肯過佢，搵埋法律顧問羅文錦出律師信拒絕資方既反建議。喺提出要求4次不果之後，總工會開始發動罷工行動
要值得一提既係，今次罷工係得到廣東當局既支持，甚至要溯源既話，連依個總工會既前身都係孫中山先生既手下馬超俊，當年成立係為咗培訓工人參加反清革命
1920年3月31日，500名船塢工人首先發起罷工，當時船塢公司都知死，即刻提出加薪15%同每月1.5既臨時買米津貼
工人當然唔接受，而且仲有報紙佬《德臣西報》幫手潑行把火：「既然日常生活開支都已經上升40%，點解僱主仲敢提出加15%呢？」
罷工行動持續，並且有其他公司加入。去到4月5日，總共有不下於6000人罷工，佢地罷工既形式係返去廣州聚集
罷工行動得到廣州當局嘅支持同全力協助，馬超俊仲幫手包辦香港機工喺廣州既食宿。喺國父孫中山既呼籲下，唔少廣州既機器工人都捐出1日既收入支援香港同工，甚至有上海華商豪捐7萬
雪球越滾越大，連電車公司、電話局、山頂纜車既機工都加入。香港甚至需要出動英軍皇家工兵團同海軍去代替罷工華人工作
搞到水務局既機工都威脅加入，一旦成事真係會影響全港食水供應，令到香港政府震撼
最後資方跪低，再同工會代表傾，結果就係咁:
月薪100港元以上加20%
月薪30以上、100以下加32.5%
月薪30或以下一律加薪到39.75港元
勞資雙方終於達成共識，喺廣州既香港華工搭火車返去開工
#401松村芽久未
終於追完
好似睇緊本書咁
巴打有冇睇過一本叫拾香紀嘅小說？
如果冇 可以睇一下
雖然係小說 但都帶左唔小香港歷史背景入去做故事入面
#407科學怪人
28. 香港蓄婢傳統既沒落
之前同樓上巴打既討論當中有提過，保良局雖然喺某程度幫到中國婦女，有效咁防止拐騙同逼良為娼，但係唯獨對有錢人買妹仔(蓄婢)就網開一面
冠冕堂皇既講法係華人大家庭家務繁忙，實在需要人手負擔，而且買賣雙方係自願既，唔存在拐騙成份
再者，華人貧民往往都係有力敦倫但係無錢養，如果唔係多得班有錢人「好心收養」，咪搞到多咗棄養、孤兒、逼良為娼既問題囉。所以蓄婢喺風俗上被認為係有錢人對貧苦大眾既慈善義舉。
不過實際上，妹仔畀主人買咗返去就即係任人魚肉，長期住喺主人屋企真係想點就點。未必個個主人同少爺都係咁和藹可親、斯文有禮，妹仔被虐打既不計其數，甚至會成為滿足性慾既工具。
簡單嚟講即係變相有錢人食妹仔就係「合法傳統」
咁搞法無論係酸臭毒L定係大愛左膠都會出嚟反
解釋一下蓄婢業既市場運作先
當年有錢人係會按照每歲另加10港元既價錢，向準妹仔既親生父母買咗佢既擁有權
為咗彰顯蓄婢同販賣人口係有分別，父母係會寫「送帖」作為賣女既契據，而新主人就會支付「薑醋金」以表謝意
咁喺第一次世界大戰結束之後，香港多咗歐籍人士同信主既華人抨擊蓄婢行為，當中駐港海軍上校希士活既夫人更加喺報紙寫文批評
上校夫人既文章觸怒華人方丈，搞到港督司徒拔都要求英國海軍調返上校去英國
返返去英國，上校夫婦都一齊反蓄婢，仲激過之前喺香港。佢地繼續寫報紙文之餘仲約見各大慈善團體同國會議員，滾雪球等多d 人支持佢地既主張
於是一堆組織紛紛向英國殖民地部提出質詢，搞到殖民地部都要捽司徒拔死掂佢
司徒拔唯有召集各界華人齊集太平戲院出席蓄婢問題研討會
會上面班上層華人當然對於註冊一事屌到反皮：
1. 承認有不法者以買婢為名，實則轉賣妓院，依d 行為應該禁止，但唔應該同正規蓄婢混為一談
2. 承認有人虐待婢女，但只係小數
3. 中華民國廣東省曾經下令蓄婢既家庭交出婢女，並且由政府接管，可惜衣食都差過主人家屋企，搞到婢女鼓譟，最後當局要請各家收返班婢女
4. 即使玩註冊制度，即係警察可以不時進入華人家中監察，會造成滋擾
最後大會喺接近一言堂之下通過成立「維持蓄婢會」，由華人協助保良局監察虐待婢女既問題
咁堅決反對果班少數就覺得個會畀哂班上層既得利益者發言，令到與會人士不自覺地支持蓄婢。喺佢地當中，有26人另行成立「反對蓄婢會」撐到行
反對蓄婢會搵到英國既希士活上校夫人資助印製幾千份《香港蓄婢問題》，喺香港同英國都派畀各界人士，又喺HKU同各中學巡迴演講，慢慢咁爭取大家既同情
喺佢地長期既努力之下，1923年香港政府終於通過禁婢新例，但仍然有華人巧立名目，改稱為「養女」繼續蓄婢
一路要去到二戰之後，隨住社會風氣改變，妹仔先至成為歷史
#427科學怪人
/林則徐成個方丈咁 小鳩氣/
自古做官都唔容易，中舉已經荷蘭威，何況仲要爬上大官，喺佢角度當然睇唔起盜賊出身既張保
(所以我只係話林則徐肯不論出身既話，可能改變戰局）
其實時至今日都會以出身取人，一次不忠百次不用
犯過事既人一樣入唔到政府做
即使係經過罪犯自新計劃洗底既
(判刑3個月以下、出獄後3年內無犯法）
如果係報考pt. 36 以上既政府工一樣係要填寫自己有犯過罪
#428科學怪人
29. 海員大罷工
機器佬得手之後，自然有更多華人反思自己既待遇，大家都唔想做港豬
都係因為第一次世界大戰之後，港幣貶值而且出現嚴重通脹，1921年去到50%
喺隔離廣東省，因應通脹，船員都已經可以加薪4成
當時香港華人海員既收入仲低過機器佬，每月只有20到25港元，實在無辦法維持生計；相反做同樣工作既洋人船員，收入就有4到5倍，當時仲可以得到15%加薪抗通脹
為咗份糧，1921年3月6日，班香港海員成立咗「中華海員工業聯合總會」，總會之下成立「加薪維持團」負責向船公司爭取加薪
另一方面，工會喺廣州成立辦事處，預備定談判失敗之後安排罷工既同工返廣州
工會既要求有3點，中心思想都係離唔開錢:
1. 加人工
月薪10以下加5成
10-20加4成
20-30加3成
30-40加2成
40以上加1成
2. 介紹工作權，避免包工頭對海員收賄同剝削(其實時至今日做炒散一樣要畀蛇頭食一截)
3. 海員同公司簽約，工會可以派員在場監察
工會先後3次提出上面既要求，都得唔到回應，唯有決定喺1922年1月13發起罷工
1500個香港海員返去廣州罷工，受到廣州工人既歡迎同接待。工會為咗令海員放心罷工，仲應承會為罷工既海員每日提供0.45到1蚊基本既生活費
當時國父個仔，時任廣州市長孫科，仲下令開放廣州所有廟宇同公共場所畀罷工海員入住
因為得到廣東方面既支持，罷工短短一星期已經有6500香港海員加入
班海員仲鼓勵同呼籲其他同航運業有關既勞工都一齊參與，防止公司同政府搵到足夠人手替代佢地工作
命運同海員息息相關既搬運工人首先響應，返去廣東，令到碼頭因為無得上落貨而癱瘓，罷工人數好快就滾到30000
1月31日碼頭工人同煤炭工人一齊加入
面對咁既情況，船公司提出按照不同航線加薪7.5到25%；不過海員總會唔肯，反建議加17.5 到32.5%
結果當然係談判破裂，軟既唔得就唯有用硬既
港督司徒拔喺2月1日刊憲宣佈海員總會係非法組織，因為佢地嘗試鼓動其他對僱主無抱怨既勞工罷工，港督仲屈佢地用恐嚇手段逼人罷工。同日派警察封閉喺德輔道中既總會office ，仲拆咗工會既招牌；2月3日，警方取締幫手罷工既碼頭工人工會總部
香港政府嘗試派人去上海、菲律賓、印度招新人替補工作，咁海員總會就組織「防護破壞罷工隊」應對，派人暗殺負責招工既人
去到2月27日，香港政府宣佈戒嚴，調集軍艦駐守香港，仲禁止九廣鐵路通行，企圖阻止更多華人離開香港
無火車搭唔緊要，數以萬計既華人喺2月底出糧之後就行路上廣州響應罷工，令到參與既港人多達12萬
3月3日凌晨，2000個華工途經沙田準備北上，在場既英軍開槍叫佢地唔准走。華工高呼：「不要怕，前進，去囉去囉！」
英軍於是向華人開槍，造成殺3傷8既「沙田慘案」
沙田慘案激起香港同中國華人既義憤，令到廣州華人斷絕香港既糧食供應，即使香港直接派軍艦上廣州都買唔到幾多
當香港政府發覺強硬手段阻止唔到罷工，而船公司已經因為罷工行動蝕咗5百萬，唯有重新再談判。喺傾加薪之前，總會首先要求取消非法既標籤，並且可以以原名恢復工會，港府同意，搞掂
跟住總會要求資方出返所有海員喺罷工期間一半既人工，36萬8千港元。
邊可能玩罷工仲有糧出，船公司當然唔肯
不過何東先生竟然願意代為畀錢，搞掂
之後到加薪，雙方同意加15-30%，搞掂
3月6日，香港政府將「中華海員工業聯合總會」既招牌物歸原主，罷工亦暫告一段落
#442赤紅之野馬
以前冇讀過書嘅人冇個係港豬，傾唔掂就罷工
反而今日社會個個讀過書，但成班港豬奴隸
btw 想睇唔同時期香港華人嘅生活水平
#443科學怪人
/以前冇讀過書嘅人冇個係港豬，傾唔掂就罷工
反而今日社會個個讀過書，但成班港豬奴隸
btw 想睇唔同時期香港華人嘅生活水平/
客觀講係階層問題
其實到今日都係，班基層理得你，班公屋外判清潔工人不滿剝削同剋扣一樣罷工
反而係d 低薪白領驚cv花咗、驚無推薦信、無職升又盛，先至會忍受一日OT幾粒鐘無得補水
#444叄拾陸詩韻
/至於唔希望受監管，自己偷偷地接客既都叫私娼
去到1839年，因為英國本土有好大既呼聲，班大愛賢者覺得定期檢查依樣野傷害到婦女既私隱，所以英國國務大臣下令香港停止體檢制度
自此之後妓院可以好似以前咁喺週圍任開(都要攞牌同註冊)，加上1897年取消咗針對華人既宵禁令，令到上環一帶既妓院夜夜笙歌
咁香港政府就喺1899年起喺中環皇后大道中海邊開始進行大型填海工程，一路填到去西邊既石塘咀。新既土地同社區都要諗諗計點開發好/
呢度啲年份我有啲亂，定係1839係打錯左？
#447科學怪人
/呢度啲年份我有啲亂，定係1839係打錯左？/
sor 打錯，係1893
自膠
#448科學怪人
30. 孫中山教訓港督、訪港外交
去到1923年，孫中山第三次喺廣州建立政權，準備北伐統一中國，首先就同蘇聯代表越飛喺上海簽署「聯俄容共」既宣言，爭取蘇聯既援助。另外佢需要改善同英國既關係，等北伐可以無後顧之憂
不過依樣有難度，因為英國同清朝有邦交，其實早喺1895年香港政府已經禁止孫中山進入香港搞革命
1月中，孫中山就搵外交代表陳友仁兩次接觸英國駐上海領事Barton，表示希望同香港政府修好。陳友仁明言如果孫中山仍然受到香港方面敵視，就會被逼尋求其他列強既援助
「其他列強」其實意指蘇聯，依樣自然就唔會係英國樂見既事
之後陳友仁拜訪英國駐華大使Macleay，再重申孫中山想修好，於是後者就同英國建議，只要孫中山唔好挑撥香港勞工搞事，應該同孫保持友好關係
之後孫中山透過滙豐探口風，問佢可唔可以同港督會面。司徒拔港督就話好，只要孫中山唔係以中華民國總統之類英國未承認既身分落嚟就得
為免國父受到行刺，香港方面派出便衣探員保護佢。喺2月18日中午，司徒拔喺港督府設非官式午宴歡迎佢
席間孫中山表示粵港利益密不可分，強調1922年既海員大罷工證明如果廣東要同香港為敵，香港貿易就會陷於停頓，所以為咗香港既利益，你地必須同我地保持良好關係
依番話對於司徒拔來講，有教訓同威脅既意味
之後孫中山以校友既身分獲邀到HKU演講，受到在場400多學生同華人領袖既熱烈歡迎。
孫中山為咗釋除英國對佢「聯俄容共」既疑慮，喺HKU大讚香港畀英國管治得好好，無論係衛生、治安、廉潔方面都比家鄉香山優勝，仲表示佢希望廣州都可以用英式良好管治作借鏡
先小人後君子，威脅帶點誠意，令到當時英國同孫中山政府既關係得到改善
#449科學怪人
講多少少，孫中山此行爭取到滙豐總經理應承批出無須抵押既貸款，用嚟協助廣東喺省內起鐵路
另外孫中山仲成立籌餉局，以債券形式向香港華商籌款協助國家發展
佢此行可以話係大收穫
#453科學怪人
孫中山把口真係幾犀利
唔係點水到咁多人陪佢搞革命
#460科學怪人
500正評特刊
都市傳說: 共享單車免費借用大法
之前講d 車、船太過技術性，未必啱大家睇
今次就講d 輕鬆d既話題
首先要聲明既係，租用共享單車係需要先喺電話安裝應用程式，再按正規程序登記信用卡同掃QR Code 開鎖
以下純粹當係香港秘史咁討論，相關行為等同盜竊，係非常嚴重既刑事罪行，一經定罪最高可被判處10年監禁，請勿以身試法
道德上，搭唔起就唔好搭
咁簡單講下喺香港既共享單車運作係咩一回事
單車喺沙田、大埔都幾乎隨處可見，主要定位係for 區內短程運輸多過畀人運動
不過共享單車一推出，就遇到好大既挑戰
1. 本身每個月交鋪租既單車鋪當然唔gur，透過傳媒表達不滿
2. 有唔少共享單車畀人掟落河，有言論認為係單車鋪所為
3. 市民用完單車周街亂泊，以致被業權人鎖起/拖走
羊毛出在羊身上，以上既損耗都係由租車既人所付出既錢嚟補貼
不過最近就流傳想用車既話，其實仲可以用特殊招式
先講GoBee Bike
鎖身係如圖一舊鐵圍住
於是有人諗到搵石仔喺鎖近住開口個位度鑿
熟手既話，30秒左右已經搞掂
所以如果大家見到架車個鎖邊係泥黃色/花哂，就一定係有人鑿過
至於OfO既鎖車系統係要撳一個4個位既密碼，而密碼又只有1, 2, 3, 4可以選擇
咁密碼最後既兩個字就一定係相同既，即係話可以撞既組合其實唔多，只有64個可能性
每撞錯5次，都只係會lock 20秒唔畀撞
#465科學怪人
31. 省港大罷工
孫中山之前同香港建立既良好關係無耐
基於聯俄容共政策，共產黨對於廣東有一定既影響力
而喺共產黨影響之下廣東當局就開始同英國人起衝突，之後廣東更加策動省港大罷工。之前建立既好關係亦都一掃而空
1923年9月，廣州國民政府企圖用武力收返洋人管轄下既廣東海關，英國為首既列強即刻派軍艦到廣州海面示威
作為報復，香港滙豐銀行出資支持廣州商團搞叛亂反孫中山
另一方面國民黨大會決議，三民主義增加反帝國主義既新內容，即係間接對英國持有敵視態度
之後喺上海發生針對英國既示威，英國巡捕開槍鎮壓做成10人死傷。消息傳到廣東，引起各界既義憤。喺國民黨左派既影響之下，中央執委表示國民黨會致力援助國民「與英帝國主義相搏」
等到國民政府平定雲南叛亂之後，中華全國總工會決定發起粵港兩地反英大罷工
1925年6月18日，加入咗共產黨一年既蘇兆徵首先發起1500名香港海員罷工，首先「金山號」、「佛山號」輪船被香港船員喺海上拋棄。其他英國輪船上既船員有樣學樣，華資輪船亦都喺接載罷工船員返廣州之後就唔再去香港
之後，電車、印刷、洋務、搬運、煤炭、機器、船塢等各界工人都加入，陸續經火車同輪船離開香港
學界方面，喺香港共產主義青年團既鼓動下，先後有30幾間學校，學生3-4千人參加罷課
6月20日，全港工團委員會發表罷工宣言，向香港政府提出6項要求：
1. 華人集會、結社、言論、罷工合法權利
2. 法律面前人人平等
3. 准許華工喺立法局有代表
4. 8小時工作制、最低工資、廢除包工制
5. 減租25%
6. 准許華人喺山頂居住
6月23日，喺廣東省同香港各界罷工既有十萬人，佢地喺廣州舉行反英示威，點知遊行隊伍被英法軍隊隔岸以機槍掃射，造成52死、170人重傷
慘案堅定香港工人罷工既決心，於是罷工頭15日已經有25萬香港市民離開發去廣州
7月3日，共產黨蘇兆徵出任新成立「省港罷工委員會」既委員長，進行封鎖香港既行動，切斷糧食供應同充公來往香港既貨物
咁香港應對今次罷工，一開始都係採取強硬手段
港督司徒拔頒佈緊急狀態令，出動大批軍警巡邏同搜捕發動罷工既工會領袖。佢呼籲市民如果有證據證明有人威嚇佢地罷工，即獎250
佢亦都審查華文報紙、郵件、電報既內容，涉及罷工既一律扣起
香港政府亦都透過一系列既政策救亡
1. 准許無牌小販喺街上擺賣，代替參與罷市既街市
2. 將新界既農產品運到香港市區，部份咁取代因為罷工而停止既糧食入口
3. 成立招工局，利誘居民返嚟復工
司徒拔仲建議由香港出資1百萬資助國民政府右派用武力鎮壓共匪，但英國外交部覺得英國對華應該保持中立，所以ban 咗
至於東華班高層其實都係有錢人，自己都身受其害，所以東華都呼籲中國同海外既華人社團停止援助罷工既匯款
香港既行動雖然可以確保返電車如常行駛同部份商店復業，但就要去到1926年蔣介石搜捕共產黨員同指示國民政府單方面宣佈喺雙十節結束罷工同停止封鎖，歷時16個月既省港大罷工先至結束