【練膽大法】我每日迫自己搵一位陌生人傾偈 原post link
#494陌樂偈•2017年4月23日 21:10:06
《陌樂偈》第28天－茶餐廳內的鐵匠伯伯
茶餐廳內，我跟一位伯伯搭枱
他把一罐酒放到枱上，罐上寫著「First Class」
枱上有些膠杯，但他主動叫店員為他拿一隻玻璃杯
「唔該！攞隻玻璃杯畀我丫！」
繁忙的店員沒有回覆他，過了一會他再說一次
「唔該！攞隻玻璃杯畀我丫！」
店員煩躁地說：「得！等等！」
我發現這是很多香港人的通病，不喜歡對別人作出回應
對方不知道你有沒有聽到，再次要求時，便會十分煩躁
過了一會，他的玻璃杯終於來了
他獨自用玻璃杯享受著他罐中的酒
機會來了～陌生人！
我指著他那罐寫著「First Class」的酒說：
「哥哥，你呢罐正嘢嚟㗎喎！」
「唔係～ Cheap嘢嚟啫～」
「個罐上面寫住頂級喎！」
「個罐就正，啲酒唔正」
「點解嘅？」
「個罐舊㗎，我自己斟啲酒落去飲」
「我見飲酒啲人都鍾意用玻璃杯，玻璃杯好飲啲㗎？」
「慣咗，摸落去涼浸浸咁」
我問他退休多久了
他說1960年做到60歲，現在75歲
這時，他的牛肚麵來了
75歲的伯伯，竟然把一羹又一羹的辣椒油加到麵中
「嘩！你咁食得喇辣嘅！ 你以前做邊行？」
「整鐵器」
「你做打鐵？」
「係呀，整鐵閘呀、扎鐵嗰啲鐵呀、監獄啲閘呀、夾萬呀」
「你負責整個夾萬，咁你會唔會識開夾萬？」
「夾萬有啲暗位嘅， 撳啱個位就會打開
我整嗰啲我咪知囉，其他人整嗰啲，就人哋先知喺邊」
「咁你見到自己整嗰啲夾萬，咪可以隨便開得到囉？」
「開？冇鎖匙點開呀？」
原來暗位只是雙重保障，夾萬還是要有鎖匙才能打開
我問他退休後有甚麼活動，他說踩單車和釣魚
然後分享了很多釣魚經歷，說在大海看過很大的魔鬼魚
我問他有沒有釣過魔鬼魚，他說：
「魔鬼魚好撚重㗎！點釣呀？吊威也咩？哈哈哈哈哈」
他說完後自己在大笑
伯伯一個人住，有一個兒子，沒有孫
我問他為甚麼沒有孫
他說：「你問下我新抱囉，佢唔肯生！」
接著，他說了很多關於新抱的壞話
「你個仔做邊行？」
「做咕哩」
「佢多唔多返嚟同你食飯呀？」
「好少返嚟… 佢有功夫要做丫麻，好忙…
唔得閒返嚟睇我咪算囉…… 最緊要身體健康」
老實說，每個人有多忙，還是有空閒時間
只是很多子女選擇用這些時間做其他事情，而忽略了父母
伯伯又說：「個仔有時會打返嚟問我夠唔夠錢洗，
我話夠，叫佢留返自己洗，有個咁嘅仔仲想點丫……」
父母要的其實十分簡單，可能一個電話已經很足夠
「新年佢有冇約你食飯呀？」
「新年都冇得約㗎，返就返，唔返就唔返，冇得強求」
我問他覺得最開心是甚麼事
他說釣魚最開心，可以跟別人「打牙骹」（傾偈）
本來不認識的陌生人，透過釣魚也能變成朋友
「你成日約啲朋友出去釣魚？」
「唔駛約㗎，出到去就會見到」
伯伯問我做邊行，我告訴了他
他又問我「做呢行O唔OK」，我說「算OK啦」
他說：「行行出狀元啦！不過做老闆就最OK！」
「做老闆都好大壓力嘅」
「做老闆有咩壓力呀？淨係叫人做，自己唔使做嘅！
我以前都做過老闆啦～ 唔洗做嘢，淨係叫人哋快手啲！
問人哋「瞓醒未呀你！」哈哈哈哈哈！」
我要走了，站起來跟他道別
「我走先喇，新年快樂！身體健康！」
他笑著說：「新年快樂！得閒再打牙骹啦！」
我離開後，這張枱只餘下這位喜歡「打牙骹」的伯伯
獨自喝著「First Class」罐內倒出來的廉價酒
我們都是陌路人，就這樣傾了一場陌樂偈
2017-01-26
#501陌樂偈•2017年4月27日 11:30:43
《陌樂偈》第29天－懲教署男職員
今天，我遇上了有史以來最可怕的目標
巴士上層，一個兇神惡煞的中年男人獨自坐著
他把一隻腳叉到旁邊沒有人的座位，看起來十分霸道
車上還有很多空位，我突然坐過去，可能會被他責罵
心裏想著「不如換個目標吧？」
但我告訴自己，要克服自己的恐懼
而且，不應以貌取人
經過一番猶豫後，我終於坐了過去，跟他說：
「先生你好，可唔可以同你傾下偈？」
他臉帶笑容，十分慈祥地說：「好呀」
果然，不應以貌取人
解釋完我每日搵陌生人傾偈的計劃後，我問：
「請問你做邊行？」
「做懲教署」
「即係…喺監獄入面做？」
「係，負責看住啲犯」
「唔怪得你個樣有啲惡，好有殺氣」
「嗯，做呢行一定要㗎」
「你今日駛唔駛返工？」
「我退咗休，之前追個犯整親腳，所以提早退休」
原來他把一隻腳叉到旁邊，是因為受了傷
真的不應以貌取人，也不應「以坐姿取人」！
人類面對未知，常常自製恐懼，把事情想像得十分可怕
「他的樣子很兇，把腳叉到旁邊，一定是個惡霸」
當你勇敢作出嘗試，會發現事情沒有想像中可怕
聽到他說「追個犯整親腳」
我馬上幻想有如「Prison Break」中驚險刺激的逃獄情節
「犯人跨過欄桿，往森林深處逃跑！
獄警獨自追上去，卻失去了逃犯的踪影
突然，一道黑影從草叢中撲出來
獄警慘遭埋伏，被逃犯用隔夜麵包打斷了一隻腳…」
他打斷了我的FF，說出了事件的經過
「我帶啲犯出去監獄外面做義工
有個犯偷偷地走咗去廁所，我追入去，俾灘水跣親」
幻想跟現實，總是有很大出入
不過，慶幸他沒有慘遭隔夜麵包打斷腳
「你而家對腳好啲未？」
「好返好多」
「咁個犯最後點？」
「佢話趕住去廁所，你都奈佢唔何」
他現在50多歲，生活沒有負擔
提早退休後，每個月也有糧出
「你鍾唔鍾意做呢份工？」
「鍾意」
「你嘅職責係咩？」
「負責帶啲犯出去，譬如參加外面啲活動
平時就負責帶佢哋出去球場」
「係咪叫做『放風』？」
「嗯，佢哋就喺球場入面
我哋就喺鐵絲網出面睇住佢哋」
「有冇見過啲咩重犯？」
「有，殺人放火都有，佢哋要獨立困住嘅
就算放出嚟，都係一個人，冇人掂到佢」
「點解最初會做呢行嘅？」
「嗰陣個個都想做政府工，做警察、消防又危險
做呢行安全啲，都未聽過有人死嘅，係咪？」
「成日有人偷走？」
「係㗎，帶佢哋出去參加活動
成日借啲易走咗去，捉到佢哋又話去廁所」
「有冇人試過喺監獄入面逃獄？」
「有，你去睇戲咪有囉～」
「哈哈，我就係睇戲睇得多，現實有冇㗎？」
「你去睇戲啦！睇戲精彩好多！」
「睇戲話入面攞煙仔嚟交易，係咪真㗎？」
他笑笑口說：「如果你真係咁有興趣～
咁想知嘅話呢～ 自己入去睇下囉！」
我無奈地笑著說：「咁又唔駛……」
「我哋有守則，唔可以講咁多入面嘅嘢，傾第啲丫」
我只好轉一轉話題
「新年係咪同屋企人一齊過呀？」
「係呀～」
「你覺得過年開唔開心？」
「細個就開心，好似我咁嘅年紀，大一年就短命一年」
「你咁耐以嚟最開心係咩事？」
「做到呢份工囉，嗰陣覺得自己好威㗎！好難考㗎！」
我把握機會，轉回跟監獄有關的話題
「以前會唔會同啲犯做朋友？」
「會，有啲都傾得埋，做到朋友」
「而家重有聯絡？」
「佢哋出咗去之後，就全部都冇聯絡㗎喇～
有啲過一排，又會入返嚟」
「係咪好多人出咗嚟，都會入返去？」
「一半一半啦，有啲會變返好，有啲會入返嚟」
「教到佢哋變返好，係唔係會好滿足？」
「唔關我事㗎，我份工唔係負責教好佢哋
只係唔畀佢哋喺入面再犯事」
「如果佢哋再犯事，你就負責罰佢哋？」
「都唔使罰佢哋㗎，淨係睇住佢哋就得㗎喇」
「個名叫懲教署，但其實唔駛懲罰，又唔駛教佢哋」
「係呀，啲法官、神父就會入嚟感化佢哋
我哋唔駛做呢啲嘢，看住佢哋就得」
「所以你哋只係負責…管理？」
「冇錯」
原來懲教署職員，不用懲、不用教，只是一個管理員
那「懲教署」應該改名做「管理署」嗎？
他到站了，我站起來讓他下車，並跟他說：
「好啦～多謝你同我傾偈！新年快樂，身體健康！」
「新年快樂，有嘢想知就入去睇下啦～Bye Bye」
我們都是陌路人，就這樣傾了一場陌樂偈
#504陌樂偈•2017年5月7日 03:49:00
《陌樂偈》第30天－沒有小販檔的年初一
今天，是年初一
去拜年途中，看見每年也會出現的小販檔
我打算回程的時候，來這裏吃件臭豆腐
當我下午3-4時回來，全部小販檔已經不見了
只餘下十多名身穿制服的食環署職員
正在趕最後一位小販婆婆離開
《實驗環節》
看到這裡，請各位讀者在心裏回答自己一條問題：
「你認為農曆新年，應該准許無牌小販擺檔嗎？」
—————————————————————————
婆婆說：「我擺喺呢度，都冇阻到人」
食環署職員說：「冇阻到人都唔得！你快啲走啦！」
婆婆只好推著車仔離開，我過去跟這位陌生人婆婆傾偈
「姐姐，佢哋唔畀你擺檔呀？」
「係呀！」
「點解年初一都唔畀擺嘅？」
「唔知喎！你問佢哋囉！」
我搵其中一位食環署女職員傾偈
「唔該，我想問下今年係咪唔畀擺檔？」
她理直氣壯說：「不嬲都唔畀擺㗎啦！」
「但係上年新年，呢度都有小販檔」
她不耐煩地說：「上年我唔知喎！你問阿Sir啦！」
她示意我去問旁邊比較高級的「阿Sir」，我走了過去
一位比較有善的阿Sir問：「有咩可以幫到你呢？」
「請問而家係咪新年都唔可以擺檔？」
「係呀，請問咩事呢？」
「冇， 通常新年我都會同屋企人出嚟買下嘢食
純粹想問下，今年係咪冇晒小販檔 」
「你見到冇就冇㗎喇～」
「係呢度唔畀擺？定周圍都唔畀？」
「全部都冇唔畀擺，周圍都冇㗎喇～
嗱～我淨係知呢區，其他區我唔知呀吓」
「但係前幾年都畀擺，點解今年唔畀擺？」
「唔同時段，有唔同做法嘅…」
突然，一位比較嚴肅的食環署阿Sir走過來
示意他的同事不要再跟我說話
友善阿Sir還想友善地回答我，嚴肅阿Sir馬上嚴肅地阻止他
嚴肅阿Sir兇惡地問我：「你邊度㗎？」
我十分愕然，這句話通常是警察用來盤問黑社會的
又或者是黑社會之間，互相問候時才會說的話
這位食環署男職員，又不是警察，也不是黑社會
為甚麼會問我這條問題呢？
我只好回答他：「我係普通市民」
那時候，我雙手插在褲袋
他突然命令我：「你攞對手出嚟丫！」
看來他真的當了自己是警察
我攤開雙手跟他說：「唔阻你哋做嘢」，然後轉身離開
在附近，看到了兩位小姐，在看守著一盤街頭小食
我過去問她們是不是檔主，她們用手語表示自己是聾啞人士
於是我展開了有史以來第一次用文字進行的陌樂偈
我拿出電話，輸入「你是檔主？」
她揮揮手，然後指向前方
我再輸入「檔主在哪裏？」
她指向前方，做了一些我不理解的手勢
接著，她們往前走，我跟了上去
在轉角看見了幾位先生，看來也是聾啞人士
他們在收拾煮食器具，然後吃著煮好了的食物
只有一位先生，在用普通話跟食環署職員交談
食環署職員不斷趕他們走
我見他們已經收起了檔口，幾個人自己在吃餘下的食物
食環署職員不斷責罵他們，叫他們馬上離開
我問食環署職員：「請問呢度係咪唔食得嘢？」
她說：「喺度食嘢就得，但係唔准擺檔」，然後就離開了
那位說普通話的先生，跟我說「謝謝」
我問他是不是檔主，他說不是，檔主是眼前的兩位聾啞先生
他們每逢農曆新年，也會從中國來香港擺檔
他和另外兩位聾啞小姐是他們的朋友，只是來旅遊
知道了朋友遇到麻煩，所以過來幫手
我問：「早幾年有沒有被趕？」
他說：「以前不會這麼早趕人走，通常到了晚上才趕
今年第一次遇到這個情況，我也不知道為甚麼」
那兩位小販看見我幫助了他們，拿了一隻炸香蕉給我
我知道他們是來自中國的無牌小販後，不敢吃他們的食物
我做了一個自己認為是「謝謝」的手語，禮貌地拒絕了
不過回想起來，以往在農曆新年幫襯小販時
其實也沒有留意他們是香港人，還是中國人
說不定我之前也有幫襯過他們
可是，現在知道了後，還是沒有信心吃他們的食物
我拒絕了幾次，那位小販還是堅持把炸香蕉塞到我手上
我只好拿著那隻炸香蕉，繼續跟那位先生傾偈
我問為甚麼他的朋友都聽不到東西，他說是天生的
他們都是有這些問題的人，透過某些組織成為了朋友
他父母也是這類人，所以從小就懂得手語，專門幫助這類人
最後，我嘗試把炸香蕉還給他們，但失敗了
只好拿著那隻炸香蕉跟他們告別
離開那條沒有小販檔的街道
首先，我不贊成其他地方的人持旅遊證件來香港搵食
現在討論一下，政府應否在農曆新年趕走無牌小販
每逢新年，很多地方都會出現大量小販檔
必定會造成通道阻塞、環境衛生等問題
雖然一年只有幾天，但住在附近的居民
認為新年流流，不想被打擾，也是非常合理
可是，整條街佈滿小販檔，
到處也是各式各樣的香港特色小食
魚蛋、牛雜、雞蛋仔、臭豆腐等等
這些景象，每年就只有這幾天才會出現
否則，香港人也不會一窩蜂地衝去一年一度的「香港夜市」
有些人，提到「食環署趕小販」這個話題就會說：
「咁佢哋真係犯法，趕佢哋走都好合理」
沒錯，他們是犯法
「但犯法的事一定是錯的嗎？」
上年發生年初一騷亂後，我花了一段時間思考這個問題
由於我們活在法律管治下的社會，
很容易轉入了「犯法就等於犯錯」的思維死角，
包括我自己
參與雨傘運動的人，佔領了馬路，全部人也犯了法
但有不少人認為他們沒有錯
七個警察，打一個手無寸鐵的市民，犯了法
也有不少人認為他們沒有錯
可見人類不會單單因為有沒有犯法，來衡量當事人有沒有錯
說遠一點，大家還記得「九龍皇帝」曾灶財嗎？
他到處寫毛筆字，絕對是犯了法
但他的犯法行為，成為了藝術、成為了香港的文化
他的罪證，還能放在博物館中讓世界各地的人展覽
一直以來，大年初一至初三，無牌小販擺檔也會酌情處理
這個約定俗成的傳統，使香港的小販檔文化得以流傳下來
多少藝術作品、畫作、模型，以香港的小販檔做主題呢？
你知道嗎？下面那張相，其實是栩栩如生的小販檔模型
現今的香港政府，不再發小販牌照
當每年初一至初三的小販檔也消失了
這種香港的特色文化，也會逐漸消失
就像現在的九龍，已經看不到「九龍皇帝」的筆跡
我們都是陌路人， 在年初一傾了幾場陌樂偈
2017-01-28
—————————————————————————
《實驗環節》
記得剛才問過自己的那條問題嗎？
「你認為農曆新年，應該准許無牌小販擺檔嗎？」
如果你剛才，跟現在也認為「應該」
按請「O咀」！
如果你剛才，跟現在也認為「不應該」
按請「嬲嬲」！
如果你剛才認為「應該」，現在認為「不應該」
按請「笑哈哈」！
如果你剛才認為「不應該」，現在認為「應該」
按請「喊喊」！
「其他」
請按「心心」，然後留言說一下你的想法
謝謝你看完整篇文章！
想參與實驗的巴打，請到Facebook，謝謝！
#507陌樂偈•2017年7月4日 20:18:22
《陌樂偈》第31天－擅長傾偈的紐西蘭人
傍晚，我在橋上行走，前方有一位外籍人士
機會來了～陌生人！
遇到外國人，總是比較容易開口
我追上去，跟他說： 「Hello~ English?」
「Yes」
「May I Chat with you?(可否同你傾偈？)」
「Okay」
我們一邊行，一邊傾陌樂偈
（以下內容由英文翻譯成廣東話）
「你係咪住喺香港？」
「唔係，我嚟公幹，聽日要開會，而家出嚟行下」
「你到咗幾耐？」
「幾個鐘」
「Oh~ Really?」
「Yes~」
「Welcome to Hong Kong(歡迎來到香港)」
「Thank you!」
「你喺邊度過嚟？」
「紐西蘭，你有冇去過？」
擅長傾偈的人，回答問題時，會反問你一條問題
「紐西蘭~ Cool! 我未去過」
「有機會去下，係一個好靚、好Relax嘅地方」
「我都好想去睇下」
我們過完橋，進入了一條行人隧道
繼續一邊行，一邊傾陌樂偈
擅長傾偈的人，會主動問關於對方的問題
他問：「你住喺香港？」
「係，我係香港人」
「你嘅職業係咩？」
「我係一個演員」
「 Oh~ 邊度嘅演員？電影？」
「電視劇、舞台劇，我希望有一日可以做電影」
「Great!」
「你第一次嚟香港？」
「第二次」
「你鍾唔鍾意香港？」
「Good，好繁榮」
「我有個計劃，係每日都搵一位陌生人傾偈」
「Oh~ Okay~」
擅長傾偈的人，會在適當的時候給你反應
「喺香港冇人會咁樣做，紐西蘭嘅人會唔會？」
「會，我哋成日都會咁做，係好平常嘅事」
「平時喺條街度，見到陌生人都會Say Hi?」
「Yes~」
原來紐西蘭的人，經常跟陌生人傾偈
難怪這位紐西蘭，這麼擅長傾偈
「咁你覺得香港人點？」
「香港人成日都耷低頭，行得好快，好趕時間咁」
「又成日望住部電話？」
「Yes~」
我們離開了行人隧道，到達市中心
繼續一邊行，一邊傾陌樂偈
他又主動問我：「你而家去邊？」
「買晚餐，你呢？」
「出嚟行下，呢度係咪市中心？」
「係呀～前面個商場好多人，你會唔會喺度食飯？」
「Maybe ，你知唔知邊度有得按摩？」
「我好少按摩，旺角好似比較多，或者你Google下」
「Okay~」
「香港係咪好出名按摩？」
「唔係，我只係想放鬆下」
兩個人互相輪流發問，是非常良好的溝通狀態
「對你嚟講香港同中國係咪一樣？定係有分別？」
「有分別， 香港結合咗中西文化，比較國際化
不過我未去過中國，香港係我對亞州嘅唯一印象」
「Do you think Hong Kong is China?」
「No, 係唔同嘅，香港人講廣東話，有自己嘅傳統」
我們進入一個商場，一起上了電梯
我向他介紹了幾間比較有名的餐廳
當時，我想不到「燒味」英文怎樣說
說了「Fire… Burning Pork」
他聽完後明顯一頭霧水，我叫他有興趣去看看餐牌
然後，我跟他告別
「Have a nice day~ Thank You!」
「See you next time」
我們沒有留聯絡方法，但他跟我說「下次見」
向對方表示期待再次見面，紐西蘭人果然是傾偈高手
其實中文「再見」兩個字，本來也有同樣意思
「期待再跟你見面」，或解作「有緣再見」
我們都是陌路人， 就這樣傾了一場陌樂偈
2017-01-28
———————————————————————-
《實驗環節》
謝謝你看完整篇文章！
看到這裡的讀者，請不要Google
馬上留言，說出「燒味」的英文
#512陌樂偈•2017年7月21日 12:01:34
出一本書，是我從小到大的心願。
沒想過這個願望，竟會在今年成真。
假如幾個月前有人告訴我：
「你現在開始搵陌生人傾偈，把這些經歷寫下來，半年後就可以出書，森美還會當這本書的推薦人。」
我一定會說：「發神經！」
我沒有正式寫過文章，也沒人讚過我的文筆，
開始寫陌樂偈文章，只是因為我想做這件事。
結果，有幸得到各位陌生人讀者的支持，
幾個月後，明報出版社竟然邀請我出書！
任何事情沒有開始做，就永遠不會知道結果。
希望各位陌生人，也去做自己一直想做的事。
衷心感謝每一位看過陌樂偈文章的讀者，
沒有你們，就不會有這本書。
這本書收錄了第1-32天的【陌樂偈經歷】，
以及特別收錄了6篇全新的【陌樂偈教室】，
分享我的陌樂偈心得，讓你也能夠傾陌樂偈。
《陌樂偈》現已在三聯、商務、中華有售！
書展買有8折（明報出版社攤位）
【書展見面＋傾偈＋簽書會】
日期：7月21日（星期五）
時間：6:00PM ~ 7:00PM
地點：明報出版社攤位
Hall 1C（書刊館）1C-C04-16
各位親愛的陌生人，
歡迎來書展，搵我傾一場陌樂偈。
謝謝你一直以來的支持！
#513陌樂偈•2017年7月21日 12:04:20
今晚就是讀者見面會了，心情十分緊張！
一直以來只能在網上看到大家的留言，
終於有機會面對面跟各位讀者傾偈了！
沒有買書也不要緊，歡迎過來傾下偈～
【書展見面＋傾偈＋簽書會】
日期：7月21日（星期五）
時間：6:00PM ~ 7:00PM
地點：明報出版社攤位
Hall 1C（書刊館）1C-C04-16
見面會可以傾偈、合照、簽名、握手、
巴打可以擁抱但絲打不可以！
（女袐書在現場啊！
即使她不在現場，我也絕對不會這樣做！）