【練膽大法】我每日迫自己搵一位陌生人傾偈原post link
#308陌樂偈•2017年2月10日 23:19:02
《陌樂偈》第13天－來自中國的香港人
今天，在巴士上三番四次比陌生人拒絕後
勇氣值餘下15點時
終於遇上了一位友善的中年女人
「小姐你好，我可唔可以同你傾吓偈？」
「好丫！」她臉帶微笑，用不純正的廣東話回答我
「你啱啱收工？」
「係丫」
「你做邊行㗎？」
「我做護理員」
「喺邊度做？」
「慈善護養院」
「哦，慈善嘅？」
「叫慈氏護養院，我講廣東話唔係好正」
「唔緊要呀，都聽得明呀」
「你係…喺大陸嚟嘅？」
「係丫」
「嚟咗香港幾耐？」
「回歸嗰年落嚟」
「97年，你以前住邊度？」
「我喺江西長大嘅」
「你本身唔識廣東話？」
「本身唔識，落到嚟再學」
「會唔會好難學？」
「喺大陸嗰陣有睇電視學，識聽唔識講，嚟到再慢慢學」
「做護理員，係唔係要讀過啲咩先做得？」
「要上1-2個月堂，要面試」
「做咗幾耐？」
「做咗六年，一開始喺醫院度做」
「咁一定好忙，好辛苦喇！」
「係呀，太辛苦喇，頂唔順，所以轉咗去呢度做」
「而家嗰間護養院，主要係照顧咩人？」
「老人家多」
「算係護老院？」
「除咗老人家，重有行動不便嘅人，後生嘅都有
我哋個病房，有個女仔之前自殺，搞到得返幾歲智商」
「知唔知道佢點解自殺？」
「為情」
「佢屋企人有冇嚟探佢？」
「佢阿媽對佢好好，日日嚟呀！」
「嘩，佢一定好心痛」
「差唔多十一點就嚟，餵佢食中午飯
所以後生仔，真係唔好做錯事…
佢咁樣死又死唔去，好似成個BB仔咁
咁樣真係好錯囉，搞到阿媽咁傷心
唉…做阿媽嘅真係，咁辛苦養到你咁大」
聽得出她也是一位母親
「你會唔會覺得佢過咗身重好？唔洗佢阿媽照顧」
「咁我哋香港嘅醫療又好好嘅，藥物呀，技術都好好
又有我哋服侍，如果喺大陸，少少事都醫唔好
好似我阿爸阿媽咁，少少毛病就過咗身」
「點解你嗰陣會嚟香港？」
「落嚟同我老公結婚」
她丈夫是香港人，朋友介紹他們在深圳跟認識
然後相愛，然後來香港結婚
到站了，我們同一個站下車
我跟她一邊下車，一邊繼續傾偈
「你覺得香港好啲，定大陸好啲？」
「香港好好多，醫療、環境都好好多
大陸就冇咁忙囉，如果我退休嗰陣可能會返大陸」
「你怕唔怕大陸啲食物有問題？」
「食物唔怕，可以自己種嘅」
最有信心保證的食物，還是自己親手種出來的
「你覺得自己係香港人，定係中國人？」
「我又係香港人，又係中國人」
「你知唔知有啲香港人，唔想認自己係中國人」
「我知，我明白嘅，因為共產黨貪污，所以啲人唔鍾意
但我覺得自己始終係中國人，冇得唔認嘅」
「其實唔單止貪污嘅，重有好多問題
道德、法治、自由、文化、治安、公德心嘅問題
中國政府會做好多嘢，去遮蓋自己嘅問題
喺大陸為咗公義出聲，可能會原告變被告」
「咁又係，大陸政府為咗要起嘢，會拆晒人哋屋企趕人走」
「其實呢啲事香港都發生緊，愈嚟愈多問題傳緊落嚟香港
所以好多香港人都好擔心，而家重有好多黑心食物出現」
「我好細個嗰陣經歷過文革，詳細情況唔係好記得
我覺得因為文革嗰陣，啲人拆晒所有關於宗教嘅嘢
唔畀人信宗教，所以搞到啲人冇咗善心」
說到宗教，原來她是一位佛教徒，現在準備去讀經
她拿出了一本經書，向我介紹了一下她的信仰
傾到這裡，我們已經一起行到了一個港鐵站的閘口
由於她要轉搭港鐵，而我不用，所以我們停了在閘口繼續傾偈
我問她怎樣看其他宗教，例如基督教
她說：「基督教都好，但上天堂唔係永遠
對我哋嚟講，上到去一段時間就要落返嚟，之前再積過福」
「你哋都信有天堂？你哋叫嗰度做極樂世界？」
「係，我覺得唔好成日諗住天堂，其實而家喺呢度都好好」
「你有冇仔女？」
「一個仔，一個女」
「佢哋有冇同你傾偈？」
「佢哋好少同我溝通」
「你講廣東話唔正，會唔會有香港人歧視你？」
「啲同事有時會笑我講嘢唔正，但係我唔介意，我都覺得好笑」
「哈哈，你自己都覺得好笑？」
「係呀，會同佢哋一齊笑」
「我以前返工有位阿姐，幫我哋叫外賣嗰陣，講咗咖喱傻仔炆雞
啲同事笑佢講傻仔炆雞，於是佢以後每次都專登講咖喱傻仔炆雞」
「哈哈哈，我都試過講傻仔雞翼」
「除咗同事呢，其他陌生人有冇歧視你？」
「冇人對我唔好，但有聽過身邊啲人傾偈，話啲新移民
我冇唔開心，但係唔係個個新移民都係咁」
其實她97年來港，至今已經20年了，怎樣計也不是「新移民」
「你識唔識繁體字？」
「我識繁體，但有啲太難嘅字就唔識」
「而家香港愈嚟愈多簡體字，你怕唔怕繁體字會畀簡體字取代？」
「簡體係方便，但繁體字好有意思，好有文化，係應該保留」
「廣東話呢？而家香港嘅小學生返學要被迫講普通話
中國政府好想取消粵語，廣州已經冇乜人講，怕唔怕香港都係咁？」
「廣東話係方言，係香港嘅文化，唔應該冇咗
人哋本身講乜話，就由得人哋講啦，點解要取代佢？」
「你怕唔怕有一日，香港會同中國一樣？」
「我希望中國會進步，然後變到同香港一樣」
我不敢奢望她的理想會實現，只希望香港不會一直退步
不想廣東話消失，繁體字消失，然後變得跟中國一樣
最後，我跟她說：「你好尊重香港文化，好努力學廣東話、繁體字
又好努力工作，幫到好多有需要嘅人，雖然有啲人會覺得你係新移民
或者笑你講廣東話唔正，但係我覺得，你係一個香港人」
「多謝你」
衝量一個人是不是本地人，從不是看這個人，是否在這個地方出生
看過《龍珠》的讀者，也不會反對「孫悟空」是地球人吧？
「我走喇，你係咪要去讀經喇？」
「我遲到㗎喇」
「唔好意思呀，搞到你遲到」
「唔緊要啦，有緣先同你傾到偈」
「好啦～咁我哋有緣再見啦！祝你生活愉快～」
「Bye Bye」
其實，我也遲到了
兩位陌生人，在街上漫無目的地傾偈，結果一起遲到
我們互相點頭，不知道對方名字，就此告別
我們都是陌路人，就這樣傾了一場「陌樂偈」
2017-01-11
#361陌樂偈•2017年2月17日 03:26:16
《陌樂偈》第14天－不想埋沒良心的健身教練
今天，我面臨「陌樂偈」有史以來最大的挑戰
全日也在室內工作，完全沒有機會跟陌生人傾偈
深夜時分，在工廠大廈等𨋢離開時，竟然遇上了他
一位體型健碩的男人，站在我旁邊等𨋢
最後的機會來了～陌生人！
升降機馬上就到了，我們一起走進去
這是一程短途𨋢，我們只是從四樓乘到地下
我爭取時間，馬上出擊：「Hello~ 收工呀？」
他有點錯愕，然後友善地回答「係呀」
「你哋嗰度係做咩㗎？」
「我哋租咗個地方，喺度做健身嘅」
「哦～唔怪得你咁大隻啦！」
「我唔係好大隻啫，我哋玩街頭健身嘅，通常都唔會好大隻」
我第一次聽「街頭健身」這個名詞，聽起來好像很有趣
但說時遲那時快，升降機已經到達地面了
我跟他一邊步出升降機，一邊繼續傾陌樂偈
「咩係街頭健身？你哋會喺街度做？」
「唔係～我哋喺室內做，因為最初係啲外國人，喺街度做健身」
「咁點先算係街頭健身？」
「我哋冇機，冇啞鈴，主要係用柱或繩去做」
他拿出手提電話，展示了一些「街頭健身」的相片給我看
他除了自己做健身，也是一位健身教練
他的拍檔就會開班教人，但他堅持只會單對單地教學生
「開班賺得多啲錢，但我覺得一對一先了解到學生嘅需要」
原來他跟朋友夾錢租這個地方前，曾在大機構做過健身教練
「喺大公司做，係咪有好多衰嘢？」
「我就係頂唔順，先自己出嚟做」
「有啲咩？反正你都冇做，可唔可以講嚟聽下？」
「可以～冇所謂～」
「會唔會困住啲客唔畀人走？迫人簽約？」
「咁又唔會困住嘅，啲人會用好多方法氹人簽
但唔係真心為學生好，做耐咗真係會冇晒罪惡感
我哋初出茅廬嗰陣，緊係想做個好教練
但喺一間跑數公司度做，心態就會慢慢改變
每日已經朝十晚十，嗰日唔夠數，就要留喺度唔准收工
到嗰陣邊個有數，咪邊個成為英雄囉」
「吓！冇數就困住你哋唔畀收工？」
「會兇你囉，但係唔會堅係拘留你囉，一路留到十二點咁囉」
「即係有數就做啲收工？」
「有數咪早啲收，冇數咪留喺度屌，留喺度屌，留喺度屌囉」
「咁最後點先走得？」
「跟住個師兄咪要打畀個舊客：
『陳太，我真係好慘呀！差十幾堂，你幫我搞掂佢啦！』
他模仿這番說話時，七情上面，看來他很適合當演員
他說：「哈哈，我係咪扮得好似呀？」
「哈哈～因為你真係做過丫麻～」
「跟住簽到張單，就成班喺度歡呼，我哋啲初出茅廬嘅
就會覺得，好彩個師兄簽到張單，先有得收工
個對錯論…唔會覺得人哋好慘囉～」
「但係個客，就唔見咗好多錢…」
「但係我哋，係用呢個方法生存喎…」
「咁係咪搵好多錢？」
「啱啱入行嗰啲都4萬幾蚊一毎月㗎，唔多人知呢樣嘢
管理層嗰啲9萬幾都有，有啲屈得勁嘅，搵10幾萬都有」
「即係睇下屈得勁唔勁㗎咋喎？」
「係㗎，屈得勁就搵得多，但好多都唔係想教好啲學生」
「佢哋最叻係氹人畀錢，而唔係教人做健身？」
「佢哋自己都唔識！」
「吓！？唔識都可以教人？」
「佢哋自己冇操開囉，個教練自己都冇操好難撻得著人」
我們走到了港鐵站，我先入閘，但他八達通不夠錢
他大聲叫我等一等，然後去了增值，我就站在閘內等他
這兩個十分鐘前才相遇的陌生人，仿佛變了朋友一樣
他增值完，入閘跟我繼續傾陌樂偈
「不過，到後尾嗰間嘢執笠嗰陣，我都冇話一沈百踩
我自己都係紅褲仔出身，但我覺得唔可以好似佢哋咁做
所以咪自己走咗出嚟，Sell返啲我想Sell嘅嘢，教返啲我想教嘅嘢
其實以前好慘㗎，同佢哋啲闗係唔可以好似屋企人咁
一次過有四十幾個學生，我邊記得咁多個
而家我得十幾個學生，但係…夠㗎喇～」
「你以前成日都要Sell啲自己唔想Sell嘅嘢？」
「有啲Plan根本就有問題，所以之前旺角嗰間xxx咪畀人告」
「嗰間係咪真係好有問題？我都有諗過簽」
「千祈唔好去啲大館，細館我覺得會好啲嘅」
「你返工嗰陣，會唔會覺得自己呃緊人錢？」
「我會，我每一日都覺得好辛苦」
「每日都覺得呃緊人錢？」
「個心成日都好唔舒服，之後唯有改變自己心態
覺得自己收得人哋咁多錢，就要交足返嘢畀人哋
問心無愧嘅單，對健身教練嚟講好珍貴㗎！我一生人得幾次」
「有次係個𡃁仔，嗰時佢搵緊8千蚊一個月
有人叫我開張萬幾蚊嘅單畀佢，最後我開咗2千幾
因為我幫佢度過，佢經濟能力只係容許咁多
嗰個人，由2010年跟我跟到而家，跟咗6年
佢初初做緊麵包學徒，到而家做緊大伙」
從語氣中聽得出，他真的當學生是屋企人一樣
「你見過最衰嘅教練，點樣Sell啲客？」
「最衰有一次呢，我想同你講，又係一個𡃁仔，本來搵我
個師兄走過嚟同我講：『呢個我幫你丫，簽完分返一半畀你』
我話：『哦，好呀』
過咗粒幾鐘之後，佢走嚟同我講：『搞掂！』
我問佢簽咗幾多錢，佢話六萬八！
我知道嗰個𡃁仔，重係讀緊書添㗎！邊有咁多錢丫？
原來佢夾咗個𡃁仔去搵大耳窿借錢呀！」
「吓！借大耳窿做健身？」我跟你一樣，十分驚訝
「我個心真係好唔舒服，我想教運動啫，人哋18歲咋！
我哋大人就有錢畀啫，人哋分分鐘大學都冇得讀㗎喎！
之後我同個師兄兩個人喺樓下食煙，我苦口婆心咁同佢講：
『嗰筆佣金可能對你嚟講，出去玩幾晚、叫次雞就冇咗
但筆錢對人哋嚟講好緊要㗎，可能人哋用嚟交學費㗎』
之後返到上去開會，佢當住所有人面前，指住我嚟屌」
「佢屌你啲咩？」
「都係嗰啲嘢啦～『而家邊個有數，邊個冇數呀？
而家邊個畀公司養呀？我養緊公司咋！屌你老母！』」
他扮演罵人時，再次七情上面，他真的很適合當演員
又或者是這些經歷，對他來說實在太刻骨銘心
在一個賺錢、跑數就是真理的世界，講良心的人會被視為不正常
「你當佢係朋友先私底下同佢講，佢竟然當眾鬧你，真係好恐怖
你而家自己教，就唔洗遇到呢啲問題啦呵？」
「之後出咗嚟做Freelance，搵嘅錢少咗好多
好努力慢慢儲錢，捱咗好耐先有自己嘅Studio㗎～
而家每一個學生，我都好畀心機教，每一蚊我都搵得好開心
我嘅滿足感係教識人哋點做，而唔係搵到幾多錢」
金錢，的確很容易為我們帶來快樂
但有些滿足感，不是金錢可以衡量的
有時候，有錢也可以活得很痛苦
窮，也可以活得很快樂
我快要到站了，雖然我們還傾得意猶未盡
「我落車喇，下次撞到你再傾啦！」
「好啦～下次收工睇下撞唔撞到～Bye Bye」
未必會撞到了，因為我只是今天，剛巧到那座工廠大廈工作
我們不知道對方名字，沒有交換電話，就此告別
我們都是陌路人，就這樣傾了一場街頭陌樂偈
2017-01-12
#363失去記憶的人•2017年2月17日 03:43:57
估唔到遇到個健身教練 背後有咁既故事
樓主加油 希望影響到更多人試下同陌生人傾計 總會有得著#hoho#
#364陌樂偈•2017年2月17日 06:11:13
/估唔到遇到個健身教練 背後有咁既故事
樓主加油 希望影響到更多人試下同陌生人傾計 總會有得著#hoho#/
多謝你～ #hoho#
其實之前成日都聽啲健身公司迫人簽約
所以一聽到佢做過健身教練，就知有好多嘢聽
#380陌樂偈•2017年2月18日 00:42:24
/日期係1月12 姐係樓主回憶中打出黎定係已經有好多篇係手？/
篇篇都係新鮮打出嚟～[sosad]
每次傾完我都會Mark低一大堆重點
因為上個月太忙，拖咗好多篇文未打
我而家重有幾十版「重點」，未打返做文章
所以我每日都好痛苦～亦都好努力咁追緊～
多謝大家支持！我會努力打快啲！#adore#
#382陌樂偈•2017年2月18日 00:47:54
《陌樂偈》第15天－不簽大台的香港小姐
今天，我遇上了有史以來最靚女的陌樂偈對象
她是一位香港小姐，也是一位新演員
出席完一個電影活動，離開時遇上了她
真抱歉，傾偈前我連她的名字也不知道
她也不知道我的名字，那就太好了
符合陌樂偈的原則，我們是陌生人
起初，一位演員朋友打算介紹我給她認識
我說：「唔洗介紹～佢唔識我就最好」
那位朋友也有看陌樂偈，馬上明白了我的意圖
朋友靜靜地行開了，留下我和她單獨傾偈
提提大家，我是一位害羞的男生
面對這位年輕貌美的女士，使我心跳加速，呼吸困難
但為了各位讀者，我只好冒生命危險跟這位靚女傾偈
「Hello… 我每日都會搵一位陌生人傾偈…
今日…可唔可以同你…傾下偈？」
她展露甜美的微笑，跟一位心臟快要停頓的男生說：
「好呀～咁我哋要傾啲咩㗎？」
「冇所謂㗎…傾乜都得…」
想不到她再下毒手，把嘴形成O形，再慢慢點頭
瀕臨死亡的害羞男生問：「點解…你想做演員嘅？」
「因為我偶像係張曼玉， 所以好想學佢做演員」
「咁你當初係點入行？」
「我知道張曼玉係選港姐入行，所以我都學佢選港姐」
「Oh~你選港姐…係入咗圍嘅？」
沒錯，我連她是香港小姐也不知道
「入咗圍，但我冇簽TVB，選完去咗外國讀Acting」
當我正想問她為甚麼不簽大台的時候
一輛私家車來了，原來有司機來接她
她上了私家車，身旁還有一個空位
她問我順不順路，要不要一起上車
這個情況下，我就算不順路，也要說順路了
於是，我上了私家車，坐在她旁邊，車子開出
或許是因為第一次在私家車上進行陌樂偈吧
我臉紅耳赤、血壓上升，心跳快得像震機一樣
當時，我生命受到威脅
我跟她說：「你睇下出面啲街燈，一條、兩條…」
然後，我就把她催眠了……
呀！對不起！
回想起那段經歷，使人太緊張
一不小心，就開始胡言亂語了
車子開出後，她跟我說了很多關於自己過去的事
例如讀過甚麼科，做過甚麼職業
為免各位猜到她是誰，所以不能一一在此透露
她參選港姐前，拍過一些短片作品，還拿過演員獎
但推動她參選港姐的動力，竟然是因為一首歌
她看了一套關於夢想的電影，十分喜歡它的主題曲
每天返工放工，她也會聽著那首關於夢想的主題曲
聽著聽著，就覺得自己還後生，應該要去試一試
仿效自己的偶像－張曼玉，參選香港小姐
一套好的電影、一首好的音樂，真的能改變人一生
參選後，雖然她沒有成為冠亞季軍，但頗有觀眾緣
大台已經準備了電視劇給她拍，看來打算捧紅她
可是，她沒有簽約
「如果簽，係咪要簽十幾年？」
「佢又唔會要你一簽，簽十幾年嘅～
佢會叫你簽7年先，簽咗之後如果你唔做
喺呢7年入面，你就唔可以喺香港做幕前
你可以做其他嘢，做保險、做餐廳
但唔可以做幕前，拍Youtube都唔得
大約第5年嗰時會叫你續約
你唔續呢？『唔好意思喇～呢兩年你冇得做戲喇～』
可能會叫你做兒童節目、做啲唔係黃金時段播嘅嘢」
「點解你唔簽TVB？」
「因為我覺得人生，應該要做咗自己最想做嘅嘢先
我之前已經錯過咗我好想做嘅嘢
我唔想再因為穩陣、穩定，而揀咗錯嘅路」
接下來，是最後一候問題
應該是你們最想知道的問題……
「小姐，你鍾唔鍾意食青椒㗎？」
開玩笑的！當然不是這條問題啦！
但接下來的問題，你們一定很想知道答案
只獎勵閱讀到這裏的讀者～
「選港姐有冇做馬？」
等等！我一直有個疑問，想做一個測試
明明我所認識的香港網民，最討厭閱讀文字
看到多過50字就會說”Too Long Didn’t Read”
為甚麼我每天打的過千字文章，會有過百人Like？
今天早上才放了「不想埋沒良心的健身教練」
不足一天已經有二百多人Like！到底怎麼一回事？
我決定用科學的實驗，來測試一下
「按Like的人到底有沒有看完整篇文章！」
看到這裏的你，請不要按Like／讚好
請按「笑哈哈」，謝謝！
繼續吧～
「選港姐有冇做馬？」
「決賽嗰晚，之前會有幾次彩排，咁會問問題啦
有啲人彩排嗰條問題，同正式嗰條係一模一樣嘅
有啲人嘅問題，係會完全唔一樣，從來未聽過嘅
我唔可以話佢哋做馬，可能係隨機嘅問題
我有份參賽，由我判斷佢公唔公平，係唔公平嘅」
她最後補充：
「都係嗰句，港姐只係一個娛樂性嘅節目
佢哋唔係想選一個 柯德莉夏萍
只係想大家有個Happy Night
所以我唔鍾意留喺嗰度嘅原因
係佢哋覺得自己做緊嘅，係娛樂事業
而我覺得電影，係藝術
好多人合力去創造嘅藝術」
香港人習慣把演員叫做Artist，中文則稱作「藝員」
其實Artist的真正意思是－藝術家
沒有簽長約，換來的是一年多不能在香港做幕前
於是她爭取時間，到外國進修演戲
現在，她成為了電影演員
傾了大約十五分鐘，到達目的地了
我坐完這程不順路的順風車，跟她一起下車
「我同陌生人傾完偈，會將對話內容打出嚟擺上網
我平時唔會出陌生人個名，但你想唔想我出你個名？」
她笑一笑「都係唔好出喇～」
「因為你透露咗好多黑幕？」
她突然醒覺：「你唔好講呀！你唔好講呀！」
「放心，我絕對保密嘅」
我們不知道對方名字(除非Google一下)
沒有交換電話(雖然我很想交換)
就此告別
我們都是演員，就這樣傾了一場陌樂偈
2017-01-13
#393陌樂偈•2017年2月19日 00:22:43
《陌樂偈》第16天－地下鐵的英國領事
地鐵車箱內，我鎖定了今天的目標
一位金髮的外藉男士，在車卡之間，靠在車箱站著
透過我的偵探頭腦，知道他來自英國，身分並不簡單
我可能會令自己，面臨陌樂偈有史以來最大的挑戰－
「要用英文和身分特殊的陌生人傾偈」
我怎樣知道他來自英國，身分並不簡單？
我站在他身旁，觀察了一會，進行了演繹法推理
從他的外貌特徵，金髮、藍眼睛，推測到他是歐洲人
他穿著整齊的西裝，戴著耳筒，用的都是英國牌子
他間中拿電話看一下電郵，看完就放回去，沒有回覆
這是英國人的文化，享受生活，下了班就不再工作
而且他嘴旁的鬍子上，有兩種明顯不同的啡色痕跡
由於年過三十的歐洲男人不會飲用柯華田和朱古力
可以推斷兩種啡色痕跡，分別是茶跡和咖啡跡
舊鬍子上痕跡比較淺色，新鬍子上痕跡比較深色
代表他曾經在英國居住，有每天飲茶的習慣
近年來了香港定居，才有了飲咖啡的習慣
至於為甚麼我推斷到他的身分並不簡單？
啊！差點說漏了！
目標身上，還有一個非常明顯的特徵！
他胸前掛著英國國旗圖案，和香港區旗圖案的扣針
回到正題吧～
我要對這位戴著耳筒的外國人出手了
戴著耳筒的人，感覺上需要私人空間，比較難下手
如果你很怕在街上遇到我，可以考慮戴上耳筒
昨天跟香港小姐傾完偈，現在我的勇氣值有120點
面對著戴著耳筒的目標，勇氣值會-30點
但由於目標是「鬼佬」，勇氣值又會+50點
結果，我帶著140點勇氣值作出攻擊
「Hello」怕他聽不見，我一邊在他面前揮手
他拿下了一邊耳筒，友善地說：「Yes?」
「May I chat with you?(我可唔可以同你傾偈?)」
「Okay!」攻擊成功！他馬上收起了耳筒
為方便各位閱讀，以下內容，我會把他的正統英語，
和我的港式英語，都翻譯成廣東話（除了某些句子）
「你而家去邊度？」
「油麻地，我有咩可以幫到你？」
「冇～我只係想每日都搵陌生人傾偈」
「Cool~點解你想咁樣做？」
接著，我努力地用英文，解釋我進行陌樂偈的原因
幸好他聽得明白我的港式英語，並表示很有意思
「你係咪住喺香港？」
「係，我住咗喺香港5年」
「你嚟自英國？」
「係呀，倫敦」
「我好鍾意英國，特別係倫敦！」
「Thank you~ 你有冇去過倫敦？」
「我有去過一次，係我最想住嘅地方！」
「你鍾意倫敦啲咩？」
「我好鍾意嗰度啲公園，好大又有湖，好舒服！
嗰度重有好多動物，我喺嗰度餵過……」
我一邊思考著「松鼠」的英文，一邊扮一隻松鼠
「Squirrel(松鼠)」我們一起說出來
他說「Yes～They are Awesome(係～佢哋係好正)」
我回想起在英國旅遊時，愉快難忘的日子
「我最鍾意St Jame’s Park(聖詹姆斯公園)
有好多松鼠，嗰度啲松鼠特別友善」
「我以前係嗰頭返工，Lunch我就會去公園坐」
「你鍾唔鍾意住喺香港？」
「鍾意，我好鍾意香港，好現代化，好繁忙」
「係咪好似倫敦？」
「似，不過香港就冇乜公園，周圍得大廈」
和這位英國人傾偈，感覺很不一樣
之前跟陌生人傾偈，人們通常都比較喜歡說自己的事
但他很喜歡反問我問題，真正地跟我討論、傾偈
他又主動地問我：「你做咩工作？」
「我係一個演員」
他問我參與過甚麼演出，我告訴了他
他好奇地問：「So you are Famous? (你好出名㗎？)」
「No~ No~ No~ HAHA~」我們一起笑了
到我問他：「你呢？你做咩工作㗎？」
他說了一個我聽不懂的英文生字
我只好叫他再說一次：「Sorry?」
說了兩次後，我還是聽不明白
他突然用廣東話說：「領事館」
我有點錯愕：「你識廣東話？」
「Little(少少)」
「所以，係英國派你嚟做…領事？」
「YES」
我感到十分幸運，竟然遇上了一位英國派來的領事
「做領事每日有咩工作？」
「主要係幫助啲喺香港居住，或者旅遊嘅英國人
例如佢哋唔見咗Passport，就會嚟搵我哋幫手」
「Cool! 你可以幫到好多自己國家嘅人」
這時候，傳來了我最不想聽到的聲音：
「下一站係－油麻地」
他差不多到站了，我很後悔自己沒有早一點出擊
但真榮幸可以和這位英國紳士傾偈
最後，我問他：「英國嘅人會唔會同陌生人傾？」
「睇地區，倫敦嘅人唔會，佢哋同香港人好似」
列車到站了，車門慢慢打開
「Thank you! Nice to meet you!」
「Nice to meet you too! 」
我們互相握手，沒有交換聯絡方法， 就此告別
我們都是陌路人，就這樣傾了一場英文陌樂偈
2017-01-14
等等！
差點忘了公佈昨天的實驗結果！
截至上一篇文章貼出後，約24小時
總共有：
666 個「笑哈哈」
159 個「讚好」
結論：
當你在Facebook，打了一篇過千字的文章
每666個按了讚好的人，約有159個沒有看你的文章
即每10個人，約有2.38人沒有看你的文章
結論2：
在Facebook進行科學實驗，能吸引更多人按表情
你知道嗎？
我今天起床嚇傻了！突然有4百多個「笑哈哈」
到晚上竟然有6百多個「笑哈哈」！瘋了嗎？
「笑哈哈」的比例，比我預期高很多呢！
衷心感謝每一位有份參與實驗的讀者！！
為了令科學實驗更準確，我們需要反覆進行測試
看到這裏的讀者，請不要按讚好／Like
請按「O咀」，謝謝！
—————————————————
另外，多謝每一位LIHKG巴絲嘅支持～#adore#
抱歉，LIHKG無法進行實驗
歡迎到Facebook參與科學實驗，謝謝！#hoho#
#397點解可以咁廢嘅•2017年2月19日 03:18:01
樓主，你習慣唔交換名但係如果陌生人問你叫乜名，你答唔答架？
#400陌樂偈•2017年2月19日 19:25:30
/樓主，你習慣唔交換名但係如果陌生人問你叫乜名，你答唔答架？/
試過答咗, 但冇問返佢個名[sosad]
#406陌樂偈•2017年2月21日 20:53:24
《陌樂偈》第18天－沒有希望的有牌小販
一位伯伯，在十字路口旁擺了輛小販車
賣著各式各樣的香港懷舊小食
有糖蔥餅、麥芽糖餅、叮叮糖、冰糖葫蘆等
跟第12天的小販不同，他看起來是有牌小販
答應過昨天的自己，今天要早點開口
但幾位客人在排隊買小食
我不能幫襯他（原因請看第12天陌樂偈）
所以又要排隊等傾偈了
等了幾分鐘，終於沒有客人
機會來了～運吉的陌生人！
「Hello~ 你成日喺度擺檔？」
「唔係㗎，我周圍擺」
「你係咪有小販牌㗎？」
「係呀～ 」
「有冇限喺邊度擺？」
「冇㗎，公地就擺得㗎喇」
「做咗幾多年呀？」
「好多年喇，個牌曾蔭權做嗰陣攞㗎」
「而家愈嚟愈少見呢啲懷舊小食喇
明明係香港特色黎，政府又唔再發牌
再係咁呢啲嘢就會消失㗎喇…」
「你哋啲讀過書，有學識嘅人，同政府講下啦」
「都要政府請肯聽先得㗎～」
這時候，兩個中學生來到小販車旁邊
他們一男一女，好奇地打量著冰糖葫蘆
女學生：「呢啲咩嚟㗎？」
男學生：「唔知喎」
老闆：「呢啲係冰糖葫蘆」
想不到現在的中學生，會不知道甚麼是冰糖葫蘆
最後他們手指指地買了糖蔥餅
老闆用心地製作給他們，十分熟手
待他們離開了，我便繼續跟老闆傾偈
「你點樣學識整糖蔥餅㗎？」
我期待著他說，跟師父學做糖蔥餅的艱苦過程
「批發攞返嚟咋麻，唔洗識㗎喎！
攞到返嚟咪自己學下點包囉，好簡單啫！」
「點解最初會開始擺檔？」
我期待著他說，「可以帶給人快樂」之類的說話
「點解開？攞到個牌咪開囉！」
「點解嗰陣會申請嘅？」
「冇嘢撈，見到有得申請咪申請囉！」
「你擺檔賣小食，覺得開唔開心？」
「冇話開唔開心，搵食啫， 都冇得揀
我咁嘅年紀，冇希望㗎喇～冇機會㗎喇～
唔做呢啲，做得啲咩啫？一係做看更，一係倒垃圾
我就冇本事發達喇，你哋讀過書嘅畀心機啦」
有時候，我們會覺得別人的工作很有意義
但那個人，可能只是為了生計
那位無牌小販，喜歡製作糕點，和客人建立感情
她很想得到一個小販牌照，擺檔不用再提心吊膽
這位有牌小販，可以光明正大，合法地隨處擺檔
卻享受這份工作，認為這是苦差，只是為了生計
我們習慣了的生活，可能是別人夢寐以求的
「伯伯，你後生嗰陣做邊行？ 」
「做廠……」他說了一些專有名詞，我聽不懂
他解釋：「即係大廈零件，之後啲廠搬晒去大陸」
「有冇諗過去大陸做」
「冇錢，冇得諗……」(原因跟第9天的陌生人一樣)
這番說話，我已經不是第一次聽
香港社會的轉型，令很多人的專業技能，失去了用處
「呢度邊樣嘢最好賣？」
「冇嘢好賣，而家都冇乜生意
啲人去M記，7仔，冇以前咁多人喺街買嘢食」
小販愈來愈少，市民便習慣了幫襯連鎖店
以前的商人可以選擇做小販，不用捱貴租
沒有了小販，商場的租金就可以不斷提高
或許這就是香港政府不再發小販牌的原因
我最後問他：「有冇遇過啲好特別嘅客？」
「有，買少少嘢，畀100蚊，特唔特別丫？
大陸人嚟嘅，100蚊對我嚟講天文數字嚟㗎喇」
「剩係試過一次？」
「重有一次係個後生仔，香港人嚟
買幾包嘢又畀100蚊我，不過我冇收到佢」
「因為見佢細個？」
「咁係唔應該收丫麻，叫佢留返自己用啦」
竟然有人，為了一個陌生人的著想
拒絕收取對自己來說，是天文數字的現金
「我行先喇，祝你好生意～」
「得閒再嚟傾下偈啦」
他竟然沒有怪我運吉，反而叫我再來跟他傾偈
看來這位有牌小販，也很喜歡跟陌生人傾陌樂偈
又或者是這份工作對他來說，真的太沉悶
我們互相微笑，不知道對方名字，就此告別
我們都是陌路人，就這樣傾了一場陌樂偈
———————————————————-
又是時候公佈實驗結果了！
《實驗結果》
截至上一篇文章貼出後約24小時
總共有：
586個「喊喊」
60 個「讚好」
合共 646人
結論：
當你在Facebook，出了一個POST
每646個按了讚好的人，約有60個沒有按「查看更多」
即每10個人，約有1.07人沒有按「查看更多」
「讚好」的比例大幅下降了
看來比較多人會按一下「查看更多」
但部分按了的人，沒有看完整篇過千字的文章
綜合3天的結果，得出的結論：
在Facebook，每10個按了「讚好」的人
大約1人沒有按「查看更多」／「Read More」
按了「查看更多」／「Read More」的9人當中
有1-3人沒有看完整篇過千字的文章
感謝各位參與科學研究！
———————————————————-
各位親愛的讀者：
今天，搵個陌生人傾偈吧！
大家都是陌路人，不仿傾場陌樂偈！
#418陌樂偈•2017年2月24日 15:24:22
《陌樂偈》第17天－黑口黑面的基督徒
我跟過精神病人、香港小姐、英國領事傾偈
各位讀者，可能覺得這些行為十分大膽
其實遇上特別的人，我反而比較容易開口
最難開口的，卻是看起來最普通的陌生人
關於這個現象，本人還未找到明確的答案
你好！
謝謝你按了「查看更多」／「See More」
你已被迫參與活體實驗！
以下是《實驗環節》
為了得到更準確的數據，今天提早進行科學實驗
來測試一下在Facebook按了讚好的人
有多少人沒有按「查看更多」／「See More」
看到這段文字的你
請不要按「讚好」／「Like」
請按不開心的「喊喊」表情，謝謝！
回到正題～
為甚麼看起來最普通的陌生人，反而最難開口呢？
可能因為特別的人，例如精神病人、小販、外國人
令人比較好奇，而且是寫文章的好題材
所以我不想錯過這場「看起來會很有意思的陌樂偈」
又或者是普通的人，突然遇到陌生人搵自己傾偈
會比較緊張和抗拒，令我失敗的機會增加
但我每次被人拒絕後，除了勇氣值會下降外
其實沒有甚麼感覺，不會覺得太難堪或尷尬
「鎖定目標」與「開口」之間那段時間，才是最難捱的
最近，我每天也在思考這個問題
明明我不怕失敗，到底在猶豫甚麼呢？
我也說不出原因，就是開不了口
今天，我就遇到了這個問題
在一輛長途巴士的上層，乘客不多
只有兩位獨自坐著的乘客
左方，有一位年過四十的女士
前方，有一位戴著耳筒年輕的女生
我當然選擇了年紀較大的女士作為目標
假如我有一個「最難開口的陌樂偈對象排行榜」
「年輕女生」一定在三甲之內
我坐在「目標」旁邊那排座位(中間隔著走廊)
目標坐在走廊位，我坐在窗邊
她一個人呆呆地坐著，是下手的好時機
機會來了～陌生人！
我鼓起勇氣，坐過去比較接近她的走廊位！
然後繼續保持沉默……
我也說不出原因，就是開不了口
我進入了每一場陌樂偈前必經的「猶豫時間」
如果陌樂偈是主菜，猶豫就是前菜
明明已經傾了半個月陌樂偈，還是會猶豫
面對這位普通的陌生人，還是開不了口
人類的心理真的很難捉摸
猶豫了十分鐘，我終於鼓起勇氣開口了
「你好，請問你喺邊度落車？」
她十分錯愕地回答：「做咩事呀？」
被她這樣一問，我的勇氣值馬上由80降至20
「冇…我想知架車係咪經xxx？」
「哦～係呀～」
「你知唔知入到去要幾耐到？」
「半個鐘左右掛，你未搭過呢架車㗎？」
「係呀，我唔係住呢頭。你係咪都係去xxx？」
「唔係呀，我就嚟落車喇」
「唔該晒你～」
直至她下了車，我也沒有再說過一句話
我餘下12點勇氣值
看著另一位目標－前方的年輕女生
她一個人戴著耳筒，坐在窗旁，看著外面
機會來了～陌生人！
我鼓起勇氣站起來！
然後坐回原位……
我思考著一個問題
巴士上層還有很多座位，如果我突然坐在她旁邊
還要是從後方走過來的，她一定會覺得我很奇怪
而且這樣做，就像困住了她，迫她跟我傾偈一樣
於是，我改變策略
站起來，坐到她前一排的座位
我在這個位置回頭，問她想不想傾偈
總好過突然坐在她身旁吧
我偷偷地觀察著坐在我後方的目標
她戴著耳筒，黑口黑面地看著窗外，看來心情不太好
看過她的表情後，我的勇氣值餘下8點
開口吧，最多只是被人拒絕，說句不好意思
被拒絕又沒有生命危險，不會受傷，不會痛
我們只是陌生人，之後不會再見面
到底有甚麼好害怕呢？
我深深吸一口氣！
把頭擰過去！
然後，馬上把頭擰回來……
我也說不出原因，就是開不了口
接下來的二十分鐘，我就這樣一直把頭擰來擰去
想著怎樣跟這位有著「林日曦表情」的陌生人開口
以往我的開場白都是「可唔可以同你傾下偈？」
我知道這是一條十分奇怪的問題
但我很想知道，陌生人聽到這條問題後會有甚麼反應
有多少陌生人，聽到這條問題後會答「可以」
根據我十幾天的統計
大約只有10%人會直接說「好」／「可以」
大約40%人會直接拒絕
通常會馬上說「唔方便」、「唔得閒」，甚至不說話
大約50%人會向我發問
通常會問「點解？」「做咩事？」
而這50%人當中，大約有一半人願意跟我傾偈
即是「可唔可以同你傾下偈？」這個開場白
成功率十分低
在我把頭擰前擰後的過程中，我想了一個新的開場白
在車程快要到達尾聲的時候，我終於擰轉頭，開了口
「Hello～唔好意思～」
她除下了耳筒
「我實行緊一個計劃，就係每日都搵一個陌生人傾偈
請問我今日可唔可以同你，傾下偈？」
她呆了
看來我可以想過一個新的開場白
她呆了幾秒，慢慢點頭說：「好…」
成功了！暫時這個新開場白的成功率是100%
「我可唔可以坐你隔離？」
她害羞地點頭
我站起來，坐到她旁邊
「你本身聽緊歌？你好鍾意聽歌？」
她微笑說：「係呀」
開始傾偈後，就不覺得她黑口黑面了，而且十分友善
真的不要以貌取人
我嘗試打開話題
「你聽開咩歌㗎？可唔可以介紹下？」
「我最鍾意嗰首歌叫Good Good Father
因為我係基督徒，呢首歌係關於天父嘅
所以我覺得呢首歌好好，好鍾意」
「Good Good Father，等我返去聽下先」
「你今日去邊度？」我問
「今日考完mock，而家返屋企」
「哦～你今年考DSE？咁你有冇信心呀？」
「都有嘅」
「有冇諗過入到大學讀咩？」
「想讀酒店旅遊」
「點解想讀呢科？」
「因為我鍾意同人傾偈」
「睇得出，因為你肯同我講野」
「哈哈～點解你會搵陌生人傾偈？」
我再一次說出了我進行陌樂偈的原因
不知道的讀者，請看第一篇陌樂偈
「你有冇試過同陌生人傾偈？」
「都有嘅，通常都係啲老人家，或者小朋友。」
「後生仔呢？」
「未試過」
「點解嘅？」
「後生仔，通常好難溝通。」
我大笑了
別忘記，她是一個後生女
「咁你咪覺得我好難溝通？」
「你呀？一般啦」
我又笑了
「咁我頭先無啦啦搵你傾偈，你覺得點？」
「我覺得你呢個idea好好呀！
我哋有時會同陌生人傳福音
但得我自己一個人，都唔敢同陌生人傾偈
香港好少人會咁做㗎，你要加油呀！」
「多謝你」
這一刻的心情，無法用文字去形容
我的勇氣值瞬間提升到200點
她到站了，比我先下車
我真的十分後悔，剛才猶豫了接近半小時
明天，無論遇到甚麼人，一定要更早開口！
我站起來，換了個位置，方便她下車
「希望你有一日都可以同陌生人傾偈」
「我都希望自己可以好似你咁勇敢」
「多謝你同我傾偈，Bye Bye」
「Bye Bye」
我拿出電話，在Youtube搜尋「Good Good Father」
聽著陌生人介紹的歌，坐完餘下的車程
不知道對方名字，沒有交換電話， 兩個人就此告別
我們都是陌路人，就這樣傾了一場陌樂偈
2017-01-15
等等！
差點又忘記了公佈實驗結果！
《實驗結果》
截至上一篇文章貼出後約24小時
總共有：
639個「O咀」
225 個「讚好」
合共 864 人
結論：
當你在Facebook，打了一篇過千字的文章
每864個按了讚好的人，約有225個沒有看完你的文章
即每10個人，約有3.84人沒有看完你的文章
上一篇的表情又增加了！
我今天起床時又嚇呆了！
看來科學實驗，真的能吸引更多人按表情！
今天記得按「喊喊」啊！
(LIHKG嘅巴絲，如想參與實驗，請到Facebook)
謝謝支持科學研究！
#424神鳥鳳凰•2017年2月25日 11:35:49
/同老人家傾計都幾多野傾#good#
下次搵下老人家開始入手先#yup#/
我之前去做義工 係屋邨樓下搞活動有機會對住啲婆婆 我問一問佢地啲野 關心下 一傾就會傾好耐[sosad][sosad] 其實有啲婆婆真係好好人 佢地又會真心分享比你知
但遇過某啲真係廢老 又貪小便宜 所以傾之前都要觀察下 小心遇廢老
#430馬騮仔唔會上船•2017年3月1日 00:40:36
睇左11日 支持巴打#good#
記得好似幾個月前 有次入到旺角一間服裝店
有個老婆婆問我邊件好睇
個陣係夜晚冇咩嘢做
我就陪佢揀左好耐
同佢傾傾下計發現佢係買比一個幫佢打掃屋企嘅女仔 廿幾歲
佢成日買嘢比佢
佢有仔女 但應該都好少陪佢
我同佢傾計佢好開心
又陪佢行左陣 之後送佢搭車
佢話不如留個電話 之後一齊出嚟飲下茶傾下計
結果我都係拒絕左
睇得出婆婆好寂莫 好想有人陪下佢
同佢一陣行左陣都感覺到佢成日係個頭行
有啲店員都認得佢
佢對啲店員好熱情 但啲店員就好冷漠
可能好多老人家都等緊人可以關心下佢
可以陪佢傾下計
我同佢都好唔捨得對方
但我又擔心自己回應唔同佢嘅期望
唔得閒唔可以成日陪佢飲茶
回憶總係美好嘅 就等佢對我嘅印象等留係個一日啦
#431陌樂偈•2017年3月2日 23:05:23
《陌樂偈》第19天－高樓大廈外攀爬的浪子
「望入去人哋屋企，有冇見過啲咩特別野？」
「我見過…有人喺屋企祼體」
「男仔定女仔呀？」「男女都見過」
「嘩！咁啲女仔見到你，有咩反應呀？」
今天，我遇上了有史以來最好傾的陌生人
子夜時分，我在街上搵陌生人傾陌樂偈
傾完偈，我便要趕回辦公室通宵工作了
街上人煙稀少，只有幾位單獨享受著尼古丁的人
我知道吸煙的人，很喜歡在吸煙時跟別人傾偈
如果你是煙民，可以嘗試在吸煙時跟陌生人傾偈
應該算是「陌樂偈」的入門
不過，我還是建議你不要吸煙
特別是不要在街上，一邊行一邊吸煙
我不會對吸煙中的人出手，因為我不想吸二手煙
如果你在街上遇到我，馬上吸煙保證能逃過一劫
那就名符其實「用生命值硬接」了
最後，我在一個水池旁邊
找到了一位獨個兒坐在池邊，吃著飯盒的男人
這位陌生人看起來大約30歲，擁有運動型的身軀
他沒有低頭看電話，只是專心地吃著飯盒
機會來了～陌生人！
我猶豫了幾分鐘（已經算快了），便過去坐在他旁邊
然後，再猶豫了幾分鐘，終於向他開口了
「Hello～你好呀」
他十分友善地回應：「Hello」
「我可唔可以同你傾吓偈呀？」
他爽快地回答：「哦～好呀，冇所謂～」
大約只有十分之一人，會對這條問題直接答「好」
「咁夜嘅？你啱啱收工？」
「唔係呀，啱啱同啲朋友去飲完野」
「你淨係飲完嘢，未食飯？ 」
他一邊吃飯一邊發出「嗯」的聲音
「點解你唔攞返屋企食嘅？」
他爬完一啖飯再回答我
「我覺得呢度幾舒服呀，可能我比較鍾意戶外」
「你住呢頭嘅？」
「係呀～你呢？」
「我喺附近做嘢，同你傾完偈就要返去通頂」
「哦～」
「因為我有個計劃呢，就係每日都搵一位陌生人傾偈
我覺得而家啲人，成日淨係望住個電話，唔會理身邊嘅人
所以我就開始做呢樣嘢，希望多啲人可以留意吓身邊嘅人
咁我今日就未搵到，見你食緊飯，所以就過黎打擾你」
「哦，唔會」
他一邊吃飯，一邊點頭
非常留心地聽著我的說話，是一個很好的聆聽者
「不過我見你食飯，都冇望住個電話
通常啲人自己一個人食飯，就會不停睇電話
點解你冇用電話嘅？你電話冇電？」
「唔係呀，我平時都會用電話
唔知點解呢，咁啱今日冇用」
「你做邊行㗎？」
「我而家做倉」
「會唔會好辛苦？係咪要搬貨？」
「唔會， 我係負責管理個倉，唔洗點搬
比如有人黎拎貨，就幫佢地登記，睇住佢哋搬」
「做咗幾耐？」
「做咗一兩個月，之前唔係做呢行」
「咁你之前返咩工？」
「可以話係抹窗，喺高樓大廈外牆做，我哋吊條繩落嚟」
「哦～成日見到喺大廈出面嗰啲人，呢個職業叫咩呢？」
「中文我唔知呢…」
「大廈外牆清潔員？可唔可以咁講呢？」
「都可以咁講啦，我喺澳洲做嘅」
「Oh～你之前喺澳洲度做嘢嘅」
「英文我哋叫做Rope Access Technician(繩索技術員)
因為我哋要係高樓大廈工作，要熟識用繩索嘅技巧
我哋唔係淨係做清潔，例如建築、安裝、油漆嗰啲
總之我哋負責做喺大廈外圍嘅工作」
「好似好危險咁，你驚唔驚？」
「初初開始有啲驚嘅，不過我玩開攀石，好快適應到」
「你攀石係喺大自然攀？所以你都大膽嘅？」
「係呀」
「我見香港果啲，有時乜都唔綁，好癲㗎喎！」
他含著飯點頭說：「嗯！係呀係呀！」
「你有冇試過？」
「有諗過下嘅，有時覺得出一出去好快，小心啲就冇事
但係如果俾同事見到呢，會好大件事囉，真係一定炒魷魚
所以我哋唔會咁做」
「你咁講，即係比起生命危險，你更加擔心俾人炒魷魚」
「生命危險都注重嘅，但因為我攀開石呢～
有啲位置知道係安全嘅，你唔鬆手就唔會跌落去」
「咁攀石呢？會唔會冒險啲？」
「會冒險啲，但係都安全嘅」
「你去澳洲係去working holiday？」
「唔係，我喺嗰度生活咗好多年，細個就移民咗過去」
「咁你今次返黎係…？」
「想返黎試下做香港人」
「特登返嚟試下做香港人？」
「咁始終係香港出世，想了解多啲香港」
「咁你鐘意香港定澳洲多啲？」
他思考了一會，把最後兩啖飯吃完，然後說：
「um… 澳洲囉，生活冇咁忙，同埋冇咁迫
不過香港都有樣好，因為地方細，容易識到多啲人
例如係我玩攀石，澳洲好多攀石場，通常去到得我一個
但香港好少攀石場，攀石果啲人都會聚集晒喺果度
就識到好多同我一樣，鍾意玩呢啲偏門運動嘅人」
「你識唔識睇中文？」
「識，我10歲先移民過去」
「咁你平時用中文定英文諗野？
我好想知，熟悉兩種語言嘅人會點樣諗嘢」
「Um… 兩樣都有，睇情況啦～」
「咁一瞓醒嗰陣呢？」
「英文」
我拿出電話，給他看《陌樂偈》的專頁
「我開咗個Facebook Page叫《陌樂偈》
會將我每日同陌生人傾偈嘅內容打上去
到時你可以睇返我哋今日嘅對話」
他看了一看我的電話「哦～好呀」
「喺澳洲嘅人，係咪會同陌生人傾偈？」
「係呀， 可能因為澳洲地方大，比較少見到人
所以難得見到人就會傾下偈，例如等車嗰陣」
「咁你返到嚟香港有冇試過？」
「冇，香港人比較冷漠，之前啱啱返到嚟香港，唔識路
想搵人問路，我行埋去啲人度，未開口啲人已經彈開晒」
如果是「鬼佬」搵人問路，一定很多香港人樂意相助
遇到跟自己同一種族的陌生人，香港人反而比較抗拒
「你喺澳洲抺窗嗰陣，係咪會望到人哋屋企？」
「係㗎，通常都見到晒」
「望入去人哋屋企，有冇見過啲咩特別野？」
「我見過…有人喺屋企祼體」
「男仔定女仔呀？」
「男女都見過」
「嘩！咁啲女仔見到你，有咩反應呀？」
「佢哋冇乜嘢，重會同我Say Hello」
「吓？」
「澳洲有啲人係鍾意祼體嘅，我哋叫Nudist」
「佢哋鍾意喺屋企祼體？定會喺公眾地方裸體？」
「Nudist意思係一啲鐘意裸體嘅人
即係如果佢哋可以喺公眾地方裸體……」
我接著說：「佢哋都會咁做，但係法律唔畀」
「係喇～所以我有時經過會見到
有啲人喺屋企唔著衫周圍走」
「咁你見到有女仔祼體…有咩感覺呢？」
「冇呀，睇到咪算囉…哈哈哈…」
我笑著問他：「睇下係咪靚女啦呵？」
「有陣時係㗎，不過係少數囉…」
「靚女咪望多兩眼囉，醜樣就繼續做嘢啦呵？」
「哈哈～係喇係喇～」我們一起大笑了
如果你是男生，會想像到我們這段對話的氣氛
他繼續說：「其實好多都係上咗年紀，我唔知點解呀下」
「上咗年紀… 咁我諗你都唔係好想見到呢啲人」
「咁我又冇所謂，我之前係醫院做過，咩都見慣晒」
「吓？你又喺醫院做過？你係醫生？」
「唔係，我負責幫癌症病人做放射治療」
「點解你會做咁多唔同嘅工？」
「我鍾意試新嘢，可能比較貪玩啦
過幾年我就會轉下環境，學下新嘢
如果你要我成世都專心做一樣嘢，我覺得有少少難」
「我都覺得咁樣係好嘅，一世人係得咁長
要試多啲唔同嘅嘢，未試過又唔知自己鍾意做咩呢」
「不過有啲人好細個，就搵到自己想做嘅工作
然後向自己嘅方向發展，有時我都覺得佢哋咁樣好好嘅」
「咁你算唔算係未搵到自己鍾意做嘅嘢？」
「都算係嘅，不過有時我會覺得…
我旅行緊，周圍走嗰陣… 我覺得咁樣係最適合我嘅」
他是一個熱愛攀石的浪子，旅遊到哪裡，就在哪裡攀石
他說特別的經歷，是在尼泊爾，攀上喜瑪拉亞山
「有冇諗過將旅遊，變成你嘅工作？」
「有諗過嘅，但我有好多朋友都係做呢個行業
佢哋都話：『你為自己旅行，同為工作旅行係唔同嘅
變咗做工作嘅話，有自己時間，就唔會想做返同一樣嘢』」
當興趣變成了工作，總是會失去了興趣
接下來，是《讀者發問環節》(歡迎提供新問題)
「有讀者叫我問下陌生人一啲問題，你睇下想唔想答」
「好呀～」
「你咁耐以嚟最開心嘅係咩事？」
他認真地思考了兩分鐘，然後說：
「幾年前，我去老撾攀石，同女朋友一齊去
嗰度有個營地，有好多座山嘅，你有冇睇過龍珠？」
「有睇」
「佢畫嗰啲山，咪一個、一個咁嘅，嗰度就係咁樣
望落去幾百個、幾千個咁，但塊地就平嘅，真係好得意
有一條好高難度嘅攀石嘅路線，我哋爬咗好耐
爬咗好多次都上唔到去，我哋喺嗰度住咗一個月
每日都去爬，到最後我同女朋友一齊爬到上去」
「一齊爬？」
「即係我爬一段，之後再拉佢上去
我爬一段，佢又爬一段、我爬一段，佢又爬一段
然後完成到呢條路線，嗰陣就覺得係一件好開心嘅事
同自己鍾意嘅人，一齊做一啲自己真係好鍾意嘅嘢
之後完成咗一個自己Work Very Hard……
用咗好多努力落去做嘅嘢」
他憶述這段經歷時，眼有淚光，顯得十分感觸
看來十分懷念那段人生中最快樂的時光
後來，我才知道真正的原因
「你咁耐以嚟最唔開心嘅係咩事？」
看他的表情，好像馬上就有了答案
令人傷心的事，總比快樂的事刻骨銘心
他說出以下這段經歷時，不時停頓
我一句話也沒有說過，留心地聽著他的過去
我不會刻意用文字，來描述他的表情和語氣
相信各位讀者單靠內容，就能體會他的心情
「以前喺醫院做耐咗，見過好多人死
知道會幫到有啲人，但係有啲人係幫唔到
我有個好好嘅朋友，係佢教我攀石既
有次我地成班朋友去飲酒，嗰陣後生唔識死
有個遊戲，係飲醉酒爬上一個建築物
佢本身爬山好叻嘅，但係佢飲醉酒丫麻
爬到2,3樓，叉錯腳跌左落黎，跌斷咗一隻腳
腳入面有好多細骨，佢差唔多全部爆開咗，哈哈
叫做xxxx (醫學術語)，好難醫嘅，但最尾都醫好咗
但係過咗幾年之後，佢嗰隻腳有癌症
以我既醫學知識，知道斷腳係唔會引起癌症
但呢個巧合真係…太過巧合
最後佢過咗身…
佢病嗰陣…我唔知…
唔知點面對呢個問題…
而家覺得…我可能做唔夠自己嘅本分去幫佢」
「你朋友係咪去你嗰間醫院？」
「係…」
「係咪你幫佢做放射治療？」
「我啲同事幫佢，我自己就…冇幫佢做」
「係冇安排你做？還是…你唔想做？」
「兩樣都係…不過通常都唔會揀身邊嘅人做
唔知呢…後尾就覺得…自己冇盡到力去幫佢…」
之後，我們沈默了一段時間
我不知道應該說些甚麼，只好轉一下話題
「有一條問題呢，係我自己想問嘅
我想試下叫陌生人講一個秘密畀我聽
反正我們都唔識對方，之後又唔會再見
你有冇秘密係未講過畀人聽？」
他眼定定望著我幾秒，我已心知不妙
他問：「不如你講先？」
我大笑了，對他說：「我都Feel到你會咁講」
突然覺得自己很不負責任，只想聽別人的秘密
卻從來沒想過，自己有甚麼秘密可以告訴別人
我想了一會，把自己的一個秘密告訴了他
然後，他也把一個沒有人知道的秘密告訴了我
兩個陌生人，就這樣互相交換了秘密
至於秘密是甚麼？
這是一個秘密呀！
我不能告訴你，因為這是我和他之間的秘密
如果你也想知道別人的秘密，去搵一位陌生人交換吧！
「同你一齊攀石嗰個女仔，有冇同你嚟香港？」
「冇，我哋分左手，佢喺澳洲
之前我成日一個人去旅行，忽略左佢
返到澳洲我地嘅關係就變左，佢對我冇晒感覺」
「係佢話要分手？」
「唔係，係我講嘅，其實我都Feel到佢想分手
只係佢一直都唔講出黎，想等我講 」
「你而家重愛唔愛佢？」
「…愛」
「既然你成世人最開心嘅事，係同佢一齊經歷嘅
你返到去應該同佢講清楚，佢真係唔愛你就冇法啦
但我地永遠唔知啲女人諗乜，如果係你誤會左，咪好唔抵？」
「…其實我打算留喺香港幾年，到時返澳洲先算啦」
不經不覺已經傾了一小時，是我有史以來最長的陌樂偈
這一小時，好像經歷了他的人生
他明天早上還要上班，我今晚還要趕工
這兩個陌生人差不多要分別了
他問：「有冇聽過Couchsurfin(沙發衝浪)?
即係去旅行嗰陣，去一個外國陌生人嘅屋企住
我今日去飲嘢，就係去Couchsurfing嘅活動
全部人都係陌生人，第一次見，我下次可以帶你去」
那時，我不打算跟陌生人建立朋友關係
所以婉拒了他，我說會上網了解一下
打這篇文章時，我開始掛念這位陌生人了
有點後悔，沒有跟他交換電話
也許因為萍水相逢，才令這段對話特別深刻
最後，我問了他一個非常重要的問題：
「你記唔記得我個Page叫咩名？」
「叫陌咩咩？唔係好記得」
「唔記得就好喇！咁就冇人會爆我秘密」
「哈哈，冇所謂」
「希望你搵到自己鍾意做嘅嘢」
「你都係」
感謝這位到處攀爬的浪子，告訴了我屬於他的故事
不知道對方名字，沒有交換電話，兩個人就此告別
我們都是陌路人，就這樣傾了一場陌樂偈
2016-01-17
#435陌樂偈•2017年3月2日 23:15:15
/睇左11日 支持巴打#good#
記得好似幾個月前 有次入到旺角一間服裝店
有個老婆婆問我邊件好睇
個陣係夜晚冇咩嘢做
我就陪佢揀左好耐……/
你好好人呀～肯陪咗嗰位婆婆咁耐 #good#
我明白你唔想留電話嘅心情 🙁
可能都係一件好事，如果你留咗
之後唔得閒陪佢，可能佢更加失望
希望其他人都可以同你一樣，肯花少少時間關心下身邊嘅人
有時我哋做咗啲睇落微不足道嘅嘢，對其他人嚟講可能好重要
你介唔介意我將你呢段經歷放，放喺Facebook度畀多啲人睇？
多謝支持 #hoho#
#452陌樂偈•2017年3月12日 14:58:15
各位巴打，唔好意思呀！
我一直都想貼返啲文喺度
但貼LIHKG比較多步驟
要重新up圖，同埋會限字數
係我懶，諗住遲啲先一次過貼返
遲啲、遲啲、結果拖咗咁耐……
我會盡快貼返晒喺呢度
對唔住#adore#
#454陌樂偈•2017年3月12日 15:02:28
/同埋岩岩睇fb page
先見到你接受訪問自爆左[sosad]/
/係[sosad] 估唔到會出真名同相:O
岩岩仲係fb開Live[sosad]/
其實我都好驚 [sosad]
考慮咗好耐，最後俾一位陌生人作家影響到我
多謝各位LIHKG巴打一路以黎嘅支持！#adore#
你哋嘅每一個留言小弟都有睇晒～:~(
#455陌樂偈•2017年3月12日 15:12:38
首先，跟各位巴打講句－對唔住！
我犯了彌天大罪……
我有女朋友……
我曾經都係一個毒撚……
祝各位毒巴早日搵到女朋友，毒絲早日搵到男朋友
讓各位巴打久等了，馬上去文～
《陌樂偈》第20天－我在日本獻出了第一次
今天，我面臨了陌樂偈有史以來最大的挑戰！
「我要跟女朋友去日本旅行 」
對我來說，跟陌生人傾偈是十分重要的事情
但比起陌生人，身邊的人更加重要
總不能在旅途中掉下女朋友，自己搵陌生人傾偈吧
雖然她是我最忠實的讀者，每篇文章最少看過5次
但她跟大部分香港人一樣，十分害怕跟陌生人接觸
早上，我們一起乘搭機場巴士，前往赤鱲角
我問她：「我哋試下一齊搵日本人傾偈好冇？」
她斬釘截鐵地說：「唔好」
她不想參與，那我在她附近跟陌生人傾偈就行了吧？
錯了，事情沒有這樣簡單
在飛機上，應該是我完成任務的最好時機
這個時間從香港出發的，大多數是香港人
飛往日本要數小時，可以跟鄰坐的乘客慢慢傾偈吧
一上到機，我就知道這個計劃徹底玩完了
女朋友坐在我右邊的窗口位，我坐在中間
在我左邊的唯一目標…
是一位年輕的女生
可以安心睡覺了
到了日本機場，我嘗試在她附近搵陌生人傾偈
去過日本的朋友也知道，日本人不太擅長英文
就算我有膽搵陌生的日本人傾偈，我們怎樣溝通呢？
難道要用肢體語言來進行陌樂偈嗎？
幸好，我看到了一位金髮的外國人，看來懂得英文
機會來了～陌生人！
由於害怕走失，女朋友坐在附近的椅子看著我
我站起來，走向目標！
然後走回頭…
我猶豫了…
不能浪費時間，讓女朋友等太久
我鼓起勇氣，再走向目標！
你猜對了
我又再走回頭，還是開不了口
在熟人面前，好像更難開口
我躊躇地來回走了兩三趟後
由於時間關係，我放棄了
女朋友說：「不如你唔好喺我面前搵陌生人傾偈」
「點解呀？」我摸不著頭腦，明明她不用參與
「見到你猶豫嗰個樣，會尷尬到我好想搵窿捐」
我哭笑不得地問她：「好似睇「關家姐」咁？」
「重衰過睇「關家姐」呀！嗰條片我都睇得晒」
「咁你唔好望住我，或者我喺你後面搵人傾偈」
「唔得， 你唔見咗咁點算？」
「咁你想唔想我喺日本搵陌生人傾偈？」
「想」
「我又唔可以畀你見到，你又唔可以見我唔到，咁點做到？」
「你自己諗辦法」
這個旅程中，我要想辦法找到…
在她「視線範圍內」與「視線範圍外」之間的神秘領域
然後在那個空間，搵一位陌生人傾偈
我們到達了東京，入住淺草的民宿
上一次來日本時，上網做了很多資料搜集
根據網上的食評，去尋找好吃的餐廳
結果，中了很多伏
今次，我們問了民宿的主人，哪裏有好吃的刺身
到埗後，去她介紹的壽司店吃晚餐，結果非常好吃！
所以去外國旅行，千萬不要相信網上的食評
要找當地好吃的餐廳，還是問當地人比較好
要知道香港哪裏有好吃的乾炒牛河、菠蘿油
當然是香港人最清楚
壽司店內，我嘗試跟店員傾偈
一位大約三十歲的女店員，負責招呼我們
雖然我是她的客人，對我來說不算陌樂偈
就當是練習一下跟日本人傾偈吧
可是，我發現實在太困難了
我不懂日文，他們不懂英文
不要說傾偈，連點餐也有困難
這裏的餐牌沒有圖畫，當我煩惱着怎樣點餐時
發現了他們的茶杯上，有不同食物的圖案
我說：「樹伊孖些～」
我在店員面前拿起茶杯，指向想吃的食物
店員笑了，並做出OK的手勢
接下來每一次點餐，也用同樣的方法
我很想跟店員傾計，但我實在沒有勇氣
我們言語不通，勉強跟她傾計一定非常尷尬
這裏的刺身真的很新鮮，是我吃過最好吃的
結帳時，我鼓起勇氣跟店員說：
「呆伊斯！（好味道）」
她微笑，用日文說謝謝
我再豎起一隻手指說：「No.1 Sushi in Japan!」
她聽到後非常開心，馬上跟我身後的壽司師傅說：
「No.1 Sushi! No.1 Sushi!」
壽司師傅露出非常感動的神情，向我鞠躬說：
「ありがとうございました！」（非常感謝）
我也豎起拇指跟他說：「阿呢吉多哥渣伊孖士」
他的嘴唇呈現一道漂亮的弧線，不停向我鞠躬
這句簡單的「No.1 Sushi」，可能夠他開心一整晚
吃完晚餐後，我們便回到民宿休息
結果，今天還是沒有跟陌生人傾偈
「我每日迫自己搵一位陌生人傾偈」的計劃
因為這趟旅行，第一次失敗了！
放心～雖然我在日本獻出了第一次…失敗
但我不會就這樣放棄！
明天我會繼續努力，尋找那個神秘領域
我們都是陌生人，不仿傾場陌樂偈
2017-01-18
作多孖爹！（等等）
很多讀者說十分期待做實驗
好吧～
《科學實驗》
看到這裡的讀者，請不要按讚好／Like
按一個你認為最適合這篇文章的表情
然後留言，說一下你的感受吧，謝謝！
想參與實驗的巴打，請到Facebook, 謝謝！
#463陌樂偈•2017年3月14日 21:47:49
《陌樂偈》第21天－韓國人 VS 台灣人
在日本旅行的第二天，到了一間天婦羅店
左方，有一枱用國語交談的年輕人，像台灣遊客
右方，有一對用韓文交談的情侶，在苦惱地傾偈
女朋友學過一點韓文，每次遇到韓國人
我也會細細聲問她：「你聽唔聽得明佢哋講咩？」
這次，她輕聲地告訴我：「佢哋話好想食泡菜…」
我們忍不住笑了出來
當香港人提到韓國人，就會想起泡菜
但想不到韓國人，真的這麼熱愛泡菜
不過很多華人到了沒白飯吃的地方，也會說很想吃白飯
上次去大阪時，我們已光顧過這間連鎖店，一試難忘
這次再來，為了再加吃一次「大大隻的蝦天婦羅」
我們只想單點「大蝦天婦羅」
但餐牌上，都是各式各樣的丼飯和套餐
點菜時，我指著一碗「大蝦天婦羅飯」上的大蝦
「Only This, Two!」我豎起兩隻手指
看那位年輕女店員的表情，明顯完全聽不明白
她用手比著餐牌上那碗「大蝦天婦羅飯」
再這樣下去，她會送來兩碗「大蝦天婦羅飯」
我指著大蝦再說：「Only EBI（海老的日文，即蝦）」
她還是聽不明白，看來她不懂「Only」這個英文
然後，我拿出電話，輸入了「大海老x2」
她點頭，做出OK的手勢，看來明白了
等餐時， 我還是很擔心，她會送錯了食物
結果， 沒有令我失望
她真的送錯了食物……
她送來了兩隻小的蝦天婦羅
我遇上了有史以來最困難的點餐狀況
連簡單點餐也溝通不到，我要怎樣告訴她：
「送錯了，我要的是大蝦天婦羅，這是小蝦天婦羅」
我跟她說：「Big EBI」
我不斷用兩隻手，做一個「大一點」的手勢
她還是聽不明白
女朋友對我說，不如算了吧
但我們千里迢迢來這裡吃大蝦天婦羅，怎能輕易放棄呢？
我拿出電話，在Google翻譯輸入「大的蝦天婦羅」
出現了「大エビの天ぷら」，然後給她看
她不斷指着枱上的蝦天婦羅，像是「這就是了」的意思
但我們上次吃過的大蝦天婦羅，大小是這隻小蝦的3倍
我看一看收據，是小蝦天婦羅的價錢
我在電話輸入了大蝦天婦羅的價錢，和收據一起給她看
希望她明白 「我想要貴一點那種」的意思
那位店員不知所措，顯得十分緊張
這時候，救星出現了
坐在旁邊的其中一位台灣人，看見我們遇上困難
過來出手相助，他開口跟店員說了幾句日文
然後問我們：「What Can I Help You?」
聽到他說英文，我就安心了
因為我的國語，可能跟日本人的英語一樣差
我說了Thank You，然後用英文告訴他，我們遇到的情況
這位台灣人馬上明白了，然後向店員說了一些日文
這位陌生人，突然成為了我們之間的翻譯
我突然有點奇怪的感覺，但又說不出原因
他用英文說：「佢話呢隻就係」
我用英文說：「呢隻係細嘅，而且價錢都唔啱」
他再一次幫我們翻譯
他再用英文說：「佢係都話，呢隻就係」
店員的樣子非常緊張，看來似是落錯了單，怕被人罵
我用英文對台灣人說：
「唔該你幫我問下佢係咪落錯咗單
如果錯咗唔緊要，呢兩隻我哋可以照要
幫我哋落多兩隻大蝦天婦羅」
台灣人跟日本店員溝通了良久後，說了聲「樹伊孖些」
我突然有點奇怪的感覺，但又說不出原因
台灣人告訴我們，店員堅持說這就是大蝦天婦羅
他說：「I am Sorry~」
我說：「Never Mind! Thank You!」
他問：「Where do you come from? (你們從哪裡來？)」
我回答：「Hong Kong」
他聽到後，張開嘴巴，抬頭看着天花板
然後發出了一下熟悉的聲音：「哎吔～」
他苦笑著說：「早啲講丫麻～」
我們呆了一下，然後大笑了
我知道奇怪的感覺來自哪裏了
他一直跟我們一樣說著港式英語
而且說「樹伊孖些」的發音跟我們很相似
因為他是香港人
我說：「我以為你係台灣人呀～」
他說：「我以為你哋係韓國人呀～」
他在日本留學，同枱的同學全都是台灣人
只有他是香港人，所以他們一直說著國語
他的同學知道後也大笑了
我問：「你頭先聽唔到我哋講廣東話咩？」
「我聽唔到呀～你哋講嘢好細聲」
「重等我頭先，好努力咁用英文同你講嘢」
「我都係呀！」
我們一起笑了
很想跟他傾耐一點，但我們趕著坐下一班火車
把小蝦天婦羅吃完，就跟這位陌生人說再見了
「韓國人」和「台灣人」互相微笑，就此告別
我們都是陌路人，就這樣傾了一場陌樂偈
2017-01-19
——————————————————
上一篇文章，真的有很多讀者留言啊！
謝謝支持科學實驗！
為了得到準確的數據，做多一次相同的實驗吧～
實驗結果，會在之後一次過公佈
《科學實驗》
看到這裡的讀者，請不要按讚好／Like
按一個你認為最適合這篇文章的表情
然後留言，說一下你的感受吧，謝謝！
#465陌樂偈•2017年3月19日 19:01:53
《陌樂偈》第22天－神秘領域內的串燒店
在日本旅行的第三天，我們還住在東京淺草
今天早上，女朋友還在化妝，我負責出外買早餐
踏出門口的瞬間，我發現自己突破了神秘領域
(如不知道甚麼是神秘領域，請看第20天)
這不就是單獨揾陌生人傾偈的大好機會嗎？
我走到街上，尋找着目標
因為是上班時間，街上的日本人都十分匆忙
站在街上五分鐘，也沒有看到比較空閒的人
天氣十分寒冷，我走進便利店選購早餐
在店內，遇到了一位同樣在買早餐的上班族
機會來了～陌生人！
我猶豫著要不要跟他說「哦哈喲」
說完後，他一定會用日文問我「甚麼事？」
然後我應該怎樣回答他呢？
我說英文他一定聽不懂，日文我又一句也不會
想像到打招呼後會遇到的可怕情況，我放棄了
「反正前天也失敗了」心裏出現了這個想法
人類的心理非常奇怪
當你破了一次戒，便會覺得再破一次戒也沒所謂
所以，千萬不要讓自己破第一次戒
除了買早餐，我的購物清單還有手套和指甲鉗
這間店很大，我打算問一下店員有沒有這些東西
我可以上網找圖片，給那位年輕女店員看
但為了爭取時間，我決定用肢體語言跟她溝通
首先，我要買手套
我摩擦著兩隻手掌，向手掌呼氣，再攤開十隻手指
她馬上就明白了，告訴了我手套的位置
然後，我要買指甲鉗
我左手攤開五隻手指，右手拿着一個隱形指甲鉗
一邊「剪」，一邊發出「啪啪啪啪啪」的聲音
她笑了笑，然後再告訴了我指甲鉗的位置
這種溝通方式十分有趣
能夠考驗急才和想像力
好像在玩不能出聲的「超級無敵大電視」
推薦各位讀者，下次去日本也可以玩一下
買完早餐，我便離開了神秘領域
回到女朋友的視線範圍內
到了晚上，我們回到民宿
女朋友在卸妝，我說肚子餓，要出去買宵夜
她叮囑我快點回來，不要留下她一個人太久
然後，我再一次進入了神秘領域
我出來的真正目的，是要搵陌生人傾計
有些壞男人，會瞞着另一半出去搵女人
而我，竟瞞着女朋友出去搵陌生人傾偈
那時，已經是深夜，街上人煙稀少
我再次進入那間便利店，一位中年男人在看雜誌
機會來了～陌生人！
我慢慢向他走近，發現他在看的是…
色情雜誌
日本人果然十分重視色情文化！
天寒地凍，夜闌人靜
還堅持一個人走出來看色情刊物
必定是為了推動自己國家的色情產業
看到他有着如此崇高的理念
我還是不要打擾他了
為了完成我的目標，我漫無目的地走了幾條街
路上遇見了幾位獨自在吸煙的陌生人
為了健康着想，沒有嘗試搵他們傾偈
走了很遠，也沒有找到目標
卻無意中發現了一間還在營業中的串燒店
我很想進去問一下有沒有外賣
但由於言語不通，怕遇上尷尬情況，我沒有進去
還是回去便利店買宵夜吧
回去的路上，我覺得自己十分沒用
無論進去後，買不買到串燒，也沒有甚麼大不了
為甚麼我要這樣害怕呢？
我一口氣跑回頭，到了那間串燒店門外
我毫不猶豫，馬上衝了進去
因為我知道，只要我一猶豫，就很大機會進不到去
女店員向我走來，用日文對我說「歡迎光臨」
我說：「樹伊孖些～Take Away?」
她馬上做出了OK手勢
太好了！她聽得明白！
然後，她還向我遞上了中文餐牌
忽然覺得，剛才的擔憂十分多餘
點餐後，發現已經出來半個小時了
我沒有帶電話，害怕女朋友會擔心
於是，我跟店員說：「I will come back later」
她聽不明白
我又說：「I take a walk」
她也不明白
我再說：「See you soon」
她還是不明白
我模仿阿諾舒華辛力加說：「I will be Back!」
她笑了出來，看來應該明白了吧
我馬上全力跑回民宿
腦海中出現「女朋友哭著擔心我的情形」
結果，當我滿身冷汗地打開大門時
女朋友悠閒地坐著問我：
「 有冇搵到陌生人傾偈呀？」
原來她一早就猜到我出去的意圖
我告訴她沒有搵到，但找到了一間串燒店
因為怕她擔心，所以先回來告訴她一下
她知道後說我十分細心，並對串燒表示興奮
最後，我順利拿了串燒回來
和女朋友一起吃著熱辣辣、香噴噴的串燒
各位讀者，對不起！辜負了你們的期望
今天沒有成功傾到陌樂偈
但我想衷心地向各位讀者說聲謝謝
全靠你們一直以來的鼓勵
我才有勇氣不斷走出自己的舒適圈
深夜還敢一個人在日本街頭到處亂走
沒有你們的話…
我們就吃不到美味的串燒了！
明天，我們要上雪山了
我會繼續努力，在日本搵陌生人傾偈
我們都是陌路人，不仿傾場陌樂偈
2017-01-20
又到了各位最期待的實驗環節！
前兩天的實驗，得到了非常重要的數據！
今天，來做一個對照實驗……
《科學實驗》
看到這裡的讀者，請不要按「讚好」／「Like」
請按「心心」！
然後留言，用5個字表達看完這篇文章的感受
謝謝支持科學研究！
想參與實驗的巴打，請到Facebook, 謝謝！
#466陌樂偈•2017年3月19日 19:04:34
《陌樂偈》第23天－雪山上浸溫泉的馬騮
在日本旅行的第四天，我們從東京出發到長野
準備登上雪山，入住一間非常特別的溫泉旅館
我們專程上雪山，是為了和馬騮一起浸溫泉
山上有一個《地獄谷野猿公園》，住了很多「雪猴」
那個公園的溫泉，只是給馬騮浸的，人類不能浸
但我們入住的溫泉旅館，就在公園的旁邊
旅館的溫泉是給人類浸的，但也會有馬騮走進去浸
這裏是全日本唯一可以讓人類跟馬騮一起浸的溫泉！
《科學實驗》
看到這裡的讀者，請不要按「讚好」／「Like」
請按「嬲嬲」！
下午時分，我們到了長野站，找可以到上雪山的巴士
在巴士站等車時，一位日本女生，拿著一大疊車票
走過來跟我們說日文，看起來像是黃牛黨
我們當然完全聽不明白，我嘗試用英文跟她溝通
除了聽得懂「Monkey」這個詞語外，完全雞同鴨講
然後，我拿出了電話，打開Google翻譯的語音功能
把語言設定為日文，然後把電話遞給她
她對著電話說了幾句日文
翻譯出來的中文是：「不要看猴子危險」
我在電話輸入：「為甚麼危險」 ，再翻譯給她看
就這樣透過Google翻譯一來一回地溝通
再加入大量的肢體語言，和少量的英文
十分鐘後，終於明白了她的意思！
這位陌生人原來是這個車站的售票員
只是好心提醒我們，現在已經很晚了
我們上山後，就沒有車可以下山
而且這個時間，山上已經很少馬騮在浸溫泉
我告訴她不用擔心，因為我們租了山上的旅館
她聽到後，放心地把車票賣給我們
坐完長途巴士，我們還要走45分鐘才能到旅館
向一位陌生人問路後，我們沿著陡峭的馬路往上走
馬路上結了冰，使我跌倒了幾次
走了十五分鐘，終於看到了《地獄谷野猿公園入口》
但Google顯示，還要走半小時的山路才能到達
入口旁邊有一間商店，我們走了進去取暖
忘記了說，今天氣溫只有零下十幾度
店內有一個大暖爐，非常舒服
女店員看似是日本人，又有點像歐洲人，年約30歲
他跟一位「鬼佬」客人流利地傾了幾句英文
那位客人離開後，我嘗試跟她傾偈
（以下對話，由英文翻譯成廣東話）
「Hello~」「Hi~」
「May I ask you a question?(可否問你一條問題?)」
「Yes?」她友善地點頭微笑
「你係唔係日本人？」
「唔係，我係荷蘭人」
「Great! 荷蘭係一個好靚嘅地方」
「多謝～ 你哋而家上山？」
「係呀，我啱啱上嚟嗰陣，仆咗好多次街」
「你哋要唔要買一對雪爪？」
她向我們介紹了一個雪地用品－套在鞋底的爪子
穿上後，在雪地就能走得更穩
價錢比雪靴平很多，但也有雪靴的效果，非常實用！
我們一人買了一對，她還細心地幫我們即時戴上
她問：「你哋係咪住山上面嗰間旅館？」
「係呀～上面係咪有好多馬騮？」
「而家冇乜，日落佢哋會匿埋，聽朝早佢哋就會出嚟」
「你一直(Always)喺度做嘢？」
「唔係一直(Always)，係通常(Usually)，我會放假」
看來我要進修一下英文了
「你會唔會覺得好凍？」
「會呀，所以咪有個暖爐喺度囉」
「咁你會唔會覺得好悶」
「有時都幾悶」
「希望有多啲人同你傾偈，好高興見到你！」
「我都好高興見到你哋～ 路上小心！」
跟這位荷蘭人道別後，我們正式出發上雪山
山路又陡峭又狹窄，左邊就是懸崖峭壁
一不小心，就沒法再打文章給各位看了
路上鋪滿了冰和雪，走在雪上比較安全
走在冰上，就會很容易滑倒
幸好我們買了雪爪
這個時候，所有人也在下山，只有我們在上山
間中會有「對頭人」和我們擦身而過
每次也要十分小心，因為山路真的十分窄
走了半小時，我們還在雪山上
天色開始暗了，山上沒有路燈，十分危險
看著Google Map上「不斷飄移」的定位
我們無法確定，路程還有多遠，開始擔心有沒有走錯路
想找個路人問一下，但已經很久沒有人跟我們擦身而過
女朋友還發現，我腳下的雪爪不見了！
那時，我們生命受到威脅
擔心著一個非常嚴重的問題⋯⋯
可能會吃不到晚餐！
溫泉旅館規定，6時前到達的客人，才可以吃晚餐
為了吃晚餐！我們只好繼續努力前進！
過了一會，終於遇到了幾位「對頭人」
他們說著熟悉的語言－廣東話
和他們擦身而過時，我說：
「哈囉！請問前面仲有幾遠先到？」
一位母親說：「仲有好遠呀！唔好上去啦！天黑喇！」
說完後，他們便急急腳下山了
我還沒有機會跟她解釋，我們住在山上的旅館
這就是香港人獨有的「冷漠式關心」吧？
我們經歷重重難關！幾次跟死神擦身而過！
（主要是想辦法在緊迫的時間下，幫女朋友拍照）
（以及摔了幾跤）
終於在5時 50分，看到了溫泉旅館！
只要再過一道橋，就能吃晚餐了！
當然，事情沒有這麼簡單
一隻馬騮霸氣地坐在路中心
像「齊天大聖」一樣，守住了那道橋的入口
想不到我來日本，除了要搵陌生人傾偈
還要想辦法跟陌生馬騮傾偈
我慢慢向牠走近，說了一聲「樹伊孖些」
他沒有離開的意欲，還突然狠狠地對我們睜大雙眼！
我們有點驚慌，退後了幾步
難道牠發現了我的背囊裏有食物？
5分鐘後，他終於離開了
地上多了幾粒大便
原來牠剛才睜大眼睛，只是在出力地屙屎
最大的恐懼，果然是來自恐懼本身
牠和我們擦身而過，然後爬了上樹
我幫牠起了一個名字，叫「齊天大便」
結果，我們成功在6時到達旅館！
遇上了非常熱情友善的日本人老闆
第一次住在傳統的日式房間，感覺非常新鮮
房間內幾乎甚麼也沒有，就像大雄的房間
晚飯時，老闆向我們介紹著各種各樣的食物
說到一半，突然指向我們身旁的玻璃窗
我把頭擰過去，馬上嚇了一大跳！
原來有一隻馬騮貼在窗外，看著我們
看來是剛才的「齊天大便」
我們十分高興！
作為香港人，女朋友馬上拿電話跟牠瘋狂自拍
（其實我比她更瘋狂，拍得咁多）
吃飯時「齊天大便」一直看著我們，看來牠十分肚餓
在這個溫泉旅館，馬騮看著客人食飯應該非常普遍吧
過了一會，老闆娘進來時發現了那隻馬騮
年過50的老闆娘，突然興奮得像5歲小孩一樣
指著馬騮大叫：「Monkey! Monkey! He is Hungry!」
她笑得十分開心，還叫每一枱客人過來看
其他日本人紛紛靠過來看
但「齊天大便」在這張枱的旁邊，只有我們可以自拍
這兩位香港人真的非常幸運啊！
（人家日本人根本沒興趣拍照…)
看到這裡的讀者，請不要按「讚好」或「嬲嬲」
千萬「不要」理會「最尾的指示」！
請緊記，按「O咀」！謝謝！
晚上，我決定出去室外風呂（戶外溫泉）
雖然那位荷蘭人說，晚上這裏沒有馬騮
但我想親自出去看一下，會不會有一、兩隻馬騮
今天氣溫零下十幾度，晚上再低一兩度，山上又低三四度
穿著浴衣走出去時，我整個人也僵硬了
一轉身，已發現了幾隻馬騮堆在門邊，嚇了我一跳！
牠們擋住了我的去路，被我開門吵醒，慢慢望向我
初到貴境，不知道馬騮的習性，很怕會得罪他們
加上天色昏暗，幾乎伸手不見五指
現場就只有馬騮的雙眼，在閃閃發光
令我不寒而慄
更正，是「又寒又慄」
不過，經過了大半個月的陌樂偈訓練！
你認為我還會害怕嗎？
沒錯，我真的害怕了
我馬上逃回屋內，去諮詢老闆的意見
（以下對話由英文翻譯成廣東話）
我問老闆：「出面有好多馬騮！
我而家出去浸溫泉，會唔會激嬲佢哋？」
老闆說：「唔會，你唔好掂佢哋，唔好望佢哋對眼
佢哋就唔會嬲，你掂佢哋或者望佢哋對眼，就會嬲」
我再問了一句：「They are Good Monkey?」
老闆笑著說：「Good Monkey!」
然後他就去睡覺了，那時才晚上8時，日本人真健康
老闆的說話沒有令我更安心，因為天色真的很黑
我害怕出去時，會不小心碰到馬騮，激嬲他們
所以，我決定了～ 今晚不會再一個人走出去！
於是，我帶了女朋友跟我一起出去
兩個人一起，果然比較大膽
到了門外，我們說了聲「樹伊孖些」
然後，慢慢跨過門邊那堆馬騮
跨過去的一瞬間，我真的很害怕被「猴子偷桃」
幸好，平安地跨過了馬騮
往前走，轉個彎，便看到那個室外溫泉
我們被眼前的景象嚇呆了！
溫泉不算很大，但竟然浸了廿幾隻馬騮！
還有一隻抱著嬰兒的馬騮媽媽
正當我們還在猶豫，要不要過去時
馬騮們突然發出叫聲！
「嘰嘰嘰嘰嘰！」
馬騮彷彿在談論著，這兩個闖進來的人類
我們嚇得「又寒又慄又窒息」
說了聲「哥咩拉西」便立即逃離現場
我們都是靈長類，就這樣傾了一場馬騮偈
2017-01-21
PS:
第一次用自己拍的照片做背景啊！
這是第二天在《地獄谷野猿公園》拍的
想知道我們最後能否成功跟馬騮浸溫泉？
敬請留意下一篇文章！謝謝支持～
有空請留言說一下你的感受吧～
《科學實驗》
看到這裡的讀者，請不要按「讚好」或「嬲嬲」
請按「笑哈哈」！
謝謝支持科學研究！
想參與實驗的巴打，請到Facebook, 謝謝！
#468陌樂偈•2017年3月19日 19:06:08
《陌樂偈》第24天－ 跟馬騮一起浸溫泉
在日本旅行的第五天，終於成功跟馬騮一起浸溫泉！
我和女朋友坐在馬騮旁邊，一位日本大叔走了進來
一坐下就開始瘋狂用水撥向馬騮，使我們嚇呆了……
我們坐得比較近馬騮，馬騮一動也不動地背著我們
我很怕馬騮忍無可忍轉身過來時，會「點錯相」！
大叔還伸手去拍牠！我忍不住開口了：「樹伊孖些！ 」
—————————————————————————
吃早餐時，老闆娘緊張地衝了進來
跟我們玩「超級無敵大電視」，你也可以猜一下
她說：「My Husband」
然後用兩隻手指指著自己眼睛，再指向前方
再用手做出了一個向前投擲的動作
用口發出「啪啪啪啪啪」的聲音
再說：「Monkey!」
答案在下面
原來，她老公看到有人用炮仗拋向馬騮
他們又緊張又心痛，於是問這裡有沒有人做過
旅館只有十多位客人，所有客人也說沒有做過
我想起了「金田一」與「柯南」中的殺人事件
可是這裡沒有偵探，最後也找不到真兇
吃完早餐，我去搵老闆傾偈
（以下內容由英文／日文翻譯成廣東話）
「早晨，琴晚我出去浸溫泉，成個池浸滿曬馬騮！」
老闆聽到後，拍手大笑
我問：「咁多馬騮，我重應唔應該落去浸？」
老闆做出OK手勢說：「冇問題㗎～（大丈夫）」
「咁我要點落去？」
老闆雙手抱著身體，做出一個「慢慢浸下去」的動作
我笑了，跟他說聲「阿呢吉多」
接著，我和女朋友再一次走出戶外溫泉
天氣依然十分寒冷， 只有零下十幾度
但這次光線充足，可以清楚地看見每一隻馬騮
兩隻馬騮在休閒地浸溫泉，旁邊還有幾隻在睡覺
馬騮變得不再可怕，而且十分可愛
人類最大的恐懼，是來自恐懼本身
我們一下水，便踩到了很多一粒一粒的物體
昨天遇過「齊天大便」，使我馬上意識到這些是甚麼
我們慢慢用腳向前探路，找到一個安全的地方坐下
適應了水溫後，我們小心翼翼地靠近馬騮
突然，一位日本大叔走了進來
他一坐下，就開始瘋狂用水撥向馬騮
我們嚇呆了！
我們坐得比較近馬騮，他在遠距離攻擊牠
馬騮一動也不動地背著我們，暴風雨前夕總是特別平靜
我很怕馬騮忍無可忍轉身過來時，會「點錯相」！
大叔還伸手過去拍牠！一邊發出「胡、胡」的聲音叫牠
我腦裏馬上出現了老闆的聲音
「你掂佢哋，佢哋就會嬲」
我突然想起了一套電影《猿人爭霸戰》
「講述人類和馬騮發生戰爭的故事」
現場約有十隻馬騮，三個人類，打起上來我們一定會輸
我忍不住開口了：「樹伊孖些！樹伊孖些！」
大叔停了手，望向我 （以下內容由英文翻譯成廣東話）
我說：「佢會唔會嬲？」
大叔淡定地指著馬騮說：「Smiling~ Happy!」
說完就繼續拍馬騮，我們只好慢慢地向後退
結果，馬騮也沒有理會他，大叔覺得冇癮便離開了
我們終於鬆了一口氣
浸過溫泉後，我們便跟老闆道別了
臨走時，我跟老闆說，他是一個很友善又快樂的人
我們跟他合照，然後離開旅館，出發去《野猿公園》
這時候，那位挑釁馬騮的陌生人大叔也剛好離開
走過來拍一拍我膊頭，跟我道別
我用英文叫他以後不要再碰馬騮了
他笑一笑就走了，不知道聽不聽得明白
到了公園，看到了很多馬騮在浸溫泉
但最吸引我注意的，是在溫泉旁邊的人類
一大群人拿著電話或相機，瘋狂地對著馬騮拍照
我在幻想，馬騮眼中到底是怎麼一回事呢？
「啲人類日日走上嚟，就係為咗拎舊奇怪嘢對住我哋
我哋就舒舒服服浸熱水，佢哋就凍冰冰企晒喺度
人類真係好搞笑，好好睇呀！嘰嘰嘰嘰嘰～」
科學實驗
看到這裡的人類，請不要按「讚好」／「Like」
請按跟馬騮塊面一樣紅的「嬲嬲」，謝謝！
公園內有一些工作人員，在鏟走地上的冰和積雪
我搵了一位比較有空的工作人員傾偈
（以下內容由英文翻譯成廣東話）
「早晨～我可以講英文？」
「我只係識少少」
「咁多人類嚟呢度，馬騮會唔會唔鍾意？」
(這條問題我用了3分鐘才令他聽得明白)
「啲馬騮對人類其實冇乜興趣
只要啲人唔好掂佢哋，唔好餵佢哋，佢哋就唔會理
如果有人搞佢哋，或者餵嘢畀佢哋食
佢哋就會開始攻擊人」
香港的馬騮會攻擊人類搶食物
就是因為以前有太多人餵馬騮
「咁你有冇見過有人餵嘢畀馬騮食？」
「間唔中有，我哋嘅職責就係要阻止人咁樣做」
這幾句簡單的說話，我們花了10分鐘才傾完
希望人類真的不會騷擾到馬騮
讓馬騮和人類可以繼續和平地相處
但我想起老闆娘早上的說話，又想起那位潑水大叔
又使我想起了《猿人爭霸戰》
跟工作人員告別後，我們離開了《地獄谷野猿公園》
開始下雪山，向輕井澤出發
我們都是靈長類，就這樣浸了一場陌樂溫泉
2017-01-22
想參與實驗的巴打，請到Facebook, 謝謝！