【練膽大法】【社會實驗】《我每日迫自己搵一位陌生人傾偈》原post link
#154陌樂偈•2017年1月14日 23:15:45
《陌樂偈》第7天－精靈訓練員老伯
今天回到巴士上層尋找目標，前排的老伯一個人在窗邊玩Pokemon Go
他的外貌看起來已經60多歲，想不到有年紀這麼大的精靈訓練員
由於我也是一名退役的精靈訓練員，所以我馬上站起來打算跟他傾偈
站起時才發現他的旁邊放了一個膠袋，心理學上這種行為是希望自己能夠與外界隔絕
實際上這種行為是為了令人不好意思叫你拿開椅上的東西，好讓你可以舒舒服服坐到下車
他的膠袋戰術成功捕捉到我身為人類的怕事心理，使我猶豫了
想不到找人傾場「陌樂偈」也要進行複雜的心理戰
我坐下來再猶豫了5分鐘後，終於突破心理關口
在他後方開了口：「先生，請問你喺邊度落車？」
他十分疑惑地反問我「我喺邊度落車又點呀？」
「冇，我想同你傾下計」
他還是十分抗拒地回應：「傾咩啊？」
我正在思考怎樣回答好，他突然說：「哦，你想傾game嗰啲嘢呀？」
我立刻打蛇隨棍上「係呀！可唔可以呀？」
他一知道我原來打算跟他討論Pokemon Go，態度馬上180度轉變
他立即拿起旁邊的膠袋讓我坐下，原來一隻Pokemon Go就可以打破人類的心理障礙
他說自己退休了，Pokemon Go剛推出的時候就已經有玩
為了打開話題，我請教他玩這個遊戲有甚麼袐訣
他竟然說：「你自己上網睇吓攻略啦，網上有好多架！」
想不到竟然會被一位60多歲的老伯叫我自己上網看攻略
我問他起初為甚麼會玩這個遊戲，他說因為知道有很多人玩，所以也下載來玩
但他從來沒有看過寵物小精靈這套卡通片，他起初只知道一些比較出名的小精靈
不過隨着他日夜鍛鍊去取勝，現在已經認識遊戲中全部小精靈的名字
他甚至連最近才出沒的稀有小精靈－百變怪也已經成功收服
我問他玩這個遊戲，有沒有多了跟陌生人傾計，他說有
還向我介紹了一些比較熱門捉小精靈的地方，叫我去找人教我玩
看來他以為我全心全意，為了學習這個遊戲才跟他傾偈
我問他玩這個遊戲前在街上有沒有和陌生人傾偈
「都有，睇下啱唔啱傾啦！你就幾啱傾～」
他一邊說一邊拍打我的手臂
他問我的工作是甚麼，我說幫某間電視台製作節目，問他有沒有看過
他說有看，並立即用智能電話顯示出那個台的應用程式
我問他喜歡看哪個節目，他說了一個關於耆英的節目
不是他這樣說，我差點忘記了他是位長者
我又問他有沒有用Facebook，他馬上說有
然後又用智能電話打開他的Facebook應用程式
他一邊拍打我的手臂，一邊向我推薦一些有趣的無聊帖子
本來我打算告訴他Facebook有一個無聊Page叫陌樂偈，相信會很適合他
但我到站了，只好直接跟他說再見
除了那位喜歡把「電腦大爆炸」和「宇宙通行證」掛在咀邊的老伯外，
他是我見過最熱愛互聯網和新科技產品的老伯了
我離開時他除了再拍拍我的手臂外，還一直保持著燦爛的笑容
可能自從Pokemon Go熱潮減退後，已經很久沒有陌生的訓練員找他傾偈吧
我們不知道對方名字，沒有交換Facebook，就此告別
我們都是陌路人，因為Pokemon Go傾了一場「陌樂偈」
2017-01-05
#157好男人唔易搵•2017年1月15日 17:31:15
我諗比你搵左黎傾計既人會開心之外亦都會好多人期待緊比你搵黎傾計
除左可以理解人唔同人諗法 我諗香港人更需要搵個人黎比佢發表下諗法
無理由會無啦啦同朋友講人生講自己對世界既理解
我都試過一次食食下飯唔知點解有個中年女人無啦啦同我吹水
個契機我都唔記得左
但個半個鐘至9個字我都係附和佢多[sosad]
對我黎講係理解下個個年代出世成出既人既諗法會係點
但都估唔到佢會對個陌生人講起自己婚姻[sosad]
佢真係好proud of自己係自由戀愛之下結婚
我就覺得佢好幸運 個男人咁多年都無對佢唔住 咁當然無講出口啦
其實都會大概知佢無咩機會同人講呢D野
我諗佢個女都聽過呢D故事好多次 身邊既c9朋友有D可能婚姻無咁成功又唔講得出口
對住一個陌生人 見得一次唔會再見 對於佢黎講我可能只係一個樹洞 講D咩都無所謂
成個過程我都好驚佢會講政治野 因為我連親戚政見唔同我都會開口同佢嘈[sosad][sosad] 不過都好好彩佢都無講
#160陌樂偈•2017年1月16日 19:58:12
《陌樂偈》第8天－雨傘下長大的下一代
今天跟一位中學生傾偈，我問了他一條問題
「你覺得自己係唔係中國人？」
「香港人」
「咁你覺得自己係唔係中國人？」
——————————————————————-
在巴士上層，連續三次被陌生人拒絕了
讓我發現下班時間很難進行「陌樂偈」
因為回家途中的人都已經十分疲倦
即使找到眼睛張開的目標
前後左右總有人在睡覺
我也不好意思在旁邊傾計
在我心灰意冷的時候，找到了一位穿著中學校服的男生
本來打算找其他類型的陌生人，以滿足各位的好奇心
但十分抱歉，整架巴士上單獨又清醒的生物，我都已經試過了
「Hello，可唔可以同你傾吓偈？」
他爽快地說：「好呀！」
看來年輕的男生，都比較喜歡「陌樂偈」
「我之前同中學生傾偈，佢話而家啲學生好少上FB」
「而家啲人用IG囉，我就Facebook同IG都會上，你而家做咩㗎？」
他竟然反客為主了！
我提到自己在參與電影電視的工作
他說正在讀Applied Learning的電影科
而我不知道Applied Learning是甚麼
原來Applied Learning，是讓學生選擇去讀的興趣科目
例如飛機維修，汽車等等，可以計DSE分，最高拿4分
「點解你會讀呢科？」
「畀個目標自己，我想做導演」
在荒謬的教育制度下，終於找到了一位有夢想的學生
他中一時參與校園電視台，覺得拍片十分有趣
我問他拍過甚麼，他說拍過「微電影」
「你知唔知咩係短片？」我問
「廣告囉，冇故事性嘅」
原來新一代已經用「微電影」取代了「短片」
我告訴他，以前沒有「微電影」這個名詞
我們都是用「短片」來稱呼所有短的影片，短片也可以有故事性
有些中國人認為「微電影」這個名詞有「電影」兩個字比較有型
所以便用「微電影」這個名詞把「短片」包裝成「電影」
就像「副學士」其實不是「學士」、「HKU Space」不是「HKU」
提到外來語入侵，我問了他一條問題
「你覺得自己係唔係中國人？」
「香港人」
「咁你覺得自己係唔係中國人？」
他思考了一會，然後說：「我唔會話自己係中國人囉」
「即係呢個身份你無可避免，但係你唔想承認？」
他點頭說：「我有港獨意識㗎麻」
我笑著說：「喂～你唔好咁大聲！咁你啲同學呢？」
「我間學校喺雨傘運動搞過罷課」
「中學都咁大膽？最後有冇俾人罰？」
「啲老師都支持」
他在雨傘運動時去過金鐘過夜，也有去過旺角
「你嗰陣先中二、三，你知發生咩事嘅？」
「我知，迫到埋嚟冇得唔知，再唔知就港豬㗎喇」
中學時期還是政治冷感的我，心感慚愧
他接著說：「冇得救㗎喇…我哋可以做得啲乜啫…冇嘢可以做到」
這句說話由一位中學生說出來，份外悲哀
我再問他：「你覺唔覺而家有好多中國嘅用詞入侵香港？
例如：打造，富二代，小三」
「我哋學校有一班，半班都係中國人」
「講普通話？」
「自己人同自己人講普通話，對住我哋講廣東話」
「我睇新聞話 魚蛋 要寫做 魚丸子
返學要講普通話，唔准講廣東話？」
「嗰啲小學嘅姐，中學就唔會嘅」
「咁你覺得嗰啲外來用語有冇問題？」我問
「冇問題嘅，台灣都係咁用，台灣同中國有啲嘢係相通」
「即係你對台灣文化唔反感，所以唔介意用台灣嘅用語？」
「係，都叫法題問姐，但我覺得唔可以剩係學普通話，就唔學廣東話」
我說：「最緊要保留到我哋原本嘅語言、文化，好似 放題 唔會取代到 自助餐，多啦A夢 唔會取代到 叮噹 咁。係喎，嗰隻嘢你會點叫佢？」
「多啦A夢」
「你知唔知佢叫叮噹？」
「知，技安都知」
「咁你自細都係叫多啦A夢？」
「唔記得喇，我好似夾雜咗喺中間」
看來再下一代，就沒有人知道甚麽是叮噹
香港人喜歡說有新鮮感的外來語，各大傳媒也帶頭推廣
外來語本來沒有問題，最理想當然是新舊文化也能保留
最怕是我們的香港文化，不知不覺被取代了，被遺忘了
文化入侵，最簡單的做法是由新一代入手
新一代不會再說短片丶有錢仔丶二奶丶魚蛋
不懂創造，不會建造，不識製造，只知打造
因為他們聽也沒有聽過
就像新一代，不知道甚麼是「叮噹」一樣
他到站了，我們還有很多說話未傾，時間實在不夠
他問我有沒有工作機會可以介紹，我說不習慣留電話
只告訴他可以到「陌樂偈」的Facebook Page找我
至今，還未收到他的訊息
我們不知道對方名字，沒有交換電話，就此告別
我們都是陌路人，就這樣傾了一場「陌樂偈」
2017-01-06
#176Easy•2017年1月19日 17:51:51
上年九月左右 我開始左做Uber (當兼職 搵下油錢咁)
但慢慢我越黎越鐘意做Uber 唔係因為搵到錢 而係因為可以同唔同o既人傾偈(一時時) 可以聽下人地故事 其實真係好有趣
其實呢個世界 大家真係可以少一份戒心 多D同陌生人傾計 其實真係有時會令你果一日感覺都好好多
利申: 中文差
#193六氟化硫•2017年1月29日 16:30:07
好想搵日撞下巴打傾下計#hoho#
自問無咁嘅勇氣 同埋唔知同其他人傾啲咩[banghead]
不過有次試過夜晚係m記同朋友做緊功課
隔離我個鬼婆聊我哋傾計
有啲後悔嗰陣無主動問佢嘢
因為嗰陣靜係掛住做嘢[banghead]
同埋想問下巴打 你有無試過喺地鐵陌樂計？
*** *** ***
原post (2) start link
*** *** ***
#91陌樂偈•2017年2月7日 23:24:27
《陌樂偈》第9天－粥店內的倉務員
我吃著皮蛋瘦肉粥，鄰桌有一位上了年紀的男人
獨個兒在吃粥，臉上帶著一份飽歷盡滄桑的神情
機會來了，陌生人！
經過幾分鐘的心理掙扎，我拿著粥走了過去
「請問我可唔可坐在喺度？」
他邊吃邊點頭
「你今日放假？」
他邊吃邊回答「要返工」
「你做邊行？」
「倉務」
「返工辛唔辛苦呀？」
「緊係辛苦啦！」他用疲倦的語氣回答
「你平時返工負責做乜？」
「搬搬抬抬囉，執貨囉」
他是散工，開工不定時，做這一行已經十年
「搵得多唔多錢？」
「緊係唔多啦！有得揀都唔好做呢行呀」
他覺得我好像很有興趣，於是勸我不要做這一行
「點解當初會做呢行？」
「以前份工冇得做，咪要搵嘢做」
「你之前做咩？」
「電子廠，我負責砌電路」
他當年跟師父學師，學滿師後找工廠做了很多年
後來，工廠都搬到中國大陸了，他只好轉工
「嗰陣你有冇諗過去大陸做？」
「冇錢，冇得上去做」
「要好多錢先可以上去做？」
「佢哋請香港人上去教完啲大陸人，就會炒晒啲香港人
因為大陸人人工低好多，除非你有錢，自己上去開廠」
他曾經是一位專業人士
但隨著時代的變遷，社會的轉型
這位專業人士，無奈地變成了一位「勞力士」
「咁你做呢份工開唔開心？」我問
「食完先講啦，我食嘢嗰陣唔鍾意講嘢」
「哦，好呀～慢慢食」
傾了大約十分鐘，他突然表示「食嘢嗰陣唔鍾意講嘢」
不知道是我問得太多，還是問了他不想回答的問題
我只好等他吃完東西再傾
接著，我們各自靜靜地吃粥
他很快把東西吃完，不發一言，轉身走了去結帳
我們不知道對方名字，甚至沒有跟對方告別
我們都是陌路人，就這樣傾了一場「陌樂偈」
2017-01-07
#95陌樂偈•2017年2月7日 23:33:41
/好有趣我都想試下搵陌生人傾偈
愈黎愈多對話由玩實搬到入電話
變到依加一到現實同人講野就會好緊張
緊張到連對方都會感覺到
好想改善下Z_Z/
我都覺得呢個係好大問題
而家啲人連電話都唔想打，有事都用Whatsapp
愈來愈唔識用口講嘢
#111陌樂偈•2017年2月7日 23:40:53
/[offtopic] 以前唔怕陌生人 但初中果陣遇過條友問路之後再話自己搵唔到電話 要我打俾佢搵 之後不時打黎講變態野 就覺得自己太蠢太易相信人 搞到依家都會同陌生人保持距離…
樓主繼續加油#hoho#/
你係咪絲打嚟？如果唔係冇理由個變態佬會咁對你 [banghead]
而家好多人都好怕同我傾偈，可能都同過往經驗有關
希望你會重新相信陌生人
#125陌樂偈•2017年2月7日 23:49:56
/試過搭火車嗰時 見到有人同我玩緊同一隻game
嗰刻唔知點解好有勇氣 走去同佢講”不如一齊玩”
佢又話ok 結果就連線一齊打[sosad]
最後冇交換到聯絡資料就落咗車O:-)/
Very Good!
好多年前我都試過！
喺小巴，聽到有人開NDS Mario Kart
我大聲講，Mario Kart喎，一齊玩丫～
之前我開場，佢真係入咗嚟玩
到落車我都睇唔到佢咩樣[sosad]
#133陌樂偈•2017年2月7日 23:53:30
/好正#good#
之前番工都有個婆婆入黎睇野
睇睇下佢問我野 之後開始講佢既人生
講佢以前做咩工 佢以前同宜家生活係點
可惜傾左15分鐘我就唔可以傾落去
始終番緊工 d大既以為我係道吹水唔做野
但其實單單果15分鐘 雖然好多野我唔係完全明
但我係佢講既野當中我感受到佢一直好孤獨
講起佢個仔搵好多錢 老闆對佢好好 好有前途
但因為咁就忽略左佢好多:-(
我臨去做野前講左句唔好意思呀婆婆 我要去做少少野
佢捉住我手講 比心機呀後生女 我唔阻你啦 多謝你
好心酸:~(/
多謝你嘅分享，好感動:-(
有時同陌生人傾一場偈，真係好似聽咗人哋嘅人生咁
呢樣亦係我堅持做落去嘅其中一個原因
#155依豬釘毛•2017年2月8日 00:58:18
/好多字 我仲未睇曬
但有d令我好感動:~(/
之前雨傘運動 我都同左好多陌生人傾計
果段時間令我對香港人有番好多好感同信心
不過完左之後 生活又一切如常
香港人好似只有愈來愈冷漠
sor 夜晚係感性d[sosad]
#185陌樂偈•2017年2月8日 04:08:02
/好奇樓主點解記得咁清楚？/
每次傾完即刻Mark低重點
其實有時唔係記得好清楚（特別係而家打緊大半個前嘅經歷）
都係靠啲重點記返啲內容，通常打打下啲記憶就會慢慢出現
其實好多無謂嘅內容，我已經唔記得咗或者冇特登打出嚟
#201向前再飛•2017年2月8日 05:35:30
巴打#good#b#good#b 難得一見高質post#yup# 真係要comment留名#yup#
其實我而家係到exchange緊,其中一個去exchange既原因就係想識多d唔同既朋友,係希望能夠keep得到既,得閒會whatsapp下,或者見到snapchat,ig 會傾返幾句.keep到聯絡,更好既佢黎hk或者我去返個到大家會一齊去玩
不過隨時間過去,發覺自己熱情不斷減退,最先黎個時,有個local女女帶exchange student遊campus,個時仲膽粗粗問完野攞埋電話,其實唔係想溝,只係想識fd,可以一齊去玩,真正exchange 下 culture,但傾落都係我問咩佢答咩,都唔會問下我野#O:-)#fs
之後又識左其他local,今次有仔有女,一group人咁傾計佢地就都算係幾好,加埋其他exchange student,得我唔識當地language(識太少）佢地大部分時間就我用英文講,但最慘係我英文都唔係太好,加埋d口音,我有時聽唔明,只係笑一笑,end左conversation,搞到大家都無引:-(
加上係呢到都遇到d hi bye 佬,雖然應該係我溝通能力唔好,冇人想同繼續同我講野:-(
本身都諗緊應唔應該學好d先,但睇到巴打個post,我覺得應該頂硬上,巴打係香港都日日step out of comfort zone,身處外國既我更加要努力#yup##yup#
要再日日同local講野,希望聽聽下會明,可以融入佢地#yup#
#225失暖王•2017年2月8日 15:37:46
皮已正:P
樓主你每一次嘅陌樂偈都好有哲學味道，逼使我都思考當中嘅道理。你呢個實驗or計劃真係好有意義，希望可以繼續進行。如果有機會真係可以希望同樓主係現實來一場陌樂偈#hoho#
#258陌樂偈•2017年2月8日 21:45:31
/idea好好#good#fs
但係d內容好似次次都係你問一句佢答一句咁，變左你問佢答
有冇諗下傾下一d諗法時交流下自己既睇法
你呢個問人問題既模式，如果俾我遇到會覺得驚
心諗你問咁多做咩，係咪想起我底@_@/
我都覺得愈嚟愈似我問你答, 之後會試下發表多啲自己嘅諗法, 真正同人討論下#good#
其實有時我都有講自己嘢, 但冇打出嚟
例如點解我要傾陌樂偈, 我做咩職業等等
因為之前已經講過, 所以唔再重覆
有時我講咗啲私人嘢, 都唔會打出嚟[sosad]
不過主要都係我問問題多
但我發現人類真係好鍾意講關於自己嘅嘢, 多過聽人講人哋嘅嘢, 大部分人都會一直答我問題, 不停講自己嘅過去, 只有少部分人會問返關於我嘅嘢
#263陌樂偈•2017年2月8日 23:12:47
《陌樂偈》第11天－快樂的獨居婆婆
經常在巴士上尋找目標，今天決定提早一步，在巴士站出擊
一位成年男士排在我後面，一直看着電話
機會來了～陌生人！
已經傾了一個多星期麥樂偈，而且今天有100點勇氣值
我真的充滿信心！
但在這個陌生的戰鬥場地，我還是猶豫了
猶豫得愈久，就愈難開始
掙扎了5分鐘，我決定轉換目標
一位滿頭白髮的老婆婆站在我前面，還是老人家比較易下手
又說得自己像騙徒一樣……
「婆婆，你係咪搭XX(巴士號碼)㗎？」
「係呀」
「我都係呀，你今日去邊呀？」
「去個女度，佢屋企有工人，我去睇下佢做嘢」
「你有幾多個仔女？」
「一仔一女」
「咁好呀～你幾多歲呀？」
「80歲」
她看起來十分健康，而且行動自如
「你啲仔女都有自己嘅仔女喇呵？」
「有幾個孫，讀緊小學」
「佢地乖唔乖呀？依家啲小朋友點呀？」
「佢地好乖呀，成日都學好多嘢，彈琴、游水、畫畫、跳舞」
我這個大人聽到也覺得辛苦
「咁多嘢學，佢哋辛唔辛苦呀？」
「佢哋慣咗囉」
「係咪媽咪幫佢哋報名？」
「係囉」
「佢哋自己鍾唔鍾學㗎？」
「鍾意，佢哋自己鍾意學，好開心」
希望是他們真心想學吧
我問婆婆平日有甚麼活動，她說喜歡做運動
主要的運動是「去公園行下」
她「做運動」時通常也會跟陌生人傾偈
主要的對象是其他婆婆，大家坐坐下就識
「咁平時喺街有冇後生仔同你傾偈㗎？」
「冇乜，而家好少後生仔鍾意同人傾偈」
其實年輕人也喜歡在街上和別人傾偈，不過是在互聯網
不懂用智能電話的老人家，才懂得跟現實世界的人傾偈
「你覺得自己開唔開心呀？」
「開心」
「點解開心呀？」
「身體健康咪開心囉，仔女返工返學咪開心囉
是但啦～過得一日得日」
巴士來了，我們一起上車
下層還有座位，婆婆竟然行樓梯走上上層！
「嘩！婆婆你真係好健康喎！」
她坐在車頭的位置，我坐在她旁邊那一排
「你鍾意坐車頭？」
「係囉，有嘢睇」
「婆婆你以前後生嗰陣有冇做嘢呀？」
「有呀，喺廠做織布」
「辛唔辛苦呀？」
「緊係辛苦啦？」
「咁難唔難學呀？」
「開頭好難㗎，學識咗就唔難」
「你哋織咩布畀人呀？」
「牛仔布」
「用嚟整牛仔褲嗰啲呀？」
「係呀係呀」
「做織布開唔開心呀？」
「開心，最緊要個個身體健康，一日過一日囉」
後來織布廠都搬上大陸了，上去做十分麻煩，所以她沒有再做
婆婆說她一生只是做過一份工，認為一份工做到老十分幸福
我問她怎樣看現在的年青比較喜歡轉工，嘗試做不同的工作
她說：「冇所謂啦，有得做就得啦，最緊要自己鍾意」
之後到她反攻了，問我屋企有多少人，結婚未等等
這段對話的內容，我當然不會全部打出來
只分享一條比較深刻的問題，她問我：「你阿媽幾多歲？」
我回答她大約60左右，她說：「好後生！」我笑了
突然想起，在網上看過一句類似這樣的說話：
「一位80歲的婆婆，後悔自己60歲時沒有開始學小提琴
否則，現在已經學了20年」
「你知唔知你啲仔女返咩工？」
「文員」
「係咪成日要對住電腦？」
「係囉」
「咁你知唔知電腦係咩嚟㗎？」
「我唔知，我唔識用」
「你而家用緊咩手提電話？」
她從手袋拿出一部古老的摺機電話
「你啲仔女，有冇話買部新嘅電話畀你用呀？」
「有，送畀我都唔要，我唔識用」
我問她生活上有沒有困難，夠不夠錢用
她說打工賺的錢，退休時已經用完
仔女每個月有家用給她，政府有$1000生果金
她覺得十分夠用
在香港，其實很多人退休時也儲不到多少積蓄
沒有子女的人，只靠$1000生果金，不知怎樣過活呢？
接下來又是代讀者問問題的環節
「你咁耐以嚟最開心嘅係咩事？」
「娶新抱最開心，個女嫁最開心，睇住孫仔出生最開心」
「你啲仔女結婚嗰陣你有咩心情呀？」
「好開心，開心到喊囉真係」
「你啲仔女而家係咪搬走晒？」
「係呀，冇得一齊住㗎喇，冇咁多地方，又窄」
「咁而家你屋企有邊個呀？」
「我自己一個」
「嗰陣你啲仔女搬走咗，你有咩感覺？」
「靜啲囉，悶啲囉」說完後她靜了下來
或許這位表面樂觀的婆婆，其實內心十分寂寞
婆婆一把年紀，我不忍心問她遇過最傷心的事
傾偈的過程中，她一直沒有提及過自己的丈夫
很想問一下關於她丈夫的事，但還是不忍心
「你平時自己喺屋企有咩活動呀？」
「落樓下咪活動囉，是但啦，一日過一日」
「你啲仔女有冇返嚟陪你呀？」
「有，一個禮拜一次」
「咁佢哋都幾乖仔喎」
「係呀，陪我食飯、飲茶，我就好開心」
老人家需要的，其實十分簡單
我到站了，站起來跟她道別
「婆婆，我落車喇，祝你身體健康」
「乖仔，要孝順爸爸媽媽」
「知道喇，Bye Bye」
「Bye Bye」
我們互相微笑，不知道對方名字，就此分別
我們都是陌路人，就這樣傾了一場「陌樂偈」
2017-01-09
#267陌樂偈•2017年2月8日 23:28:41
/我有時都會同陌生人傾計，不過多數係機緣巧合，有啲契機先傾到[sosad] 但我做主動無乜嘢心理障礙，但如果有人無啦啦埋嚟搵我傾偈我會驚，唔知點解[banghead]
有時傾完除咗有得着都有失落，因為又變番自己一個:-(
btw 希望會遇到樓主O:-)/
香港好少有好似你咁嘅人，希望你繼續同多啲香港人傾偈
有特別嘅經歷可以Send畀我，唔介意嘅我Post喺陌樂偈FB
平時要主動同陌生人講嘢我都唔係好怕
但要搵人同自己傾偈，真係比我想像中要更大勇氣
（大家可以自己試下[sosad] ）
我一直都思考緊一個問題：
「點解人與人傾偈／做朋友一定要有契機？」
例如同班同學，同事就自自然然會一齊傾偈，再成為朋友
但無啦啦同人傾偈，或者想同人做朋友，就會覺得好唔自在
契機真係咁重要？點解我哋唔可以自己製契機呢？
明明每個朋友原本都係陌生人，但我哋就好怕陌生人
人類嘅心理真係好奇妙
#272陌樂偈•2017年2月8日 23:38:56
/當作文睇就還可以
現實生活不是這樣的
但也值得試試 當練膽量/
每一篇都係真人真事，雖然有時真係好戲劇性
#275陌樂偈•2017年2月8日 23:49:48
/巴打識到唔少朋友？/
全部冇交換電話，所以唔算識到朋友
我唔反對大家搵人傾陌樂偈之後交換電話
只係我自己覺得，兩個人都冇利益、冇目的咁傾偈，傾完就消失
大家先可以將自己心入面嘅說話講出嚟
#277Panic•2017年2月9日 01:08:31
前幾日先喺fb見有外國人做同一樣嘢 估唔到有香港人都會一樣敢去試#good# 幾欣賞你嘅勇氣 如果我無啦啦俾人問大概都會嚇怕
不過睇完覺得 或者咁樣同個萍水相逢嘅陌生人傾傾人生 傾下自己 都唔錯:) 我哋隔住個mon唔會怕同陌生人講嘢 仲會telegram做人樹窿搵樹窿 去到現實就唔敢甚至抗拒 大概真係由細到大俾父母灌輸太多「陌生人好危險」嘅道理 幾值得反思
期待更多文:)
#283笑得你心裏發寒•2017年2月9日 03:32:10
好好睇#good#
我去旅行果陣有時係路邊等睇show之類既野果陣都會聊下人傾計，有香港人有外國人。但香港人好多都聊唔起，講一兩句就停左 都幾灰鳩:-(
#284我愛紅豆•2017年2月9日 15:48:02
之前搭mtr果時玩扭計骰..有個外國女人望到我實一實，之後扭完仲撩我傾計,讚我扭得好:D
呢次係我第一次比人撩傾計既經歷.好想有多呢d機會:-(
#286陌樂偈•2017年2月9日 19:53:02
/前幾日先喺fb見有外國人做同一樣嘢 估唔到有香港人都會一樣敢去試#good# 幾欣賞你嘅勇氣 如果我無啦啦俾人問大概都會嚇怕
不過睇完覺得 或者咁樣同個萍水相逢嘅陌生人傾傾人生 傾下自己 都唔錯:) 我哋隔住個mon唔會怕同陌生人講嘢 仲會telegram做人樹窿搵樹窿 去到現實就唔敢甚至抗拒 大概真係由細到大俾父母灌輸太多「陌生人好危險」嘅道理 幾值得反思
期待更多文:)/
多謝巴打嘅讚賞同支持！#hoho#
嗰條片我早兩日都睇到，估唔到外國已經有人做緊呢樣嘢
不過佢目的係同人影相＋識朋友，而我只係想單純咁同人傾偈
呢一代嘅人慣咗活喺網絡世界，愈嚟愈怕現實世界嘅陌生人
呢個現像其實好恐怖，希望多啲人可以同我做一樣嘅事
巴打都可以試下搵人傾陌樂偈 #good#
#298陌樂偈•2017年2月10日 00:23:52
《陌樂偈》第12天－有人情味的無牌小販
回家途中，遇到一位在街邊擺檔賣糕點的嬸嬸
我之前幫襯她買過一次砵仔糕，之後就沒有再買
因為她的砵仔糕，不好吃的，而且不只我一個這樣說
雖然間中也在附近看到她，但從來沒有跟她傾過偈
今晚，就好好的跟她傾一場陌樂偈吧！
最簡單的做法，是幫她買一些糕點，然後跟她傾偈
但我不會這樣做，否則我便會成為了她的客人
藉這個機會，說一下我為自己訂立的陌樂偈規條
各位想進行陌樂偈的話，可以自行制定適合自己的規則
以下《陌樂偈》規條只適用於我自己：
1.一對一
一對一傾偈，才最容易把自己的心底話說出來
一段只屬於兩個人的對話，雙方才會用心聆聽
2.雙方是對等關係，對方有選擇的權利
例如跟髮型師傾偈，對我來說不算陌樂偈
因為我是他的客人，我跟他說話，他必須回應我
我要找一位不一定要回應我，也願意和我傾偈的人
（當然，我也十分鼓勵大家跟髮型師傾偈
是一個嘗試跟陌生人傾偈、練膽量的好方法）
3. 不問對方名字，不交換聯絡方法
人有很多祕密，不想被身邊的人知道
對著一位傾完便會消失的陌生人，就說甚麼都不用怕
（除非是特別的情況吧，例如上次那位騎馬的伯伯
我真的很想再遇到他，四萬多一個月的工作機會啊！）
根據規條二，我不能幫她買糕點，要直接跟她傾偈
可是她的生意很好，有五、六位客人在排隊
我只好等她做完生意，才能跟她傾偈
人生中第一次，搵人傾偈也要排隊
等了幾分鐘，終於暫時沒有客人
機會來了，運吉的陌生人！
「姐姐，你好好生意喎！」
「一時時㗎咋，有啲熟客仔丫麻」
「你成日喺度擺檔？」
「有時啦～我周圍擺，呢度唔擺得㗎！」
「哦～咁邊度擺得呀？」
「度度都走鬼嘅，做呢行就遇咗走鬼」
沒有地方可以擺檔，因為她是無牌小販
對話途中，陸續有不少客人來找她買糕點
還真的有很多熟客，畀錢時會跟她傾兩句
每當她有生意時，我只好靜靜的站在一旁
等她有空了，再跟她繼續傾偈
「有冇試過俾人捉到呀？」
「俾人拉過幾次啦！啲人投訴就會有人嚟捉」
「點解啲人要投訴你？」
「我點知呀？啲人心地唔好咪投訴囉！」
「佢哋夜晚都開工㗎？」
「而家24小時工作丫麻，我通常七點左右落嚟，賣晒就走」
「俾人拉到會點？」
「罰錢囉，充公囉，要上法庭」
「每次罰幾多錢？」
「次次唔同，法官話事」
「吓？法官話事？」
「梗係法官話事啦，唔通我話事呀？」
「捉到淨係罰錢咋呵？」
「充公囉！重唔夠呀？賣一個月都搵唔返呀！」
「俾人充公咗啲嘢，會唔會畀返你？」
「唔會，車仔都冇埋㗎喇，炒栗子嗰啲有牌就唔會充公」
原來街邊賣炒粟子、鵪鶉蛋的檔口，多數是有牌小販
「啊～原來而家重有有牌嘅小販」
「舊時喇！冇得攞好多年啦，我做嗰陣已經冇得攞」
「你做咗幾多年？」
「十幾年」
「你點識整呢啲糕點嘅？」
「家婆教嘅」
很久沒有聽過家婆這個稱呼
「家婆即係你⋯⋯」
「奶奶」我們異口同聲地說出來
她繼續說：「以前啲人唔買嘢食㗎，想食就自己整」
這時，有一名小男孩跑過來說要吃大菜糕
嬸嬸告訴他：「大菜糕賣晒，食砵仔糕啦好唔好？」
小男孩不停說：「我要食大菜糕！我要食大菜糕！」
男孩的父母走過來，告訴他今天沒有大菜糕了
小男孩還是不放棄，扭著計說：「我要食大菜糕！我要食大菜糕！」
他圍著檔口轉來轉去，嘗試找出大菜糕
一邊找一邊繼續說：「我要食大菜糕！我要食大菜糕！」
幾經辛苦，男孩的媽媽才成功把這位扁著嘴的大菜糕愛好者帶走
這一家三口離開後，我笑著跟嬸嬸說：「小朋友聽唔明人哋講咩」
她細細聲地說：「佢唔食得呀…」
「吓？」
「氣管炎…唔食得凍嘢…」
她把一個膠箱打開，裏面還有很多大菜糕
原來這個小男孩，每次見到嬸嬸，也會走過去買大菜糕
嬸嬸知道小男孩有氣管炎，不能吃大菜糕
所以每次也跟男孩的媽媽，上演一場「大菜糕賣晒」的戲
「你後生嗰陣有冇做過其他嘢？」
「冇，負責照顧仔女」
原來她曾經是一位家庭主婦
「咁點解你當初會開始擺檔嘅？」
「仔女搬晒出去住，覺得悶」
然後，我問了今晚最想問的問題
「你啲客有冇讚你啲嘢好食？」
「哈哈，啲人返嚟話好食㗎」
「邊樣嘢最好賣？」
「砵仔糕」
最後，我還是幫她買了兩件砵仔糕
傾完陌樂偈才成為她的客人，就不算犯規條二了吧
回家路上，咬了一口，果然是不好吃的
但傾偈的途中，她的生意真的不錯
也許她賣的，是一份人情味
我們都是陌路人，就這樣傾了一場陌樂偈
2017-01-10