【練膽大法】【社會實驗】《我每日迫自己搵一位陌生人傾偈》原post link
#33陌樂偈•2017年1月6日 13:53:28
《陌樂偈》第4天－快餐店內的哲學課
昨晚，Facebook收到了一位陌生人的訊息
他說看了陌樂偈，覺得這個idea很有趣
我道謝了他，他說其實我們之前見過面
原來他是我一年前，排隊時遇過的陌生人
「我想你問下人對生命嘅睇法，應該好有趣」
於是，我今天多了一項任務
昨天被人拒絕過後，今天的心情十分緊張
我再一次在快餐店內尋找目標
這幾天，我學到了一個人生哲理
「當你猶豫要不要做一件事
猶豫得愈久，就愈難開始」
我決定買了餐，就馬上找一位目標衝過去
取餐後，我發現今天有很多獨自進餐的人
機會來了～陌生人！:-[
我鼓起勇氣，衝向我鎖定的目標！
…然後在他旁邊那張沒有人的枱坐下
我猶豫了…… 🙁
猶豫得愈久，就愈難開始
經過5分鐘的觀察和掙扎
我選擇了一位看起來十分友善的小姐
我拿起餐盤，慢慢走過去
「新年快樂，請問我可唔可以坐喺度？」
她微笑著回應：「可以～」
「我可唔可同你傾下偈？」
她繼續保持友善的微笑：「你想傾咩？」
「我每日都會搵陌生人同我傾偈…」
「哦～我成日都同陌生人傾偈㗎」
「香港好少人會咁做㗎喎，你哋會傾啲咩？」
「通常傾下閒偈，你有咩想搵人傾？」
她看來誤會了我有心事
「冇～我只係想每日都搵唔同嘅人傾偈」
「哦～其實你想同人傾偈好簡單
首先…打少啲機」
我笑了出來，看來她對自己的孩子十分不滿
「拎個心出嚟真誠咁對人，最緊要唔好貪！
同埋睇多啲書，就會有多啲話題同人傾」
她說她喜歡看哲學和心理學的書
我問她「你平時點樣搵人傾偈㗎？」
「我唔洗搵人㗎，啲人主動會走嚟同我傾偈」
「可能你有吸引陌生人同你傾偈嘅超能力」
「係呀，我同呢度間餐廳啲人都好熟㗎
你夠唔夠飽呀？可以叫阿姐醒多隻雞翼畀你㗎」
「哈哈哈！我平時都唔會問陌生人拎電話嘅
為咗以後有多隻雞翼，我今次想問你拎電話
不過都係唔好喇，啱啱有人教我，唔好貪」
我們一起笑了出來
「唔見你用電話，你有冇上網？」
「我冇㗎，個電話我都唔係好識撳」
「你知唔知啲後生仔用咁多時間上網，到底做緊乜？」
「啲人用好多時間，去做一樣嘢…炫耀自己」
一矢中的
她繼續說：「我覺得好晒時間，你行出嚟係咩樣，人哋有眼睇㗎麻」
「而家好多女仔，網上個樣同行出嚟個樣完全唔同㗎！」
「哈哈，係咪化晒妝影到啲相好靚咁呀？」
「唔單止，佢哋會用電腦執相」
「有咩意思？見到真人嗰陣咪知係假」
「所以啲人愈嚟愈唔敢係現實世界面對人」
她說：「有個實驗，畀三種女仔啲男仔揀
唔化妝:) 、化淡妝^3^ 同化濃妝[369] ，化濃妝嘅女仔係最低分」
「因為太假？」
「可能因為濃妝女仔似唔正經」
「咁最高分呢？」
她回答：「淡妝」
「哈哈，係咪因為唔化妝又太嚇人喇？」
「咁人始終都係鍾意靚嘢嘅，
睇得出你都鍾意靚嘢㗎，如果唔係你都唔坐落嚟」
我又大笑了，今天遇上了幽默哲學大師 [sosad]
「我會將同陌生人傾偈嘅經歷寫低放上網
有一位讀者想我問你，你對生命有咩睇法」
「關於人生嘅意義，每個人都有唔同諗法
去到唔同年紀，又會有唔同體會。特別係去到30歲左右會有好大改變，身邊開始會遇到一啲問題，但冇人幫到你。呢條問題，你有冇叫佢問下自己先？」
「佢問得其他人，相信佢都有自己嘅答案」
「既然佢有自己嘅答案，又洗乜聽我嗰套呢？」
我突然好像覺悟了 :O
「所以你唔會話我聽，亦唔會聽我嘅答案」
她微笑點頭，露出「你明白了」的表情
我很想繼續和她傾計，但工作關係要走了
我說昨天被人拒絕後信心盡失，幸好今天遇到她
她繼續保持著微笑地說：
「冇失敗又點會有成功嘅喜悅呢？」
我拿起餐盤，跟她道別：「希望下次會再喺度見到你，特別係想食雞翼嗰陣，Bye Bye」
我們笑一笑，沒有交換電話，就此告別
我們都是陌路人，在快餐店傾了一場「陌樂偈」
2017-01-02
#45陌樂偈•2017年1月6日 15:24:21
/留名 冇膽做:-(/
第一次真係好驚[sosad]
但我覺得而家個人大膽咗
巴打你都一定做得到嘅
傾完記得上嚟分享返你嘅經歷#good#
/最新呢篇既姐姐唔錯#good#
BTW好好睇
虧巴打你記得D內容 我傾閒偈就好易唔記得 十成九要偷偷地用錄音筆/
個姐姐好有智慧，又有幽默感 😀
同佢傾偈真係好開心
可惜嗰日趕住開工，如果唔係傾多一個鐘都冇問題
我傾完會即刻用電話mark低d重點先
返到去再用電腦再慢慢打
/你係每日都搵一個人傾計？/
係呀～呢個係我嘅目標
希望可以維持到落去
但係我發現，每日同人傾偈都唔係最大問題
每日打一篇長文真係好攰[sosad]
但我又唔想求其打，唯有練習打快啲
而家打文已經落後咗2日進度，點算好[sosad]
唔想愈積愈多 [banghead]
/真人真事#oh#?
如果係都幾得意/
真人真事
我冇咁博學多才，作唔到咁多唔同人嘅經歷同諗法
希望各位巴打都可以試返場「陌樂偈」
再喺度打返出嚟，相信你會有所得著#good#
上一頁
#59浮雲生雞湯•2017年1月6日 21:36:33
我都有試過興起黎場陌樂計，不過全部都無寫低
樓主咁做好好啊，可以等自己再經歷多次段對話#yup#
#66陌樂偈•2017年1月7日 00:43:05
《陌樂偈》第5天－傾場偈竟然有機會做騎師
有想過跟陌生人傾一場偈，就有機會成為騎師嗎？
世間上竟然真的會發生這種事！[yipes]
我今天遇上了一位馬匹訓練員
晚上在屋邨商場內，一間像冒險樂園的店內找目標
我一直想知道，那些遊戲機到底有甚麼魔力
令一班師奶阿叔、公公婆婆，一日玩到黑
場內只有幾位婆婆，呆坐在一部大型Jackpot機旁
面對著老人家，我選用簡單一點的開場白
「Hello，請問呢部機點玩？」
她十分抗拒「我唔玩㗎！你問員工啦」
她前方的位置插著一張積分卡
「呢張卡唔係你㗎？」
她被踢爆了顯得有點驚慌「唔係我嘅」
旁邊另一位婆婆馬上搶了她的卡說：「哦，多謝！」
兩位老友記便開始爭奪那張卡了
我對著眼前陌生的景況，像到了另一個星球
我自知無能力跟外星人溝通，於是我離開了這店
店外站著一位老伯伯，臉帶微笑地望向店內
不知他在打量著各式各樣的遊戲機，還是外星人
對著老人家總是比較易開口「伯伯你等緊人？」
伯伯有點錯愕哋看過來「唔係呀」
「你成日喺度玩㗎？」
伯伯回復笑容「唔係呀，我唔玩㗎，我睇人玩」
伯伯說已經很久沒玩，最多人玩是推銀機
他說很多人整天在玩，是為了把積分賣給人賺錢
原來現在的積分卡很先進，可以卡過卡轉給別人
但積分不能換回現金，只可以用來換超市現金卷
「就算點玩都賺唔到錢㗎，一定輸」他說
「即係啲人唔係為咗贏錢？只係想打發時間？」
「啲人諗住贏㗎！好多人玩到輸成萬蚊㗎！」
我跟你現在一樣，呆了。
「輸咁多錢？咁咪好似賭場咁？」
「根本就係賭場」
「咁你以前最多輸過幾多？」
「輸幾百啦，輸到飲茶錢都冇, 而家唔玩喇」
「你最多見過人輸幾多？」
「呢度個看更阿姐輸到賣咗層樓」
我再一次跟你現在一樣，呆了。
看來剛才遇到的外星人，就是病態賭徒了吧
到底有多少人關注過這個社會問題呢？
「你退咗休幾耐？」
「95年退休，而家80歲」
伯伯看起來只像6-70歲，十分有精神
「嘩！你好健康喎，你以前做邊行㗎？」
「我騎馬㗎」
難得遇到了這麼特別的職業
「騎馬呀～喺邊度騎呀？」
「喺馬會」
「即係…騎賽馬呀？」
「係呀，我係騎馬人，負責訓練啲馬嘅」
我感到十分興奮
「嘩！咁西利～騎住隻馬跑係咩感覺？」
「搖下搖下，會感受到同隻馬一齊跑」
伯伯一邊說，一邊模仿騎馬的動作
「你同時間會訓練幾多隻馬？一隻？」
「十幾隻，我一騎上去就知隻馬幾多班，跑唔跑得」
伯伯表現得十分自豪
「咁你咪知每場邊隻馬跑得最快」
「係㗎～」
「但係你唔可以買馬？」
「我可以買㗎」
「嘩！咁你咪知邊隻馬贏囉」
「唔知㗎～嗱，我知隻馬跑得嘅，佢個頭肯去，
前腳肯去，後腳肯去，你話佢贏唔贏丫？」
我配合著他說：「贏呀」期待著他的反差
「贏？但係佢個背脊唔去呢～」
他展露出別有意思的微笑
我思考了兩秒後，張開了口，慢慢點頭
「造馬」
「所以你都冇得估嘅？」
「係呀，我見邊隻跑得又冷門咪買下，熱門唔買」
我十分好奇地繼續問：「點訓練啲馬？打佢？」
「我唔打馬㗎！餵佢食嘢，慢慢騎到佢聽話」
看得出他對馬匹十分有感情
他補充說：「但有啲人會打，用鎚仔揼都有」
「你同啲馬好好朋友？」
「係呀，同馬講咩語言都通嘅，佢聽得明
好似我哋就講－去！去！外國人就講英文」
他又再模仿騎馬的動作
我聽得十分投入，高興地說：
「我都好鍾意馬，一直都好想學騎馬」
「你幾多歲？」
我說出了自己的歲數
「啊～如果你早一兩年遇到我，我介紹你去做」
「哈哈，做騎馬人？」
「做騎師呀！」他認真地說
我大笑了出來「做騎師！？真係㗎？」
「我契仔本身喺馬會做緊，啱啱去咗外國
你身型就Fit喇，但年紀大咗少少，早兩年就得」
「真係可惜喇，早啲識你就好」
「你可以去做拉馬」
「拉馬？有冇得騎馬㗎？」
「冇，負責清潔馬房、照顧啲馬同拉馬」
「拉佢入閘嗰啲？」
「唔係，拉佢出場，拉入閘嗰啲高好多人工」
「咁拉馬有幾多人工？」
「冇馬跑嘅月份萬六，有馬跑嘅月份四萬幾」
四萬幾！我又一次呆了～
「咁你係做騎馬人係咪搵好多錢㗎？」
「我退休嗰陣每個月萬一蚊」
我聽起來覺得不算很多
他繼續說：「退休金有百幾萬」
「嘩～都唔少錢喎～你做咗幾多年？」
「63年入職，做咗6年拉馬就轉騎馬人
得6個騎馬人訓練所有馬，40幾人爭6個位」
他又再表現出自豪的表情
「你有冇聽過早排有隻馬叫 巴基之星？」
「冇，我而家冇做就冇睇馬喇」
我告訴他「巴基之星 」在網上很紅，由尾跑到最頭
他也分享了一些馬由尾追上來的經歷
我問他為甚麼會有這種後追馬，是性格還是策略
「睇隻馬，有啲馬開頭領先好多，但唔夠力都係冇用
有啲馬係愈跑愈快，跑到尾對後腳伸到去個頭前面」
這次，他在模仿一匹馬
接下來是一系列的「我問佢答」
「你有冇試過受傷？」
「試過跑跑下隻馬自己腳撞腳，我跌咗落嚟
成個人暈咗，到白車嚟先醒，不過冇乜事」
「係咪唔可以企喺馬後面？」
「後面同屁股旁邊都好危險，後面最多踢開你
旁邊打橫踢埋嚟，就乜都冇㗎喇」
「如果我見到一隻馬，要點做先可以同佢做朋友？」
「摸佢頭頂，佢會好舒服㗎～因為佢痕自己R唔到」
「背脊痕佢自己R到咩？」我好像突破了盲點
「哈哈～背脊有人幫佢梳丫麻！」
「你退休嗰陣有冇好唔捨得啲馬？」
「唔會話捨得，都冇得你話唔捨得」
他十分感觸，懷念著以前騎馬的日子
多有趣的陌生人，也有分別的時候
「我要走喇，你成日落嚟呢個商場行？」
「係呀，我冇嘢做日日都落嚟行下」
「希望再見到你，Bye Bye」
「Bye Bye」
我們互相微笑，沒有交換電話，就此告別
回家後，我開始有點後悔，應該留個電話
有空的時候，請他介紹我去做拉馬也不錯
之後幾天，我常常到那個商場，希望碰到他
但我也再沒有遇過這位馬匹訓練員
我們都是陌路人，頂你個肺做乜唔留電話
2017-01-03
#69陌樂偈•2017年1月7日 00:44:37
想方便追看每篇文章，可以去呢度
我會繼續貼喺LIHKG，多謝支持 #hoho#
#91投機人生•2017年1月7日 10:35:25
巴打你好勁，我真心羨慕你有咁既勇氣同恆心#adore#
想問下巴打：
1.你同人傾計時係唔係望實對方講野？
2.對方如果答得你比較hea,眼神又冇點望你時，你會唔會覺得「自己講野唔岩對方」，所以會唔想繼續落去架，如果係，你點堅持落去？
（我見個中學生係你撩佢講野時佢係咁玩電話唔望你，正常人問多兩句可能已取放棄走左，但你能夠堅持落去應該有原因，所以先咁問）
#101陌樂偈•2017年1月7日 11:06:22
/巴打你好勁，我真心羨慕你有咁既勇氣同恆心#adore#
想問下巴打：
1.你同人傾計時係唔係望實對方講野？
2.對方如果答得你比較hea,眼神又冇點望你時，你會唔會覺得「自己講野唔岩對方」，所以會唔想繼續落去架，如果係，你點堅持落去？
（我見個中學生係你撩佢講野時佢係咁玩電話唔望你，正常人問多兩句可能已取放棄走左，但你能夠堅持落去應該有原因，所以先咁問）/
1. 我自己覺得, 間唔中望下人, 間唔中望下其他地方, 係最舒服
2. 見到人冇興趣, 就會試下轉話題
嗰日唔放棄係, 因為我怕冇勇氣再搵下一個目標
#112陌樂偈•2017年1月7日 23:12:27
《陌樂偈》第6天－地下鐵的精神病人
地鐵車箱內，一名男子在自言自語，手指不停指向周圍的人
附近乘客都用奇異的目光看著他，沒有想人靠近，除了我
「Hello」我慢慢向他靠近
他顯得有點驚慌，不停激動地搖手，示意我不要接近他
「唔洗驚，你冇事丫麻？」我說
他急忙地拿出了一張精神病証件給我看，咽泣著說：
「唔好意思呀！我有病㗎！我有覆診有食藥㗎！」
看來他很清楚自己有病，也知道其他人都很害怕他
但他控制不了自己的行為，於是見我走近就馬上道歉
令我想起了一套叫《Memento》的電影
主角有短暫失憶症，他連剛剛發生了甚麼事也會忘記，卻清楚知道自己有這個病
於是他每次遇到陌生人的開場白也是「對不起，我有短暫失憶症」
我本來打算拍一拍他膞頭，使他放鬆一點
突然想起可能會刺激到他，所以把手收回了
我說：「唔緊要，冷靜啲，我想同你傾下偈啫」
「哦～哦～」他開始冷靜下來
為免他太緊張，我保持微笑地問他：「你而家去邊呀？」
「去旺角，我今日放假」
「你平時做咩㗎？」
「我喺庇護工場返工」
「負責做啲乜？」
「畫畫」
「畫啲畫用嚟做咩㗎？」
「畫啲畫送去庇護工場」
我不知道是他說錯了，還是真的有一種工作，是負責在庇護工場畫畫送去庇護工場
「佢哋唔畀我同其他人一齊㗎，要分開我自己一個人畫畫」
我繼續保持微笑地問他「點解嘅？」
「如果有人拍我膞頭，我會一腳踢開佢，我唔鍾意人拍我膞頭」
他馬上把自己的腿功示範了出來，我慶幸著剛才沒有拍他膞頭
他補充：「或者會用手指大大力篤佢個肚！」
看來在交通工具上的阿叔都不喜歡被人拍膞頭，大家要注意！
他又開始用手指指向其他人
我微笑著叫他不要這樣做，會嚇怕別人
他說：「我唔鍾意女人㗎！」
「嗯，但係都唔好指住人，點解你唔鍾意女人？」
「我老婆8年前跳海死咗」他說這句話時出奇的平靜
我同情地說：「你太太過咗身，令你好大刺激，搞到你都有病？」
「唔係，我哋兩個都有病。我細個喺碌㗎床跌落嚟，腦震盪。」
很難想像一對夫婦兩人也有精神問題，生活會有多困難
他突然激動地說「我老婆有病㗎！佢自己跳海死，啲人就以為我害死佢，明明係佢自己跳落去，唔關我事㗎！所以我唔鍾意女人！」
他邊說邊指向其他女人，我微笑著叫他細聲點，不要指向別人
他十分聽話，立即細聲下來
「我知自己有問題㗎，我覺得自己個身體有兩個人，左邊男，右邊女
我唔鍾意多人嘅地方，有時啲人行埋嚟我會好驚」
「咁我頭先行埋嚟有冇嚇親你？」
「冇～但係我成日會覺得其他人望住我，有人想跟蹤我」
「你知道其實冇人跟蹤你，但你又控制唔到自己？」
「係呀～我唔鍾意人哋對住我笑㗎」
我即時收起了一直保持著的笑容
他又補充：「對住我笑同喊我都唔鍾意」
他到站了，比我先下車
你可能會問我，我害怕他嗎？
我不害怕，只感到同情
我明白精神病患者有可能會踢人或用手指篤人個肚
為免受到傷害，一般人不敢靠近他是十分正常的
但我在其他人臉上看到的，不只是害怕，而是厭惡
最近，我看了一套電影叫《一念無明》
戲中由余文樂飾演的主角患了躁鬱症，控制不到自己的情緒
生活十分艱苦， 得不到別人的關心，每天也活在悲傷之中
很多觀眾都看得感動流淚，十分同情這個角色
但在現實生活中，大家對他們的態度為甚麼會截然不同呢？
因為他們不是余文樂？還是因為他們生活在殘酷的現實中？
想像一下，當你不幸患上了精神病，控制不到自己
所有人都討厭你，永遠只能孤獨一人，是怎麼樣的感受？
精神病患者不是壞人，只是不幸的病人
他站在月台，依然隔著「月台與車箱間之空隙」跟我傾偈
我叫他小心一點，不要再指著別人了
車門正在關閉時，他還在努力地向著我說話
看來他很不捨得我這個陌生人，因為平時每個人也無視他
列車開出，我們不知道對方的名字，就此告別
我們都是陌路人，在地下鐵傾了一場「陌樂偈」
2017-01-04
想方便追看每篇文章，可以去呢度
我會繼續貼喺度，多謝支持 #hoho#
#113綠色巨人•2017年1月8日 03:04:34
巴打嘅構思好好
好佩服你可以有勇氣去實踐到
特別係最新嘅精神病患者篇，好有共鳴
每一次見到d人都帶住歧視嘅目光去望住佢地，都會不期然咁覺得好慘:-(
會諗起電影《癲佬正傳》，套戲又係講精神病患者不被了解嘅情況
明明套電影係十幾年前拍嘅，但而家嘅社會居然都仲係對住精神病患者抱有歧視同不了解嘅態度，覺得真係好可悲
#117狂三天使笑聲•2017年1月8日 06:22:36
諗番起前幾日行山
見到有2個女仔係度行但又好似當失左路
之後一直跟到我落山途中冇傾過計…..
唉自己細膽諗番起覺得竟然咁都冇勇氣去傾計
#122似花還似非花•2017年1月9日 02:36:52
精神病人個篇睇到有啲眼濕濕
巴打會唔會專登揀特別啲嘅對象 等人可以消除下對佢地嘅歧視/更加明白佢地？
同埋希望有一日有緣同你傾計 :D:D
#124你以為自己係邊個•2017年1月10日 02:04:56
好有趣既構思:) 應該話，其實呢個世界本身就好有趣，只係太多時候人都被手機吸引，忘記將眼光放返係眼前既事物。欣賞你突破框框之餘，仲將你既經歷寫出黎畀多d人知道#good#
另外見巴打你由一開始好猶豫好細膽，到到連精神病人都勇於接觸，短短一星期既改變都真係幾犀利[sosad]
希望你能夠堅持做&寫落去#yup# 加油
#128小心甩尾呀•2017年1月10日 17:56:47
好睇:) 自己去旅行個陣都會同啲陌生人傾下計，香港就睇場合，通常行山先會。
試過係地鐵車廂同個伯伯傾計，因為佢支行山杖好靚[sosad] ，傾傾下原來佢自己整，仲話冇人約得佢一支公行山，不過最後都係冇留電話就走左。
#130斬大舊叉燒•2017年1月10日 18:15:26
曾經係某間舊茶樓搭枱, 食食下同一對公公婆婆傾計
其實都係傾d好無聊嘅野
間茶樓要出去搶點心, 佢地唔太方便
所有我會幫佢地拎埋, 佢地又會share d俾我一齊食
佢地埋單走果陣我好唔捨得#:)#fs
仲互相祝福對方
明明只係一件好平凡嘅事, 但我記到依家
因為真係感受到果種人情味
我都希望有一日遇到樓主:)
#140豬豬俠•2017年1月11日 12:20:10
支持樓主#like#
真係好有意思
唔好話同陌生人
問心個句 同親人傾計都可能少過自己對住部電話既時間
我自己有時會全日唔用電話 行下山
始終無你咁大膽 敢同陌生人傾計
但我覺得 反而正正對方係唔識 有時更可以打開心扉去傾計.
#144離家出走•2017年1月11日 19:27:01
巴打啲對話幾有趣，反而好好奇你點解你遇到嘅人都咁好傾:O
通常都應該遇到唔係太想傾或者冇咩野講嘅人，就好似個女中學生咁[sosad]
#153陌樂偈•2017年1月14日 23:13:50
各位陌生人:
最近沒有每天出一篇文章, 十分抱歉! #adore#
想不到幾天沒有出現，各位巴絲依然繼續推Post
各位請放心, 我每天也有跟陌生人傾偈
只是工作繁忙, 比較少時間打文章
近日有讀者inbox我追稿, 我感到好笑又快樂
我不是甚麽作家, 陌樂偈前很少寫文章
打字速度慢, 文筆不算好
沒想過會有這麼多人, 喜歡看我和陌生人的對話
有人問我: 到底對話內容是不是真的?
我在此告訴大家, 每一篇都是真實的
那為甚麼我好像每天, 都能夠找到一位比較特別的陌生人呢?
起初我認為是幸運, 最近我想到了真正的原因
其實每個人, 包括我和你, 都是特別的
每個人也有自己的故事, 沒有人是平凡的
只要你願意跟陌生人傾偈
就可以聽到很多有意義的內容
陌樂偈使我重新思考很多事情
希望各位也可以勇敢地試一次
最近收到很多很多鼓勵的說話
也有很多人說我在做一件十分有意義的事
令我非常感動:~( 謝謝你們每一位陌生人的支持! #adore#
陌生人上
PS: 我會盡快追返甩咗嘅稿, 但歡迎繼續追稿