By 戈登探長
原Post: https://lihkg.com/thread/246863/page/1
作為文藝青年，講左咁多文學當然要講埋藝術啦。
呢個Post主要係分享下對藝術嘅睇法
我地到底可以點欣賞一件藝術作品
又以一個咩角度去睇一位藝術家呢 
藝術賞析入門呢個主題之後會提到多位藝術大師
今次打頭陣嘅係集狂人、詩人、情人於一身嘅梵谷 ( Van Gogh )
Van Gogh self-portrait 1889
而係正式講呢個三為一體嘅藝術家之前，我先簡單講下點去睇一件藝術品。
了解脈絡係極其重要
了解脈絡係極其重要
因為好重要所以要講三次。
一、 了解背景
二、 理解思想
三、 感受技法
四、 豐富想像
第一就係盡量去了解藝術家嘅一切，例如時代、家庭，童年等等
要知道所有影響到佢成長、思考嘅野 
第二係理解思想，要去明白藝術家個嗰時期主要想表達嘅係咩，而思想又點樣表現係佢嘅作品上面。
第三係技法，藝術家嘅成長同思想係會直接影響到技法嘅表現
例如用咩形式去表逹作品 (不同顏料、媒介、筆法等等)
第四係要有豐富嘅想像力，設身處地想像藝術家係作畫當時面對緊咩問題，煩惱緊啲咩，享受緊啲咩。 
所以每一部分都係連動下一部分，稱之為脈絡
以上就係理解藝術過程嘅一個簡說 
我希望大家可以了解到藝術並非遙不可及，只要你肯去了解
藝術嘅野，真係可以識佢條鐵架
藝術係香港
係上流社會餘興嘅玩物；少年夢想嘅彼岸地；掩飾世俗化最好嘅包裝紙 但都可以係觸碰靈魂深處嘅窗戶，繁忙都會中嘅桃花源。
然而，呢一切都取決於你觀賞嘅角度。
要知道藝術並唔係遙不可及；遠觀而不能接近
而係在坐各位都可以理解同實踐，感受更深層嘅美。
如果你願意，此地願化作藝術之窗，領你慢游桃花源，靜觀美景。 
每個偉大嘅藝術家都必然係不斷改變
梵谷都一樣，係佢短暫10年作畫生涯入面
主要分為三大時期
今次先講荷蘭時期1880-1886
呢到有一點係關於梵谷背景
你唔會估到
梵谷原來曾經係一個基督信仰傳教士
最主要係受到家庭嘅影響，自細就崇拜做牧師嘅父親
不過佢呢個心最後無被教會理解同接受
個時佢比人派左去礦區傳教
佢大愛到分享哂佢擁有嘅所有物質出去，又同礦工一齊住
日日污糟邋遢，爛身爛世，但佢係實實際際咁行使佢嘅教義
可惜教會唔識欣賞
佢地覺得污糟邋遢會令人唔想接觸上帝，有損形象
但真正污糟邋遢嘅係教會嘅心
呢件事令佢對宗教嘅熱情轉向藝術
藝術可以話係佢對宗教感情嘅延伸
之後都會見到係佢作品入面有信仰嘅影子
可以話信仰係梵谷生命嘅基底
而呢段時期主要係佢學習時期
佢學習主要以巴比松派(The Barbizon School)為主
有盧梭、米勒、朱爾·迪普雷等
特別係早期有好多臨摹米勒嘅素描
巴比松派: 主要係厭倦都市活動，信奉“回歸自然”
佢地反對學院派畫家係室內畫風景畫，主張走出畫室，係自然光之下對景寫生
The Sower, 1881 Van Gogh
The Sower, 1850 Jean-Francois Millet
佢嗰時大半題材都係礦工、農夫、村婦等等
筆觸粗重，色調陰沉
而荷蘭時期最有代表性嘅傑作就係
The Potato Eaters, 1885 Van Gogh
食薯者！
呢幅係佢荷蘭時期集大成嘅傑作
呢到拉返前小小講
梵谷到底點解會開始畫畫？
又點從宗教嘅熱情轉到去畫畫呢
咁就要睇脈絡啦
就由佢家族歷史開始講起
呢個大家族除左盛產牧師之外，仲盛產藝術經紀
有成三個叔伯都係搞藝術經紀嘅生意
當年因為佢老豆無錢比學校住宿費，梵谷只係讀左四年書就輟學
退學之後，十六歲嘅佢就跟左佢叔伯從事藝術經紀
而佢細佬(西奧Theo)之後都入左呢行，更一心志向於此
西奧就係梵谷背後嘅男人，不輪係精神定物質
佢係後面會再出場
梵谷一做就做左五年，但就唔同佢細佬
雖然工作好順利，又加人工又升職，工作上又見識到好多藝術名作，但都滿足唔到佢嘅心
佢明白到佢想追求更遠大嘅野，一種生命根本上嘅野
宗教信仰
於是放棄左份做左五年而且有大好前途嘅藝術經紀
佢仲同自己講要搵份同宗教信仰有關嘅工
之後佢做過志願教師
又去過當地最窮嘅地方傳道
為左得到牧師資格，仲去左阿姆斯特丹讀神學
不過讀左一年考試衰左
但佢無放棄，仲積極爭取做佈道者傳教，最後就係去左礦區傳教。
係佢踢出教會之前
呢到提兩件事
1.當時佢係礦區傳教遇到坑洞崩塌
佢同細佬書信講到佢見到地獄一樣嘅景象，
個環境係有毒嘅空氣，瓦斯爆炸、滲水，坑洞崩塌等等
大家可想而知當時礦區環境有幾惡劣
又要吊落幾百米深嘅礦坑，
又要吸埋啲死人霧霾，
又黑又熱又危險。
佢又形容「大部份嘅礦工單薄瘦弱，蒼白，發著熱病。
他們筋疲力竭，還很年輕就己衰老了。」
呢件事對佢影響好大，特別崩塌後嘅景象同礦工嘅生活情況
更加強化宗教上佢對救贖苦難嘅心
2.當時有啲畫家批評梵谷嘅礦工作品人體比例唔啱
叫佢從基本嘅透視、比例開始練習。
其實梵谷都知佢自己畫得唔標準
但佢覺得跟本無人比佢更明白礦工嘅身體比例
因為經過長年累月工作嘅身體一早就超出正常人嘅比例
呢件事令佢思考到真正想畫嘅並唔係學院派所追求嘅美
而係追求真正有力有靈魂有生命嘅美
外在都只係藝術表演嘅一種形式
其實梵谷嘅經歷係好苦
由小時候對父親嘅崇拜
再到因為對宗教嘅狂熱而放棄大好前途嘅工作
後來讀神學因考試制度阻擋自己奉獻比神
到落礦區傳教奉獻一切
經歷地獄但得唔到接受同認同
表達勞動階層作品又被指導基礎不足
佢經過咁多波折挫敗
否定同失敗
但依然堅持擁抱住狂熱，佢對信仰嘅心係不變。
可見梵谷一生必然為世人奉獻，燃燒生命去擁抱上帝。
佢係行使悲憫同淑世，救贖苦難嘅人。
廣義黎講，佢係世人嘅情人
其實講咁多背景同經歷都係想你理解到梵谷日後藝術風格嘅走向
呢堆經歷更加命定佢係藝術上嘅精神基礎。
(救贖苦難、追求生命藝術、不愛古典學院派技法同思想、堅定嘅信仰)
以上所有所有都係脈絡，都係一步影響一步
少一步都令你對佢嘅作品少一種睇法
所以深層咁睇藝術係要了解佢嘅脈絡、了解佢當時嘅諗法
咁樣就睇到藝術家風格同技法嘅轉變。
呢到我講下梵谷初期嘅素描
主要繪畫主題係煤礦工人、紡織工人、農工
但點解要畫佢地呢
其實係受到當時社會主義影響
要讚揚工人階級，用意消除階級觀念，追求平等尊重。
所以就畫好多工人，表達佢地為社會所負出嘅努力。
可以話係大愛嘅前身。
而影響梵谷好深嘅就係米勒 Jean Francois Millet
可以話係佢嘅男神
米勒擅長描出田園風景嘅詩意，再加上深重莊肅嘅人物
整個氣氛神聖但無距離感
係完美表達出社會主義讚頌工人階級
好幾張作品都有呢一種狀態
當你面對佢嘅時候會不自覺閉住呼吸 
彷彿會打攪到畫入面嘅人一樣。
The Angelus,1859 Jean-François Millet
Les Gleanuses Salon (The Gleaners),1857 Jean-François Millet
咁梵谷就好米勒影響嘅
佢係唔同時期用唔同方式差唔多畫過哂米勒嘅作品
可以睇得出佢有幾鐘意米勒 
咁跟得人多自己都會畫嘅
所以佢係荷蘭時期畫咁多工人
咁下面就開始講下佢呢類素描可以點睇
你見到佢地都有一啲共通點
首先係對象，佢地都係彎腰，工作緊，腳部被異常放大，肩膊比例扭曲
其次係技法，筆觸厚重，剛強有動勢
最後係感受，帶出勞動者沉重、尊嚴、頑強、辛酸苦澀嘅感覺，引申出當時環境對工人嘅壓力，而時代背景又說明係當時推緊社會主義。
可見呢頪素描唔單只記錄工人工作情況，更係對工人一種敬意。
講左咁多素描，係時候講下佢嘅油畫啦
梵谷係1982先開始畫油畫嘅，一開始都有練習下畫石膏像個類
但係以半路出家畫畫嘅佢，跟本畫唔好石膏像
加上佢無辦法去關心無生命嘅石膏像
佢要嘅係真實
係有感覺有思想嘅對像。
所以佢呢段時間佢畫左好多農地嘅風景、農民、工作嘅情況等
以上呢幾幅係佢啱啱開始畫油畫個時其中一啲作品
可以睇到佢係唔畫細節，落筆豪邁，感覺為重
睇到佢同畫素描個時一樣，好鍾意用黑線圍邊
呢到講一下我地畫畫嘅習慣，好多時我地學畫都唔主張用黑線去圍住要畫嘅一件野
因為現實無一樣野係有條線圍住，通常係想強調想表達嘅主體先咁用
但梵谷好鍾意用 
佢成日都圍住所有主體，細節部分都直接用黑線表達，呢一點係影響到佢後期風格嘅一大重點
而佢為左食薯者呢幅畫都做左好多練習同準備
你會見到畫中嘅人物係佢手中已經綀習過無數次
而你仔細睇可以睇到梵谷係技法上嘅脈絡
佢地面部色塊嘅畫法、農民嘅神態、用色都比較樸實
好有個種農民嘅氛圍，唔洗特意講你知佢係邊個佢背景係咩
因為係佢用色、筆觸、構圖已經表達哂
呢個就係長時間同勞動者相處生活觀察而得出嘅一種經驗
係書信上，有指出過梵谷為左食薯者呢幅畫
用左成個冬季淨係練畫手部
而今次要講嘅係之前提過嘅”食薯者”
食薯者係梵谷長時間觀察勞動者所得嘅一個總結
佢係同細佬書信當中曾經講過呢幅畫係佢得意之作，
而且仲講出佢想表達嘅係咩
「我想傳達的觀點是，借着一個油燈的光線，吃馬鈴薯的人用他們同一雙在土地上工作的手從盤子裡抓起馬鈴薯－ 他們誠實地自食其力」
係呢句句子入面其實包含住好多層脈絡
你地可以諗返之前講過嘅脈絡去再睇呢幅畫
先睇下成品前嘅草圖同練習
你會見到係一步步咁向前
先從第一張概念草圖定左農民坐埋一齊食薯仔，氣氛暗沉，用一盞燈，一隻碟去做連結
之後第二張見到上左色，主調深沉，加上光影，傢俬構圖佈置
再到第三張比較完成，再加入一個人，
人與人之間嘅角色關係構圖建立，而關係帶動觀者視點移動
光影佈置更完整，傢俬加上有宗教意味嘅掛畫
你咁樣去睇就更清楚呢幅畫嘅重點同Van Gogh想你睇咩，佢想帶出啲咩意思
最後就係成品
先從技法上睇，作品主體嘅筆觸粗糙，短促，強硬，
特別係受光面嘅表現同外形嘅勾勒
高光位嘅表達方法更係強硬霸道
溫和漸變意圖唔強，經常會見到色塊明度對比強烈嘅情況，會令你嘅視線停留
呢個係梵谷常用嘅技巧
就好似畫中人嘅面部同手部
用呢種畫法表現得特別強硬，有力
刻意令你去觀察乾瘦且佈滿皺紋嘅農民，
感受佢地嘅辛勞，生活當中嘅簡樸踏實
受光面: 畫面受光嘅部分
高光位:受光剖分入最光嘅位置
明度:色調明暗程度，白色名度最高，黑色最低
整體深沉，墨綠泥綠，灰樸主調，背景用色稀薄淺淡，襯托前景嘅主體形象
利用光影嘅明暗去特別強調農民嘅面同手部，
呢間暗沉嘅房間，特別能夠帶出個種窮困嘅生活感，用大量大地嘅顏色(土黃泥綠)去營造農民生活嘅真實情況。
農民係呢個壓抑嘅生活之下，梵谷見到嘅唔係絕望，而係對生命有真實感嘅一種感情，環境壓抑、人之間嘅溫暖
農民之間係實實在在咁生存，食自己種嘅薯仔、飲黑咖啡，日復日。
梵谷唔單只同米勒一樣咁對勞動者保持敬意；讚頌工人階級
佢仲以一個宗教角度去睇呢班辛勞苦悶嘅人，以救贖苦難嘅心去對待。
靜觀生命之間嘅關係。
借食薯者講多少少概念
呢幅畫有五個人，四個係有樣貌而且之間係有相連關連互動
唯獨係一個女孩無樣睇，一個人默默地食薯仔
點解畫家要畫呢個對比嘅情況出黎
到底梵谷想係呢個位到話你知啲咩呢
係睇作品嘅時候，我地要成日諗下點解個畫家要咁安排呢
佢用意係咩呢
對於佢黎講，呢隻色呢件物品呢個構圖係代表咩呢
經過了解畫家嘅脈絡後
你可以從中作出一啲合理嘅推測，再自己去解讀作品。
好似幅食薯者咁
先講正面四位農民先，我地左邊數起係(一)至(四)。
佢地之間係有相互關係，你可以睇到(二)隻手係吉緊薯仔，而眼係望緊(一)
呢到存在住一種關係，一種構圖上嘅帶動
佢可以令觀者視線從(二)嘅眼帶動去(一)嘅面容再到返(一)嘅手。
你可能會問睇畫咪睇畫囉，點解要有咁多野，我點睇你可以控制到咩
我係鍾意打個交叉咁睇呀XXXX
當然可以，當刻意去意識呢件事去睇嘅時候，就唔存在咩帶動視點。
個重點係個”引導”，佢一定唔能夠控制你點睇，但佢會引導你
其實呢種係畫家刻意安排嘅動作
目的就係令觀者視線可以跟住畫家嘅安排去睇
可以跟安排順序去遊覽成幅作品，跟住順序去感受。
如果再入一層去睇，就係睇個畫家有無駕馭能力
係唔係四方八面都駕馭到
駕馭畫面嘅能力有無遍佈成張畫
[插曲]
膚淺既小弟想了解更多藝術
巴打指欣賞藝術必須了解脈絡
但要知咁多野先識欣賞佢既作品
咁作品本身仲係咪咁值得欣賞呢？就當一幅你從未睇過既畫
你唔知作者係邊個
當然更唔知咩脈絡
或者你會覺得作品好普通
要了解左咁多野先覺得靚
咁係咪真既靚呢？除左啲業界公認大師
現實好多時無乜機會俾你認識作者咁多野
咁啲大師又點成為大師?
關於第一個問題
重點在於作品撇除背後所有含意後，到底仲有咩可以欣賞呢？
答案係美，藝術離不開美。不論係視覺上定係意義上
你可以睇到作品技巧上嘅美，用色、構圖、筆觸等，呢啲都係視覺上嘅享受
比如去睇大型藝術展，入面會有你未了解過嘅藝術品，但你又會比他深深吸引住，當下只有覺得有種力係作品入面，你未去睇清佢嘅技法，未去了解佢嘅脈絡，但都會停係到睇，呢種咁純粹嘅感覺就係美學，純粹嘅欣賞。
至於第二條問題
當一件作品抹除所有含意，佢係造型上好普通，咁件作品又係咪真係有佢原來嘅價值呢？
呢到拉返出小小講，
首先要知道藝術分好多種類，表演藝術、視覺藝術、文學藝術等等
而當中有好多類別嘅核心係美感
比如繪畫、雕塑、音樂、舞蹈、戲劇
呢頪係佢抹除所有含義後都會有一定程度嘅美感存在
但亦都有相反嘅情況，比如觀念藝術、裝置藝術、互動藝術等等
呢類藝術形式反而核心在於思想、背後意義、作品過程、脈絡等
抹除佢背後一切嘅意味就等於這件作品不是一件完成嘅作品
就好似當年經典 杜象 嘅(噴泉 Fountain)
呢件野本身只係一個尿兜，仲要係現成係工廠直接買，係一件現成物，之後杜象係上面簽左個名，幫佢改作品名噴泉 Fountain，就話佢係藝術品。
佢就係要一件日常用品升格為藝術品，特別係呢件作品本身係一件不雅物，通過改名同簽名呢個行為去改變一件物品嘅意義同性質，令佢變成藝術品。咁到底佢可唔可以出展覽呢？
最後係唔可以，當時有兩個確切理由
該物是不道德且粗俗的。
該物涉嫌抄襲，所做的只是拿了一個普通的小便斗。
但正正展覽主辦品位拒絕呢件作品，令到呢件作品完整。
到底呢個只係多個簽名而又改左名嘅現成物尿兜，係唔係藝術品呢？
呢個連返去第一個問題，咁杜象呢件作品係唔知脈絡嘅情況下仲值唔值得欣賞呢？
答案係唔值得，因為呢類作品無左背後嘅思想就無左佢嘅價值。
無思想嘅噴泉，只係一件工廠出產嘅尿兜。
所以但當你再去了解埋作品嘅脈絡，帶出嘅意味、作品嘅過程
你可以係入面感受到多一層感覺
至於大師點成為大師，呢點最主要經時間去證明，仲有創新美感思想手法等等好多原因，之後會係藝術家嘅總結再講下
[/插曲]
[Admin]追到#50
more can be found at > https://lihkg.com/thread/246863/page/3